A-ancien so a soro ala ti bata kundu ti ataba ti Nzapa

NA NGOI so Jésus ayeke lani na sese ge, lo fa na gigi so lo yeke “berger so ayeke nzoni mingi.” (Jean 10:11). Tongana lo bâ lani gbâ ti azo so ayeke mû peko ti lo na bê ti ala kue, “mawa ti ala asara lo ngbanga ti so a sara pasi na ala nga yâ ti ala akangbi kirikiri tongana ataba so ayeke na berger pëpe.” (Mat. 9:36). So Jésus ayeke pensé lani na azo andu bê ti Pierre nga na tanga ti abazengele ni. Jésus ayeke ti lo lani nde mingi na aberger ti wataka ti Israël, so abâ lani lege ti kundu ti ataba ni oko ape asara si ataba ni akangbi kirikiri na ala kui nzara na lege ti yingo (Ézéch. 34:7, 8). So abazengele abâ pendere tapande so Jésus azia, na lege ti fango ye ti lo nga na lege so lo bâ ndo na ndö ti ataba ti lo juska ti mû fini ti lo ndali ti ala, ala manda tongana nyen ti aidé azo so ayeke na mabe, si ala kiri na Jéhovah, “berger nga zo ti bango ndo na ndö ti âme ti ala.”—1 Pi. 2:25.

² Mbeni lâ, na ngoi so Jésus ayeke sara tënë na Pierre, lo luti mingi na ndö ti nene ti mungo kobe na ataba ni nga ti batango ala (Jean 21:15-17). Kite ayeke dä ape so tënë so andu bê ti Pierre ngangu mingi, ni la ngu mingi na pekoni, lo tene na a-ancien ti acongrégation ti ândö, lo tene: “Ala bata kundu ti ataba ti Nzapa so lo zia na maboko ti ala; tongana azo ti bango ndo na ndö ti ala, zia a gbu ala gbungo na ngangu pëpe ti sara ni, me zia ala sara ni na bê ti ala wani na gbele Nzapa; ala bata ataba ni na bibe ti warango ye na lege ti likisi pëpe, me na bê ti ala kue. Ala sara mokonzi pëpe na ndö ti ala so ayeke aye ti Nzapa, me ala ga tapande ndali ti ataba ni.” (1 Pi. 5:1-3). A-ancien ti congrégation ti laso alingbi nga ti sara kua na atënë ti Pierre so. Ti mû tapande ti Jésus, a-ancien ayeke sara kua ti Jéhovah na bê ti ala wani nga na bê ti ala kue, si ala ga atapande ndali ti kundu ni, nga ala yeke mû li ni na yâ ti kua ti Jéhovah.—aHéb. 13:7.

³ E lingbi ti kiri singila ndali ti so, na yâ ti congrégation, e yeke na a-ancien so a soro ala na lege ti yingo vulu. Aye ti nzoni so e yeke wara na lege ti ala ayeke mingi. Na tapande, a-ancien ayeke mû wango ti kpengba aita ti ala nga ala yeke bi bê na zo oko oko kue na yâ ti congrégation. Yenga oko oko, ala yeke mû li ni na bê ti ala kue na abungbi ti congrégation, so na ngoi ni aita kue ayeke wara afango ye so ayeke kpengba ala (aRom. 12:8). A-effort so a-ancien ni ayeke sara ti bata kundu ni na aye so alingbi ti sara sioni na ni, na tapande asioni zo, amû lege na e ti duti nzoni (És. 32:2; Tite 1:9-11). So ala yeke mû li ni na yâ ti kua ti fango tënë apusu e ti ngbâ ti fa nzoni tënë nze na nze (aHéb. 13:15-17). Na lege ti akoli so, so ayeke tongana “amatabisi”, Jéhovah aleke ye nzoni ti kpengba congrégation.—aÉph. 4:8, 11, 12.

ASARANGO YE SO A KU NA MBAGE TI AZO SO AYE TI GA A-ANCIEN

⁴ Ti bata congrégation nzoni, a lingbi aita-koli so a yeke soro ala ti ga a-ancien asara ye alingbi na aye so Bible ahunda na ala ti sara. A yeke gï tongana aita-koli ni asara ye alingbi na aye so a ku na mbage ti ala la a lingbi ti tene so yingo vulu la asoro ala (Kus. 20:28). Tâ tënë, asarango ye so Bible ahunda na a-ancien ti duti na ni ayeke aye so ahunda effort mingi ti duti na ni, ndali ti so ti duti ancien ayeke kota kua mingi. Me a ye pëpe ti tene so aye ni so ahon ngangu ti zo, si aita-koli so aye Jéhovah nga so aye ti tene lo sara kusala na ala alingbi lâ oko ape ti duti na ni. A lingbi aita kue abâ polele so a-ancien ayeke azo so ayeke sara ye alingbi na awango ti Bible na yâ ti fini ti ala ti lâ na lâ.

⁵ Na yâ ti kozo mbeti so bazengele Paul asû na Timothée nga na ti so lo sû na Tite, lo fa molongo ti asarango ye so Bible ahunda na azo so aye ti ga a-ancien. Na 1 Timothée 3:1-7 a tene: “Tongana mbeni zo agi ti ga zo ti bango ndo na ndö ti congrégation, lo sara nzara ti mbeni kusala so ayeke nzoni mingi. A yeke nzoni zo ti bango ndo na ndö ti congrégation aduti zo so tënë ayeke na li ti lo pëpe, koli ti wali oko, sarango ye ti terê ti lo ayeke lakue nzoni, lo bata bibe ti lo nzoni, lo sara ye kirikiri pëpe, lo yeke zo ti yambango agene nzoni, lo yeke zo so ahinga ti fa ye nzoni, lo yeke ngbâa ti sämba pëpe, lo yeke zo ti sarango ye na zo na ngangu pëpe, me lo yeke zo so asara ye na lege ni, lo yeke zo so aye tiri pëpe, lo yeke zo ti yengo nginza pëpe, lo yeke fa lege nzoni mingi na azo ti da ti lo, amolenge ti lo ayeke woko terê na gbe ti lo na bê ti ala kue, (ndali ti so tongana mbeni zo ahinga ti fa lege nzoni na azo ti da ti lo wani pëpe, lo yeke bata ande congrégation ti Nzapa ni tongana nyen?), lo yeke mbeni fini zo na yâ ti mabe pëpe, si baba ahon ndö ti lo pëpe na lo tï pëpe na gbe ti ngbanga so a dë na li ti Zabolo. Nga, a yeke nzoni azo ti gigi asara nzoni tënë ti lo, si azo atene sioni tënë na ndö ti lo pëpe na lo tï pëpe na yâ ti kûkû ti Zabolo.”

