Ndani so e yeke na bezoin ti Nzapa

Azo so amanda ye na ndo ti seni ti li ti zo atene so atâa so e azo e yeke na bezoin ti aye tongana kobe, bongo nga na da, gi aye ni so la ayeke sara si e duti na tâ ngia ape. E bezoin mbeni ye nde. Ni la ambeni zo ayeke bi tere ti ala ti sara ambeni ye ti wara ngia dä wala ala yeke na nzara ti sara na mbeni zo so ayeke kota ahon ala. Na tapande, ambeni zo ni ayeke mû angoi so ala yeke na ye ti sarango ni ape ti sara na aye ti ndara, ti pika na mozoko, ti fono na yâ ti gbako wala ti sara na ambeni ye nde. Me atâa aye so kue, ngia ti azo ni aninga nga ape.

So e azo, na yâ ti tere ti e, e bezoin mbeni ye nde, a yeke fini tënë pëpe na azo so ayeke diko Bible. Akozo chapitre ti Genèse afa so na peko ti so Nzapa acréé kozo koli na kozo wali, lo yeke sara ka lani lisoro na ala. Ye so amû lege na ala ti lë songo na lo Nzapa ni (Genèse 3:8-10). Nzapa aleke lani azo ti tene ala duti sân lo ape; ala yeke na bezoin ti sara lisoro na lo teti lo la lo sara ala. Bible asara tënë ti bezoin ni so fani mingi.

Na tapande, Jésus atene: “Ngia ayeke na ala so ahinga so ala yeke na bezoin ti aye ti yingo.” (Matthieu 5:3). Na lege ti atënë so, e lingbi ti tene so ti duti na ngia na yâ ti gigi ti e, e yeke na bezoin ti kaï nzara so e yeke na ni ti hinga Nzapa. E lingbi ti sara ni tongana nyen? Jésus amû kiringo tënë ni na ngoi so lo tene: “Zo ayeke ngbâ na fini gi na lege ti mapa pëpe, me na lege ti tënë kue so asigigi na yanga ti Jéhovah.” (Matthieu 4:4). Tënë so asigigi na yanga ti Jéhovah ayeke apensé ti lo nga na afango lege ti lo so e wara ni na yâ ti Bible. Atënë so la alingbi ti sara si e duti na ngia na yâ ti gigi ti e. Me tongana nyen? A yeke na lege ti aye ota so e yeke bâ ni fadeso.

E bezoin ti tene a fa lege na e nzoni

Laso, gbâ ti azo ayeke nduru ti mû awango na ndo ti songo na popo ti azo, na ndo ti yengo tere, sewa, lekengo tënë, ngia nga même na ndo ti ndani so e azo e yeke na ndo ti sese. Me nde na Jéhovah Nzapa, lo so asara azo, zo wa la alingbi ti mû na e tâ nzoni wango na ndo ti aye so kue zo wa?

Zia e mû gi mbeni tapande: Tongana mo vo mbeni fini masini, tongana appareil photo wala ordinateur, mo yeke na bezoin ti mbeti ti masini ni ti tene a fa na mo nzoni fason ti sarango kua na ni si mo bâ nzoni na pekoni. E lingbi ti haka Bible na mbeti ti masini ni so. A yeke mbeni mbeti so asara tënë na ndo ti fini ti e azo so Nzapa, lo so asara zo, amû ni na e ti tene e sara ye na ni. Mbeti so afa ndani so Nzapa amû fini na e azo nga afa tongana nyen e lingbi ti sara ye na ni ti wara nzoni dä.

Tongana ti mbeti ti masini so atënë ti yâ ni ayeke polele si amû maboko na zo so avo masini ni, Bible ayeke fa na azo ti sara hange na ambeni sarango ye so alingbi ti buba fini ti e. Ambeni zo alingbi ti mû na e ambeni wango so akpa anzoni wango wala so même a yeke ngangu pëpe ti mû pekoni. Me ti Jéhovah, so lo la lo sara e, tongana e sara ye alingbi na wango ti lo, e yeke bâ nzoni dä.

