“Ala sara na Jéhovah tongana angbâa”

1. Nyen la azo mingi ayeke pensé na ndo ti angbâa? Na lege wa ngbâa so aRomain 12:11 asara tënë ni ayeke ti lo nde?

DUTINGO ngbâa ti aChrétien ayeke nde mingi na ye so azo mingi ayeke pensé na ndo ti angbâa. Na li ti ala, ngbâa ayeke mbeni zo so maître ti lo ayeke komande na ndo ti lo na ngangu, ayeke sara lo pasi nga ayeke sara ye na lo na lege ni ape. Me Bible atene so mbeni Chrétien alingbi ti soro ti duti ngbâa ti mbeni Maître so ayeke sara ye na ndoye. Ni la, tongana bazengele Paul awa akozo Chrétien ti “sara na Jéhovah tongana angbâa”, lo ye ti fa na ala so ayeke nzoni ndoye so ala yeke na ni na mbage ti Nzapa la apusu ala ti sara na lo (aRom. 12:11). Ti duti ngbâa ti Jéhovah aye ti tene nyen? Nyen la e lingbi ti sara ti duti pëpe ngbâa ti Satan nga na ti dunia ti lo? Ye ti nzoni wa mbeni ngbâa ti Jéhovah so ayeke be-ta-zo na lo ayeke wara?

“MBI NDOYE MVENI TI MBI”

2. (a) Ngbanga ti nyen na Israël mbeni ngbâa alingbi ti soro ti ngbâ tongana ngbâa? (b) Tongana mbeni ngbâa ayeda si a koro mê ti lo, a ye ti fa nyen?

² Ndia so Nzapa amû na amolenge ti Israël amû maboko na e ti hinga ye so dutingo ngbâa ti Jéhovah aye ti tene. Tongana mbeni ngbâa so ayeke Hébreu asara kua na maître ti lo ngu omene awe, na ngu mbasambala ni a lingbi a zi lo (Ex. 21:2). Me tongana ngbâa ni aye biani maître ti lo na lo ye ti hon ape, lo lingbi ti ngbâ. Ndia ti Jéhovah ayeda na ni. Maître ti lo ni ayeke ga na lo na tere ti yanga-da na lo yeke koro mê ti ngbâa ni (Ex. 21:5, 6). Ngbanga ti nyen a lingbi a koro mê ti lo? Na yanga ti Hébreu, mango yanga aye ti tene ti mä tënë nga ti dengi mê na tënë ni. Tongaso, tongana a koro mê ti mbeni ngbâa, a fa so lo ye ti ngbâ ti sara ye so maître ti lo ahunda na lo ti sara. Ye so ague oko na mungo tere ti e so e mû na Jéhovah. Na ngoi so e mû tere ti e na Jéhovah, e fa so e yeda ti mä yanga ti lo ndali ti so e ndoye lo.

3. Nyen la apusu e ti mû tere ti e na Nzapa?

³ Kozoni si e wara batême, e mû desizion ti sara na Jéhovah, wala ti duti ngbâa ti lo. Na ngoi so e mû tere ti e na Jéhovah, e tene na lo so e ye ti mä yanga ti lo nga ti sara ye so lo ye. A yeke mbeni zo la agbu e na ngangu pëpe ti sara ni. Même tongana a yeke mbeni maseka la awara batême, lo sara ni pëpe ti nzere na babâ na mama ti lo, me lo sara ni ndali ti so lo wani la lo ye ti mû tere ti lo na Nzapa. Ndoye so e a-Chrétien e yeke na ni na mbage ti Jéhovah, Maître ti e so ayeke na yayu, la apusu e ti mû tere ti e na lo. Bazengele Jean atene: “Ndoye ti Nzapa ayeke so: e bata acommandement ti lo.”​—1 Jean 5:3.

