“Fadeso a yeke biani ngoi so a sara nzoni na zo”

“Bâ, fadeso a yeke biani ngoi so a sara nzoni na zo. Bâ, fadeso a yeke lango ti salut.”​—2 ACOR. 6:2.

1. Ngbanga ti nyen a yeke nzoni ti gi ti hinga kusala wa a lingbi e sara na mbeni ngoi?

“NGOI ayeke teti ye kue, na lâ ayeke teti kusala nde nde kue so ayeke na gbe ti yayu.” (Zo-ti. 3:1). Salomon ayeke sara lani tënë ti nene ti hingango ngoi so ayeke nzoni mingi ndali ti aye tongana fango yaka, voyage, dengo buze wala sarango lisoro. Me e yeke nga na bezoin ti hinga kusala wa ayeke kota mingi ti sara ni na mbeni ngoi. Tënë so aye ti tene so a lingbi e hinga nzoni aye so ayeke kota na lê ti e.

2. E hinga tongana nyen so na ngoi so Jésus ayeke fa lani tënë, lo hinga ngoi so lo yeke dä nzoni?

² Na ngoi so Jésus ayeke na sese, lo hinga ngoi so lo yeke dä nzoni nga ye so a lingbi lo sara. Teti so lo bata na li aye so ayeke kota na lê ti lo, lo hinga so a yeke ngoi ti tene agbâ ti prophétie so azo aku aninga, so andu Messie, aga tâ tënë (1 Pi. 1:11; Apoc. 19:10). Lo yeke lani na akusala ti sara ti fa polele so lo yeke Messie so a mû zendo ti lo. A lingbi lo fa tâ tënë ti Royaume nga lo bungbi azo so ayeke komande ande na lo na yâ ti Royaume ni. A lingbi lo zia nga na sese gunda ti congrégation ti aChrétien so ayeke fa tënë na ndo ti sese kue nga ayeke sara si azo aga adisciple.​—Marc 1:15.

3. So Jésus ahinga ngoi so lo yeke dä nzoni, a sara ngangu na ndo ti lo tongana nyen?

³ So Jésus ahinga ngoi ni nzoni, a sara nzoni mingi na lo nga a pusu lo ti yapu na sarango ye so bê ti Babâ ti lo aye. Lo tene na adisciple ti lo: “Biani, akobe ti yaka ni ayeke mingi, me azo ti kua ni ayeke mingi pëpe. Tongaso, ala hunda mingi na Wa ti kua ni ti tokua azo ti kua ti fâ akobe ti yaka ti lo.” (Luc 10:2; Mal. 4:5, 6). Jésus asoro kozoni azo 12 na pekoni azo 70 na popo ti adisciple ti lo, lo fa na ala ambilimbili ye so a lingbi ala sara nga lo tokua ala ti gue ti fa kpengba tënë so: “Royaume ti yayu aga nduru awe.” Me ti Jésus wani, Bible atene: “Tongana [lo hunzi] ti mû awango so na adisciple ti lo bale-oko na use so awe, lo londo na ndo so ti gue ti fa ye nga ti fa tënë na yâ ti ambeni gbata.”​—Mat. 10:5-7; 11:1; Luc 10:1.

4. Na lege wa Paul amû lani tapande ti Jésus Christ?

⁴ Jésus ayapu na yâ ti kusala ti lo nga lo sara ni na bê ti lo kue, lo yeke mbeni nzoni tapande teti adisciple ti lo kue. A yeke ye so bazengele Paul asara tënë ni tongana lo wa amba ti lo aChrétien lo tene: “Ala ga azo so asara ye tongana mbi, tongana ti so mbi nga mbi yeke zo so asara ye tongana Christ.” (1 aCor. 11:1). Na lege wa Paul amû lani tapande ti Christ? Kozoni, lo bi tere ti lo kue na yâ ti kusala ti fango nzoni tënë. Na yâ ti alettre so Paul atokua na acongrégation, e yeke wara atënë tongana “ala sara kua ti ala na goigoi pëpe”, “ala sara na Jéhovah tongana angbâa”, “ala duti lakue na ye mingi ti sara na yâ ti kusala ti Seigneur” nga “aye kue so ala yeke sara, ala sara ni na âme ti ala kue mo bâ mo tene ala sara ni na Jéhovah”. (aRom. 12:11; 1 aCor. 15:58; aCol. 3:23). Paul agirisa lâ oko pëpe tingbingo tere ti lo na Seigneur Jésus Christ na lege ti Damas nga na atënë ti Jésus so a lingbi Ananias afa ni lani na lo. Jésus atene: “Koli so ayeke mbeni ta so mbi soro ni awe ti mû iri ti mbi ti fa na amara, agbia nga na amolenge ti Israël.”​—Kus. 9:15; aRom. 1:1, 5; aGal. 1:16.

