Salango kusala na ye so a mû na mo

BIBLE ahaka kongregation ti aChrétien na tele ti zo. Mbage oko oko ayeke kota ye, me “amembre kue ayeke na kusala nde nde”. Teti so a yeke tongaso, a lingbi e sala kue ti sala nzoni mingi kusala so a mû na e. Ye so ahunda ti tene e mä yâ ti devoir kue so a mû na e na e sala ni nzoni. Zia e bâ pëpe tongana senge ye ambeni ye so a mû na e ti sala tënë na ndo ni, ngbanga ti so e bâ so ambeni tënë nde ayeke pendere mingi (aRom. 12:4-8). Bungbi ti ngbâa be-ta-zo na ti ndara ayeke na kungba ti mû kobe ti yingo “na l’heure ni so alingbi.” (Mat. 24:45). Tongana e sala kusala na akode ti e ti zi nda ti adevoir alingbi na awango so e wara, e yeke fa so e yekia ye so a leke. Ye so ayeke sala si kongregation ni kue ayeke tambela nzoni.

Ye so a lingbi a zia na yâ ni. Tongana a mû na mo mbeni ye ti sala tënë na ndo ni na Ekole ti Kusala ti aChrétien, bâ si mo zi gi nda ti ye so, me pëpe mbeni ye nde. Na yâ ti aye mingi, a yeke fa na mo mbeni mbilimbili mbeti. Tongana a fa na mo pëpe mbeti so a lingbi a duti na gunda ti devoir ti mo, mo lingbi ti soro atënë ni na yâ ti ambeti ti bê ti mo. Ye oko, na ngoi so mo yeke leke devoir ni, bâ si mo leke devoir ni kue na ndo ye so a fa na mo ti sala tënë na ndo ni. Na ngoi so mo yeke soro ye so a lingbi mo zia dä, a lingbi mo bi bê nga na azo so ayeke mä mo.

Manda nzoni mbeti so atënë ni ayeke dä na gi nda ti aversê so ayeke na yâ ni. Na pekoni bâ tongana nyen ti sala kusala na ni nzoni ndali ti nzoni ti azo so ayeke mä mo. Soro peut-être atënë use wala ota na yâ ti mbeti ni ti sala kusala na ni tongana angbongboro tënë ti devoir ti mo. Legeoko nga, soro na yâ ni aversê so mo ye ti diko ni na ti sala tënë na ndo ni.

A lingbi mo sala tënë na ndo ti aye oke ti mbeti ni? Gi aye so mo lingbi ti fa nda ni nzoni. Buba pëpe anzoni kode ti fango ye gi ti fa gbâ ti atënë. Tongana ambeni tënë ni alingbi pëpe na ye so devoir ti mo aye ti si dä, zia ngangu ti mo kue na ndo ambage so ayeke mû maboko ande ti si na ye so. Na yâ ti mbeti ni, sala kusala na ye so ayeke kiri ti zi lê ti zo nga ayeke mû ye ti nzoni na azo so ayeke mä mo. Ye so mo yeke gi na lege ti kode ti salango tënë so, a yeke pëpe wungo ti aye so mo lingbi ti sala tënë na ndo ni, me a yeke ti sala kusala na ye so a mû na mo tongana gunda ti devoir ti mo.

Devoir ti mo ayeke pëpe gi ti fa na ndulu tënë aye so ayeke na yâ ti mbeti so a mû na mo. A lingbi mo leke ti fa nda ti ambeni tënë, ti fa anzene nzene tënë, ti fa atapande nga peut-être ti fa tongana nyen ti sala kusala alingbi na ni. Sala kusala na ambeni bibe na ndo ni ti zi nda ti akota tënë na yâ ye so a mû na mo ti sala tënë na ndo ni, me pëpe ti duti na place ni.

A lingbi peut-être ti tisa aita-koli so alingbi na so afa ye nzoni ti mû awango na Bungbi ti Kusala. Ala bâ nene ti sala nzoni kusala na ye so a mû na ala ti sala tënë na ndo ni ahon ti zia mbeni ye nde na place ni. Legeoko nga, a mû na aita-koli so ayeke mû akota diskur aplan so a lingbi ala mû pekoni. Aplan so amû lege na zo ti zia ambeni ye dä, me ala fa polele angbongboro tënë so a lingbi a zi nda ni, ambeni tënë so a lingbi a sala kusala na ni nga aversê so ayeke na gunda ti diskur ni. Ti manda tongana nyen ti sala kusala na ye so a mû tongana gunda ti devoir ayeke mbeni kota mbage ti leke zo ti wara ambeni devoir nde.

Fango lege so alingbi nga ti mû maboko na mo ti manda Bible na azo si a lë lengo. Tongana mo ngbâ gi na ndo ti ye so ala yeke manda ni, mo yeke sala ande tënë na ndo ti gbâ ti aye senge senge pëpe. Aye ni so alingbi ti nzere, me ala yeke kota ye pëpe ti tene zo ni agbu nda ti tene. Ye oko, tongana mo hinga nda ti ye so ala yeke manda ni, mo yeke kpengba pëpe gi na ndo tenengo peko ti atënë ti mbeti ni si mo fa pëpe nda ti ambeni tënë so mbeni wamandango ye ni ayeke peut-être na bezoin ni.