Salango si fini ti e ane na lê ti Jéhovah

“Biri, na yanga ti ndapelele ti si na lakui, mbeni zo agirisa angbonga use so ayeke tongana lor, so ala oko oko kue ayeke na apenze-ngbonga bale-omene so alingbi ti haka ni na adiamant. A mû mbeni futa ndali ni pëpe teti so ala hon biaku biaku!”​—Lydia H. Sigourney, wasungo-mbeti ti Amerika (1791-1865).

TONGANA a bâ alâ ti fini ti e, a kpa mbeni ye so aninga pëpe nga so akpe loro mingi. Wasungo psaume David agbu lani li ti lo na ndo gigi so ayo pëpe, na bê ti lo apusu lo ti sambela: “O L’Eternel, Mo fa na mbi nda ti mbi, lango ti mbi angbâ oke? Mo sala si mbi hinga mbi yeke zo ti hon fade. Bâ, Mo diko lâ ti mbi ndulu tongana yambati ti mbi; na lâ ti fini ti mbi na gbele Mo ayeke tongana ye pëpe.” David aye lani ti tene gigi ti lo, so na lege ti atënë ti yanga ti lo nga na asalango ye ti lo, anzere na lê ti Nzapa. Na fango so lo zia bê ti lo kue na Nzapa, lo tene: “Beku ti mbi ayeke gi na Mo.” (Psaume 39:5, 6, 8). Jéhovah amä sambela ti lo, na Lo zia akusala ti lo na ndo kilo ti futa lo alingbi na ni.

Na yâ ti lango oko, apenze-ngbonga oko oko so ayeke hon, a yeke ngangu pëpe ti duti na aye mingi ti sala, na ti tene fini so ague hio nga so asi singo na akusala amû ngoi ti e kue. Mbilimbili tongana aye ayeke mingi ti sala na ti bâ, me ngoi ni ayeke gi kete ti sala ni, bê ti e alingbi ti gi e. Ye so e gi bê ti e dä ayeke oko na ti David, so ayeke ti duti na mbeni fini so anzere na Nzapa? Biani, Jéhovah ayeke bâ e oko oko kue nzoni. A sala angu 3 600 awe tongaso, Job, mbeni koli so akpe lani mbito ti Nzapa, atene so Jéhovah abâ alege ti lo nga na akusala ti lo kue. Lo hunda: “Tongana Lo ga ti bâ mbi, fade mbi kiri tënë nyen na Lo?” (Job 31:4-6, 14). Lege ayeke dä ti tene fini ti e ane na lê ti Nzapa na ziango aye ti yingo na kozo ndo, na batango akomandema ti lo, nga na salango kusala na ngoi ti e na ndara. Zia e bâ aye so nzoni.

E bi bê ti e kozoni kue na aye ti yingo

Mbeti ti Nzapa awa e na lege ni ti zia aye ti yingo na kozo ndo tongana lo tene: ‘I hinga ye so ayeke nzoni ahon’. Ye ni so ayeke nyen? Kiringo tënë ni andu “hingango ye na ndara”. (aPhilippien 1:9, 10). Tongana e ye ti hinga ye na ndo ye so Jéhovah aleke ti sala, a yeke nzoni e sala kusala na ngoi ti e na ndara. Me, tongana e bi bê ti e kozoni kue na aye ti yingo, a yeke sala si fini ti e ayeke nzere mingi nga amû ngia na bê.

Bazengele Paul adabe e ti “hinga ye so ayeke nzoni na lê ti Seigneur.” Ti hinga ye so ayeke nzoni, a lingbi e bâ anzara ti bê ti e nga na aye so apusu e ti sala mbeni ye. Bazengele ni angbâ ti tene: “A lingbi i hinga nda ti ye so Seigneur aye.” (aEphésien 5:10, 17). Tongaso, ye nyen ayeke nzoni na lê ti Jéhovah? Mbeni mato ti Bible akiri tënë tongaso: “Ndara ayeke kozo ye. Mo gi lege ti wara ndara, biani, a hon mbeni ye kue so mo gi, mo gi lege ti hinga nda ti ye. Yä iri ti ndara, na fade lo yä mo.” (aProverbe 4:7, 8). Zo so awara ndara ti Nzapa na lo sala ye alingbi na ni, bê ti Jéhovah ayeke duti na ngia na mbage ti lo (aProverbe 23:15). Nzoni ti ndara tongaso ayeke so a lingbi ti zi ni wala ti buba ni pëpe. Lo ga tâ mbeni ye ti bata e yongoro ‘na lege so ayeke sioni nga na azo so asala tënë kirikiri’.​—aProverbe 2:10-15.

