Aye ayeke tambela tongana nyen na yâ ti congrégation?

NA YÂ ti kozo mbeti ti bazengele Paul na aCorinthien, lo fa mbeni kota tâ tënë na ndö ti Nzapa, lo tene: “Nzapa ayeke Nzapa ti wusuwusu pëpe, me ti siriri.” Na pekoni, na ngoi so lo yeke sara ambeni tënë na ndö ti abungbi ti congrégation, lo tene: “Ala zia si ye kue atambela na lege ni nga na yâ ti wusuwusu pëpe.”—1 aCor. 14:33, 40.

² Gï na tongo nda ti kozo mbeti ti bazengele Paul na aCorinthien so, lo mû awango na ndö ti atënë ti kangbi so ayeke lani na yâ ti congrégation ti Corinthe. Paul awa aita ti congrégation ni ti sara si “tënë ti ala kue amä terê,” nga ti “duti biani beoko na yâ ti bibe oko nga na bango ndo oko.” (1 aCor. 1:10, 11). Na pekoni, lo mû wango na ndö ti atënë nde nde so aga na kangbi lani na yâ ti congrégation ni. Lo mû tapande ti terê ti zo ti fa so a yeke kota ye mingi ti tene ala duti beoko nga ala sara kua maboko na maboko. Lo wa azo kue na yâ ti congrégation ti aChrétien, atâa kua ti ala ayeke so wa, ti bi bê na amba ti ala na ndoye (1 aCor. 12:12-26). So Paul atene azo ti congrégation adoit ti sara kua maboko na maboko tongaso, a ye ti fa so a yeke leke yâ ni ti tene atambela nzoni.

³ Me aye ayeke tambela tongana nyen lani na yâ ti congrégation ti aChrétien? Azo wa la ayeke leke yâ ti akua ni? A yeke leke yâ ti akua ni lani tongana nyen? Nga azo wa la ayeke mû lani li ni dä? Bible la alingbi ti mû maboko na e ti wara akiringo tënë so ayeke polele na ahunda so.—1 aCor. 4:6.

AYE NI ATAMBELA TONGANA TI SO NZAPA AFA

⁴ Congrégation ti aChrétien abâ gigi lani na lango ti Pentecôte ti ngu 33. Nyen la e lingbi ti manda na ndö ti congrégation ti ngoi ni so? Aye atambela lani na yâ ti congrégation ni so tongana ti so Nzapa afa, so ti tene na gbe ti komandema (na Grec, kratos) ti Nzapa (théos). Atënë use so asigi na 1 Pierre 5:10, 11. Tondo ti aye so asi lani na Jérusalem a sara fadeso nduru na ngu 2 000 tongaso awe, so a sû ni na gbe ti yingo vulu, afa biani so a yeke Nzapa la si azia lani na sese congrégation ti aChrétien so a soro ala ti gue na yayu (Kus. 2:1-47). A yeke da so Nzapa la aleke, nga a iri aChrétien ni azo ti da ti Nzapa (1 aCor. 3:9; aÉph. 2:19). Lege so aye atambela na ni lani na yâ ti congrégation ti akozo Chrétien la acongrégation ti laso ayeke mû peko ni.

⁵ Kozo congrégation ti aChrétien ato nda ni lani na adisciple 120 tongaso. A tuku lani yingo vulu na ndö ti ala, ye so asara si tënë so ayeke na Joël 2:28, 29 aga tâ tënë (Kus. 2:16-18). Me gï na oko lango ni so, azo 3 000 tongaso awara batême, na ala ga na yâ ti congrégation ti ala so a soro ala na lege ti yingo vulu ti gue na yayu. Ala yeda na tënë so a fa na ndö ti Christ, na ala “ngbâ ti mû terê ti ala kue na ye so abazengele ayeke fa”. Na peko ti ye ni so, “lâ na lâ Jéhovah angbâ ti zia na ndö ti ala azo so lo sö ala.”—Kus. 2:41, 42, 47.

⁶ Congrégation so ayeke na Jérusalem ague na li ni lani mingi juska a sara si kota-prêtre ti aJuif adema terê ti lo so adisciple asara si afango ye ti ala amû yâ ti Jérusalem kue. Na popo ti afini disciple so ayeke na Jérusalem, a yeke wara gbâ ti aJuif so ayeke aprêtre so aga lani na yâ ti congrégation ni.—Kus. 5:27, 28; 6:7.

