Tënë ti Jéhovah ayeke na fini
Akota tënë ti mbeti ti Apocalypse: Kozo mbage ni
NA NGOI so a kanga bazengele Jean so aga mbakoro awe na zoa so a iri ni Patmos, lo wara asuma nde nde 16. Na yâ ti asuma so, lo bâ aye so Jéhovah Nzapa na Jésus Christ ayeke sara na lâ ti Seigneur: ngoi so ato nda ni na ndembe so Royaume ti Nzapa ato nda ti komande na ngu 1914 ti si na hunzingo ti Ngu Saki Oko ti Komandema ti Christ. Jean la asû mbeti ti Apocalypse na ngu 96 tongaso; na yâ ni a yeke wara asuma so, so apika bê mingi.
Zia e bâ fadeso angbongboro tënë ti yâ ti mbeti ti Apocalypse 1:1–12:17, so afa akozo suma mbasambala so Jean awara. Asuma so agbu bê ti e ndali ti so a ndu aye so ayeke si na ndo ti sese fadeso nga a fa ye so Jéhovah ayeke sara ande na yâ ti kete ngoi. Asuma so ayeke dë bê ti azo so adiko ni na mabe nga ayeke kpengba ala.—aHéb. 4:12.
“MOLENGE TI NGASANGBAGA NI” AZI ANZOROKO OMENE TI ANZOROKO MBASAMBALA
Kozoni, Jean abâ Jésus Christ so awara gloire nga a fa na Jean atënë nde nde na a hunda na lo ti ‘sû ni na mbeti na ti tokua ni na acongrégation mbasambala’. (Apoc. 1:10, 11). Na pekoni, lo bâ trône so ayeke na yayu. Na yâ ti maboko ti koti ti Zo so aduti na ndo ti trône ni, a yeke wara mbeti so a rulê ni rulengo na a kanga ni na anzoroko mbasambala. Zo so “akpa ti zi yâ ti mbeti so a rulê ni rulengo” ayeke mbeni zo nde pëpe me ayeke “bamara so ayeke ti kete mara ti Juda,” wala ‘molenge ti ngasangbaga so ayeke na adidi mbasambala nga na alê mbasambala’.—Apoc. 4:2; 5:1, 2, 5, 6.
Ota suma ni afa ye so asi na ngoi so “Molenge ti ngasangbaga ni” azi na peko ti tere akozo nzoroko omene. Na ngoi so lo zi nzoroko omene ni, sese ayengi ngangu mingi nga kota lango ti ngonzo asi (Apoc. 6:1, 12, 17). Ye oko, suma so aga na peko ni afa ‘a-ange osio so agbu apupu osio ti sese ngangu’ juska a kpo nzoroko na ndo ti lê ti azo 144 000 kue. Lo bâ “azo mingi mingi” so a kpo nzoroko na ndo ti lê ti ala pëpe ayeke “luti na dawa ti trône ni nga na dawa ti Molenge ti ngasangbaga”.—Apoc. 7:1, 9.
Akiringo tënë na atënë na ndo ti Bible:
1:4; 3:1; 4:5; 5:6—Tënë “ayingo mbasambala” aye ti tene nyen? Na lê ti Nzapa, wungo ti ye mbasambala aye ti sara tënë ti mbeni ye so alingbi kue. Ni la, atënë so a tokua na “acongrégation mbasambala” andu biani awakua ti Jéhovah kue so ayeke bungbi na yâ ti acongrégation ahon 100 000 na ndo ti sese kue (Apoc. 1:11, 20). Teti so Jéhovah ayeke mû yingo ti lo alingbi na ye so lo ye ti sara, tënë “ayingo mbasambala” afa ye kue so yingo ti Jéhovah ayeke sara ti mû maboko na azo so ayeke dengi mê na prophétie ni ti gbu nda ni nga ti tene ala wara aye ti nzoni dä. Na bango ni, aye so a fa na yâ ti mbeti ti Apocalypse, a bungbi ni na agroupe mbasambala mbasambala. Wungo ti ye mbasambala aye ti sara tënë ti ye so alingbi kue, na mbeti ti Apocalypse afa so “tënë ti Nzapa so lo honde nda ni” ayeke “ga ande tâ tënë biani.”—Apoc. 10:7.
