Mo Yeke Zo ti Kamela?
1 Bê ti e adö pepe tongana e ba mbeni kete molenge na yâ maboko ti mama ti lo so ayeke ba e na mbito. Kamela ayeke mbeni ye so adü akete molenge na ni. Atä ala ga kota, azo mingi angbâ ti sala kamela. Mo lingbi ti sala nyen tongana kamela akanga lege na yâ fango tene ti mo?
2 Hon ndo ti kamela ti mo: A yeke kota ye ti sala kusala na ndo “zo-ti-ya-ni” ti mo. (1 Pi. 3:4) Kpengba ndoye so mo yeke na ni teti Jéhovah nga teti mba ti mo. Hinga na bê kue so fango tene ayeke oko ti anzoni lege ahon ti fa ndoye so kion ayeke dä pepe. Duti na anzoni ngobo ti mandango ye mo mveni nga na ti guengo na abungbi. Sambela lakue na fa ye so mo hunda polele ti wara mungo maboko ti Jéhovah. Fade mabe nga na ziango bê so akpengba ayeke sala si bê ti mo adö pepe na a yeke mu maboko na mo ti “fa Tene ti Nzapa na mbito pepe.”—aPhil. 1:14.
3 Ke bibe kue so atene ye atia mo ngangu. Biani, a ba a tene a yeke ye so Timothée asala la ni. Paul awa lo ti ‘zia mbeni zo aba lo tongana molenge pepe,’ na lo dabe ti lo so “Nzapa amu na e pepe yingo ti mbito, me Lo mu na e yingo ti ngangu.” (1 Tim. 4:12; 2 Tim. 1:7) Jéhovah asala la ni kusala mingi na Timothée, na lo yeke sala ande kusala nga na mo tongana mo sala ngangu ti gue na li ni na ziango bê kue na Nzapa.—Ps. 56:12 (56:11, NW).
4 Ndali ti kamela ti lo, mbeni ita-wali asala mbito ti koli ti lo so ake atene ti mabe ti lo, me lo wara ngangu na bingo bê na ndo ti aversê ti Bible tongana Matthieu 10:37. Teti lo gbu ngangu, fango tene aga mbeni ye so ayeke ngangu na lo pepe, nga na nda ni koli ti lo, mama ti lo na aita ti lo ti koli ayeda na tâ tene.
5 A hunda lekengo tele: Tongana mo leke tele ti mo nzoni teti kusala, fade mingi ahon bê ti mo ayeke dö pepe. Soro mbeni fango ye so akpengba pepe na yâ ti buku Comment raisonner wala na yâ ti Kusala ti Royaume, bata atene ni nzoni na li na manda peko ni fani mingi. Ahon ti tene mo gi bê ti mo senge senge, duti na mbeni nzoni bango ndo. Wara ngangu na lege ti salango kusala maboko na maboko na amba ti mo. Dabe mo so na popo ti azo mingi so mo yeke tingbi ande na ala, mingi ni ayeke nga azo ti kamela tongana mo. A lingbi a fa nzo tene ti Royaume na azo kue.
6 Tongana mo yeke zo so asala kamela, zia bê ti mo anze pepe. Sala ye alingbi na awango so amu ge, na fade Jéhovah ayeke mu maboko na mo ti ga mbeni wafango nzo tene so ayeke na kode. Na fade mo yeke wara ngia na yâ kusala ti mo.—aProv. 10:22.