⁷ Jésus atene lani, atene: “Ala yeke duti atémoin ti mbi na Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.” (Kus. 1:8). A yeke ye so asi na ngoi so a komanse ti sara ye ti ngangu mingi na adisciple na Jérusalem na peko ti kuâ ti Étienne, ala so alango na yâ ti gbata ni akpe, na ala kangbi yâ ti terê ti ala kirikiri na Judée nga na Samarie. Me na ndo kue so ala gue dä, ala ngbâ gï ti fa nzoni tënë na ti sara adisciple mingi, même na popo ti azo ti Samarie (Kus. 8:1-13). Na pekoni, a fa nzoni tënë na azo so ayeke aJuif ape nga so afâ ganza ape, na ambeni ayeda ti ga adisciple (Kus. 10:1-48). Kua ti fango tënë so kue la asara si a wara gbâ ti adisciple nga asara si afini congrégation abâ gigi na ando so ayeke na yâ ti Jérusalem pëpe.—Kus. 11:19-21; 14:21-23.

⁸ Aye wa la a leke ni lani ti sara kue si afini congrégation oko oko kue atambela tongana ti so Nzapa aye? Na gbe ti yingo vulu ti Nzapa, a leke ti tene ambeni zo asara kua tongana aberger ti bata kundu ti ataba ti Nzapa. Na yâ ti acongrégation so Paul na Barnabas ague dä lani na ngoi ti kozo voyage ti ala tongana amissionnaire, ala zia a-ancien ti mû li ni (Kus. 14:23). Luc, mbeni zo so asû Bible, asara tënë ti bungbi so Paul asara lani na a-ancien ti congrégation ti Éphèse. Paul atene na ala, lo tene: “Ala sara hange na ala wani nga na groupe ti ataba ni kue, so yingo vulu azia ala na popo ni tongana azo ti bango ndo na ndö ni, si ala bata congrégation ti Nzapa, congrégation so lo vo na mênë ti Molenge ti lo wani.” (Kus. 20:17, 28). A soro lani ala ti ga a-ancien ngbanga ti so ala sara ye alingbi na aye so Bible ahunda na azo kue so aye ti ga a-ancien (1 Tim. 3:1-7). A mû lani yanga na Tite, so asara kua na terê ti Paul, ti zia azo tongana a-ancien na yâ ti acongrégation ti Crète.—Tite 1:5.

⁹ Lani tongana afini congrégation ayeke bâ gigi, abazengele nga na a-ancien ti Jérusalem la angbâ lani ti sara kota kua ti bango ndo na ndö ti congrégation ti akozo Chrétien ti akodro nde nde kue ti ngoi ni kâ. Ala sara kua lani tongana mbeni bebungbi.

¹⁰ Na ngoi so bazengele Paul ayeke sû lani mbeti na congrégation ti Éphèse, lo fa so tongana congrégation ti aChrétien ni asara kua legeoko na yingo ti Nzapa, aita ti congrégation ni ayeke ngbâ beoko, ndali ti so ala yeke be-ta-zo na Mokonzi ti congrégation ni, Jésus Christ. Bazengele ni awa aChrétien ti Éphèse ti gi ti sara terê ti ala kete nga ti bata “beoko ti yingo” na lege so ala duti na siriri na azo kue ti congrégation ni (aÉph. 4:1-6). Na pekoni, lo fa tënë ti yâ ti versê ti Psaume 68:18, na lo tene so versê ni aye ti fa so a yeke Jéhovah la aye ti tene akoli so alingbi asara kua na yâ ti congrégation tongana abazengele, aprophète, awafango nzoni tënë, aberger nga na awafango ye. Mara ti akoli tongaso, so ayeke tongana amatabisi so alondo na Jéhovah, ayeke kpengba congrégation ni kue si dutingo ti azo ni na lege ti yingo anzere na Nzapa.—aÉph. 4:7-16.

