“Zia yingo aduti tongana wâ na yâ ti tere ti ala”
1. A lingbi e sara kusala ti fango tënë tongana nyen?
1 A yeke nzoni ambage kue ti kusala ti e ti aChrétien ague na li ni. Ni la, a wa e a tene: “Zia yingo aduti tongana wâ na yâ ti tere ti ala.” Nga “ala sara na Jéhovah tongana angbâa.” (aRom. 12:11). Ye oko, aye mingi ayeke dä so alingbi ti sara si wâ ti e na yâ ti fango tënë akiri na peko. Tongana nyen e lingbi ti ‘ngbâ gi ti za tongana wâ’ na yâ ti kusala ti e ti fango tënë ti Royaume?—2 Tim. 1:6, 7.
2. Kamba wa ayeke na popo ti mandango Bible zo mveni nga na fango tënë na wâ?
2 Mandango Bible zo mveni: Nzoni wafango tënë ti Royaume ayeke zo so andoye andia ti Nzapa nga atâ tënë so ayeke na yâ ni andu bê ti lo mingi (Ps. 119:97). Tongana e wara aye ti nzoni na ngoi ti mandango Bible ti e e mveni, aye ni so ayeke pusu e na ayeke sara si e kiri e duti na wâ mingi. Ndoye ti e na mbage ti Zo so amû na e atâ tënë so nga na nzara ti e ti fa nzoni tënë na azo ayeke pusu e ti sepela Nzapa nga ti fa iri ti lo na azo (aHéb. 13:15). A yeke polele so fango nzoni tënë na bê ti e kue afa so e bâ ni na nene ni.
3. Ye wa yingo ti Nzapa alingbi ti sara na ndo ti kusala ti e?
3 Sambela ti wara yingo ti Nzapa: A yeke pëpe na lege ti ngangu ti e mveni si fango tënë ti e ayeke lë lengo. E yeke duti na wâ gi tongana yingo ti Nzapa asara kusala na yâ ti tere ti e (1 Pi. 4:11). Gango nduru na Lingu so ayeke na “ngangu mingi” ayeke sara si e wara ngangu na lege ti yingo ti fa tënë na mbeto pëpe (És. 40:26, 29-31). Na ngoi so bazengele Paul atingbi lani na akpale na yâ ti kusala ti lo, lo “wara mungo maboko so alondo na Nzapa”. (Kus. 26:21, 22). Ngangu ti yingo ti Nzapa alingbi ti mû maboko na e ti duti na wâ na yâ ti kusala ti e. Ni la, a yeke nzoni e sambela ti wara ni.—Luc 11:9-13.
4. Fango tënë na wâ alingbi ti ga na aye ti nzoni wa? Wango wa a lingbi e bi bê ti e na ni?
4 Mingi ni tongana zo ayeke na wâ mingi na yâ ti fango tënë ti Royaume, ye so ayeke pusu nga ambeni Chrétien ti duti na wâ mingi (2 aCor. 9:2). Na yâ ti territoire, tongana e fa tënë na wâ nga e fa so e mä na bê ngangu na tënë ni, azo alingbi peut-être ti yeda na tënë ni. Ye oko, a lingbi wâ ti e ni ague lakue oko na sarango ye na ndara nga na ngangu pëpe (Tite 3:2). Na ngoi kue e yeke gi ti ne zo so e yeke fa tënë na lo nga ti bâ na nene ni droit ti lo ti soro ye.
5. Wango wa ti Bible a yeke nzoni e sara kue ti sara ye alingbi na ni?
5 E awafango tënë ti Royaume, ‘zia yingo aduti tongana wâ na yâ ti tere ti e’ lakue. Zia e duti na kota nzara ti manda Bible e wani nga e sambela na bê ti e kue Jéhovah, zo so alingbi ti mû na e yingo vulu. Na sarango tongaso, e lingbi ti sara kusala ti e ti fango tënë na wâ “na yingo vulu nga na bê so ayeda na tënë ni kue”.—1 aThes. 1:5.