Jéhovah ayeke be-ta-zo nga lo yeke pardone azo

1, 2. (a) Ngbanga ti nyen e ye mingi akamarade so ayeke be-ta-zo nga ayeke pardone azo? (b) Ahundango ndo wa e yeke sara tënë na ndo ni na yâ ti article so?

TÂ KAMARADE ayeke sara ye tongana nyen? Ashley, mbeni ita-wali, atene so tâ kamarade ayeke mbeni zo so ayeke lakue nduru ti mû maboko na mo nga lo yeke pardone mo na ngoi so mo sara afaute. E kue e ye mara ti akamarade tongaso mingi. Ala yeke mû maboko na e ti tene e duti nzoni nga e hinga so a ndoye e.​—aProv. 17:17.

² Na popo ti akamarade kue so e lingbi ti wara, Jéhovah la ayeke be-ta-zo nga ayeke nduru ti pardone azo ahon atanga ni kue. Mbeni zo ti sungo psaume asara tënë ti lo, a tene: “Mo, Seigneur, Mo yeke nzoni, na Mo ye ti pardone, na nzobe ti Mo ayeke kota teti ala so atoto na Mo.” (Ps. 86:5). Ti duti be-ta-zo nga ti pardone azo aye ti tene nyen? Na lege wa Jéhovah afa so lo yeke na apendere sarango ye so? E lingbi ti sara nyen ti mû tapande ti lo? Tongana e hinga akiringo tënë na ahundango ndo so, e yeke kiri ti ndoye Jéhovah, kota Kamarade ti e mingi. E yeke duti nga na kpengba songo ti kamarade na aita ti e.​—1 Jean 4:7, 8.

JÉHOVAH AYEKE BE-TA-ZO

3. Ti duti be-ta-zo aye ti tene nyen?

³ Zo so ayeke be-ta-zo ayeke mbeni zo so angbâ lakue na tere ti mbeni zo so lo ye lo. Lo fa so lo ye mba ti lo na lege so lo yeke ngbâ ti mû maboko na lo. Lo yeke ye mba ti lo ni gi pëpe na ngoi so aye atambela nzoni me nga na angoi ti ngangu. Biani, Jéhovah la ayeke “be-ta-zo” ahon tanga ti azo kue.​—Apoc. 16:5.

4, 5. (a) Na lege wa Jéhovah afa so lo yeke be-ta-zo? (b) Na lege wa gbungo li na ndo ti alege so Jéhovah afa so lo yeke be-ta-zo ayeke mû ngangu na e?

⁴ Na lege wa Jéhovah afa so lo yeke be-ta-zo? Na lege so lo zia awakua be-ta-zo ti lo lâ oko pëpe. Gbia David, mbeni oko ti awakua be-ta-zo ti lo, afa so Jéhovah ayeke be-ta-zo, lo tene: “Zo so ayeke be-ta-zo, mo yeke be-ta-zo na lo.” (2 Sam. 22:26, FD). Na ngoi so David awara akpale, Jéhovah angbâ ti fa lege na lo, ti bata lo nga ti sö lo (2 Sam. 22:1). David ahinga so Jéhovah atene pëpe gi na yanga so lo yeke be-ta-zo. Ngbanga ti nyen Jéhovah angbâ be-ta-zo na David? Ngbanga ti so David wani ayeke mbeni “zo so ayeke be-ta-zo.” Jéhovah aye awakua ti lo ndali ti so ala yeke be-ta-zo, nga lo yeke be-ta-zo na azo so ayeke be-ta-zo na lo.​—aProv. 2:6-8.