Atâa so Jéhovah Nzapa ayeke fa na e lege nga lo yeke mû wango na e, lo gbu e na ngangu ape ti yeda na ni. Teti so lo ye e nga lo ye ti mû maboko na e, lo tene: “Mbi yeke L’Éternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä. O, tongana mo mä commandement ti Mbi giriri! ka siriri ti mo aga tongana ngu so asua, na mbilimbili ti mo aga tongana mapo ti kota ngu ti ingo.” (Ésaïe 48:17, 18). Na nduru tënë, tongana e yeda ti tene Nzapa afa lege na e, e yeke duti nzoni na yâ ti gigi ti e. E lingbi nga ti tene so, tongana e ye ti duti nzoni na yâ ti gigi ti e nga na ngia, e yeke na bezoin ti Nzapa.

E bezoin ti hinga nda ti apasi ti e

Ambeni zo abâ so ala yeke na bezoin ti Nzapa ape ngbanga ti so ala bâ gbâ ti aye so ala hinga li ti ala na ni ape na so ague nde na tënë so a tene Nzapa aye e azo. Na tapande, ala yeke hunda peut-être, atene: ‘Ndali ti nyen anzoni zo ayeke bâ pasi?’ ‘A dü ka ambeni bébé mbage ti tere ti ala abuba ngbanga ti nyen? so ala sara nga mbeni sioni ye ape so!’ ‘Nyen la si dunia ayeke sioni tongaso?’ Atënë ni so ayeke kota tënë mingi, nga tongana e wara akiringo tënë ni, a lingbi ti sara ye mingi na yâ ti gigi ti e. Ni la, ahon ti bi atënë ni hio na li ti Nzapa, zia e bâ ye so Bible atene na ndo ti atënë so.

Na chapitre ota ti Genèse, e yeke wara mbaï ti Satan so asara kusala lani na mbeni ngbo ti handa na kozo koli na kozo wali ti ke yanga so Jéhovah amû na ala. Nzapa atene lani na ala ti te pëpe lê ti keke ti hingango nzoni na sioni. Me Satan atene na Ève, lo tene: “I lingbi kui biani pëpe, teti Nzapa ahinga na lâ ni so i te lê ni, fade lê ti i alungula, na i ga tongana Nzapa, i hinga nzoni na sioni.”​—Genèse 2:16, 17; 3:4, 5.

Na lege ti atënë so, Satan aye ti fa so Nzapa ayeke zo ti mvene nga so komandema ti lo ayeke nzoni ape. Zabolo atene so tongana azo amä gi ni, ala yeke duti nzoni mingi. Fade a yeke leke mara ti tënë so tongana nyen? Jéhovah azia ti tene angoi ahon si azo kue abâ wala tënë so a bi na li ti lo so ayeke tâ tënë wala mvene. Ti bâ ni nzoni, Nzapa azia lani lege na Satan nga na azo so amû peko ti lo ti fa wala azo alingbi biani ti duti nzoni sân Nzapa.

Ti mo, e lingbi ti tene nyen na ndo ti tënë so Satan atene so? Azo alingbi ti duti nzoni nga ti komande tere ti ala wani nzoni sân Nzapa? A sara angu ngbangbo mingi awe la si azo ayeke gi na yâ ti pasi, kobela, kuâ, sarango sioni na azo, nzoni sarango ye so ayeke dä encore ape, abira, fango azo ti ambeni mara ti hunzi ala kue kue kue nga na ambeni sioni ye ni nde. Aye so afa polele so ye kue so azo atara ti sara ti komande tere ti ala wani sân Nzapa atï gi tingo na ngu. Ahon ti tene so Nzapa la ayeke na peko ti apasi ti azo, Bible afa tâ gi ye so ayeke na gunda ni, lo tene: “Zo akomande mbeni zo, na a sara sioni na lo.”​—Zo-ti-fa-tene 8:9.

A yeke polele so e azo e bezoin ti tene Nzapa akiri tënë na atënë so e yeke hunda tere ti e na ni gbä nga ti tene lo fa na e ye so e lingbi ti sara ti sigigi dä. Fade lo yeke sara ni tongana nyen?