E YEKE NA LIBERTÉ, ME E YEKE ANGBÂA

4. Nyen la a lingbi e sara ti ga “angbâa ti mbilimbili”?

⁴ E mû merci mingi na Nzapa so lo mû na e aye so e yeke na bezoin ni ti duti angbâa ti lo. Mabe so e yeke na ni na ngere so Christ afuta ti zi e amû lege na e ti sigigi na gbe ti ngbâa ti siokpari. Ye so aye ti tene so atâa so siokpari ayeke na tere ti e, e soro ti duti na gbe ti komandema ti Jéhovah na Jésus. Paul afa ni polele na yâ ti mbeni lettre ti lo, lo tene: “Zia ala bâ tere ti ala so ala kui awe na lege ti siokpari, me ala yeke duti na fini teti Nzapa na lege ti Christ Jésus.” Na pekoni lo mû wango, lo tene: “Ala hinga pëpe so tongana ala ngbâ ti fa tere ti ala na mbeni zo tongana angbâa ti mä yanga ti lo, ala yeke angbâa ti lo ngbanga ti so ala mä yanga ti lo? Tongana ala yeke angbâa ti siokpari, a yeke ti si na kuâ, na tongana ala yeke angbâa ti mango yanga, a yeke ti si na mbilimbili. Me singila na Nzapa so ala yeke lani angbâa ti siokpari, me ala ga azo so ayeda na bê ti ala kue na mara ti fango ye so a zia na maboko ti ala. Biani, teti so a zi ala na gbe ti siokpari awe, ala ga angbâa ti mbilimbili.” (aRom. 6:11, 16-18). Bâ so bazengele Paul atene so a lingbi e duti “azo so ayeda na bê ti ala kue” na ye so a fa na e. Ni la, mungo tere ti e so e mû na Jéhovah asara si e ga “angbâa ti mbilimbili.”

5. Nyen la a lingbi e tiri lakue na ni? Ngbanga ti nyen?

⁵ Me ambeni ye ayeke dä so a lingbi e hon ndo ni si e ngbâ ti sara ye alingbi na mungo tere ti e so e mû na Nzapa. A yeke aye use. Kozoni, a yeke bira so Paul atingbi na ni. Lo tene: “Na yâ ti bê ti mbi, mbi wara ngia biani na yâ ti ndia ti Nzapa, me mbi bâ na yâ ti amembre ti tere ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti tere ti mbi.” (aRom. 7:22, 23). E nga kue e yeke azo so siokpari ayeke na tere ti e. Tongaso, a lingbi e tiri lakue na anzara ti e ti mitele. Bazengele Pierre amû wango na e, lo tene: “Ala sara ye tongana azo so a zi ala awe, me zia si ala duti na liberté ti ala ni pëpe tongana mbeni ye ti honde ndo ti sioni, me tongana angbâa ti Nzapa.”​—1 Pi. 2:16.

6, 7. Tongana nyen la Satan asara si aye ti dunia so aga mbeni ye so agboto lê ti zo?

⁶ Use bira ni, a yeke bira so e yeke tiri na dunia so ayeke na gbe ti ngangu ti asioni yingo. Satan, so ayeke mokonzi ti dunia so, ayeke sara kua na aye ti bira ti lo kue ti gi ti sara si e ngbâ be-ta-zo pëpe na Jéhovah nga na Jésus. Satan aye ti sara si e ga angbâa ti lo na lege so lo yeke gi ti handa e ti mû mbage ti e na yâ ti aye ti dunia ti lo. (Diko aÉphésien 6:11, 12.) Mbeni lege so Satan ayeke sara na ni ayeke so lo mû aye so ayeke na yâ ti dunia ti lo, lo sara ni na mbeni fason so agboto lê ti zo ngangu. Bazengele Jean atene: “Tongana mbeni zo andoye dunia so, ndoye ti Babâ ni ayeke na yâ ti lo pëpe, ngbanga ti so ye kue so ayeke na yâ ti dunia so, so ti tene nzara ti mitele, nzara ti lê na sarango baba ti akungba so zo ayeke na ni, alondo na Babâ ni pëpe, me a londo na dunia so.”​—1 Jean 2:15, 16.

⁷ Azo mingi na yâ ti dunia so aye ti wara gbâ ti aye ti sese. Satan asara si azo abâ so tongana zo awara nginza mingi ayeke sara si lo duti na ngia. Akota magazin ayeke gbani. Na yâ ti asabango a yeke wa mingi azo ti bâ so a yeke kota ye ti tene ala duti na aye mingi nga ala sara ngia mingi. Na tapande, mbeni ndokua so ayeke bâ lege ti voyage ayeke wa mingi azo ti gue na ambeni ndo so ayeke pendere mingi so mingi ni azo so asara voyage ni ayeke azo so ayeke na bibe ti dunia so. Azo so ayeke nduru na e, a yeke pusu e ti changé sarango ye ti e ti lingbi na sarango ye ti dunia so.