⁵ Tongana e gbu li na ndo ti alege so Jéhovah afa so lo yeke be-ta-zo na awakua ti lo, a yeke mû ngangu na e. Reed, mbeni ita-koli so ayeke be-ta-zo, atene so lo ye mingi ti diko mbaï so afa tongana nyen Jéhovah amû maboko na David na yâ ti akpale. Lo tene: “Même na angoi so David ayeke kpe, lo yeke lango na yâ ti adü ti tênë nde nde, Jéhovah amû ngangu na lo lakue. Ye so amû ngangu na mbi mingi! A dabe ti mbi so atâa ye ni ayeke tongana nyen, wala kpale ni ayeke tongana nyen, Jéhovah ayeke na tere ti mbi na ngoi kue so mbi ngbâ be-ta-zo na lo.” Kite ayeke pëpe so tënë ti bê ti mo nga kue ayeke tongaso.​—aRom. 8:38, 39.

6. Na ambeni lege wa Jéhovah afa so lo yeke be-ta-zo? Tongana nyen la ye so aga na ye ti nzoni na awakua ti lo?

⁶ Na ambeni lege wa Jéhovah afa so lo yeke be-ta-zo? Mbeni lege ni ayeke so lo yeke sara ye lakue alingbi na andia ti lo. Lo tene: “Même juska i ga mbakoro, Mbi yeke”. (És. 46:4). Lo yeke mû lakue adesizion alingbi na andia ti lo na ndo ti ye so ayeke mbilimbili na ti so ayeke sioni, nga andia ti lo achangé pëpe (Mal. 3:6). Jéhovah afa nga so lo yeke be-ta-zo na lege so lo yeke sara lakue ye so lo mû zendo ni (És. 55:11). Dutingo be-ta-zo ti Jéhovah aga na aye ti nzoni na awakua be-ta-zo ti lo kue. Tongana nyen? Tongana e sara ngangu ti sara ye alingbi na andia ti Jéhovah, e hinga biani so lo yeke ngbâ ti sara ye alingbi na zendo ti lo ti iri tënë nzoni na ndo ti e.​—És. 48:17, 18.

MÛ TAPANDE TI JÉHOVAH SO AYEKE BE-TA-ZO

7. Fa mbeni lege so e lingbi ti mû tapande ti Jéhovah so ayeke be-ta-zo.

⁷ Na lege wa e lingbi ti mû tapande ti Jéhovah so ayeke be-ta-zo? Mbeni lege ni ayeke ti sara ye ti nzoni na azo so ayeke na yâ ti kpale (aProv. 3:27). Na tapande, mo hinga mbeni ita so bê ti lo anze, peut-être ndali ti kpale ti seni, awokongo ti lo wala ndali ti so azo ti sewa ti lo akanga lege na lo? Mo lingbi ti kpengba lo na ‘nzoni tënë nga na tënë ti lungula vundu.’ (Zach. 1:13).a Tongana mo sara ni, mo yeke fa so mo yeke tâ kamarade so ayeke be-ta-zo, mbeni zo so ayeke ‘nduru na zo ahon ita ti lo.’​—aProv. 18:24.

8. Na lege wa e lingbi ti sara ye tongana Jéhovah so ayeke be-ta-zo, na tapande, na yâ ti mariage?

⁸ E lingbi nga ti sara ye tongana Jéhovah so ayeke be-ta-zo na ngbango be-ta-zo na azo so e ye ala. Na tapande, tongana e sara mariage awe, e hinga so a lingbi e ngbâ be-ta-zo na koli wala wali ti e (aProv. 5:15-18). Tongaso, e yeke sara ye mingi ahon gi ti kpe lango-sioni. E yeke kpe ti sara ye kue so alingbi ti gue na e ti sara lango-sioni (Mat. 5:28). Nga, e yeke fa so e yeke be-ta-zo na aita ti e na lege so e yeke tene pëpe asioni tënë wala amvene na ndo ti ala. E yeke ke même ti mä mara ti atënë tongaso.​—aProv. 12:18.

9, 10. (a) Zo wa mbilimbili la e ye ti ngbâ be-ta-zo na lo? (b) Ngbanga ti nyen sarango ye alingbi na acommandement ti Jéhovah ayeke lakue kete ye pëpe?