⁶ Paul atene na Tite, atene: “Mbi zia mo lani na Crête ti tene mo leke aye so atambela nzoni pëpe nga ti tene mo zia azo tongana a-ancien na yâ ti agbata oko oko, tongana ti so mbi mû lani yanga na mo: A yeke nzoni a duti mbeni koli so tënë ayeke na li ti lo pëpe, koli ti wali oko, lo yeke na amolenge so amä na bê na a bi tënë na li ti ala pëpe a tene ala yeke amolenge ti kirikiri wala amolenge ti ngangu-li. Biani, a yeke nzoni mbeni zo ti bango ndo na ndö ti congrégation aduti zo so a bi tënë na li ti lo pëpe, ngbanga ti so lo yeke wabatango ye ti Nzapa. A yeke nzoni lo duti zo so asara gï ye ti li ti lo pëpe, lo duti pëpe zo so aye ngonzo mingi, lo yeke ngbâa ti sämba pëpe, lo yeke sara ye na zo na ngangu pëpe, lo sara bê ti warango ye na lege ti likisi pëpe; me lo yeke zo ti yambango agene nzoni, zo so andoye nzoni ye, zo so abata bibe ti lo nzoni, zo ti mbilimbili, zo so ayeke be-ta-zo, zo so ahinga ti kanga nzara ti bê ti lo; tongana a ndu tënë ti kode ti fango ye ti lo, lo yeke zo so angbâ gï na ndö ti tënë so ayeke tâ tënë, si lo lingbi ti wa azo na lege ti nzoni fango ye ti lo nga ti suku na azo so adë kite na tënë ni.”—Tite 1:5-9.

⁷ Atâa so na bango ni pan aye so Bible ahunda akpa ye so a yeke ngangu mingi ti sara ni, a yeke nzoni aita-koli agi ti wara pëpe ambeni raison ti kpe ti ga ancien. Tongana ala yeke gi ti duti na apendere sarango ye so a ku na mbage ti a-ancien, ala yeke pusu tanga ti amba ti ala na yâ ti congrégation ti sara nga tongaso. Paul atene so a soro mara ti akoli tongaso, so ayeke tongana “amatabisi”, “ti kiri na azo ti be-vulu na nzoni lege, ti sara kua ndali ti azo, na ti leke terê ti Christ, juska e kue e ga oko na yâ ti mabe nga na yâ ti tâ hingango ye na ndö ti Molenge ti Nzapa, ti ga tongana mbeni koli so akpengba kue awe, ti yo ti lingbi na yongo so Christ ayo na ni kue”.—aÉph. 4:8, 12, 13.

⁸ A lingbi a-ancien aduti pëpe gï asenge maseka-koli wala azo so awara batême fini fini. Me a lingbi ala duti azo so afa na yâ ti gigi ti ala aninga kamême awe, so ala hinga ti sara ye tongana aChrétien, ala hinga Bible nzoni nga ala ndoye congrégation na bê ti ala kue. Ala yeke azo so ayeke sara tënë sân mbeto, na ngoi so ala yeke leke tënë ti siokpari so mbeni zo asara, tongaso si ala bata ataba ni yongoro na azo so aye ti sara sioni na ala (És. 32:2). A-ancien ayeke azo so azo kue ti yâ ti congrégation ahinga ala tongana azo so akpengba na lege ti yingo nga so ayeke bi bê na ndö ti nzoni duti ti kundu ti Nzapa.

⁹ Aita-koli so a bâ so ala lingbi awe ti ga ancien ayeke fa na yâ ti gigi ti ala so ala hinga ti sara ye na ndara na yâ ti fini ti ala. Tongana mbeni ancien asara mariage awe, a lingbi lo sara ye alingbi na aye so a hunda na aChrétien na ndö ti mariage, so ti tene a lingbi lo duti gï na wali oko nga lo fa lege nzoni na azo ti da ti lo. Tongana lo yeke na amolenge so amä na bê na so ayeke woko terê na gbe ti lo na bê ti ala kue nga a bi tënë na li ti ala pëpe a tene ala yeke amolenge ti kirikiri wala amolenge ti ngangu-li, azo ti yâ ti congrégation alingbi ti hunda na lo na bê ti ala kue awango na ndö ti atënë so andu sewa nga na ndö ti sarango ye ti Chrétien. A lingbi ancien ni aduti nga zo so tënë ayeke na li ti lo pëpe nga so même azo ti gigi asara nzoni tënë ti lo. A lingbi a wara nga mbeni tënë na li ti lo pëpe so afa atene lo sara mbeni ye ti sioni, so abuba iri ti congrégation. A lingbi lo duti pëpe mbeni zo so bungbi asuku na lo ade ti ninga mingi ape ndali ti mbeni kota siokpari so lo sara. Anzoni sarango ye ti ancien ni ayeke pusu ande azo so ayeke na yâ ti congrégation ni ti mû nzoni tapande ti lo, nga ti zia fini ti ala na lege ti yingo na tïtî lo ti tene lo bâ ndo na ndö ni.—1 aCor. 11:1; 16:15, 16.

¹⁰ Mara ti akoli tongaso alingbi ti sara kua ndali ti congrégation tongana ti a-ancien ti Israël so a hinga ala ândö tongana “[akoli] so ayeke na ndara, so lê ti ala ahan nga so ayeke na kode”. (Deut. 1:13). A-ancien ayeke na siokpari na terê ti ala, me na yâ ti congrégation nga na ndo so ala yeke dä, a hinga ala tongana azo so sarango ye ti ala ayeke na lege ni, azo so akpe mbeto ti Nzapa, na so afa teti mbeni ngoi awe so fini ti ala kue ague oko na amama-ndia ti Nzapa. So tënë ayeke na li ti ala ape, a yeke mû lege na ala ti sara tënë polele na lê ti azo ti congrégation.—aRom. 3:23.

¹¹ Koli so alingbi ti ga ancien ayeke zo so sarango ye ti terê ti lo ayeke lakue nzoni nga lo hinga ti sara ye nzoni na mbage ti amba ti lo. Lo yeke zo so ayeke sara ye ahon ndö ni ape nga lo yeke zo so ahinga ti kanga nzara ti bê ti lo. Lo yeke sara ye lakue nzoni na lege so lo yeke te ye ahon ndö ni ape, lo yeke nyon ye ahon ndö ni ape nga lo yeke sara angia ahon ndö ni ape. Lo yeke sara ye lakue nzoni na lege so lo nyon sämba alingbi na ni tongaso si a bi pëpe tënë na li ti lo a tene so lo yeke nyon sämba ahon ndö ni, wala lo yeke ngbâa ti sämba. Zo so sämba ahon ndö ti lo, a yeke ngangu na lo ti kanga nzara ti bê ti lo na lo lingbi pëpe ti bâ lege ti akua ti Nzapa na yâ ti congrégation nzoni.