1:8, 17—Iri “Alpha na Oméga” nga na tënë “Kozo zo ni nga Ndangba zo ni” andu azo wa? Iri “Alpha na Oméga” andu Jéhovah, na a fa so kozoni na lo a yeke wara pëpe mbeni Nzapa ti ngangu ahon kue nga a yeke wara ande mbeni Nzapa tongana lo pëpe. Lo yeke “tongo nda ti ye nga na kongo nda ti ye.” (Apoc. 21:6; 22:13). Atâa so Apocalypse 22:13 atene so Jéhovah ‘ayeke kozo nga lo yeke ndangba ni’ na lege so mbeni créature ayeke dä pëpe kozo ti lo wala na peko ti lo, aversê so angoro Apocalypse 1:8, 17 afa so tënë “Kozo zo ni nga Ndangba zo ni” andu Jésus Christ. Jésus ayeke kozo zo so a zingo lo tongana mbeni créature ti yingo so alingbi ande lâ oko pëpe ti kui nga lo yeke ndangba zo so Jéhovah lo wani la azingo lo.—aCol. 1:18.
2:7—“Paradis ti Nzapa” ayeke nyen? Teti so a sara tënë so na aChrétien so a soro ala ti gue na yayu, paradis so a sara tënë ni ge asara tënë ti pendere ndo so ayeke na yayu, ndo so Nzapa aduti dä. A yeke futa ande aChrétien so, so ayeke be-ta-zo na lege so ala yeke te “lê ti keke ti mungo fini”. Ala yeke wara mbeni fini so ala lingbi ande ti hinga kuâ pëpe.—1 aCor. 15:53.
3:7—Lawa la Jésus awara “kelele ti David”? Lo yeke sara kua na ni tongana nyen? Na ngoi so Jésus awara batême na ngu 29, a soro lo ti ga Gbia so asigigi na yâ ti asewa ti David. Ye oko, Jésus awara lani pëpe kelele ti David juska na ngu 33, ngoi so a yä lo na koti ti Nzapa na yayu. Kâ, lo wara adroit kue so andu gbia ti Royaume ti David. Ngbene ye na ngoi ni so, Jésus ayeke sara kua na kelele so ti zi lege na awakua ti Jéhovah ti sara akusala so andu Royaume ni. Na ngu 1919, Jésus azia “clé ti da ti David” na ndo ti go ti “ngbâa be-ta-zo so ayeke sara ye na ndara” na lege so lo zia ngbâa so “na ndo ti akungba ti lo kue.”—És. 22:22; Mat. 24:45, 47.
3:12—“Fini iri” ti Jésus ayeke nyen? Iri ni so andu afini kusala so a mû na Jésus ti sara (aPhil. 2:9-11). Atâa so mbeni zo nde ahinga iri so tongana ti Jésus pëpe, Jésus asû ni na ndo ti aita ti lo so ayeke be-ta-zo na ngoi so ala yeke na yayu, lo sara si ala duti na kpengba songo na lo (Apoc. 19:12). Lo mû même na ala ambeni kusala so Jéhovah amû na lo ti sara.
Aye ti manda teti e:
1:3. Teti so “ngoi so a soro ni awe [ti sara ye alingbi na ngbanga so Nzapa afâ na ndo ti dunia ti Satan] ayeke nduru ti si”, a yeke kota ye mingi laso ti tene azo agbu nda ti tënë ti mbeti ti Apocalypse na ala sara ye alingbi na ni.
3:17, 18. Ti wara mosoro na lege ti yingo, a lingbi e vo na tïtî Jésus “lor so a tö ni na wâ si a zi saleté ni awe”. So ti tene so a lingbi e sara ngangu ti sara gbâ ti anzoni kusala (1 Tim. 6:17-19). Na ndo ni, a lingbi e yü “avuru bongo ti ndo ni” so afa so e yeke atâ disciple ti Christ nga e zia “yorö ti lê” na lê ti e. So ti tene e mä awango so ayeke na yâ ti Tour ti Ba Ndo, si lê ti e azi na lege ti yingo.—Apoc. 19:8.