“Ngoi so a sara nzoni na zo”

5. Nyen la apusu Paul ti yapu na yâ ti kusala ti lo?

⁵ Na dikongo mbeti ti Kusala, e bâ polele so Paul afa tënë na mbeto pëpe nga lo yapu na yâ ni (Kus. 13:9, 10; 17:16, 17; 18:5). Paul ahinga so ngoi so lo yeke dä ayeke ngoi ti tene a sara ye hio. Lo tene: “Bâ, fadeso a yeke biani ngoi so a sara nzoni na zo. Bâ, fadeso a yeke lango ti salut.” (2 aCor. 6:2). Ngu 537 kozo ti Christ ayeke lani ngoi so a sara nzoni na aJuif so ayeke na Babylone ti tene ala kiri na kodoro ti ala (És. 49:8, 9). Me Paul ayeke sara lani tënë ti nyen? Atënë so angoro versê so amû lege na e ti hinga ye so lo ye ti sara tënë ni.

6, 7. Kota pasa wa a mû laso na aChrétien so a soro ala na lege ti yingo? Azo wa la ayeke sara kusala na tere ti aChrétien so a soro ala na lege ti yingo?

⁶ Kozoni na yâ ti lettre ti lo, Paul asara tënë ti kota pasa so a mû na lo nga na amba ti lo so a soro ala na lege ti yingo. (Diko 2 aCorinthien 5:18-20.) Lo fa so Nzapa airi ala ti sara mbeni mbilimbili kusala so ayeke “kusala ti kiringo na songo”, ti voro azo ti tene “ala kiri ala sara songo na Nzapa.”

⁷ Ngbene ye na kengo yanga so asi na Éden, yâ ti songo ti azo kue na Jéhovah afâ (aRom. 3:10, 23). Fango yâ ti songo so asara si azo kue atï na yâ ti bingo na lege ti yingo, ni la si ala yeke bâ pasi nga ala yeke kui. Paul atene: “E hinga so juska fadeso création kue angbâ gi ti dema legeoko na ti bâ pasi legeoko.” (aRom. 8:22). Me Nzapa asara ambeni ye ti wa azo, so ti tene ti “voro” azo ti kiri na mbage ti lo wala ti kiri ti sara songo na lo. A yeke lani kusala so a mû na Paul nga na amba ti lo so a soro ala na lege ti yingo na ngoi ni kâ. “Ngoi [ni] so a sara nzoni na zo” ayeke “lango ti salut” teti azo so amä na bê na Jésus. A-Chrétien kue so a soro ala na lege ti yingo nga na amba ti ala, “ambeni ngasangbaga”, so ayeke sara kusala maboko na maboko na ala, ala kue angbâ ti tisa azo ti wara ye ti nzoni na “ngoi so a sara nzoni na zo.”​—Jean 10:16.

8. Nyen la asara si iringo ndo ti kiri ti sara songo so apika bê?

⁸ Iringo azo ti kiri ti sara songo na Nzapa ayeke mbeni ye so apika bê mingi ngbanga ti so atâa so azo wani la afâ yâ ti songo na Nzapa, na lege ti kengo yanga so asi lani na Éden, Nzapa lo wani la amû li ni lani ti sara kue ti leke kpale so (1 Jean 4:10, 19). Lo sara nyen? Paul atene: “Na lege ti Christ, Nzapa ayeke kiri na songo na popo ti lo na azo ti dunia; lo yeke diko afaute ti ala pëpe, na lo zia na tïtî e tokua ti kiringo na songo ni.”​—2 aCor. 5:19; És. 55:6.