¹² Ti tene mbeni ancien abâ ndo nzoni na ndö ti congrégation, a lingbi lo duti zo so ayeke sara ye kirikiri pëpe. A yeke bâ asarango ye ti terê ti lo na yâ ti aye so andu fason ti lekengo terê ti lo, da ti lo nga na akua ti lo ti lâ oko oko. Mara ti zo tongaso ayeke bata kua batango ape; lo yeke bâ aye so a lingbi lo sara nga lo yeke leke kapa ti sara ni. Lo yeke sara ye alingbi na amama-ndia ti Nzapa.

¹³ A lingbi mbeni ancien aduti zo so asara ye na lege ni. A lingbi lo duti zo so alingbi ti sara kua maboko na maboko na yâ ti beoko na tanga ti a-ancien ni. A lingbi lo bâ terê ti lo kota ahon amba ti lo ape nga lo ku pëpe ti tene amba ti lo asara aye so ahon ngangu ti ala. So ancien ayeke zo so asara ye na lege ni, lo yeke luti gï nganganga na ndö ti bango ndo ti lo ape, lo yeke bâ pëpe so bango ndo ti lo la ayeke nzoni ahon ti tanga ti amba ti lo a-ancien ni. Ambeni mba ti lo a-ancien ni apeut ti duti na ambeni pendere sarango ye nga na anzoni kode so peut-être lo yeke na ni ape. Mbeni ancien ayeke sara ye na lege ni tongana lo gi ti sara si bango ndo ti lo so lo fa aluti gï na ndö ti Bible nga tongana lo yeke sara kue ti mû tapande ti Jésus Christ (aPhil. 2:2-8). Ancien ayeke zo so aye tiri pëpe wala lo yeke zo ti pikango zo pëpe, me lo yeke ne amba ti lo, lo bâ ala kota ahon lo. Lo yeke zo so asara gï ye ti li ti lo pëpe, zo so lakue aye gï ti tene azo ayeda gï na bango ndo ti lo. Lo yeke pëpe zo so aye ngonzo mingi, me lo yeke na siriri na yâ ti sarango ye ti lo na azo.

¹⁴ Legeoko nga, zo so alingbi ti ga ancien na yâ ti congrégation ayeke zo so abata bibe ti lo nzoni. So aye ti tene lo yeke zo so ahinga ti gbu li nzoni kozo ti sara mbeni ye, so ti tene lo yeke mû desizion na yâ ti dongo terê ape. Lo yeke zo so ahinga amama-ndia ti Jéhovah nzoni nga lo hinga ti sara kua na ni. Zo so ayeke bata bibe ti lo nzoni ayeke duti nduru ti mä wango na ti sara ye so a hunda na lo ti sara. Lo yeke zo ti handango lê ti azo pëpe.

¹⁵ Paul adabe ti Tite so ancien ayeke zo so andoye nzoni ye. Lo yeke zo ti mbilimbili nga zo so ayeke be-ta-zo. A yeke bâ ni na yâ ti asarango ye ti lo na mbage ti amba ti lo nga na lege so lo yeke luti nganganga na ndö ti ye so ayeke mbilimbili nga na ye so ayeke nzoni. Ancien ayeke zo so ayeke voro Jéhovah na bê ti lo kue nga lo yeke ngbâ gï na ndö ti amama-ndia ti Bible so ayeke mbilimbili. Lo yeke zo so ayeke sigi na tënë kirikiri ape. Lo yeke nga zo ti yambango agene nzoni nga lo yeke mû terê ti lo wani nga na aye ti lo ndali ti nzoni ti amba ti lo.—Kus. 20:33-35.

¹⁶ Ti tene mbeni ancien asara kua ti lo nzoni, a lingbi lo duti zo so ahinga ti fa ye nzoni na zo. Ti gue oko na tënë so Paul atene na Tite, a lingbi ancien aduti “zo so angbâ gï na ndö ti tënë so ayeke tâ tënë, si lo lingbi ti wa azo na lege ti nzoni fango ye ti lo nga ti suku na azo so adë kite na tënë ni.” (Tite 1:9). A lingbi ancien ahinga ti fa nda ti tënë na azo, ti fa aye so afa atene tënë tongaso ayeke tâ tënë, ti hon ndö ti atënë so ayeke kanga lege na lisoro, nga lo hinga ti sara kua na Bible na mbeni lege so aga na azo ti yeda na tënë ni nga ti sara si mabe ti ala akpengba. Lo yeke sara ni atâa na ngoi so aye atambela nzoni wala na ngoi ti wusuwusu (2 Tim. 4:2). Lo hinga ti kanga bê, tongaso si lo sara ye na ngangu ape na ngoi so lo yeke suku na mbeni zo so asara faute, wala lo yeke ga na mbeni zo so ayeke na kite na bê ti lo ti yeda na tënë ti lo nga ti pusu zo ni ti sara anzoni kusala so aluti na ndö ti mabe. Tongana ancien ahinga biani ti fa ye atâa na gbele gbâ ti azo wala gï lo na mbeni zo, ye so ayeke fa so lo sara ye alingbi na kpengba ye so a hunda so.

¹⁷ A yeke kota ye ti tene a-ancien ayapu na kua ti fango tënë. Tongana ala sara tongaso, a yeke bâ nga polele so ala ye ti mû tapande ti Jésus, so kua ti fango nzoni tënë ayeke kota ye mingi na lê ti lo. Jésus abi bê ti lo lani mingi na adisciple ti lo. Lo fa ni na lege so lo mû maboko na ala ti ga anzoni wafango tënë (Marc 1:38; Luc 8:1). Tongana a-ancien ayeke fa tënë lakue, atâa gbâ ti kua so ala yeke na ni, a yeke pusu azo ti yâ ti congrégation ni kue ti mû tapande ti ala. Nga, tongana a-ancien ayeke sigi na fango tënë na azo ti sewa ti ala wani nga na aita ti congrégation, ala yeke “wa terê na popo ti” ala.—aRom. 1:11, 12.

¹⁸ Tongana a bâ aye so kue, a kpa mo bâ mo tene a hunda ye mingi na a-ancien ti sara. Tâ tënë, mbeni ancien apeut pëpe ti sara aye kue so Bible ahunda na a-ancien tâ gï na lege ni. Me a yeke na lege ni ape ti tene, na popo ti a-ancien so a soro ala, a bâ tâ polele so mbeni oko ti ala amanke mbeni oko ti aye so a hunda na a-ancien, so a sara si a lingbi ti bâ ni tongana mbeni kota wokongo. Ambeni ancien apeut ti duti na ambeni pendere sarango ye so azo ayeke bâ ni polele, me ambeni apeut ti duti na ambeni pendere sarango ye ni nde. Aye ni so kue ayeke sara si, na yâ ti bungbi ti a-ancien ni, a yeke wara anzoni sarango ye kue so a yeke na bezoin ni ti tene a-ancien abâ ndo nzoni na ndö ti congrégation ti Nzapa.

