Ye so lâ ti Jéhovah ayeke fa ande na gigi

“Lâ ti Jéhovah ayeke ga tongana zo ti nzi . . . nga sese na akusala so ayeke na yâ ni ayeke sigigi dandara.”​—2 PI. 3:10.

1, 2. (a) Sioni dunia ti Satan so ayeke hunzi ande tongana nyen? (b) Ahundango ndo wa e yeke bâ ande?

AYE ti sioni dunia ti Satan aluti na ndo ti tënë ti mvene so a tene zo alingbi ti komande sese nzoni sân ti tene Jéhovah amû maboko na lo (Ps. 2:2, 3). Mbeni ye so aluti na ndo ti mvene alingbi ti ngbâ lakue lakue? A yeke ngbâ pëpe! Me, a lingbi e ku pëpe ti tene dunia ti Satan afuti na bê ti lo wani. Nde na so, Nzapa la ayeke futi ni na ngoi so lo diko nga na lege so bê ti lo aye. Bira so Nzapa ayeke ga na ni na ndo ti sioni dunia so ayeke fa na gigi nzoni mingi mbilimbili ti lo nga na ndoye ti lo.​—Ps. 92:8; aProv. 2:21, 22.

² Bazengele Pierre atene: “Lâ ti Jéhovah ayeke ga tongana zo ti nzi; na lango ni so, ayayu ayeke hon hio tongaso tongana toto ti bekpa, na aye ni so amû wâ ngangu ayeke ga tongana ngu si a girisa, nga sese na akusala so ayeke na yâ ni ayeke sigigi dandara.” (2 Pi. 3:10). “Ayayu” nga na “sese” so a sara tënë ni ge so ayeke nyen? “Aye ni so” ayeke ga tongana ngu si agirisa so ayeke nyen? Nga tongana Pierre atene “sese na akusala so ayeke na yâ ni ayeke sigigi dandara”, lo ye ti tene nyen? Ti hinga akiringo tënë na ahundango ndo so ayeke mû maboko na e ti leke tere ti e ndali ti aye so ayeke nduru ti si na so amû mbeto mingi na zo.

Ayayu na sese so ayeke hon hio

3. “Ayayu” so a sara tënë ni na 2 Pierre 3:10 ayeke nyen? Na lege wa ala yeke hon hio?

³ Tongana Bible asara tënë ti “ayayu” na lege ti fä, mingi ni a ye ti sara tënë ti azo so ayeke na komandema so ti tene azo so ayeke na ndo ti amba ti ala (És. 14:13, 14; Apoc. 21:1, 2). “Ayayu [so] ayeke hon hio” ayeke fä ti azo so ayeke komande na yâ ti dunia so ake Nzapa. So ala yeke hon hio tongana “toto ti bekpa” aye peut-être ti fa so gi hio tongaso a yeke futi ala kue kue kue.

4. “Sese” ni ayeke nyen? Tongana nyen si a yeke futi ni?

⁴ “Sese” ni ayeke fä ti azo ti dunia so, so ake Nzapa. Mara ti dunia ni so ayeke lani na ngoi ti Noé na Nzapa afuti ni na lege ti kota ngu so apika. “Na lege ti oko tënë so, a bata ayayu na sese ti fadeso ti ku na wâ, na a bata ni ti ku lango ti ngbanga nga ti futingo azo so akpe Nzapa pëpe.” (2 Pi. 3:7). Kota ngu so apika lani afuti azo so akpe mbeto ti Nzapa pëpe kue legeoko, me futingo ti so ayeke ga ayeke duti ti lo ande na ambage nde nde na ngoi ti “kota ye ti vundu”. (Apoc. 7:14). Na kozo mbage ti kota ye ti vundu ni, Nzapa ayeke pusu akota zo ti poroso ti dunia so ti futi “Babylone, Ngangu gbata”. Jéhovah ayeke sara ni ti fa so lo ke abungbi ti vorongo Nzapa so ayeke tongana wali-ndumba (Apoc. 17:5, 16; 18:8). Na pekoni, na ngoi ti bira ti Harmaguédon so ayeke ndangba mbage ti kota ye ti vundu, Jéhovah lo wani ayeke zi tanga ti aye ti dunia ti Satan kue.​—Apoc. 16:14, 16; 19:19-21.