8, 9. Nyen la ayeke biani mbeni kpale? Ngbanga ti nyen?

⁸ Na ngoi ti akozo Chrétien, Pierre agboto mê ti aChrétien na ndo ti ala so na yâ ti congrégation akomanse ti pensé tongana azo ti dunia. Lo tene: “Ala bâ ti ala sarango ye alingbi na anzara ti bê ti ala na kota lâ tongana ye so ayeke ga na ala ngia. Ala yeke asaleté nga asioni ye; na nzerengo tere kue, ala yeke bi tere ti ala na yâ ti afango ye ti ala ni so ahanda zo, na oko ngoi so ala yeke sara matanga legeoko na ala. Teti ala yeke tene atënë ti baba so aga na ye ti nzoni na zo pëpe, nga na lege ti anzara ti mitele na asioni sarango ye, ala handa ala so alondo ti sigigi fade fadeso na maboko ti azo so na lege ti sarango ye ti ala, ala girisa lege awe. Atâa so ala mû zendo ti mû liberté na azo so, ala wani ayeke angbâa ti aye so abuba awe. Teti zo so mbeni zo ahon lo na ngangu, zo ni amû lo na ngbâa awe.”​—2 Pi. 2:13, 18, 19.

⁹ Tongana e gi ti kaï “nzara ti lê” ti e, e yeke duti na liberté ape. Me e yeke ga ngbâa ti Satan Zabolo, mokonzi ti dunia so, so zo alingbi ti bâ lo ape (1 Jean 5:19). A yeke sioni mingi ti ga ngbâa ti aye ti sese. Tongana e ga ngbâa ni, a yeke ngangu na e ti zi tere ti e dä.

MBENI KUA SO AMÛ NGIA NA ZO

10, 11. Mingi ni Satan ayeke gi ti sara ngangu na ndo ti azo wa? Na lege wa mandango mbeti ayo ayeke ga na kpale na amaseka?

¹⁰ Legeoko tongana ti so Satan asara na yaka ti Éden, laso nga lo yeke gi ti sara ngangu na ndo ti azo so ahinga ye mingi ape. Azo so lo yeke sara ngangu mingi na ndo ti ala, a yeke amaseka. Tongana mbeni maseka, wala mbeni zo, asoro ti duti ngbâa ti Jéhovah, a yeke nzere na Satan ape. Satan aye ti tene azo kue so amû tere ti ala na Jéhovah angbâ be-ta-zo na lo pëpe nga ala zia ti sara na lo.

¹¹ Zia e kiri na ndo ti tapande ti ngbâa so ayeda ti tene a koro mê ti lo. Tongana a koro mê ti lo, a lingbi ti son lo gi teti kete ngoi, me place ni so angbâ so ayeke fa na azo kue so lo la lo soro ti ngbâ na maître ti lo. A lingbi ti duti ngangu na amaseka, wala même ti mû vundu na ala, ti soro ti sara ye so ague nde na ye so azo so ayeke nduru na ala ayeke sara. Na tapande, Satan ayeke gi ti fa na amaseka so warango kua na yâ ti dunia ti lo la ayeke sara si zo aduti na tâ ngia. Me a yeke gi tongana e zia Jéhovah na kozo ndo na yâ ti fini ti e la si e yeke duti na tâ ngia. Jésus atene: “Ngia ayeke na ala so ahinga so ala yeke na bezoin ti aye ti yingo.” (Mat. 5:3). A-Chrétien amû tere ti ala ti sara ye so bê ti Jéhovah aye, me pëpe ti sara ye so bê ti Satan aye. Ala yeke diko Bible nga ala yeke gbu li ti ala na ndo ti aye so ala diko “lâ na bï.” (Diko Psaume 1:1-3.) Ye oko, laso mandango mbeti ayo azia ngoi mingi pëpe na awakua ti Jéhovah ti gbu li na ndo ti Bible nga ti sara na Jéhovah.

