YE TI MANDA 49
Tongana nyen la sewa ti mo apeut ti duti na ngia? Mbage 1
Azo so asara mariage fini fini aye ti tene ngia so ala wara na lango ti mariage ti ala angbâ lakue lakue. A peut ti duti tongaso. A-Chrétien so asara mariage aninga awe na so asara kue ti sara ye alingbi na awango ti Bible ahinga so a peut ti duti tongaso.
1. Wango wa la Bible amû na akoli?
Jéhovah amû na koli kua ti mû li ni na yâ ti sewa. (Diko aÉphésien 5:23.) Jéhovah aku ti tene lo mû adesizion so aga na nzoni ye na sewa ni. Bible atene na akoli, atene: “Ala ngbâ lakue ti ndoye awali ti ala.” (aÉphésien 5:25). Tënë so aye ti tene nyen? Mbeni koli so aye wali ti lo ayeke sara ye na lo na nzoni bê, atâa na yanga-da wala na lê ti azo. Lo yeke bata wali ti lo si sioni asi na lo ape, lo yeke sara kue ti bâ lege ti abezoin ti lo nga lo yeke bi bê na atënë ti bê ti lo (1 Timothée 5:8). Ye so ayeke kota mingi ayeke ti tene lo aidé lo ti duti na kpengba songo na Jéhovah (Matthieu 4:4). Na tapande, lo peut ti sambela nga ti diko Bible legeoko na wali ti lo. Tongana mbeni koli so aye wali ti lo abâ lege ti lo, lo yeke bata songo ti kamarade ti lo na Jéhovah.—Diko 1 Pierre 3:7.
2. Wango wa la Bible amû na awali?
Bible atene so “a lingbi wali ane koli ti lo mingi.” (aÉphésien 5:33). Lo peut ti sara ni tongana nyen? Lo peut ti gbu li na ndö ti anzoni sarango ye ti koli ti lo nga na a-effort so lo sara ti bâ lege ti lo na amolenge ti ala. Lo peut nga ti fa so lo ne koli ti lo na lege so lo yeda na adesizion so lo mû, lo sara tënë na lo na nzoni bê nga lo tene nzoni tënë ti lo même tongana lo voro Jéhovah ape.
3. Tongana nyen la mbeni koli na wali apeut ti kpengba songo ti mariage ti ala?
Bible atene tënë so na koli na wali so asara mariage awe: “Ala use kue ayeke ga terê oko.” (Matthieu 19:5). Tënë so aye ti tene ala doit ti tiri na ye kue so apeut ti sara si ala ye terê mingi ape. Ala yeke sara ni na lege so lakue ala mû ngoi ti duti na terê ti mba nga na lege so ala fa apensé ti ala nga na atënë ti bê ti ala polele na mba na ndoye. Ala yeke zia pëpe si mbeni ye wala mbeni zo nde na Jéhovah aduti kota mingi na lê ti ala ahon koli wala wali ti ala. Ala yeke sara hange mingi ti duti pëpe kota kamarade ti mbeni koli wala wali nde.
GI TI HINGA AYE MINGI
Gi ti hinga amama-ndia ti Bible so apeut ti kpengba mariage ti mo.
4. Akoli, ala ndoye awali ti ala nga ala bâ lege ti ala nzoni
Bible atene so a lingbi “akoli andoye awali ti ala tongana terê ti ala wani.” (aÉphésien 5:28, 29). Tënë so aye ti tene nyen? Zia VIDÉO ni, na pekoni kiri tënë na hunda so:
Na ambeni lege wa la mbeni koli apeut ti fa so lo ye wali ti lo nga lo yeke bâ lege ti lo?
Diko aColossien 3:12, na pekoni kiri tënë na hunda so:
Tongana nyen la mbeni koli apeut ti fa anzoni sarango ye so na yâ ti mariage ti lo?