¹⁹ Na ngoi so bungbi ti a-ancien ayeke gbu li ti bâ wala azo wa la a lingbi ti tene a soro ala ti ga a-ancien, a yeke nzoni ala bata wango ti bazengele Paul so na li ti ala; lo tene: “Mbi tene na zo oko oko kue na popo ti ala ti bâ terê ti lo wani ahon ti so a lingbi zo abâ terê ti lo na ni pëpe, me ti bâ terê ti lo si lo duti na li so ayeke nzoni, zo oko oko alingbi na konongo ti mabe so Nzapa amû na lo.” (aRom. 12:3). A lingbi ancien oko oko kue asara terê ti lo kete. A lingbi ancien oko abâ terê ti lo “mbilimbili ahon ndö ni” pëpe na ngoi so ala yeke bâ wala mbeni ita-koli alingbi ti ga ancien (Zo-ti. 7:16). So bungbi ti a-ancien ahinga nzoni asarango ye so Bible ahunda na mbeni zo ti sara si lo ga ancien, a lingbi ala gi ti bâ wala ita-koli ni asara ye alingbi na ti so a hunda, me ala yeke ku pëpe ti tene lo sara aye ni tâ nzoni kue si. Tongana a-ancien ni ahinga so zo kue ayeke na siokpari na terê ti lo, nga ala kpe bibe ti mungo mbage ti zo wala ti handango lê ti zo, na ngoi so ala yeke gi ti bâ wala mbeni ita alingbi na kua ti ancien, ala yeke fa so ala sara ye alingbi na andia ti Jéhovah so ayeke mbilimbili nga ala sara ye ndali ti nzoni ti congrégation. A-ancien ni ayeke sambela ndali ti zo oko oko so ala ye ti soro lo, na ala yeke zia si yingo vulu ti Nzapa afa lege na ala. So ayeke mbeni oko ti akota kua so ala yeke na ni, na a lingbi ala sara ni a lingbi na wango ti Paul so lo tene na ala ti ‘zia maboko ti ala hio na li ti mbeni zo pëpe.’—1 Tim. 5:21, 22.

LENGO TI YINGO

²⁰ Aita-koli so akpengba na lege ti yingo ayeke fa polele so a yeke yingo vulu la afa lege na ala, na ala yeke fa lengo ti yingo so na yâ ti gigi ti ala. Paul afa molongo ti ambage gumbaya ti lengo ti yingo ni so. A yeke: “Ndoye, ngia, siriri, kangango bê ti ku, sarango nzoni na zo, nzoni bê, mabe, sarango ye na ngangu pëpe, kangango nzara ti bê.” (aGal. 5:22, 23). A-ancien so ayeke na amara ti sarango ye ni so ayeke sara nzoni mingi na aita, na ala yeke mû maboko na congrégation ni ti sara kua ti Nzapa na yâ ti beoko. Sarango ye ti ala nga na aye ti peko ti kua ti ala ayeke fa na gigi so yingo vulu la asoro ala.—Kus. 20:28.

AKOLI SO AMAÏ BIBE TI DUTINGO BEOKO

²¹ A yeke tâ kota ye mingi ti tene a-ancien asara kua maboko na maboko ti sara si aita aduti beoko na yâ ti congrégation. Peut-être asarango ye ti ala ayeke nde nde, me ala yeke bata beoko so ayeke na popo ti ala na lege so, ala yeke dengi mê ti mä tënë ti amba ti ala na nengo zo, même si ala lingbi pëpe ti mä terê na ndö ti aye kue so ala yeke sara lisoro na ndö ni. Tongana ye ni ague nde na mbeni mama-ndia ti Bible ape, a lingbi zo oko oko aduti nduru ti yeda na desizion so bungbi ti a-ancien ni ayeke mû na nda ni nga ti sara ye alingbi na ni. Tongana ala duti nduru ti yeda na bango ndo ti amba ti ala, a yeke fa so “ndara so alondo na nduzu”, so ayeke “sara ye na siriri, [nga] a yeke sara ye ahon ndö ni pëpe”, la ayeke fa lege na ala (Jacq. 3:17, 18). A lingbi mbeni ancien apensé pëpe so ni yeke kota ahon tanga ti a-ancien ni kue, na a lingbi mbeni ancien agi ti komande na ndö ti amba ti lo pëpe. Tongana a-ancien ayeke sara kua maboko na maboko na popo ti ala ndali ti nzoni ti congrégation, andâ ala yeke sara kua maboko na maboko na Jéhovah la.—1 aCor., chap. 12; aCol. 2:19.

GI TI GA ANCIEN

²² A yeke nzoni aita-koli so akpengba na lege ti yingo asara nzara ti ga a-ancien (1 Tim. 3:1). Me kua ti ancien ayeke kete kua ape nga ahunda ti sara asacrifice. A hunda ti duti nduru ti sara kua ndali ti aita, so ti tene ti bâ ndo na ndö ti ala na lege ti yingo. Ti gi ti ga ancien aye ti tene ti sara ye alingbi na aye so Bible ahunda na azo so aye ti ga ancien.

DUTINGO TI MBENI ANCIEN APEUT TI CHANGÉ

²³ Mbeni ita-koli so asara kua ti ancien be-ta-zo a sara angu mingi awe apeut ti duti na kpale ti seni wala même ti duti na ngangu tongana ti kozo ape. Peut-être ndali ti so ngu ti lo ahon mingi, lo lingbi mbeni pëpe ti sara akua kue so a hunda na mbeni ancien ti sara. Me atâa so kue, a lingbi a ngbâ lakue ti ne lo nga ti bâ lo tongana ancien na ngoi kue so lo ngbâ na yâ ti kua ni. Lo bezoin pëpe ti zia kua ti lo ni ndali ti so lo lingbi pëpe ti sara ni tongana ti kozo. A lingbi a ne lo lakue mingi tongana ti so a yeke ne ka na a-ancien so ayeke mû akode kue so ala yeke na ni ti sara na kua ti batango kundu ti ataba ti Nzapa.

²⁴ Me tongana mbeni ita-koli abâ so a yeke nzoni lo zia kua ti ancien ngbanga ti so aye so achangé na yâ ti dutingo ti lo asara si lo peut ti sara kua ni tongana ti kozo ape, lo lingbi ti soro ti zia kua ni senge (1 Pi. 5:2). A lingbi a ngbâ lakue ti ne lo. Lo peut ti sara anzoni ye mingi na yâ ti congrégation, atâa so lo yeke sara encore kua ti ancien ape.

