E Tisa Ala
1 Laso, a kiri afa peko ti mbeni tisango ndo, so amu ni ti fani oko ni a sala asiècle mingi awe, na yâ akodoro na aterritoire 233 ti ndo ti sese: “I ga, zia e ma na Hoto ti L’Eternel [“Jéhovah,” NW] . . . ; fade Lo fa lege ti Lo na e, na fade e tambela na lege ti Lo.” (És. 2:3) Oko ti apendere lege ti mu maboko na mbeni zo ti gue na li ni na lege ti yingo na ndo ti lege ti fini ti lakue lakue ayeke ti ga na lo na mbage ti bungbi ti Jéhovah.
2 Ambeni wakua ayeke gi bê ti ala peut-être ti tisa azo ti ga na Da ti Royaume tongana ala de ti gue na li ni mingi pepe na yâ mandango Bible ni. Ye oko, a lingbi ti si so ambeni zo aga na abungbi ti kongrégation kozoni si ala wara lege ti manda Bible. Tongaso, a lingbi e ku pepe ti tisa na bê kue nga ti wa azo ti ga na abungbi.
3 Tongana nyen ti sala ni: E sala kusala na ambeti ti tisango ndo ti fa ye na azo na ndo abungbi ti e. E fa na ala so zo ayeke li senge, na e yeke hunda nginza lâ oko pepe. E fa tongana nyen abungbi ayeke tambela. E fa so a yeke atâ mandango ye na ndo Bible na zo oko oko alingbi ti mu peko ni na lege ti ambeni buku ti mandango ye so amu na azo kue. E sala tene na azo na ndo ngobo ti salango ye nga na adutingo nde nde ti tanga ti azo so aga. E fa na ala nga so a yeke azo so alango na yâ vaka ni, na so amolenge ti ngu nde nde alingbi ti ga. A lingbi e tisa azo so e manda Bible na ala ti ga na e mu maboko na ala.
4 Oko ti andangba versê ti Bible ayeke mbeni tisango ndo na wâ ti wara nzoni na lege ti aye so Jéhovah aleke teti fini: “Yingo na fini-wali atene, Ga! . . . Na zo so ayeke na nzala ti ngu, zia lo ga; zo so aye, zia lo nyon ngu so amu fini, zia lo nyon senge senge.” (Apoc. 22:17) E tisa azo ti ga na abungbi. Kode ti nzoni ahon so ayeke pepe.
5 Na yâ ti prophétie so afa pekoni na Ésaïe 60:8, afini zo saki mingi so ayeke ga na yâ ti akongrégation ti Nzapa ti sepela Lo “ahulu tongana mbinda, ala hulu tongana abungu ahulu na da ti ala.” E kue e lingbi ti tisa afini zo na abungbi, na ti yamba ala nzoni. Na salango tongaso, e yeke sala kusala maboko na maboko na Jéhovah na ngoi so lo yeke sala si kusala ti bungbingo azo ayeke gue na li ni na loro.—És. 60:22.