“Aye ni so . . . ayeke ga tongana ngu si a girisa”

5. Aye ni so na lege ti fä andu nyen?

⁵ ‘Aye ni so ayeke ga tongana ngu si a girisa’ ayeke nyen? “Aye ni so” Pierre asara tënë ni ayeke na gunda ti aye so asara si azo akpe mbeto ti Nzapa pëpe, abango ndo ti ala, lege so ala yeke sara na ye nga na aye so ala yeke tomba pekoni. “Aye ni so” andu nga “yingo ti dunia so”, so “ayeke sara kua fadeso na yâ ti amolenge ti kengo yanga.” (1 aCor. 2:12; diko aÉphésien 2:1-3.) Yingo ni so wala “pupu” amû yâ ti dunia ti Satan kue. Yingo ni so la ayeke pusu azo ti pensé, ti leke akapa, ti sara tënë nga ti sara ye na mbeni lege so afa na gigi bibe ti Satan, zo ti baba, zo ti kengo yanga so ayeke “mokonzi so ayeke na ndo ti komandema ti pupu so angoro e”.

6. Yingo ti dunia so ayeke sara ye tongana nyen?

⁶ Atâa ala hinga wala ala hinga pëpe, azo so yingo ti dunia so alï ala azia si Satan asara ngangu na ndo ti bê nga na bibe ti ala ti tene ala fa na gigi bango ndo nga na bibe ti lo. Ye so asara si ala sara gi ye ti bê ti ala sân ti bi bê na ye so bê ti Nzapa aye. Tongana mbeni ye asi, ala yeke sara ye na baba wala na bibe ti kion, ala yeke sara kpengba-li na mbage ti azo so ayeke na komandema, nga ala zia si “nzara ti mitele, [na] nzara ti lê” afa lege na ala.​—Diko 1 Jean 2:15-17.

7. Ngbanga ti nyen a lingbi e “bata bê ti [e]”?

⁷ Ni la, a yeke biani kota ye ti tene e “bata bê ti [e]” na sarango ye na ndara alingbi na aye so e manda na mbage ti Nzapa tongana e yeke soro akamarade, ambeti so e yeke diko, angia nga tongana e yeke gi ye na ndo ti Internet! (aProv. 4:23). Bazengele Paul atene: “Ala sara hange si mbeni zo agbu ala na kûkû pëpe na lege ti senda-ndara na senge tënë ti handa so alondo na ngobo ti azo, so ague oko na aye ti dunia so, so ayeke tongana aye ti molenge, me a gue oko na Christ pëpe.” (aCol. 2:8). Wango so ayeke biani kota mingi na ngoi so lâ ti Jéhovah ayeke pusu nduru nduru, teti “wâ” so mara ni ade ti si lâ oko pëpe ayeke sara si “aye” ti dunia ti Satan amû wâ na aga ngu tongaso ala lingbi pëpe ti sö kuâ na yâ ti kota ngonzo ti Nzapa. Ye so adabe ti e na atënë ti Malachie 4:1 so atene: “Lâ ni ayeke ga, a za tongana wâ ti four; azo ti kpengba-li kue, na ala kue so asara sioye, fade ala yeke mbesu [wala pere] . . . fade lâ ni so ayeke ga ti gbi ala.”

“Sese na akusala so ayeke na yâ ni ayeke sigigi dandara”

8. Tongana nyen sese na akusala so ayeke na yâ ni ayeke “sigigi dandara”?

⁸ Pierre aye ti tene nyen tongana lo tene so “sese na akusala so ayeke na yâ ni ayeke sigigi dandara”? Pierre aye ti tene so na ngoi ti kota ye ti vundu, Jéhovah ayeke sigigi na nda ti dunia ti Satan na fango so dunia ni ake lo Jéhovah nga na Royaume ti lo. Ni la, lo lingbi biani na futingo. Na sarango tënë ti ngoi ni so na lege ti prophétie, e diko na Ésaïe 26:21 atene: “L’Éternel asigigi na ndo ti Lo ti ga ti fâ ngbanga na ndo awakodoro ti sese ngbanga ti sioye ti ala. Fade sese nga afa na gigi mênë so ayeke na yâ lo, na ala so a fâ ala awe, fade lo honde kuâ ti ala pëpe.”