AKUA TI A-ANCIEN NA YÂ TI CONGRÉGATION

²⁵ A-ancien ayeke sara akua nde nde na yâ ti congrégation. Na yâ ti congrégation, a yeke wara coordinateur ti bungbi ti a-ancien, secrétaire, surveillant ti kusala, zo ti mungo li ni na Mandango Tour ti Ba Ndo nga na surveillant ti bungbi ti Kusala ti e nga na gigi ti e. Mingi ti a-ancien ni ayeke sara kua tongana asurveillant ti groupe. A-ancien so ayeke sara kua ni gï teti mbeni ngoi ape. Me tongana mbeni ancien achangé congrégation, wala lo lingbi ti sara akua ti lo ape ndali ti kobela, wala tongana a si so lo lingbi mbeni pëpe ti sara kua ni ndali ti so lo yeke sara encore ape aye so Bible ahunda na mbeni zo so ayeke sara kua ti ancien, a lingbi ti soro mbeni ancien nde ti sara kua ti lo ni. Na yâ ti acongrégation so wungo ti a-ancien ni ayeke mingi ape, a lingbi ti hunda na mbeni ancien oko ti sara akua mingi juska na ngoi so a wara ambeni ita-koli so alingbi na kua ti ancien.

²⁶ Coordinateur ti bungbi ti a-ancien ayeke mû li ni na abungbi so a-ancien ti congrégation ni ayeke sara. Lo yeke sara terê ti lo kete ti sara kua maboko na maboko na amba ti lo a-ancien na yâ ti kua ti bango ndo na ndö ti kundu ti Nzapa (aRom. 12:10; 1 Pi. 5:2, 3). A lingbi lo duti zo so ahinga ti leke yâ ti akua nzoni mingi, nga lo yeke mû li ni na bê ti lo kue.—aRom. 12:8.

²⁷ Secrétaire ayeke bâ tënë ti adossier ti congrégation nga lo yeke fa peko ti atënë so ayeke kota mingi na amba ti lo a-ancien ni. Tongana lo bezoin mungo maboko na yâ ti kua ti lo, a lingbi ti hunda na mbeni ancien nde wala na mbeni wakua ti mungo maboko ti mû maboko na lo.

²⁸ Surveillant ti kusala ayeke bâ ndo na ndö ti kua ti fango tënë nga na ambeni ye so andu kua ti fango tënë. Lo yeke leke lakue ti sara vizite na agroupe ti fango tënë kue, tongaso na nda-yenga oko na yâ ti nze oko oko, lo yeke sara vizite na groupe oko. Na yâ ti akete congrégation so agroupe ti fango tënë ni ayeke mingi ape, lo lingbi ti leke ti sara vizite na agroupe oko oko fani use na yâ ti ngu oko. Na ngoi ti vizite ti lo ni, lo yeke mû li ni na bungbi ti fango tënë, lo yeke sigi na fango tënë na aita ti groupe ni nga lo yeke mû maboko na ala ti sara avizite nga na a-étude ti ala.

ASURVEILLANT TI GROUPE

²⁹ Ti sara kua tongana surveillant ti groupe na yâ ti congrégation ayeke mbeni kota pasa mingi. Kua ti surveillant ti groupe ayeke (1) ti bi bê ti lo mingi na ndö ti nzoni duti ti zo oko oko kue ti yâ ti groupe ni na lege ti yingo; (2) ti mû maboko na zo oko oko kue ti yâ ti groupe ni ti fa tënë lakue, ti bâ ni na nene ni na ti sara ni na ngia; nga (3) ti mû maboko na awakua ti mungo maboko so ayeke na yâ ti groupe ni nga ti fa ye na ala, tongaso si ala gi ti sara akua na yâ ti congrégation. Bungbi ti a-ancien la ayeke bâ wala aita-koli wa la apeut ti sara akua ni so kue nzoni.

³⁰ Ndali ti so kua ni ayeke kota mingi, tongana lege ayeke dä, a yeke nzoni ti tene asurveillant ti agroupe aduti a-ancien. Wala a lingbi ti soro mbeni wakua ti mungo maboko so alingbi ti sara kua ni so juska na ngoi so a wara mbeni ancien ti sara ni. Wakua ti mungo maboko so ayeke sara mara ti kua ni so, a yeke iri lo wakua ti groupe ti fango tënë, ngbanga ti so lo de ti ga ancien ape. Me lo yeke sara kua ti lo ni na gbe ti fango lege ti a-ancien.

³¹ Mbeni kota kua so surveillant ti groupe ayeke na ni ayeke ti mû li ni na yâ ti kua ti fango tënë. Tongana lo yeke fa tënë lakue nga lo yeke sara ni na bê ti lo kue, a yeke sara ande si awafango tënë ti groupe ni ayeke mû tapande ti lo. Tongana aita ayeke wara terê place oko ndali ti fango tënë, ye so ayeke kpengba ala nga ayeke mû maboko na ala. Ni la, a yeke nzoni a leke mbeni kapa ti fango tënë so alingbi na ngoi ti mingi ti aita ti groupe ni (Luc 10:1-16). A lingbi surveillant ni asara kue si territoire aduti dä lakue. Mingi ni, lo la lo yeke mû li ni na bungbi ti fango tënë, na lo yeke kangbi yâ ti awafango tënë si ala gue na fango tënë na lango ni so. Tongana lo lingbi ti duti dä ape, a lingbi lo leke ti tene mbeni ancien nde wala mbeni wakua ti mungo maboko amû li ni na place ti lo. Me tongana mbeni ancien wala mbeni wakua ti mungo maboko ayeke dä ape, surveillant ni alingbi ti soro mbeni wafango tënë nde so alingbi ti sara kua ni, tongaso si aita awara mbeni zo so alingbi ti mû li ni.

³² A lingbi surveillant ti groupe aleke kapa ti vizite ti surveillant ti kusala alango mingi kozoni si lango ti vizite ni asi. Lo yeke fa lango ti vizite ni na groupe ti lo, na lo yeke leke azo ti groupe ni ti ku na aye ti nzoni so ala yeke wara na ngoi ti vizite ni. Tongana ala kue ahinga tënë ti kapa so a leke ni nzoni ndali ti vizite ni, ala lingbi ti mû maboko na bê ti ala kue si kapa ni atambela nzoni.

