Awango so apeut ti aidé mo ti duti na siriri na amba ti mo

Duti nduru ti pardonné zo

“Ala ngbâ . . . ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo.”​—ACOLOSSIEN 3:13.

E kue e yeke sara afaute. E lingbi ti son bê ti amba ti e, wala ala lingbi ti son bê ti e. Atâa ye ni ayeke so wa, e kue e bezoin ti tene ala pardonné e nga e pardonné ala. Tongana e pardonné mbeni zo awe, e yeke bata zo ni na bê ape. E yeke “kiri sioni ndali ti sioni” ape nga e yeke rappelé zo ni lakue ape na afaute ti lo (aRomain 12:17). Me ka tongana bê ti e ason ngangu na e peut ti girisa ye so apassé ape? Na nengo zo, a lingbi e sara tënë na zo ni na ndö ti ye ni gï e use. Ye so e yeke gi ayeke ti tene siriri akiri na popo ti e, me pëpe ti fa so e la e yeke na raison.—aRomain 12:18.

Sara terê ti mo kete nga ne zo

“Ala sara terê ti ala kete na ala bâ amba ti ala tongana azo so ayeke kota ahon ala.”​—APHILIPPIEN 2:3.

Tongana e sara terê ti e kete nga e ne azo, a yeke nzere na ala ti ga nduru na e. Ala hinga so e yeke sara ye na ala na nzoni bê, e bâ ala na nene ni nga e yeke sara ye na mbana ape ti son bê ti ala. Me, tongana e bâ terê ti e kota ahon amba ti e wala e ye lakue ti tene a sara gï ye so e ye, a yeke sara si papa alondo nga mango terê ayeke dä ape. Azo ayeke kpe e kpengo nga e yeke wara akamarade mingi ape.

Sara kangbi na popo ti azo ape

“Nzapa ayeke sara kpangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”​—KUSALA 10:34, 35.

Wasarango e aye azo pëpe ndali ti mara ti ala, yanga ti kodro ti ala, dutingo ti ala wala couleur ti terê ti ala. “Na lege ti zo oko, lo sara mara oko oko kue ti azo”. (Kusala 17:26). Ye so aye ti tene, azo kue ayeke aita. Tongana e sara ye na azo kue na nengo zo nga na nzoni bê, e yeke sara si ala duti na ngia, e wani e yeke na ngia mingi nga e yeke nzere na lê ti Nzapa.

Sara ye na ngangu pëpe

“Ala yü . . . sarango ye na ngangu pëpe.”—ACOLOSSIEN 3:12.

Tongana e sara ye na ngangu ape, a yeke sara si azo aga nduru na e. Ala yeke na mbeto ape ti sara tënë na e, na même ti leke bango ndo ti e ndali ti so ala hinga so e yeke sara ngonzo ape. Tongana bê ti mbeni zo ason na terê ti e, si e kiri tënë na lo yeke apeut ti sara si bê ti lo adë. A-Proverbe 15:1 atene: “Ti kiri tënë na zo na ngangu pëpe asara si ngonzo adë, me tënë so ason bê asara si ngonzo alondo.”

Kiri singila nga mû ye na zo

“Mungo ye na zo aga na ngia mingi ahon warango ye na tïtî zo.”​—KUSALA 20:35.

Laso, azo mingi ayeke sara bê ti ye na ala yeke pensé gï na ala wani. Me, azo so ayeke mû ye na zo la ayeke na tâ ngia (Luc 6:38). Azo so amû ye na azo ayeke na ngia ndali ti so ala ye azo mingi ahon aye ti sese. Tongana mbeni zo amû ye na ala, mara ti ndoye ni so la ayeke pusu ala ti kiri singila nga ti fa so ala bâ ye ni na nene ni (aColossien 3:15). Hunda terê ti mo: ‘Zo wa la mbi ye ti duti nduru na lo, zo ti kion nga so ayeke kiri singila ape, wala zo so ayeke mû ye na zo nga so ayeke kiri singila?’ Nyen la e manda? Duti na oko sarango ye so mo ye ti tene azo aduti na ni.—Matthieu 7:12.