12. Nyen la ayeke na gbele amaseka mingi ti soro?

¹² Mbeni maître ti dunia so alingbi ti sara si gigi akpengba na aChrétien so ayeke angbâa ti Jéhovah. Na yâ ti kozo mbeti ti Paul na aCorinthien, lo hunda ndo, lo tene: “A iri mo na ngoi so mo yeke lani ngbâa?” Na pekoni lo mû wango, lo tene: “Zia mo gi bê ti mo dä pëpe. Me tongana mo lingbi ti sigigi na gbe ni, mo sigigi biani.” (1 aCor. 7:21). Tongana mbeni ngbâa ayeke na mbeni maître ti dunia so, so asara si gigi akpengba na lo, a yeke nzoni mingi ti tene ngbâa so asigigi na gbe ti lo. Laso, na yâ ti mingi ti akodoro, ndia ayeda ti tene amaseka ague na ekole teti ambeni ngu. Na pekoni, a yeke na a-élève ni ti soro ye ti bê ti ala. Ala lingbi ti soro ti manda mbeti ayo wala pëpe. Tongana mbeni Chrétien asoro ti manda mbeti ayo gi ti wara mbeni kua na yâ ti dunia so, a yeke duti ngangu mingi na lo ti wara lege ti sara kusala ti ngoi kue.​—Diko 1 aCorinthien 7:23.

MO YE TI MANDA MBETI AYO WALA MO YE ANZONI FANGO YE?

13. Aye wa awakua ti Jéhovah asoro ti manda?

¹³ Paul amû wango na aChrétien so ayeke na Colosses, lo tene: “Ala sara hange si mbeni zo agbu ala na kûkû pëpe na lege ti senda-ndara na senge tënë ti handa so alondo na ngobo ti azo, so ague oko na aye ti dunia so, so ayeke tongana aye ti molenge, me a gue oko na Christ pëpe.” (aCol. 2:8). Awafango mbeti mingi ayeke fa “senda-ndara na senge tënë ti handa so alondo na ngobo ti azo”. Mingi ni azo so ayeke manda mbeti ayo ayeke manda nga aye so, me na nda ni aye so ala manda na dasendagi ayeke mû maboko na ala lakue pëpe ti hinga mbeni kua ti maboko. Nga mandango ye ti ala ni aleke ala pëpe ti hon ndo ti akpale so azo ayeke tingbi na ni lâ na lâ. Me awakua ti Jéhovah asoro ti manda aye so alingbi ti mû maboko na ala ti maï anzoni kode so alingbi ti mû lege na ala ti duti na aye mingi pëpe na yâ ti fini ti ala tongaso si ala sara kua ti Nzapa. Ala bâ na nene ni wango so Paul amû na Timothée, lo tene: “Tâ tënë, gbungo tënë ti Nzapa ngangu so ayeke mbeni lege ti wara kota ye gi tongana zo azia bê ti lo gi na ndo ti ye so lo yeke na ni awe. Ni la, tongana e yeke na kobe, bongo na ndo ti lango, so alingbi na e awe.” (1 Tim. 6:6, 8). Ahon ti tene atâ Chrétien agi ti wara akota diplôme nga kota iri, ala yeke sara ngangu ti wara “ambeti so a sara nzoni tënë” ti ala, so ti tene, azo so ala mû maboko na ala ti ga adisciple ti Jésus. Ala yeke sara ni na lege so ala bi tere ti ala na yâ ti kua ti fango tënë.​—Diko 2 aCorinthien 3:1-3.

14. Ti gue oko na aPhilippien 3:8, tongana nyen la Paul abâ pasa so lo yeke na ni ti duti ngbâa ti Nzapa na ti Christ?

¹⁴ E lingbi ti manda ye na lege ti bazengele Paul. Lo manda ye lani na gbe ti Gamaliel maître ti Ndia so ayeke Juif. A lingbi ti haka ye so Paul amanda lani na ye so a yeke fa laso na dasendagi. Me Paul abâ ni tongana nyen, tongana lo haka ni na pasa so lo yeke na ni ti duti ngbâa ti Nzapa na ti Christ? Lo tene: “Ndali ti hingango ye na ndo ti Christ Jésus Seigneur ti mbi so mbeni ye ti hon ni ayeke dä pëpe, mbi dö aye kue mbi zia.” Lo kiri lo tene: “Ndali ti lo, mbi dö aye kue mbi zia, na mbi bâ aye ni tongana gbâ ti azende si mbi lingbi ti wara Christ.” (aPhil. 3:8). Bango ndo ti Paul alingbi ti mû maboko na amaseka so ayeke aChrétien nga na ababâ na amama ti ala ti soro ye nzoni na ndo ti mandango mbeti. (Bâ afoto.)