³³ A leke ti tene wungo ti aita so ayeke na yâ ti groupe ti fango tënë oko oko aduti mingi ape. Ye so ayeke mû lege na surveillant ti groupe ni ti hinga azo kue ti yâ ti groupe ni nzoni. Legeoko tongana ti mbeni berger so ayeke na ndoye, lo yeke gi ti hinga zo oko oko nzoni. Lo yeke tara ti mû maboko nga ti mû wango ti kpengba zo oko oko kue na ndö ti kua ti fango tënë, ti wa ala ti ga na abungbi na ti mû mbage dä. Lo yeke sara nga ye kue so lo lingbi ti sara ti mû maboko na zo oko oko kue ti ngbâ lakue ti kpengba na lege ti yingo. Ala so terê ti ala ason wala so vundu asara ala mingi alingbi ti wara ye ti nzoni na lege ti vizite so lo yeke sara na ala. Mbeni tënë so alingbi ti pusu zo ti sara ye wala gï mbeni kete wango tongaso alingbi ti sara si ambeni ita aduti na nzara ti sara akua mingi encore na yâ ti congrégation ti mû maboko mingi na aita. Surveillant ti groupe ayeke sara effort mingi ti mû maboko na azo ti groupe ti lo. Ye oko, teti so lo yeke ancien nga berger, lo yeke bi bê ti lo nga na ndö ti nzoni duti ti aita kue na yâ ti congrégation, nga lo yeke nduru ti mû maboko na ala kue so abezoin ni.—Kus. 20:17, 28.

³⁴ Mbeni oko ti akua so surveillant ti groupe ayeke na ni ayeke ti mû maboko ti ro arapport ti awafango tënë ti groupe ti lo. Na pekoni, a yeke mû arapport ni kue na secrétaire. Wafango tënë oko oko kue alingbi ti mû maboko na surveillant ti groupe ni na lege so ala mû rapport ti ala hio na hunzingo ti nze. Ala lingbi ti sara tongaso na lege so ala mû rapport ti ala na surveillant ti groupe ni wani, tongana nze ni ahunzi, wala ala bi ni na yâ ti boîte so a leke ndali ni na Da ti Royaume.

KOMITE TI SERVICE TI CONGRÉGATION

³⁵ Ambeni kua ayeke dä so Komite ti service ti congrégation la ayeke sara ni. Na yâ ti Komite so, a yeke wara coordinateur, secrétaire na surveillant ti kusala. Na tapande, Komite ti service la ayeke yeda ti tene a sara adiskur ti mariage nga na ti lungo kuâ na Da ti Royaume. Komite ni ayeke kangbi nga yâ ti awafango tënë na yâ ti agroupe ti fango tënë. Lo yeke yeda nga na ademande ti kua ti pionnier permanent, pionnier auxiliaire nga na ti ambeni kua nde. Komite ni ayeke sara kua na gbe ti fango lege ti bungbi ti a-ancien.

³⁶ Komite ti Filiale ayeke fa na yâ ti alettre ambilimbili kua ti aita-koli so ayeke mû li ni na Mandango Tour ti Ba Ndo, ti surveillant ti bungbi Kusala ti e nga na gigi ti e nga na ti tanga ti a-ancien ti congrégation ni kue.

³⁷ Na yâ ti congrégation oko oko kue, ngoi na ngoi, bungbi ti a-ancien ayeke wara terê ti sara lisoro na ndö ti aye so andu guengo na li ni ti congrégation ni. Na ngoi ti vizite ti surveillant ti circonscription oko oko kue a-ancien ayeke sara bungbi, ala yeke sara nga mbeni bungbi encore nze ota tongaso na peko ti vizite ni. Me a-ancien alingbi ti wara terê na ngoi kue so bezoin ni ayeke dä.

WOKO TERÊ TI MO NA GBE TI ALA

³⁸ A-ancien ayeke mbilimbili-kue ape. Me a hunda na azo ti yâ ti congrégation kue ti woko terê ti ala na gbe ti a-ancien ngbanga ti so a yeke ye so Jéhovah aleke la. A-ancien ayeke na tënë ti kiri na ni ande na lo ndali ti aye so ala sara. Ala yeke sara kua na iri ti lo nga ala sara kua tongana ti so lo fa. A-Hébreu 13:17 atene: “Ala mä yanga ti ala so ayeke mû li ni na popo ti ala na ala woko terê ti ala na gbe ti ala, ndali ti so azo so ayeke bâ ndo na ndö ti ala tongana azo so ayeke na tënë ti kiri na ni na Nzapa, si ala sara kua ti ala na ngia me na demango terê pëpe, ndali ti so ye ni ayeke sara ande nzoni na ala pëpe.” Legeoko tongana ti so Jéhovah ayeke sara kua na yingo vulu ti soro mbeni ita ti sara kua, Jéhovah ayeke sara kua na oko yingo vulu so ti zi na maboko ti mbeni ita kua ti ancien tongana ita ni afa na gigi lengo ti yingo ni encore ape, nga tongana dutingo ti lo ague fadeso nde na ye so Bible ahunda.

³⁹ Eskê e yeke kiri singila biani teti ngangu kua nga na nzoni tapande ti a-ancien ti congrégation? Lani tongana Paul ayeke sû mbeti na congrégation ti Thessalonique, lo mû wango so na aita ni: “Aita, e hunda na ala ti ne azo so ayeke sara kua ngangu na popo ti ala, so ayeke fa lege na ala na yâ ti kusala ti Seigneur nga so ayeke gboto mê ti ala. E hunda nga na ala ti tene, na lege ti ndoye, ala ne azo so mingi mingi ndali ti kusala so azo so ayeke sara.” (1 aThes. 5:12, 13). Mingi ti angangu kua so a-ancien ayeke sara asara si kua so e yeke sara na Nzapa akpengba na e ape nga e wara ngia mingi dä. Na yâ ti kozo mbeti ti Paul na Timothée, lo sara nga tënë ti bango ndo so a lingbi azo ti yâ ti congrégation aduti na ni na mbage ti a-ancien; lo tene: “A-ancien so ayeke fa lege nzoni, zia a bâ ala tongana azo so alingbi ti wara gonda fani use, mbilimbili ala so ayeke sara kua ngangu na lege ti tënë ti yanga ti ala nga na lege ti fango ye ti ala.”—1 Tim. 5:17.

AMBENI KUA NDE SO A-ANCIEN AYEKE NA NI

⁴⁰ Na ambeni ngoi, a yeke soro ambeni ancien ti sara kua na yâ ti Bungbi ti aita so ayeke gue na yâ ti ada-nganga ti bâ aita so ayeke na kobela. Ambeni ayeke na yâ ti aKomite so abâ lege ti songo na ada-nganga, nga ala yeke sara lisoro na adocteur na yâ ti ada-nganga ni ti wa ala ti sara kua na akode ti savango zo sân mênë na ngoi so ala yeke gi ti sava aTémoin ti Jéhovah so ayeke na kobela. Ambeni ancien ni nde ayeke sara si kua ti Royaume ague na devant na lege so ala yeke mû maboko na kua ti lekengo aDa ti Royaume nga na aDa ti Assemblée nga ala yeke bata ni si angbâ pendere, wala ala yeke sara kua na yâ ti aKomite ti akota bungbi ti lango ota. Aita kue na yâ ti bungbi ti Jéhovah abâ na nene ni mingi ngangu kua ti aita so nga na bibe so ala yeke na ni ti mû ngoi ti ala nga na ngangu ti ala ti sara na akua so. Biani, e ‘ngbâ ti bâ mara ti azo tongana ala so na nene ni mingi’.—aPhil. 2:29.