9. (a) Aye wa a lingbi e ke ni? Ngbanga ti nyen? (b) Ye wa a lingbi e gi ti lë ni? Ngbanga ti nyen?

⁹ Na lâ ti Jéhovah, azo so azia si dunia so nga na yingo ti lo so ayeke sioni asara ngangu na ndo ti ala ayeke fa na gigi tâ sarango ye ti ala, ala yeke fâ même tere na popo ti ala. A yeke biani tâ tënë so mingi ti angia ti ngangu nde nde so amû ndo laso ayeke leke mingi ti azo ti tene na ngoi ni ala londo ti “sara ngangu na azo so ayeke nduru na ala.” (Zach. 14:13). Tongaso, a yeke biani kota ye ti tene e ke aye tongana afilm, abuku, angia ti vidéo nga na ambeni ye so alingbi ti dü na yâ ti e ambeni sarango ye so ayeke sioni na lê ti Nzapa. A yeke asarango ye tongana baba nga sarango ngangu na zo (2 Sam. 22:28; Ps. 11:5). Nde na so, zia e gi ti lë lengo ti yingo vulu ti Nzapa ndali ti so ambage nde nde ti lengo ti yingo so ayeke mû maboko na e ti sö kuâ na lâ ti ngonzo ti Nzapa.​—aGal. 5:22, 23.

“Afini yayu na fini sese”

10, 11. “Afini yayu na fini sese” ayeke nyen?

¹⁰ Diko 2 Pierre 3:13. “Afini yayu” ayeke Royaume ti Nzapa so ayeke na yayu, so abâ gigi na ngu 1914 na ngoi so “ngoi so a diko teti amara” ahunzi (Luc 21:24). Na yâ ti ngorogbia ti yayu so, a yeke wara Christ Jésus nga na azo 144 000 so ayeke lë gbia legeoko na lo. Mingi ti ala awara futa ti ala na yayu awe. Na yâ ti mbeti ti Apocalypse, a fa ala so a soro ala tongana “gbata so ayeke nzoni-kue, Fini Jérusalem, so alondo na mbage ti Nzapa na yayu si ayeke zu; lo leke tere ti lo tongana mbeni wali so aye ti mû koli fini fini si asara pendere na tere ti lo ti ku na koli ti lo ni.” (Apoc. 21:1, 2, 22-24). Legeoko tongana ti so Jérusalem ayeke lani ndo so ngorogbia ti Israël ti giriri ayeke dä, Fini Jérusalem na koli ti lo la ayeke ngorogbia ti fini dunia. So gbata ti yayu so ayeke ‘londo na yayu si ayeke zu’ aye pëpe ti tene so gbata ni ayeke ga tâ na sese ge, me a ye ti tene so a yeke bâ lege ti aye na ndo ti sese.

¹¹ “Fini sese” ayeke fini bungbi ti azo ti sese so afa polele so ala yeke nduru ti woko tere ti ala na gbe ti Royaume ti Nzapa. Paradis ti yingo so azo ti Nzapa ayeke na yâ ni laso ayeke ga ande tâ ye na yâ ti pendere “sese so azo ayeke duti ande dä”. (aHéb. 2:5). E lingbi ti sara nyen ti duti na yâ ti fini dunia so?