9. Nyen la Paul asara ti fa so lo bâ na nene ni nzoni bê ti Nzapa?

⁹ Na mungo ngere so a futa ti zi zo, Jéhovah azi lege na azo so amä na bê na ni ti wara pardon ti siokpari ti ala nga ti kiri ti sara songo na lo. Na ndo ni, lo tokua azo ti lo na ndo kue ti wa azo ti leke songo ti ala na lo kozoni si lege ni akanga. (Diko 1 Timothée 2:3-6.) Teti so Paul ahinga ye so bê ti Nzapa aye nga lo hinga ngoi so lo yeke dä, lo sara “kusala ti kiringo na songo” na ngangu ti lo kue. Ye so bê ti Jéhovah aye achangé pëpe. Laso, Jéhovah angbâ lakue ti ku ti tene azo akiri asara songo na lo. Atënë ti Paul so atene “fadeso a yeke biani ngoi so a sara nzoni na zo” nga “fadeso a yeke lango ti salut” achangé pëpe. Jéhovah ayeke biani na nzoni bê nga lo yeke bâ mawa ti zo!​—Ex. 34:6, 7.

“Hon nde pëpe na ye so kota nzobe ni aye”

10. Ti aChrétien so a soro ala na lege ti yingo ândö nga laso, “lango ti salut” aye ti tene nyen teti ala?

¹⁰ Akozo zo so abâ nzoni na lege ti kota nzoni bê so ayeke ala so “ayeke beoko na Christ”. (2 aCor. 5:17, 18). Ti ti ala “lango ti salut” ni ato nda ni na Pentecôte ti ngu 33. Ti londo na lango ni so ti ga na ni, a mû na ala kusala ti fango “tokua ti kiringo na songo”. Laso, tanga ti aChrétien so a soro ala na lege ti yingo angbâ ti sara “kusala ti kiringo na songo”. Ala hinga so a-ange osio ti prophétie so bazengele Jean abâ na yâ ti suma ‘agbu apupu osio ti sese ngangu, si mbeni pupu alingbi ti ya na ndo ti sese pëpe’. Ni la, “lango ti salut” nga na “ngoi so a sara nzoni na zo” angbâ (Apoc. 7:1-3). A yeke ndali ti tënë so la nduru na tongo nda ti ngu 1900 ti ga na ni, tanga ti aChrétien so a soro ala na lege ti yingo abi tere ti ala kue ti sara “kusala ti kiringo na songo” juska na andangoro ti sese kue.

11, 12. Na lege wa aChrétien so a soro ala na lege ti yingo na tongo nda ti ngu 1900 afa so ala hinga ngoi so ala yeke na yâ ni? (Bâ foto ti lembeti 23.)

¹¹ Na tapande, a fa na yâ ti buku Les Témoins de Jéhovah: Prédicateurs du Royaume de Dieu so na tongo nda ti ngu 1900, “Charles Taze Russell na amba ti lo amä na bê ngangu so ala yeke na yâ ti ngoi ti kongo lê ti kobe nga so azo ayeke na bezoin ti mä tâ tënë so ayeke zi zo.” Ala sara nyen ndali ti ye so? So aita so ahinga so ala yeke na yâ ti ngoi ti kongo lê ti kobe, “ngoi so a sara nzoni na zo”, ala tene pëpe gi na azo ti gue na yâ ti mbeni bungbi ti vorongo nzapa. A yeke ye so akota zo ti a-eglize ayeke sara teti angu mingi. Me, aChrétien so a soro ala na lege ti yingo agi anzoni lege ti sara si nzoni tënë amû ndo. Ala sara nga kusala nzoni na afini ye so senda-kode asigigi na ni ti sara si kusala ti ala ague na li ni.