⁹ E ye mbilimbili ti ngbâ be-ta-zo na Jéhovah. E yeke sara ni tongana nyen? Na lege so e yeke sara ngangu ti bâ aye tongana ti so Jéhovah ayeke bâ na ni, e ye aye so lo ye nga e ke aye so lo ke, nga e yeke sara ye alingbi na ni. (Diko Psaume 97:10.) Tongana e gi mingi ti sara si apensé ti e nga na atënë ti bê ti e ague oko na ti Jéhovah, e yeke duti nduru ti sara ye alingbi na acommandement ti lo.​—Ps. 119:104.

¹⁰ Biani, a yeke lakue kete ye pëpe ti sara ye alingbi na acommandement ti Jéhovah. A lingbi e sara ngangu ti ngbâ be-ta-zo na lo. Na tapande, ambeni ita so ayeke kumbamba aye ti sara mariage, me ade ala wara pëpe mbeni koli wala wali so ala ye ti sara mariage na lo na popo ti awakua ti Jéhovah (1 aCor. 7:39). Mbeni ita-wali alingbi ti bâ so amba ti lo ti place ti kua so ayeke aTémoin pëpe ayeke gi lakue ti pusu lo ti tï mbeni koli. Na oko ngoi ni, ita-wali ni alingbi ti bâ so lo yeke gi lo oko. Me lo sara kue ti ngbâ be-ta-zo na Jéhovah. A-Chrétien so ayeke tongana ita-wali so ayeke anzoni tapande ti dutingo be-ta-zo. Jéhovah ayeke iri tënë nzoni na ndo ti azo kue so angbâ ti sara na lo na bê ti ala kue na yâ ti angoi ti ngangu.​—aHéb. 11:6.

JÉHOVAH AYEKE PARDONE AZO

11. Zo so ayeke pardone azo ayeke sara ye tongana nyen?

¹¹ Pardon ayeke mbeni pendere sarango ye ti tere ti Jéhovah. Zo so ayeke pardone azo ayeke sara ye tongana nyen? Zo so ayeke pardone azo ayeke sara ngonzo pëpe na tere ti azo ndali ti mbeni ye so ala sara na lo. Ye so aye pëpe ti tene so lo yeda na ye so ala sara wala lo kanga lê na ndo ni na tenengo so ye ni so asi lâ oko pëpe. Me lo ye pëpe ti sara ngonzo. Bible afa so Jéhovah “[a]ye ti pardone” azo so achangé bê ti ala biani.​—Ps. 86:5.

12. (a) Na lege wa Jéhovah afa so lo yeke pardone azo? (b) Ti “mbô” asiokpari ti mbeni zo aye ti tene nyen?

¹² Na lege wa Jéhovah afa so lo yeke pardone azo? Bible atene so Jéhovah ayeke pardone zo “kue.” Ye so aye ti tene so lo yeke pardone kue kue kue nga biani biani (És. 55:7). E hinga tongana nyen so Jéhovah ayeke pardone kue kue kue? Gbu li na ndo ti tënë so ayeke na Kusala 3:19. (Diko ni.) Bazengele Pierre awa awamango lo ti “changé bê ti ala” nga ti “changé lege ti ala”. Tongana mbeni zo so asara siokpari achangé bê ti lo biani, lo yeke sara vundu mingi ndali ti ye ti sioni so lo sara. Lo yeke sara nga kue ti kiri ti sara ye ti sioni ni so pëpe (2 aCor. 7:10, 11). Nga, tongana zo achangé bê ti lo biani, a yeke pusu lo ti “changé lege” ti lo na lege so lo yeke zia sioni sarango ye ti lo nga lo yeke gi ti sara ye so anzere na Nzapa. Tongana azo so amä Pierre lani achangé bê ti ala biani, nyen la ayeke si na pekoni? Pierre atene so a yeke “mbô” asiokpari ti ala. Ti “mbô” mbeni ye aye ti tene ti zi ye ni, wala ti sara si ye ni aduti dä mbeni pëpe. Tongaso tongana Jéhovah apardone siokpari ti e, a yeke mo bâ mo tene lo mû mbeni chiffon si lo effacé na lê ti ardoise. Lo yeke pardone kue kue kue.​—aHéb. 10:22; 1 Jean 1:7.