Leke tere ti mo teti kota lâ ti Jéhovah

12. Ngbanga ti nyen lâ ti Jéhovah ayeke ga ande gi gbagburu tongaso na ndo ti azo ti dunia?

¹² Paul na Pierre afa kozoni awe so lâ ti Jéhovah ayeke ga tongana “zo ti nzi” so ti tene na ngoi so zo aku tere ti lo na ni pëpe. (Diko 1 aThessalonicien 5:1, 2.) Même atâ Chrétien so ayeke ku lango ni so, li ti ala ayeke kpe ndali ti so a yeke si gi gbagburu tongaso (Mat. 24:44). Me ti azo ti dunia so ayeke duti ande ngangu mingi. Paul atene: “Na ngoi so azo ni [so ake Jéhovah] ayeke tene: ‘Siriri na nzoni duti ayeke dä!’ mo ye ti bâ, futingo ayeke ga gi hio tongaso na ndo ti ala gi tongana ti so songo yâ ayeke gbu mbeni mama ti ngo; na ala yeke kpe ande oko pëpe.”​—1 aThes. 5:3.

13. Nyen la e lingbi ti sara ti tene dengo kongo so atene “siriri na nzoni duti ayeke dä!” ahanda e pëpe?

¹³ Dengo kongo so atene “siriri na nzoni duti ayeke dä!” ayeke gi mbeni tënë ti mvene so asioni yingo apusu azo ti tene ni; me ye so ayeke handa awakua ti Jéhovah pëpe. Bazengele Paul atene: “Ala yeke na yâ ti bingo pëpe, si lango ni so anzi ala nzingo tongana ti so kota lâ ayeke nzi azo ti nzi, teti ala kue ayeke amolenge ti lumière nga amolenge ti kota lâ.” (1 aThes. 5:4, 5). Tongaso, zia e ngbâ na yâ ti lumière, yongoro mingi na bingo ti dunia ti Satan. Pierre atene: “Aita so mbi ndoye ala mingi, so ala hinga ye so kozo awe, ala sara hange si girisango lege ti azo ni so akpe ndia pëpe ague na ala yongoro pëpe si ala tï, atâa so ala wani ala luti fade ngangu.”​—2 Pi. 3:17.

14, 15. (a) Tongana nyen Jéhovah afa so lo ne e? (b) Atënë wa so a sû na gbe ti yingo ti Nzapa a lingbi e bata ni na li ti e?

¹⁴ Bâ so Jéhovah atene gi pëpe na e ti “sara hange” na ti duti gi tongaso sân ti sara mbeni ye. Nde na so, lo ne e nga na nzoni bê lo sara si e ‘hinga kozo awe’ akota ye so ayeke si ande.

¹⁵ Me mawa ni ayeke so, dango bê so ahunda ti tene e lango pëpe, ambeni asara sanka ni wala même ala he ni na ngia. Peut-être ala yeke tene ‘a sara angu mingi awe la e yeke mä gi oko tënë so.’ Ye oko, a lingbi azo ni so agirisa pëpe so na sarango tënë tongaso ala bâ Jéhovah nga na molenge ti lo tongana azo ti mvene me gi pëpe ngbâa be-ta-zo so ayeke sara ye na ndara. Jéhovah atene: “Mo ku.” (Hab. 2:3). Legeoko nga Jésus atene: “Ala lango pëpe, ngbanga ti so ala hinga pëpe lango so Seigneur ti ala ayeke ga na ni.” (Mat. 24:42). Pierre nga atene: “A yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala gbu tënë ti Nzapa ngangu; ala ku na ala bata na li ti ala ngoi so lâ ti Jéhovah ayeke si na ayeke duti dä.” (2 Pi. 3:11, 12). Lâ oko pëpe ngbâa be-ta-zo so ayeke sara ye na ndara nga na Bebungbi ti lo abâ akota tënë so tongana senge ye!