E bezoin mungo maboko ti Nzapa

A sara angu mingi awe la azo aye ti tene a zi ala na gbe ti kobela, gango mbakoro nga na kuâ. Ala yeke mû ngoi ti ala, ngangu ti ala nga na gbâ ti nginza ti ala ndali ni, me so kue gbä. Ti ambeni, ala pensé so tongana ala nyon mbeni yorö tongaso, wala ngu tongaso wala tongana ala lango na mbeni place tongaso, ala lingbi ti ngbâ maseka kpu na kpu. Me wataka!

Nzapa aye ti tene azo aduti nzoni nga na ngia. A yeke ye so lo ye lani na ngoi so lo leke azo la, nga lo girisa ni ape (Genèse 1:27, 28; Ésaïe 45:18). Jéhovah Nzapa atene na e so ye kue so lo leke awe ti sara ayeke ga gi tâ tënë (Ésaïe 55:10, 11). Bible afa na e zendo ti Nzapa so ayeke ti sara si sese akiri aga Paradis tongana ti ngoi ti Adam na Ève. Na yâ ti ndangba buku ti Bible, a tene Jéhovah Nzapa ayeke “mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” (Apocalypse 21:4). Nzapa ayeke sara ande tongana nyen ti ga na apendere ye ni so? Nga, e lingbi ti sara nyen ti bâ nzoni dä?

Jésus Christ, Molenge ti Nzapa, afa na adisciple ti lo ti sambela si a sara ye so bê ti Nzapa aye. Azo mingi ahinga sambela ni so, so ambeni airi ni Sambela ti adisciple so atene: “Babâ ti e so mo yeke na yayu, zia a sara si iri ti mo aga nzoni-kue. Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Matthieu 6:9, 10). Biani, a yeke gi na lege ti Royaume ni la Jéhovah Nzapa ayeke zi pasi so komandema ti azo aga na ni nga si lo yeke ga na fini dunia so lo mû zendo ni na so mbilimbili ayeke duti dä (Daniel 2:44; 2 Pierre 3:13).a Tongana e ye ti bâ nzoni dä a lingbi e sara nyen?

Jésus Christ afa ye so a lingbi e sara, so a kpengba ape, lo tene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” (Jean 17:3). Biani, Nzapa alingbi ti mû maboko na e ti wara fini ti lakue lakue na yâ ti fini dunia ni. Zendo ni so alingbi peut-être ti pusu mo ti yeda so e azo e yeke biani na bezoin ti Nzapa.

A lingbi e pensé na Nzapa

A sara angu saki use awe, na mbeni ndo so a iri ni Aréopage, wala Hoto ti Mars, na Athènes, so ayeke mbeni gbata ti Grèce, bazengele Paul asara lisoro na ambeni zo ni na ndo ti Nzapa. Azo ti Athènes ayeke ka lani nduru ti mä afini tënë. Tongaso Paul atene na ala: “[Nzapa] wani si amû na azo kue fini, mbö nga na aye kue. Teti na lege ti lo e yeke na fini, e yeke tambela na e yeke dä, legeoko tongana ambeni wasungo suma-tene ti ala atene: ‘Teti e nga e yeke ahale ti lo.’”​—Kusala 17:25, 28.

Atënë ti Paul so angbâ lakue tâ tënë. Nzapa la amû na e pupu so e yeke wu, kobe so e yeke te nga na ngu so e yeke nyon. Tongana Jéhovah amû fade na e anzoni ye ni so ape, ka e yeke ngbâ na fini ape. Me ngbanga ti nyen la Nzapa angbâ lakue ti mû aye ni so na azo kue, atâa ala pensé na lo wala pëpe? Paul atene a yeke ti tene ala “gi Nzapa, même ala gi lo na tarango ndo na ala wara lo biani, atâa so, ti tâ tënë ni, lo yeke yongoro [pëpe] na e oko oko kue”.​—Kusala 17:27.

Mo ye ti hinga Nzapa nzoni? nga ti manda ye mingi na ndo ti aye so lo ye ti sara? Mo ye nga ti hinga awango ti lo so alingbi ti mû lege na mo ti duti nzoni laso nga lakue lakue? E wa mo ti sara tënë ni na zo so amû na mo mbeti so wala na azo so asigigi na ni. A yeke nzere ande na ala mingi ti mû maboko na mo.