Tongaso, a yeke lege ti ndara ti ke ye kue so alingbi ti pusu e ti bâ aye ti yingo tongana asenge ye! A lingbi e lë bê ti kiri singila na Jéhovah ndali ti atënë ti lo nga ti kpe mbito ti lo na lege ni (aProverbe 23:17, 18). Atâa so e lingbi ti wara mara ti bibe tongaso na ngoi kue ti fini ti e, a yeke nzoni ti duti na mara ti bibe so na ti yôro akpengba-ndia ti Bible na yâ salango ye ti e na ngoi so e de maseka. Salomon, Gbia ti ndara, atene: “Fadeso, mo dabe mo na Lo so acréé mo, na lâ ti pendere ti mo”.​—Zo-ti-fa-tene 12:3.

Lege so ayeke nzoni ahon atanga ni kue ti lë bê ti kiri singila na Jéhovah ayeke ti sambela lo lâ oko oko. David ahinga lani nene ti fa na Jéhovah ye so ayeke na yâ bê ti lo, teti lo voro tele ti lo, lo tene: “O L’Eternel, Mo mä sambela ti mbi, zia mê ti Mo amä toto ti mbi; Mo bâ ngule ti mbi senge pëpe”. (Psaume 39:13). Kpengba songo so e lë na Nzapa apusu e ngoi na ngoi ti toto na ngule ngbanga ti so a ndu bê ti e? Biani, tongana e sala lisoro mingi na Jéhovah na ndo aye so andu bê ti e nga e gbu li ti e mingi na ndo Mbeti ti lo, lo yeke ga ndulu mingi na e ahon ti kozo.​—Jacques 4:8.

Manda ti mä yanga

Moïse ayeke nga ândö mbeni koli ti mabe so ahinga so a lingbi lo zia bê ti lo kue na Nzapa. Tongana David, Moïse nga alingbi lani ti bâ so gigi asi singo na akpale. Tongaso, lo toto na Nzapa ti fa na lo ‘lege ti diko lâ ti lo, si lo lingbi wara bê so ayeke na ndara.’ (Psaume 90:10-12). Zo alingbi ti wara bê so ayeke na ndara gi tongana lo manda andia nga na akpengba-ndia ti Jéhovah na lo duti na fini alingbi na ni. Moïse ahinga ni, na tongaso, lo sala kue ti yôro kpengba tâ tënë so na yâ bê ti mara ti Israël na fango na ala lege mingi andia nga na akpengba-ndia ti Nzapa kozoni si ala lï na Sese ti Zendo. A hunda na agbia kue so Jéhovah ayeke soro ala ande ti komande na ndo Israël ti sû teti ala mveni mbeni mbeti ti Ndia na ti diko ni na lâ ti fini ti ala kue. Ngbanga ti nyen tongaso? Ti tene ala manda ti kpe mbito ti Nzapa. Ye so ayeke mû lege ti bâ wala gbia ni ayeke mä ande yanga. A yeke sala nga si lo yä tele ti lo na ndo aita ti lo pëpe, nga si lâ ti komandema ti lo awu (Deutéronome 17:18-20). Jéhovah akiri amû zendo so na Salomon, molenge ti David, tongana lo tene na lo: “Tongana mo tambela na lege ti Mbi ti bata kpengba-ndia ti Mbi na komandema ti Mbi legeoko tongana babâ ti mo David atambela na lege ti Mbi, ka fade Mbi sala si lâ ti mo awu mingi.”​—1 aGbia 3:10-14.