7:13, 14. A-ancien 24 aye ti sara tënë ti aChrétien 144 000 na ngoi so ala yeke na yâ ti gloire na yayu, kâ ala yeke sara kua tongana agbia na aprêtre. Aprêtre ti Israël ti giriri, so Gbia David akangbi yâ ti ala lani na yâ ti abungbi 24, afa kozoni awe a-ancien ti yayu so. Mbeni oko ti a-ancien so afa na Jean azo so ayeke azo mingi mingi. Ye so afa so kozoni na ngu 1935, a to nda ti zingo na kuâ aChrétien so a soro ala ti gue na yayu. Ngbanga ti nyen e tene tongaso? Ngbanga ti so na ngu ni so, a fa na awakua ti Jéhovah so a soro ala ti gue na yayu, me so angbâ na sese ge, azo so ayeke azo mingi mingi.—Luc 22:28-30; Apoc. 4:4; 7:9.
A ZI NZOROKO MBASAMBALA NI, NA PEKONI A HURU TROMPETTE FANI MBASAMBALA
Molenge ti ngasangbaga azi nzoroko mbasambala ni. A mû trompette mbasambala na a-ange mbasambala. A-ange omene ahuru trompette ti ala ti fa tënë ti ngbanga so a fâ na ndo ti mbage oko ti “ambage ota” ti azo, so ti tene aChrétien ti wataka (Apoc. 8:1, 2, 7-12; 9:15, 18). A yeke ye so Jean abâ na yâ ti oku suma ni. Jean amû mbage na yâ ti suma so aga na peko ni, lo te kete mbeti so a rulê ni rulengo nga lo mû yongo ti akubu ti temple. Na pekoni so a huru trompette mbasambala ni, mbeni go adekongo atene: “Fadeso royaume ti dunia aga royaume ti Seigneur ti e na ti Christ ti lo awe.”—Apoc. 10:10; 11:1, 15.
Suma mbasambala ni ague andu ye so atene na Apocalypse 11:15, 17. A bâ mbeni kota fä na yayu. Wali so ayeke na yayu adü molenge ti koli. A tomba Zabolo na yayu. Teti so ngonzo agbu Zabolo mingi na tere ti wali ni, lo gue “ti sara bira na tanga ti ala so ayeke ti ngongoa ti wali ni”.—Apoc. 12:1, 5, 9, 17.
Akiringo tënë na atënë na ndo ti Bible:
8:1-5—Ngbanga ti nyen ndo adë ngii na yayu? Nyen la a bi ni na pekoni na sese ge? Na lege ti fä, ndo adë ngii na yayu ti sara si a mä “asambela ti azo kue so ayeke nzoni-kue” na ndo ti sese. Ye so asi na hunzingo ti Kozo Bira so Amû Sese Kue. A-Chrétien so a soro ala ti gue na yayu ague na yayu pëpe na hunzingo ti Ngoi ti Amara, tongana ti so ala mingi aku tere ti ala na ni. Ala wara aye ti ngangu na ngoi ti bira so. Fadeso, ala yeke sambela mingi ti tene a fa lege na ala. Ti kiri tënë na sambela ti ala, Nzapa asara si mbeni ange abi wâ na lege ti fä na ndo ti sese ti mû ngangu na aChrétien so a soro ala ti gue na yayu ti sara gbâ ti akusala. Atâa so wungo ti aChrétien so ayeke lani mingi pëpe, ala to nda ti fa tënë ti Royaume na ndo ti sese kue, na a ga mbeni kota tënë na gbele azo, mo bâ mo tene ala tingo wâ na tere ti aChrétien ti wataka. Atënë ti Bible so ala yeke fa ayeke tongana bekpa so atoto ngangu, atâ tënë so ala fa asigigi polele tongana wâ ti bekpa, a sara si abungbi ti vorongo nzapa ti wataka ayengi tongana ti so yengingo ti sese asara si gere ti ada ayengi.