BÂ NZONI NA LEGE TI ANZONI FANGO YE

15, 16. A-ekole wa bungbi ti Jéhovah azia na sese? Ndani ayeke nyen?

¹⁵ Na dasendagi sarango ye ti azo ayeke tongana nyen? Mingi ni, ala yeke sara kpengba-li nga ala yeke nduru ti fa ngonzo ti bê ti ala na tere ti ngorogbia nga na azo so ayeke na komandema (aÉph. 2:2). Me bungbi ti Jéhovah ayeke fa tâ anzoni ye na yâ ti congrégation so siriri ayeke dä. E oko oko kue e lingbi ti mû mbage ti e na Ekole ti Kusala ti aChrétien so ayeke sara ni yenga na yenga. E yeke nga na ekole so gi aita-koli so ayeke akumbamba la ayeke sara ni (Ekole ti aita-koli so ayeke kumbamba) nga na ti aita-koli so ayeke apionnier na awali ti ala (Ekole ti aita-koli na awali ti ala). A-ekole so ayeke ti mû maboko na e ti mä yanga ti Jéhovah, Maître ti e ti yayu.

¹⁶ E lingbi ti wara gbâ ti akpengba tâ tënë na yâ ti Index des publications de la Société Watch Tower nga na Watchtower Library CD-ROM. Ndani so e yeke sara a-ekole ti mandango Bible so, a yeke ti voro Jéhovah. A yeke fa na e tongana nyen ti mû maboko na azo ti ga akamarade ti Nzapa (2 aCor. 5:20). Na pekoni azo ni so a yeke fa nga ye na ambeni zo.​—2 Tim. 2:2.

YE TI NZONI SO NGBÂA NI AYEKE WARA

17. Tongana e soro nzoni fango ye, ye ti nzoni wa la e yeke wara?

¹⁷ Na yâ ti toli ti Jésus na ndo ti atalent, a gonda angbâa use so ayeke be-ta-zo. Ye so asara si ala na maître ti ala kue ayeke na ngia. Ti fa so ye so ala sara anzere na lo, lo mû na ala kua mingi na ndo ni. (Diko Matthieu 25:21, 23.) Tongana e soro nzoni fango ye, e yeke wara ngia laso nga e yeke wara ye ti nzoni. Zia e bâ tapande ti Michael. Lo hinga ye lani mingi na ekole. Na ngoi so amaître ti lo airi lo ti sara lisoro na lo ti bâ wala lege ayeke dä ti tene lo gue na dasendagi, bê ti ala adö ti bâ so lo ye pëpe ti manda mbeti ayo. Lo ye ti manda mbeni ye so aninga ape so alingbi ti mû maboko na lo ti bâ lege ti abezoin ti lo na ti sara kua ti pionnier. Lo regretté desizion so lo mû so? Ên-ën. Lo tene so aye so lo manda na lege ti Bible nga na yâ ti kua ti ancien na yâ ti congrégation amû maboko na lo mingi. Lo tene: “Aye ti nzoni nga na apasa so mbi wara ayeke kota mingi ahon nginza kue so mbi lingbi fade ti wara. Mbi yeke tâ na ngia mingi so mbi soro ti manda mbeti ayo ape so.”

18. Ngbanga ti nyen mo soro nzoni fango ye?

¹⁸ Nzoni fango ye ayeke fa na e aye so Nzapa aye nga ayeke mû maboko na e ti duti angbâa ti Jéhovah. A yeke sara si e duti na beku so a yeke ‘zi e na gbe ti ngbâa ti ye so abuba,’ nga na nda ni e yeke wara “liberté ti gloire ti amolenge ti Nzapa.” (aRom. 8:21). Me ye so ayeke kota mingi ayeke so, a yeke tâ nzoni lege so e lingbi ti fa so e ye biani Jéhovah, Maître ti e.​—Ex. 21:5.