Nzapa abâ na nene ni mingi mango yanga. Tongana e ye ti bâ tongana senge ye ambeni mbage ti akomandema ti Jéhovah nga na aye so lo hunda, mara ti bibe tongaso ayeke hon na lê ti lo senge pëpe (aProverbe 15:3). A lingbi hingango ye so apusu e ti ngbâ ti yekia mingi afango lege kue ti Jéhovah, atâa so salango tongaso alingbi ti duti lakue kete ye pëpe. Na ngoi so e yeke sala ngangu ti bata andia nga na akomandema ti Nzapa, Satan ayeke sala kue ti ‘kanga lege na e.’​—1 aThessalonicien 2:18.

A yeke mbilimbili kota ye mingi ti tene e sala ye alingbi na wango so Bible amû ti tingbi tele ti voro Nzapa na ti bungbi oko na aita (Deutéronome 31:12, 13; aHébreu 10:24, 25). Tongaso, a yeke nzoni e hunda tele ti e: ‘Mbi ye biani ti ngbâ lakue ti sala ye so ayeke nzoni?’ Tongana e bâ na nene ni pëpe tingbingo tele na abungbi nga fango ye so a mû kâ ngbanga ti so e ye ti wara nginza, a yeke woko songo ti e na Jéhovah. Bazengele Paul asû na mbeti: “Ayeke nzoni na yâ ti dutingo ti ala, nzara ti nginza ahon ndo ti ala pëpe. Me ayeke nzoni ala zia bê ti ala gi na ye so ala yeke na ni, ngbanga ti so [Jéhovah] lo mveni atene: ‘Mbi yeke zi maboko ti mbi ande na tele ti mo pëpe. Mbi yeke zia ande mo oko pëpe.’ ” (aHébreu 13:5, Buku ti Nzapa, Fini Mbuki). Tongana e yeke ndulu ti bata akomandema ti Jéhovah, a fa so na bê ti e kue, e hinga so lo yeke bata e.

Jésus amanda lani ti mä yanga nga lo wara ye ti nzoni na pekoni. E kue e lingbi ti sala tongaso nga (aHébreu 5:8). Tongana e yeke mä yanga mingi, a yeke duti ande ngangu na e pëpe ti mä yanga hio atâa na yâ ti akete kete ye. Tâ tënë, ndali ti be-biani ti e, ambeni zo alingbi peut-être ti sala sioni na même ye ti ngangu na e, mbilimbili na ndo ti kusala, na ekole, wala na yâ ti sewa so azo ni asala anzapa nde nde. Ye oko, bê ti e adë ti mä tënë so Jéhovah atene na amolenge ti Israël so, tongana ala ‘ndoye lo na mango yanga ti lo, na ala zia bê ti ala na lo, fade lo duti fini ti ala nga wungo ti lâ ti ala’. (Deutéronome 30:20). A mû oko zendo so na e nga.

E sala kusala na ngoi ti e na ndara

Tongana e sala kusala na ngoi ti e na ndara, a yeke mû nga maboko na e ti sala si fini ti e ane na lê ti Jéhovah. Nde na nginza so zo alingbi ti bata ni, ti ngoi, a hunda ti sala kusala na ni, wala fade a hon biani. Ngbonga oko oko so ayeke hon, ayeke hon biaku biaku. Teti so aye ayeke lakue mingi ti sala me ngoi ni ayeke gi kete, e yeke mû ngoi ti e si ye so e zia na gbele e na yâ fini, e lingbi ti wara ni? Kota ye so a lingbi Chrétien oko oko kue azia na gbele lo ti sala ayeke ti mû mbage ti lo lakue na kusala ti fango tënë ti Royaume nga na ti salango adisciple.​—Matthieu 24:14; 28:19, 20.

E yeke sala kusala na ngoi ti e na ndara gi na peko ti so e bâ nene ni. Ni la, aEphésien 5:16 awa e ti ‘vo ngoi so alingbi teti e mveni,’ na ye so ahunda ti zia lege ti aye so ayeke nga kota ye pëpe. A hunda ti duti na aye mingi pëpe so ayeke buba ngoi ti e senge senge. Bango televizion nga na Internet mingi, dikongo asenge mbeti so asala nzoni na zo pëpe, wala gbotongo tele na salango ngia ahon ndo ni alingbi ti sala si e woko kue. Nga, warango gbâ ti akungba alingbi ti mû ngoi so a hunda ti wara na bê so ayeke na ndara.