SURVEILLANT TI CIRCONSCRIPTION

⁴¹ Bebungbi la ayeke bâ tënë ti sorongo a-ancien so alingbi ti sara kua tongana asurveillant ti circonscription. Bureau ti filiale la ayeke hunda na asurveillant so ti tene ala sara vizite na acongrégation so ayeke na yâ ti circonscription ti ala, na mingi ni ala yeke sara ni fani use na yâ ti ngu oko. Ngoi na ngoi, ala yeke sara nga vizite na apionnier so ayeke na yâ ti aterritoire so ayo. Ala yeke leke akapa ti vizite ti ala, na ala yeke fa ni na congrégation oko oko kue alango mingi kozoni si ala ga na vizite ni, tongaso si vizite ni aga na ye ti nzoni mingi.

⁴² Coordinateur ti bungbi ti a-ancien ayeke mû li ni ti leke aye na yâ ti congrégation teti vizite ni, tongaso si a kpengba azo kue na lege ti yingo (aRom. 1:11, 12). Tongana coordinateur ni ahinga tënë na ndö ti lango ti vizite ti surveillant ni nga na ndö ti aye so surveillant ni na wali ti lo (tongana lo yeke na wali) ayeke na bezoin ni, coordinateur ti bungbi ti a-ancien ni ayeke leke, na lege ti aita nde nde, ti wara mbeni ndo ti lango nga na ambeni ye nde so ala yeke na bezoin ni. Lo yeke sara kue si azo kue, même surveillant ti circonscription ni, ahinga tënë ti aye so a leke ni so.

⁴³ Surveillant ti circonscription ni ayeke bâ coordinateur ti bungbi ti a-ancien na ndö ti akapa ti abungbi, nga na ti abungbi ti fango tënë. A yeke leke aye ni so alingbi na awango ti surveillant ti circonscription ni nga na fango lege ti filiale. A lingbi a fa kozo na aita alango nga na ndo ti abungbi ti congrégation, ti bungbi ti apionnier, ti bungbi ti a-ancien nga na awakua ti mungo maboko nga na ti abungbi ti fango tënë.

⁴⁴ Na mardi na peko ti midi, surveillant ti circonscription ayeke bâ afiche ti awafango tënë, arapport so afa wungo ti azo so ayeke ga na abungbi, acarte ti territoire nga na ambeti ti compte. Ye so ayeke mû ande lege na lo ti hinga ambeni ye na ndö ti abezoin ti congrégation ni nga tongana nyen la lo lingbi ti mû maboko na aita so kua ti ala ayeke ti bâ ndo na ndö ti ambeti ni so. Coordinateur ti bungbi ti a-ancien ayeke leke ti tene surveillant ni awara ambeti ni so kozo.

⁴⁵ Na ngoi ti vizite ti surveillant ti circonscription ni, lo yeke mû ngoi ti sara lisoro na aita oko oko tongana lege ayeke dä. Lo lingbi ti sara ni na angoi ti bungbi, na fango tënë, na angoi ti tengo ye nga na ambeni ngoi nde. Na ndö ni, lo yeke sara bungbi na a-ancien nga na awakua ti mungo maboko ti mû na ala awango ti Bible, ti fa na ala ambeni ye so ala lingbi ti sara nga ti tene na ala atënë so alingbi ti mû ande maboko na ala ti sara kua ti ala ti bango ndo na ndö ti kundu ni na ti bata ni (aProv. 27:23; Kus. 20:26-32; 1 Tim. 4:11-16). Lo yeke sara nga bungbi na apionnier ti kpengba ala na yâ ti kua ti ala, nga ti mû maboko na ala oko oko kue na yâ ti akpale so ala wara peut-être na yâ ti kua ti ala ti fango tënë.

⁴⁶ Tongana ambeni tënë nde ayeke dä so a hunda ti bâ lege ni, surveillant ti circonscription ayeke mû maboko na a-ancien ni alingbi na ye so lo lingbi ti sara na ngoi ti vizite ni. Tongana ala wara lege ti bâ lege ti atënë ni kue na yâ ti yenga ni so ape, lo lingbi ti mû maboko na a-ancien ni wala na aita so tënë ni abâ ala ti gi ye so Mbeti ti Nzapa atene na ndö ni. Tongana a hunda ti tene filiale afa bango ndo ti lo na ndö ti tënë ni, a lingbi lo na a-ancien ni atokua na filiale anzene nzene tënë kue na ndö ti kpale ni.

⁴⁷ Na ngoi so surveillant ti circonscription ayeke sara vizite, lo yeke sara bungbi na yâ ti congrégation so lo yeke na vizite dä. Ngoi na ngoi, a lingbi ti changé programme ti abungbi ni alingbi na aye so filiale afa. Lo yeke mû adiskur ti kpengba congrégation ni, ti pusu aita na kusala nga ti fa ye na ala. Lo yeke sara kue ti pusu aita ti ye Jéhovah, ti ye Jésus Christ nga na bungbi ti Jéhovah.

⁴⁸ Mbeni raison so ndali ni asurveillant ti circonscription ayeke sara vizite ayeke ti pusu aita ti fa tënë mingi nga ti mû na ala awango so alingbi na kua ti fango tënë ni. Aita mingi na yâ ti congrégation ni alingbi ti leke yâ ti kapa ti ala, tongaso si ala fa tënë mingi na yâ ti yenga ni. Peut-être ala lingbi ti leke ti mû kua ti pionnier auxiliaire na nze so congrégation ti ala ayeke na vizite. Ala so aye ti fa tënë na surveillant ni wala na wali ti lo alingbi ti sara tënë ni kozo. Aita alingbi ti wara ye ti nzoni mingi tongana ala na surveillant ti circonscription wala na wali ti lo ague asara a-étude wala avizite ti ala. E gonda mo mingi ndali ti ngangu so mo yeke sara ti mû mbage ti mo kue na fango tënë na yenga ti vizite ni.—aProv. 27:17.