¹² Ti sara si nzoni tënë ti Royaume amû ndo, kete wungo ti awakua so ayeke fâ tënë na ngangu ti ala kue asara kusala na atract, apériodique na abuku. Ala sû nga ambeni diskur na a-article ti tene andokua ti ambeti-sango asigigi na ni saki na saki. Ala sara akuasinga na ndo ti Bible na yâ ti ada ti radio so azo ayeke mä na yâ ti kodoro ni nga na ati so azo ayeke mä ni juska na akodoro wande. Ala sigigi na alimon so a zia go ti azo ayeke toto na tere ni, ala sara ni même kozoni si andokua ti alimon asara kusala na akode so. So ala gbu ngangu na yâ ti kusala so, ye ti pekoni ayeke so wa? Laso azo kutu mbasambala tongaso ayeda na tokua so nga ala kue ayeke tene: “Ala kiri ala sara songo na Nzapa.” Biani akozo wakua ti Jéhovah so ayeke mbeni nzoni tapande ti azo so ayapu na yâ ti kusala atâa so wungo ti ala ayeke mingi pëpe nga so ala yeke na kode mingi pëpe.

13. Ye so bê ti Nzapa aye so a lingbi e bâ na nene ni ayeke nyen?

¹³ Tënë so Paul atene “fadeso ayeke ngoi so a sara nzoni na zo” angbâ na ngangu. E so Jéhovah afa kota nzobe ti lo na e, e kiri singila so lege azi na e ti mä tënë ti kiringo ti sarango songo na Nzapa na e yeda na ni. Ahon ti tene so e yeke na bezoin ti ye oko pëpe, e bâ na nene ni tënë so Paul atene na pekoni, lo tene: “E voro nga yanga na ala ti tene ala yeda na kota nzobe ti Nzapa na ala hon nde pëpe na ye so kota nzobe ni aye.” (2 aCor. 6:1). Ye so kota nzobe ti Nzapa aye ayeke ti “kiri na songo na popo ti lo na azo ti dunia” na lege ti Christ.​—2 aCor. 5:19.

14. Lege wa azi na azo na ando mingi?

¹⁴ Satan avuko lê ti mingi ti azo na ala yeke na songo na Nzapa pëpe nga ala hinga pëpe ye so kota nzobe ti lo aye (2 aCor. 4:3, 4; 1 Jean 5:19). Ye oko, teti so aye so ayeke na yâ ti dunia so ayeke ga gi sioni sioni, a pusu azo ti yeda ti lê songo na Nzapa na ngoi so a fa na ala so dutingo na songo pëpe na Nzapa la ayeke na gunda ti aye ti sioni nga na pasi. Même na ando so mingi ti azo ayeke sara ka nzara ti tënë ti e pëpe, ala mingi ayeke yeda fadeso na nzoni tënë na ala yeke gi ti kiri ti duti na songo na Nzapa. E bâ so a yeke ngoi ni la ti tene e mû tere ti e kue ti wa azo e tene: “Ala kiri ala sara songo na Nzapa”.

15. Ahon ti fa gi tënë so anzere na azo, nyen la e ye ti tene azo kue ahinga?

¹⁵ Kusala ti e ayeke gi pëpe ti tene na azo so tongana ala kiri na mbage ti Nzapa, lo yeke mû maboko na ala ti leke akpale ti ala kue nga ala ayeke duti na ngia. A yeke ye so azo mingi ayeke gi na ngoi so ala gue na eglize na azo ti a-eglize ayeke nduru ti sara ni (2 Tim. 4:3, 4). A yeke pëpe ye so e yeke gi na yâ ti kusala ti e. Nzoni tënë so e yeke fa ayeke so, Jéhovah so aye azo mingi ayeke nduru ti pardone asiokpari ti e na lege ti Christ. Ni la, azo alingbi ti ga nduru na Nzapa na ti kiri ti sara songo na lo (aRom. 5:10; 8:32). Ye oko, “ngoi so a sara nzoni na zo” aga nduru ti hunzi awe.