8:6-12; 9:1, 13; 11:15—Na ngoi wa a-ange mbasambala aleke tere ti ala ti huru atrompette ti ala? Atrompette ni atoto na ngoi wa? Atrompette ni atoto tongana nyen? Ti londo na ngu 1919 ti si na ngu 1922, mbeni ye so a-ange asara ti leke tere ti ala ti huru atrompette mbasambala ayeke so ala fa lege na aChrétien so a soro ala ti gue na yayu. A-Chrétien so, so asara kua tongana ti Jean akiri awara ngangu na lege ti yingo. Na pekoni, ala mû ngoi ti ala mingi ti leke gere ti kusala ti fango tënë nga ti leke ada so a yeke pete ambeti dä (Apoc. 12:13, 14). Toto ti atrompette ni ayeke fango atënë ti ngbanga ti Jéhovah na ndo ti dunia ti Satan, so a-ange ayeke mû maboko na awakua ti Jéhovah ti sara ni na mbeto pëpe. Kusala so ato nda ni mbilimbili na ngoi ti kota bungbi so a sara ni na Cedar Point, na Ohio na Amerika na ngu 1922, na a yeke ngbâ ande ti gue juska na ngoi ti kota ye ti vundu.
8:13; 9:12; 11:14—Na lege wa totongo ti andangba trompette ota afa tënë ti “mawa”? Atâa so akozo toto ti trompette osio afa so aChrétien ti wataka akui awe na lege ti yingo, toto ti andangba trompette ota afa tënë ti mawa na lege so a ndu ambeni mbilimbili ye so ayeke si. Oku toto ti trompette ni andu zingo awakua ti Jéhovah na ngu 1919 na yâ ti “kota dû so alï mingi”, so aye ti sara tënë ti ngoi so ala sara kusala mingi pëpe; a ndu nga fango tënë so ala yeke sara ni sân ti luti, na so aga tongana mbeni ye ti songo aChrétien ti wataka (Apoc. 9:1). Toto ti omene trompette ni andu kota kpengo ti aturugu so ayeke na ambarata so ade ti si lâ oko pëpe. A ndu nga tënë ti kota kapa ti fango tënë na ndo ti sese kue, so ato nda ni na ngu 1922. Ndangba toto ti trompette ni andu Royaume ti Messie so abâ gigi.
Aye ti manda teti e:
9:10, 19. Na yâ ti ambeti so “ngbâa be-ta-zo so ayeke sara ye na ndara” asigigi na ni na so zo alingbi ti zia bê ti lo na ni, a yeke wara atënë so ayeke zö zo zongo (Mat. 24:45). Atënë so ayeke tongana damba ti agbadora so ayeke na “kî so akpa ti akpalakongo” nga tongana gbâ ti ambarata ti aturugu so akpe ngangu, so “damba ti ala ayeke tongana angbo”. Ndali ti nyen? Ndali ti so ambeti so ayeke gboto lê ti azo na ndo ti “lâ ti futango kula ti [Jéhovah]”. (És. 61:2). Na mbeto pëpe, zia e yeda na bê ti e kue ti kangbi ambeti so.
9:20, 21. Gbâ ti azo so ayeke sara ye na ngangu pëpe, so ayeke na yâ ti akodoro so mingi ti azo ni atene ala yeke aChrétien ayeke yeda na tënë so e yeke fa. A haka gbâ ti azo so ayeke na yâ ti abungbi ti vorongo nzapa so ayeke nde na ti aChrétien ti wataka na “tanga ti azo”. Ye oko, e ku pëpe ti tene gbâ ti azo so aga atâ Chrétien. Atâa so kue, e yeke ngbâ lakue ti fa tënë.
12:15, 16. “Sese”, so ti tene abungbi ti yâ ti dunia ti Satan, wala angorogbia so ayeke komande na yâ ti akodoro nde nde ayeda ti tene azo avoro Nzapa tongana ti so bê ti ala aye. Ti to nda ni na ngu 1940 tongaso, angorogbia so ‘amene ngu so asua [wala, sarango ngangu] so kota ngbo abi na gigi na yanga ti lo.’ Ti tâ tënë ni, tongana Jéhovah asoro ti sara ni, lo lingbi ti pusu angorogbia ti sara ye so bê ti lo aye. Tongaso, a yeke tâ na lege ni so aProverbe 21:1 atene: “Bê ti gbia ayeke na tïtî L’Éternel legeoko tongana ngu so asua; lo turnê bê so na lege so Lo ye.” A yeke nzoni ye so akpengba mabe ti e na Nzapa.