16. Bango ndo wa a lingbi e kpe ni? Ngbanga ti nyen?

¹⁶ Biani, a yeke “sioni ngbâa” la atene so Wa ti ni ayeke si fade fadeso pëpe (Mat. 24:48). Sioni ngbâa so ayeke na popo ti azo so a sara tënë ti ala na 2 Pierre 3:3, 4. Pierre atene: “Na alango ti nda ni, fade azo ti hengo ndo ayeke ga na . . . anzara ti bê ti ala” ti he azo so, na mango yanga, angbâ ti bata na li ti ala lâ ti Jéhovah. Biani, ahon ti gi ti sara gi na Nzapa nga ti mû maboko na Royaume ti lo, azo ti hengo ndo so abi bê ti ala gi na ndo ti ala wani nga na ndo ti aye so agbu bê ti ala. Zia e gi lâ oko pëpe ti ke yanga wala ti wara mara ti sioni bango ndo tongaso! Ahon ti sara tongaso, zia e “bâ kangango bê ti Seigneur ti e tongana salut” na mungo tere ti e kue na kusala ti fango tënë ti Royaume nga na sarango si azo aga adisciple. Zia e gi nga bê ti e ahon ndo ni pëpe ti hinga lango so Jéhovah Nzapa adiko ti tene aye ni asi na ni.​—2 Pi. 3:15; diko Kusala 1:6, 7.

Zia bê ti mo kue na Nzapa ti salut

17. Tongana nyen aChrétien so ayeke be-ta-zo asara ye alingbi na yanga so Jésus amû na ala ti zia Jérusalem ti kpe? Ngbanga ti nyen?

¹⁷ Na pekoni so aturugu ti Rome amû Judée na ngu 66, aChrétien so ayeke be-ta-zo asara ye lani alingbi na yanga so Jésus amû ti kpe gbata ti Jérusalem na ngoi so ala wara lege ti sara ni (Luc 21:20-23). Ngbanga ti nyen ala sara ye lani hio sân ti duti na kite? Kite ayeke pëpe so ala ngbâ ti bata na li ti ala gbotongo mê so Jésus amû lani. Ti tâ tënë ni, ala yeke ku lani ti mû mbeni desizion so ayeke duti ande ngangu tongana ti so Christ atene na ala tënë ni kozoni. Me na oko ngoi ni, ala hinga so Jéhovah ayeke girisa awakua be-ta-zo ti lo lâ oko pëpe.​—Ps. 55:23.

18. Tongana nyen atënë ti Jésus so ayeke na Luc 21:25-28 asara ngangu na ndo ti bango ndo ti mo na ndo ti kota ye ti vundu so ayeke ga?

¹⁸ E nga kue, a lingbi e zia bê ti e kue na Jéhovah teti gi lo oko la alingbi ti sö e na ngoi so kota ye ti vundu so mara ni ade ti si lâ oko pëpe ayeke tï na ndo ti dunia ti laso. Na mbeni ngoi ande na pekoni so kota ye ti vundu ato nda ni, kozoni si Jéhovah afuti tanga ti aye ti dunia so, fade azo “ayeke woko na mbeto nga na kungo aye so ayeke ga na ndo ti sese so azo ayeke dä”. Ye oko, na ngoi so awato ti Nzapa ayeke dö na mbeto, awakua be-ta-zo ti Jéhovah ayeke sara ande mbeto pëpe. Nde na so, ala yeke duti ande na ngia ngbanga ti so ala hinga so a ga nduru ti zi ala awe.​—Diko Luc 21:25-28.

19. Ye wa e yeke bâ na yâ ti article ti peko?

¹⁹ Biani, pendere gigi ti kekereke ayeke ku ala so angbâ ti duti nde na dunia so nga na “aye” so ayeke ti dunia ni. Me tongana ti so article ti peko ayeke fa ni, tongana e ye ti wara fini, a lingbi e sara aye mingi ahon gi ti kpe ti sara ye so ayeke sioni. A lingbi e gi ti duti na asarango ye so anzere na Jéhovah nga e sara akusala so lo yeda na ni.​—2 Pi. 3:11.

Mo lingbi ti fa ndani?

• Aye so na gbe ni ge ayeke fä ti nyen?

‘Ayayu na sese’ ti laso.

“Aye ni so”.

“Afini yayu na fini sese”.

• Ngbanga ti nyen e zia bê ti e kue na Nzapa?

[Foto na lembeti 13]

Mo lingbi ti “bata bê ti mo” nga ti ngbâ ti duti yongoro na dunia so tongana nyen?

[Foto na lembeti 14]

Na lege wa e yeke fa so e “bâ kangango bê ti Seigneur ti e tongana salut”?