5. Awali, ala ndoye akoli ti ala nga ala ne ala
Bible awa wali ti ne koli ti lo atâa lo voro Jéhovah wala pëpe. Diko 1 Pierre 3:1, 2, na pekoni kiri tënë na ahunda so:
Tongana koli ti mo ayeke Témoin ape, kite ayeke dä ape so mo ye ti tene lo voro Jéhovah. Nzoni lege ti aidé lo ayeke so wa? Mo pensé a yeke nzoni ti tene mo fa tënë na lo lakue, wala a yeke nzoni ti tene mo duti nzoni wali, mo sara ye na nzoni bê nga mo ne lo? Ngbanga ti nyen?
Mbeni koli na wali ti lo apeut ti mû anzoni desizion. Me na ambeni ngoi, mbeni wali apeut ti yeda ape na desizion ti koli ti lo. Tongaso, lo peut ti tene na koli ti lo yeke nga na nengo zo aye so lo pensé, me lo doit ti hinga so Jéhovah atene koli ti lo la ayeke mû desizion so ayeke nzoni ndali ti sewa ni. Lo doit ti sara kue ti yeda na desizion ni. Tongana lo sara tongaso, lo yeke sara si sewa ni kue aduti na ngia. Diko 1 Pierre 3:3-5, na pekoni kiri tënë na hunda so:
Tongana mbeni wali ane koli ti lo, a yeke sara Jéhovah tongana nyen?
6. Mo peut ti hon ndö ti akpale na yâ ti mariage ti mo
Mariage so ayeke mbilimbili-kue ayeke dä ape. Tongaso, acouple adoit ti sara kua maboko na maboko ti hon ndö ti akpale ti ala. Zia VIDÉO ni, na pekoni kiri tënë na ahunda so:
Na yâ ti vidéo so, nyen la afa so koli na wali ni ayeke na kpengba songo encore ape?
Aye wa la ala sara ti kpengba songo ti ala na yâ ti mariage ti ala?
Diko 1 aCorinthien 10:24 nga na aColossien 3:13. Na peko ti so mo diko aversê so awe, kiri tënë na hunda so alingbi na versê oko oko:
Tongana nyen la sarango ye alingbi na wango so apeut ti kpengba songo ti mbeni mariage?
Bible atene a yeke nzoni e ne mba. Ti ne zo andu sarango ye na lo na nzoni bê. Diko aRomain 12:10, na pekoni kiri tënë na ahunda so:
Eskê a yeke nzoni ti tene akoli wala awali aku ti tene awali ti ala wala akoli ti ala la amû li ni kozo ti ne ala? Ngbanga ti nyen?
AMBENI ZO ATENE: “Mbi na wali wala koli ti mbi e yeke na kpengba songo tongana ti kozo ape.”
Tongana nyen la mo yeke fa na ala so Bible apeut ti aidé ala?
NA NDURU TËNË
Mbeni koli na wali ti lo apeut ti duti na ngia tongana ala ye terê, ala ne mba nga ala sara ye alingbi na amama-ndia ti Bible.
Dango bê
Tongana nyen la mbeni koli apeut ti sara si mariage ti lo aduti na ngia?
Tongana nyen la mbeni wali apeut ti sara si mariage ti lo aduti na ngia?
Tongana mo sara mariage awe, mama-ndia wa ti Bible la apeut ti aidé mo ti kpengba songo ti mariage ti mo?
GI NDA TI YE
Gi ti hinga ambeni ye so apeut ti aidé mo ti tene sewa ti mo aduti na ngia.
Bâ mbeni vidéo ti abia so afa aye ti nzoni so mo yeke wara tongana mo sara ye alingbi na awango ti Nzapa na yâ ti mariage ti mo.
Gi ti hinga ye so aye ti tene ti woko terê na gbe ti komandema ti koli.
Bâ tongana nyen la awango ti Bible na ndö ti mariage apeut ti aidé mbeni couple.