ACONGRÉGATION TI LASO AYEKE TAMBELA TONGANA TI NGOI TI ABAZENGELE

¹¹ Laso, acongrégation kue ti aTémoin ti Jéhovah ayeke tambela tongana ti ngoi ti abazengele. Tongana a bungbi acongrégation ni so kue oko, ala yeke tongana mbeni congrégation oko so na yâ ni ala so ayeke ti ambeni taba ayeke bungbi na terê ti aita ti ala so a soro ala ti gue na yayu (Zach. 8:23). A yeke grâce na Jésus Christ la congrégation ni ayeke beoko tongaso. Ti lingbi na zendo so Jésus amû lani, lo ngbâ lakue na terê ti adisciple ti lo so a soro ala ti gue na yayu “juska na lâ ni so aye ti ngoi so ayeke gue ti hunzi.” Na ngoi so congrégation ni ayeke gue na li ni, azo so ayeke ga na yâ ni ayeda na nzoni tënë ti Nzapa, ala mû fini ti ala kue na Jéhovah ti sara gï ye so bê ti lo aye na ala wara batême ala ga adisciple ti Jésus (Mat. 28:19, 20; Marc 1:14; Kus. 2:41). Ala yeda so Jésus Christ, “berger so ayeke nzoni mingi”, la ayeke Mokonzi ti kundu ti ataba ni kue. Na yâ ti kundu ni so, a yeke wara ala so a soro ala ti gue na yayu nga na “ambeni taba”. (Jean 10:14, 16; aÉph. 1:22, 23). “Kundu oko” ni so abata beoko ti lo na lege so lo yeda so Christ la ayeke Mokonzi ni, nga lo woko terê ti lo na gbe ti “ngbâa be-ta-zo so ayeke sara ye na ndara”, so Christ azia lo ti fa lege na ni. Zia e ngbâ ti sara confiance kue na ngbâa be-ta-zo so.—Mat. 24:45.

KUSALA TI A-ASSOCIATION TI E

¹² Ti mû kobe ti yingo na ngoi so alingbi nga ti fa nzoni tënë ti Royaume kozoni si nda ni aga, a zia na sese ambeni association. Andia ti akodro nde nde ayeda na a-association so kue, na a-association ni ayeke sara kua maboko na maboko na popo ti ala. A yeke sara kua na a-association ni so ti yapu kua ti fango nzoni tënë na ndö ti sese kue.

LEGE SO A LEKE NA AKUA NA YÂ TI AFILIALE

¹³ Na ndo kue so a zia mbeni filiale dä, a yeke zia mbeni Komite ti Filiale so na yâ ni a yeke wara a-ancien ota wala ahon so ti bâ ndo na ndö ti kua so a yeke sara na yâ ti kodro wala akodro so ayeke na gbe ti filiale ni. Mbeni oko ti amembre ti Komite ti Filiale ni ayeke sara kua tongana coordinateur.

¹⁴ A zia acongrégation, so ayeke na gbe ti filiale oko oko kue, na yâ ti acirconscription. Ambeni circonscription ni apeut ti kono ahon ambeni alingbi na konongo ti akodro ni, wungo ti ayanga ti kodro ni nga na wungo ti acongrégation ti ando so filiale ti ala ayeke bâ ndo na ndö ni. Na yâ ti circonscription oko oko, a yeke soro mbeni surveillant ti circonscription ti sara vizite na acongrégation so ayeke na yâ ni. Bureau ti filiale ayeke fa na asurveillant ti circonscription tongana nyen la ala yeke sara akua ti ala.

¹⁵ Acongrégation ayeda ti sara ye alingbi na aye so a leke na yâ ti bungbi ni, so ayeke teti nzoni ti azo kue. Acongrégation ni ayeke yeda na a-ancien so a soro ala ti bâ ndo na ndö ti akua so a yeke sara na yâ ti afiliale, na yâ ti acirconscription nga na yâ ti acongrégation. Ala yeke bâ ndo na mbage ti ngbâa be-ta-zo so ayeke sara ye na ndara ti mû na ala kobe ti yingo na ngoi so alingbi. Laso, ngbâa be-ta-zo nga kue ayeke mä yanga ti Christ so ayeke mokonzi ti lo. Lo yeke sara ye alingbi na amama-ndia ti Bible, nga lo yeke nduru ti sara ye alingbi na fango lege ti yingo vulu. Tongana e kue e sara kua maboko na maboko na yâ ti beoko, e yeke wara aye ti nzoni tongana ti so akozo Chrétien awara lani. Bible atene: “Acongrégation angbâ ti kpengba na yâ ti mabe na wungo ti aita ni ayeke gue na li ni lâ na lâ.”—Kus. 16:5.