⁴⁹ Ngu oko oko, a yeke leke ti tene na yâ ti circonscription oko oko, a sara kota bungbi ti lango oko fani use. Na angoi ni so, surveillant ti circonscription la ayeke bâ lege ti lekengo aye ndali ti akota bungbi ni so. Surveillant ti circonscription ni ayeke soro ita so ayeke sara kua ti surveillant ti assemblée nga na adjoint ti lo. Ala yeke sara kua maboko na maboko na lo ti leke aye teti kota bungbi ni. Ye so ayeke mû ande lege na surveillant ti circonscription ni ti zia lê ti lo mingi gï na ndö ti kapa ti kota bungbi ni. Surveillant ni ayeke soro nga ambeni ita-koli nde so alingbi na akua ni ti bâ ndo na ndö ti andokua nde nde ti kota bungbi ni. Lo yeke leke nga ti tene a bâ tënë ti compte ti circonscription ni na peko ti kota bungbi oko oko. Na ngoi ti mbeni kota bungbi ti lango oko ni, filiale ayeke tokua mbeni ita-koli na iri ti Béthel ti mû adiskur. Ndali ti yongo ti lege wala ndali ti so ambeni ndo ti a-assemblée ni akono ape, a kangbi yâ ti ambeni circonscription ni na akete mbage, na ambage oko oko ayeke sara akota bungbi ti lango oko ni nde nde.

⁵⁰ Na hunzingo ti nze oko oko, surveillant ti circonscription ni ayeke tokua rapport ti lo ti fango tënë na bureau ti filiale. Tongana lo sara ambeni kete dépense, na tapande ndali ti voyage, ti kobe, ti ndo ti lango nga na ambeni ye nde so andu kua ti lo, si congrégation so lo sara vizite ni dä afuta aye ni so na lo ape, lo lingbi ti sû ni na mbeti ti tokua na bureau ti filiale. Aita so ayeke gue na ando nde nde ahinga so, tongana ala zia aye ti Royaume na kozo ndo, aye ti mitele ayeke manke ala ape, tongana ti so Jésus amû zendo ni lani (Luc 12:31). A yeke nzoni acongrégation ahinga so pasa la ala yeke na ni ti yamba a-ancien so ayeke sara kua ti ala na bê ti ala kue.—3 Jean 5-8.

KOMITE TI FILIALE

⁵¹ Na yâ ti afiliale oko oko kue ti aTémoin ti Jéhovah na yâ ti dunia kue, a yeke soro aita-koli ota wala ahon ni, so ayeke aita so alingbi nga so ayeke abiazo, ti tene ala sara kua tongana Komite ti Filiale. Komite ni ayeke bâ ndo na ndö ti kua ti fango tënë na yâ ti kodro wala akodro so ayeke na gbe ti filiale ni. Mbeni oko ti amembre ti Komite ti Filiale ni ayeke sara kua tongana coordinateur ti Komite ni.

⁵² Ala so ayeke na yâ ti Komite ti Filiale ni ayeke bâ tënë ti aye nde nde so andu acongrégation kue ti territoire ti ala. Komite ni ayeke bâ ndo na ndö ti kua ti fango nzoni tënë ti Royaume na yâ ti aterritoire kue so ayeke na gbe ti filiale ni. Nga, komite ni ayeke leke ti tene a zia na sese acongrégation nga na acirconscription tongaso si a bâ ndo nzoni na ndö ti abezoin ti territoire ni. Komite ti Filiale ni ayeke bâ nga lege ti akua ti amissionnaire, apionnier spécial, apionnier permanent nga na ti apionnier auxiliaire. Tongana akota bungbi ti lango oko wala ti lango ota ayeke dä, komite ni ayeke leke aye nga lo yeke mû akua na azo tongaso si “ye kue atambela na lege ni nga na yâ ti wusuwusu pëpe.”—1 aCor. 14:40.

⁵³ A yeke zia mbeni Komite ti kodro na yâ ti akodro so filiale ayeke dä ape, me so Komite ti Filiale ti mbeni kodro nde la ayeke bâ ndo na ndö ni. Ye so ayeke mû lege ti bâ ndo nzoni mingi na ndö ti akua so a yeke sara na ndo so Komite ti kodro ni ayeke dä. Komite ti kodro ni ayeke bâ tënë ti aye so andu ada ti Béthel nga na andokua ni. Lo yeke bâ nga tënë ti ambeti so a yeke tokua na ala nga tënë ti arapport, nga mingi ni lo yeke bâ tënë ti kua ti fango tënë. Komite ti kodro ayeke sara kua maboko na maboko na Komite ti Filiale ti sara si kua ti Royaume ague na li ni.

⁵⁴ Bebungbi la ayeke soro aita-koli kue so ayeke sara kua tongana amembre ti aKomite ti Filiale na ti aKomite ti Kodro.

AITA SO AGA NA IRI TI KOTA NDOKUA TI E

⁵⁵ Ngoi na ngoi, Bebungbi ayeke leke ti tene ambeni ita-koli so alingbi ague asara vizite na afiliale ti yâ ti dunia kue. Ita so a soro lo ti sara vizite ni a iri lo ita so aga na iri ti kota ndokua ti e. Kozo kua ti lo ayeke ti kpengba sewa ti Béthel nga ti mû maboko na Komite ti Filiale ti leke ambeni tënë nga na akpale so andu kua ti fango tënë nga na ti sarango adisciple. Lo yeke sara nga bungbi na ambeni surveillant ti circonscription nga ngoi na ngoi na amissionnaire. Na ngoi ti abungbi ni lo yeke sara lisoro na ala na ndö ti akpale ti ala nga na aye so ala yeke na bezoin ni. Lo yeke tene atënë so alingbi ti kpengba ala na yâ ti ngangu kua so ala yeke na ni, so ayeke ti fa tënë ti Royaume nga ti sara adisciple.

⁵⁶ Ita so aga na iri ti kota ndokua ti e ayeke bi bê ti lo mingi na ndö ti kua so a yeke sara na yâ ti territoire, so andu fango tënë ti Royaume nga na ambeni kua nde so andu congrégation. Tongana lo yeke na ngoi, lo lingbi nga ti gue ti sara vizite na abureau ti traduction so ayo na filiale. Tongana ita so aga na iri ti kota ndokua ti e ayeke sara vizite na mbeni filiale, si lo bâ so lege ayeke dä, lo lingbi nga ti sigi na fango tënë.

A-ANCIEN AYEKE SARA KUA TI ALA NA NDOYE

⁵⁷ E wara ye ti nzoni mingi na lege ti ngangu kua ti aChrétien biazo so, nga na lege so ala yeke bi bê ti ala na e na ndoye. Tongana e ngbâ ti woko terê ti e na gbe ti a-ancien, so a mû na ala kua ti bango ndo na ndö ti kundu ti ataba ti Nzapa, a yeke sara si e duti beoko na Christ Jésus, Mokonzi ti congrégation (1 aCor. 16:15-18; aÉph. 1:22, 23). Ye ti peko ni ayeke so yingo ti Nzapa ayeke sara kua ti lo nzoni na yâ ti acongrégation ti dunia kue, nga Mbeti ti Nzapa ayeke fa lege na kua ti e na yâ ti dunia kue.—Ps. 119:105.