Azo so ayeke maï tënë ti salango kusala na ngoi na lege ti ndara atene: “Ti sala nzoni kusala na ngoi ti mo, a lingbi mo zia na gbele mo aye so ayeke polele.” Ala fa aye oku so ahunda ti wara na aye so zo azia na gbele lo: ti hinga ni mbilimbili, ti kangbi yâ ni na akete kete kapa, ti duti na mbeni ye so zo alingbi ti si dä, ti duti na lege ni, nga ti leke mbeni ngoi so na yâ ni e ye ti wara ye ni.

Mbeni ye so a yeke nzoni ti zia na gbele e ti sala ayeke ti maï dikongo Bible ti e. Kozo ye ni ayeke ti fa mbilimbili ye so e zia na gbele e, na tapande, ti diko Bible kue. Use ni ayeke ti kangbi ni na akete kete kapa ti hon dä, si na lege ni e lingbi ti bâ guengo na li ni ti e. A yeke nzoni aye so e zia na gbele e apusu e ti sala ngangu na ti maï. A lingbi ala duti nga ambeni ye so e lingbi ti si dä nga so ayeke na lege ni. A lingbi e bâ na nene ni salango kusala na angangu, akode nga na ngoi ti e. Ti ambeni zo, a hunda ngoi mingi ti diko Bible kue. Na nda ni, a lingbi e leke mbeni ngoi so na yâ ni e ye ti wara ye ni. Tongana e soro mbeni lango ti hunzi ti sala mbeni ye, a yeke pusu e ti sala kusala biani.

Azo kue ti sewa ti Béthel na ndo sese mobimba, atâa ala yeke na kota ndokua ti aTémoin ti Jéhovah wala na yâ ti ambeni oko ti afiliale ni, ala kue azia na gbele ala ti diko Bible kue na kozo ngu so ala lï na Béthel. Ala bâ so dikongo Bible nzoni amû lege na ala ti maï na lege ti yingo na ti lë kpengba songo na Jéhovah, Nzapa so ayeke fa ye na ala teti nzoni ti ala (Esaïe 48:17). E lingbi ti zia na gbele e ti diko Bible lakue nga?

Anzoni ye so aga tongana e sala si e ne na lê ti Nzapa

Tongana e bi bê ti e kozoni kue na aye ti yingo, e yeke wara gbâ ti adeba nzoni. Kozoni, a yeke sala si e hinga ye so e ye na yâ fini ti e nga so e yeke wara ngia teti e yeke bâ so e yeke sala mbeni ye. Tongana e sala lisoro lakue na Jéhovah na yâ sambela so alondo na bê, a yeke pusu e ndulu mingi na lo ahon ti kozo. Gi ti sambela afa so e zia bê ti e na lo. Dikongo Bible lâ na lâ nga na ambeti so a sû na ndo ni, so “ngbâa be-ta-zo na ti ndara” amû, afa so e ye ti mä Nzapa na ngoi so lo yeke sala tënë na e (Matthieu 24:45-47, NW). Ye so amû maboko na e ti wara bê so ayeke na ndara, si na yâ fini ti e, e lingbi ti mû anzoni desizion nga e soro anzoni ye.​—Psaume 1:1-3.

E yeke na ngia mingi ti bata akomandema ti Jéhovah, ngbanga ti so salango tongaso ane oko pëpe (1 Jean 5:3). Na ndembe so e yeke sala si lâ oko oko e ne na lê ti Jéhovah, e yeke kpengba songo ti e na lo. E yeke ga nga mbeni ngangu ye ti mungo maboko na lege ti yingo na afon e aChrétien. Mara ti aye tongaso azia ngia na bê ti Jéhovah Nzapa (aProverbe 27:11). Na ti tene Jéhovah ayeda na e fadeso nga teti lakue lakue, mbeni ye ti hon ni ayeke pëpe!

[Foto na lembeti 21]

A-Chrétien ayeke bâ aye ti yingo na nene ni mingi

[Afoto na lembeti 22]

Mo yeke sala kusala na ngoi ti mo na ndara?

[Foto na lembeti 23]

Na ndembe so e yeke sala si lâ oko oko e ne na lê ti Jéhovah, e yeke kpengba songo ti e na lo