Mo Yeke na Yingo ti Gbanzi Ye na Tele?
1 A lingbi be-ti-kiri-singila ti e teti kusala ti Jésus Christ ti gbanzi ye na tele ndali ti azo ti sese apusu e ti sala kusala na akode ti e, wâ ti e na angangu ti e na lege ti gbanzingo ye na tele. Mbeti ti Nzapa ahunda na e mingi ‘ti mu tele ti e tongana sadaka so ayeke na fini, ye ti nzoni-kue, ye so alingbi na lê ti Nzapa, mbeni kusala ti nzoni-kue.’ (aRom. 12:1, NW) Mbeni bango ndo na mbage ti e mveni lakue ayeke mu maboko na e ti ba wala e yeke fa na gigi yingo ti gbanzi ye na tele legeoko tongana so dutingo ti e amu lege na e ti sala ni.
2 Na yâ gingo hingango ye ti Bible: Mo yeke bata ngoi ti diko na ti manda Bible mo mveni na lakue lakue? Mo yeke sala ye alingbi na programme ti mo ni? Mo yeke na ngobo ti lekengo nzoni abungbi ti kongrégation? Tongana mo yeke mokonzi ti sewa, mo yeke manda Bible lakue na sewa ti mo? Ti sala tongaso, peut-être a lingbi mo vo ngoi so mo yeke mu teti bango limon wala salango kusala na ordinateur, wala na ambeni kusala nde. Ye oko, a yeke gi mbeni kete sadaka tongana e hinga so ngoi so e yeke mu teti Tene ti Nzapa ayeke mu maboko na e ti si na fini ti lakue lakue.—Jean 17:3.
3 Na yâ fango ye na amolenge ti mo: Ngoi so molenge angbâ kete ayeke nzoni ngoi ti fa tongana nyen ti maï yingo ti gbanzi ye na tele. Fa na amolenge ti mo so tongana ngoi ti salango ngia ayeke dä, ngoi ti salango kusala na ti mungo mbage na kusala ti théocratie ayeke nga dä. (aEph. 6:4) Mu na ala anzoni kusala so alingbi na yâ da. Leke mbeni programme so amu lege na mo ti mu mbage na ala lakue na kusala ti fango tene. Zia nzoni tapande na ndo fango ye ti mo.
4 Na yâ akusala ti kongrégation: Mbeni kongrégation ayeke maï tongana zo oko oko ti yâ ni ayeke ndulu ti gbanzi ye na tele teti nzoni ti azo kue. (aHéb. 13:16) Mo lingbi ti mu angoi mingi ahon teti fango tene ti Royaume na kusala ti salango adisciple? Mo lingbi ti mu tele ti mo ti mu maboko na azo ti kobela wala ambakoro, na hundango na ala ti gue na ala na abungbi?
5 Kozo ti mu fini ti lo, sadaka ti kota ahon kue, Jésus awa adisciple ti lo ti zia lê ti ala na ndo ti Royaume na ti mu na atanga ti aye ni gi use ndo. (Mat. 6:33) Tongana e fa na gigi yingo ti gbanzi ye na tele so, fade e yeke ngbâ ti sala na Jéhovah na ngia, na so ayeke mu na e tâ ngia ti kota ahon kue.