13. So Jéhovah atene “Mbi dabe Mbi na siokpari ti ala mbeni pëpe”, a fa nyen na e na ndo ti lo?

¹³ E hinga tongana nyen so Jéhovah ayeke pardone biani biani? E hinga ni na lege ti mbeni tënë so lo tene na Jérémie na yâ ti mbeni prophétie so andu aChrétien so a soro ala ti gue na yayu. (Diko Jérémie 31:34.) Jéhovah atene: “Fade Mbi pardone sioye ti ala, na Mbi dabe Mbi na siokpari ti ala mbeni pëpe.” Tongaso, tongana Jéhovah apardone asiokpari ti e awe, lo yeke ngbâ ti pensé na ndo ni pëpe ti tene lo bi tënë na li ti e wala lo kiri lo punir e ndali ni. Lo yeke pardone e biani biani.​—aRom. 4:7, 8.

14. Ngbanga ti nyen e yeke wara dengo bê tongana e hinga so Jéhovah ayeke pardone azo? Fa mbeni tapande.

¹⁴ Tongana e hinga so Jéhovah ayeke pardone azo, a yeke sara si e wara dengo bê. Zia e bâ mbeni tapande ti mbeni ita-wali so e iri lo Elaine. Bungbi abi lo na gigi asara ngu mingi awe. Angu mingi na pekoni, a kiri na lo na bungbi. Atâa so kue, Elaine atene so lo mä na bê kue pëpe so Jéhovah apardone lo awe. Lo pensé so Jéhovah andoye amba ti lo mingi ahon lo. Ye oko, Elaine awara dengo bê na ngoi so lo ga ti bâ tongana nyen Bible afa Jéhovah tongana zo so ayeke pardone azo. Na tapande, lo diko na yâ ti Bible so tongana Jéhovah apardone e, a yeke mo bâ mo tene lo sukula asiokpari ti e na tere ti e. E yeke pëpe na bezoin ti sara vundu ndali ni na yâ ti tanga ti gigi ti e kue.b Elaine akiri atene: “Mbi bâ lani so Jéhovah alingbi ti pardone asiokpari ti mbi kue ape, nga mbi pensé so asiokpari ni ayeke ne mbi na yâ ti tanga ti gigi ti mbi kue. Fadeso mbi hinga so a yeke mû ande ngoi, me mbi komanse ti bâ so mbi lingbi biani ti duti na kpengba songo na Jéhovah, nga mbi bâ so a zi mbeni nengo kungba na ndo ti mbi.” Jéhovah ayeke biani Nzapa so ayeke sara ye na ndoye nga lo yeke pardone azo!​—Ps. 103:9.

MÛ TAPANDE TI JÉHOVAH SO AYEKE PARDONE AZO

15. Tongana nyen la e lingbi ti mû tapande ti Jéhovah so ayeke pardone azo?

¹⁵ E lingbi ti mû tapande ti Jéhovah so ayeke pardone azo na lege so e yeke pardone azo. (Diko Luc 17:3, 4.) Dabe ti mo so tongana Jéhovah apardone e, lo yeke ngbâ ti pensé na ndo ti ye so e sara so pëpe. Tongana e pardone amba ti e, e nga kue e yeke zia ti pensé na ndo ti ye so ala sara na e nga e yeke kiri ti sara tënë ti afaute ti ala ni mbeni lâ pëpe.

16. (a) Ti pardone azo aye ti tene so e yeda na ye ti sioni so ala sara wala e ye ti tene ala buba e? Fa ndani. (b) Nyen la a lingbi e sara tongana e ye ti tene Nzapa apardone e?