“Zia yingo aduti tongana wâ na yâ ti tere ti ala”

16. Nyen la amû lege na Paul ti yapu na ti sara ye na mbeto pëpe?

¹⁶ E lingbi ti sara tongana nyen ti yapu na yâ ti kusala ti Jéhovah na ti ngbâ ti sara ni? Ambeni zo alingbi ti duti azo ti kamene wala ala yeke sara ka tënë hio hio pëpe na ala lingbi ti bâ so a yeke ngangu na ala ti zi yanga ti sara tënë polele wala ti gi ti sara lisoro na azo. Me a yeke nzoni ti hinga so ti yapu aye gi pëpe ti tene a lingbi zo afa tënë ti bê ti lo wala nzerengo tere ti lo na gigi. A luti nga pëpe na ndo ti sarango ye ti tere ti mbeni zo. Paul afa tongana nyen ti yapu na yâ ti kusala ti Jéhovah na ti ngbâ ti sara ni tongana lo wa amba ti lo aChrétien lo tene: “Zia yingo aduti tongana wâ na yâ ti tere ti ala.” (aRom. 12:11). Yingo ti Jéhovah la amû lege na bazengele so ti fa tënë na mbeto pëpe nga ti gbu ngangu na yâ ni. Ti londo na ngoi so Jésus airi lo juska na ndangba kanga ti lo na Rome nga na kuâ ti lo, ahon ngu 30. Na yâ ti angu so kue Paul ayapu na yâ ti kusala ti lo. Lakue Paul abâ ndo na mbage ti Nzapa so amû na lo ngangu na lege ti yingo vulu. Lo tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhil. 4:13). E lingbi ti wara ye ti nzoni mingi tongana e manda ti mû tapande ti lo!

17. E lingbi ti sara nyen ti tene ‘yingo aduti tongana wâ na yâ ti tere ti e’?

¹⁷ Na aRomain 12:11, bazengele Paul asara kusala na mbeni mbupa ti Grec so aye ti sara tënë ti “mbeni ye so ayeke kporo.” Ti sara si mbeni ngu angbâ ti kporo, a lingbi e zia wâ na gbe ni lakue. Legeoko nga, ti tene ‘yingo aduti tongana wâ na yâ ti tere ti e’, a lingbi e wara yingo ti Nzapa lakue. Ti wara yingo ti Nzapa, a yeke nzoni e sara kusala na aye kue so Jéhovah amû ti kpengba e na lege ti yingo. Ye so aye ti tene ti bâ na nene ni Mandango tënë ti Nzapa na sewa nga na abungbi ti congrégation. Ye so andu mandango ye lakue mo mveni nga na sewa, sambela nga guengo na abungbi. Aye so ayeke mû maboko na e ti tene ‘yingo aduti tongana wâ na yâ ti tere ti e’ legeoko tongana wâ so ayeke sara si ngu akporo.​—Diko Kusala 4:20; 18:25.

18. E so e yeke aChrétien, ye wa a yeke nzoni e zia lê ti e kue na ndo ni?

¹⁸ Zo so amû tere ti lo na Nzapa ayeke zia lê ti lo kue gi na ndo ti ye so lo leke ti si dä na lo yeke zia pëpe si mbeni ye nde agboto lê ti lo yongoro nga lo yeke nze pëpe na sarango ye ni so. E aChrétien, ye so e zia na gbele e ayeke ti sara ye kue so Jéhovah ahunda na e tongana ti so Jésus asara lani (aHéb. 10:7). Ye so Jéhovah aye laso ayeke ti tene azo mingi akiri asara songo na lo. Tongaso, zia e mû tapande ti Jésus na Paul, e bi tere ti e kue na yâ ti kusala so ayeke kota ahon tanga ni kue so a hunda ti tene a sara ni hio laso.

Mo dabe ti mo na ni?

• “Kusala ti kiringo na songo” so a mû na Paul nga na amba ti lo so a soro ala na lege ti yingo ayeke nyen?

• Na lege wa tanga ti aChrétien so a soro ala na lege ti yingo asara kusala nzoni na “ngoi so a sara nzoni na zo”?

• Mbeni Chrétien alingbi ti sara nyen si ‘yingo aduti tongana wâ na yâ ti tere ti lo’?

[Foto na lembeti 20]

Paul agirisa lâ oko pëpe tingbingo tere ti lo na Seigneur Jésus Christ