Fade A Yeke Sala Matanga ti Dango Bê na Kui ti Christ na ndo Sese Kue
1 Jéhovah amu na e amatabisi so alingbi ti diko wungo ni kue pepe. A fa na mbeni pendere lege konongo ti nzobe ti lo tongana mbeni ‘matabisi ti lo so zo alingbi fa nda ni kue pepe.’ ‘Grâce ti Nzapa’ ayeke nde mingi si e lingbi pepe ti fa pekoni.—2 aCor. 9:14, 15.
2 Matabisi ti lo ti kota ahon: Jésus Christ, Lo so aton azo, ayeke matabisi so ayeke pendere ahon tanga ti amatabisi kue. Jéhovah afa na gigi kota ndoye ti lo teti sese ti azo na mungo Molenge ti lo ngengele oko, so Lo ndoye lo mingi. (Jean 3:16) A yeke nzoni ti tene, na ndo ti sese kue, a sala matanga ti dabe na ye ti nzoni so zo alingbi na ni pepe. Lawa nga na ndo wa si a yeke sala ande matanga ti dango bê so? Na mercredi 19 avril 2000, na lakui, aChrétien ti sese kue ayeke sala ande matanga ti Kobe ti Seigneur na ala yeke sala matanga ti dango bê na sadaka so ahon atanga ni kue.—1 aCor. 11:20, 23-26.
3 Christ akui teti e “tongana e de awasiokpari.” E lingbi ti fa e mveni bê ti kiri singila ti e na salango matanga ti Dango bê nga na tisango ambeni zo ti ga na tele ti e na kota matanga so.—aRom. 5:8.
4 Ye ti kota ahon so asi: Salango matanga ti kui ti Christ agboto lë kozoni kue na ndo tene so Christ azia lâ oko pepe ti mu mbage ti kota yanga-ti-komande ti Nzapa. A dabe ti e nga so e lingbi ti duti na sioni oko pepe na lë ti Jéhovah na fango na gigi mabe na yâ sadaka ti Jésus, na lege so e hinga so e yeke wara ande salut. (Kus. 4:12) Tongaso, a yeke biani ye ti kota ahon ti ngu ni.
5 E yeke fa ande so e ndoye mba ti e na tisango lo ti sala matanga ti Kobe ti Seigneur legeoko na e. Aye ti nzoni so kota ngele ti Christ aga na ni andu nga azo kutu mingi so aga ti manda so ngele ni ayeke kota mingi. (aPhil. 3:8) Ala so afa na gigi mabe na yâ sadaka ti Christ alingbi ti duti na ngangu beku ti wara fini ti lakue lakue.—Jean 17:3.
6 Ngoi ti Mémorial amu na e alege so ayeke nde ti fa na gigi bê ti kiri singila ti e na Jéhovah teti kpengba nzobe ti lo so zo alingbi na ni pepe. A yeke ngoi so alingbi biani ti fa nzo tene ti Royaume ti Nzapa na wâ. Akota deba nzoni ayeke ku ala kue so ayeke gbu li na yâ sambela na ndo matabisi ti Jéhovah so zo alingbi fa nda ni kue pepe nga so lo mu senge senge, na so ayeke leke tele ti ala ti duti ande na matanga ti Kobe ti Seigneur ti ngu so.