¹⁶ Ti pardone azo aye pëpe ti tene so e yeda na ye ti sioni so ala sara wala e ye ti tene ala buba e. Ên-ën. A ye ti tene so e soro ti bata tënë na bê pëpe. A yeke nga kota ye ti dabe ti e so tongana e ye ti tene Jéhovah apardone e, a lingbi e pardone amba ti e (Mat. 6:14, 15). Jéhovah adabe ti lo so “e yeke pupu-sese.” Lo hinga so siokpari ayeke na tere ti e (Ps. 103:14). Ni la, tongana azo atene mbeni tënë wala ala sara mbeni ye so ason e, a lingbi e dabe ti e so ala nga kue siokpari ayeke na tere ti ala tongana ti e, nga a lingbi e pardone ala na bê ti e kue.​—aÉph. 4:32; aCol. 3:13.

17. Nyen la alingbi ti mû maboko na e tongana mbeni ita ason bê ti e?

¹⁷ Tâ tënë, a yeke lakue kete ye pëpe ti pardone azo. Même ambeni Chrétien so a soro ala ti gue na yayu na ngoi ti akozo Chrétien ayeke na bezoin ti tene a mû maboko na ala ti leke akpale na popo ti ala (aPhil. 4:2). Tongana mbeni ita ason bê ti e, nyen la alingbi ti mû maboko na e ti pardone lo? Gbu li na ndo ti ye so asi na Job. Eliphaz, Bildad na Tsophar atene so ala yeke akamarade ti Job. Me ala zonga lo nga ala tene so lo sara aye ti sioni. Vundu agbû Job ngangu (Job 42:7-9). Na nda ni, Jéhovah atene na akoli so ye so ala sara so ayeke na lege ni pëpe na lo hunda na ala ti gue na mbage ti Job nga ti mû sandaga ndali ti asiokpari ti ala (Job 42:7-9). Me Jéhovah ahunda nga na Job ti sara mbeni ye. Lo hunda na lo ti sara nyen? Lo hunda na Job ti sambela ndali ti akoli so. Job asara tongana ti so Jéhovah ahunda na lo, nga Jéhovah airi tënë nzoni na ndo ti lo ndali ti so lo yeke na bibe ti pardonengo azo. (Diko Job 42:10, 12, 16, 17.) Ye so afa nyen na e? Ti sambela na bê ti e kue ndali ti mbeni zo so ason bê ti e alingbi ti mû maboko na e ti bata tënë na bê pëpe.

NGBÂ TI BÂ NA NENE NI ASARANGO YE TI TERE TI JÉHOVAH

18, 19. Nyen la e ye ti ngbâ ti sara?

¹⁸ Anzere na e ti manda ye mingi na ndo ti asarango ye ti tere ti Jéhovah. E manda so zo alingbi ti ga nduru na lo, lo sara kangbi na popo ti azo pëpe, lo mû ye mingi na zo, lo yeke sara ye alingbi na dutingo ti zo oko oko, lo yeke be-ta-zo, nga lo yeke pardone azo. Tâ tënë, aye mingi angbâ ti tene e hinga na ndo ti Jéhovah. E yeke duti ande na ngia ti manda aye mingi na ndo ti lo teti lakue lakue (Zo-ti. 3:11). Tënë ti bê ti e ague oko na ti bazengele Paul so atene: “Bâ, tongana nyen mosoro ti Nzapa, ndara ti lo na hingango ye ti lo ayeke kota!” E lingbi ti tene nga oko tënë so na ndo ti ndoye ti Nzapa nga na ambeni sarango ye ti lo omene so e bâ na yâ ti a-article so.​—aRom. 11:33.

¹⁹ Zia e kue e ngbâ ti gi ti hinga ye mingi na ndo ti asarango ye ti tere ti Jéhovah, e gbu li na ndo ni nga e gi ti sara ye alingbi na ni na yâ ti fini ti e (aÉph. 5:1). Tongana e sara ni, e yeke kiri ti ye Jéhovah mingi nga songo ti e na lo ayeke kpengba ahon ti kozo. Tënë ti bê ti e ayeke gue tâ oko na ti zo ti sungo psaume so ahe bia, a tene: “A yeke nzoni na mbi ti ga nduru na Nzapa.”​—Ps. 73:28.