“I sala mbito pëpe, i zia ye ayengi i pëpe”

“I sala mbito pëpe, i zia ye ayengi i pëpe, . . . [Fade] L’Eternel ayeke na i.”​—2 CHRONIQUE 20:17.

MO MÄ awe tënë ti asalango ye ti awabingo kpale so a hiri ala a-terroriste? Gi mango tënë ti aye so ala yeke sala amû mbito na bê ti zo biani, na a yeke sala si zo abâ na bê ti lo so mbeni ye ti bata lo wala ti mû maboko na lo ayeke dä pëpe. A yeke dü na yâ bê ti zo kota mbito so abungbi oko na kota mawa nga na ngonzo. Nga, aye so ala sala afa peko ti ye so, na bango ndo ti azo mingi, ayeke sala ande sioni na ndo azo teti angu mingi so ayeke ga. Teti tongana zo abâ tiri so ambeni kodoro ayeke sala ti lungula asalango ye kue ti awabingo kpale so, me ti bâ na pekoni so akodoro so asö benda mingi pëpe, ye so ayeke pusu lo ti bâ so dutingo na mara ti mbito tongaso ayeke tâ na lege ni.

² Ye oko, lege ayeke dä biani ti duti na beku. A-Témoin ti Jéhovah, so ayeke fa tënë na wâ na yâ akodoro 234 ti sese ayeke tâ na kpengba beku teti kekereke. Ahon ti duti na mbito ti pensé so a lingbi ande lâ oko pëpe ti lungula akpale so a-terroriste ayeke bi, ala yeke na beku biani so fade a yeke lungula ni, na ti ala, ye so ayeke ndulu ti ga tâ tënë. A yeke tâ na lege ni ti duti na mara ti beku tongana ti ala so? Zo wa alingbi même ti lungula mara ti sioni kpale so na ndo sese? Na tongana nyen tënë so alingbi ti ga tâ ye? Teti so peut-être e kue aye ti ngangu so a sala ni andu e awe, a yeke nzoni ti bâ ye so apusu aTémoin ti duti na mara ti beku tongaso.

³ Laso, aye mingi asala si azo ayeke na mbito, nga bê ti ala ayengi. Gbu li gi na ndo azo mingi mingi so alingbi mbeni pëpe ti bata tele ti ala ngbanga ti so ngu ti ala ahon mingi awe, azo so angangu kobela awoko ala, na gbâ ti asewa so ayeke tiri ngangu ti wara kobe ti yanga ti ala. Biani, bi bê na fini ti zo mveni so aluti nzoni kue pëpe. Kuâ alingbi ti tï hio tongaso na ndo mbeni zo na lege ti mbeni ndao wala kpale ti ndagigi, na ye ni ayeke si mo bâ mo tene kuâ ni ayeke ngoro gi na tele ti e, ndulu ti futi ye kue so e ndoye ni mingi. Mara ti mbito na ti gingo bê tongaso, tongana a zia na ndo ni gbâ ti akpale ti mango tele pëpe na ti suingo bê, asala si ngoi ti e alingbi biani na ye so bazengele Paul afa pekoni tongaso: “A lingbi mo hinga ye so, na lâ ti nda ni, fade lâ ti ye ti ngangu aga. Teti fade azo ayeke azo ti ndoye tele ti ala mveni, . . . azo so andoye asongo ti ala pëpe, azo so aye ti leke songo pëpe, azo so [‘atene sioni tënë na iri ti amba ti ala’, Fini Mbuki, 2001], azo so akanga nzara ti tele ti ala pëpe, azo so ahili, azo so andoye nzoye pëpe”.​—2 Timothée 3:1-3.

⁴ Atâa so versê so afa gi tënë na ndo asioni ye so ayeke si, lo mû nga beku na e na mbeni mbage. Bâ so asioni ngoi so a fa ni ayeke si na “lâ ti nda ni” ti bungbi ti asioni ye ti sese ti Satan ti fadeso. So aye ti tene so hungo tele ayeke ndulu ti si, na a ga ndulu ti lungula sioni bungbi ti aye ti sese so awe, na ti zia na place ni komandema so alondo na Royaume ti Nzapa so ayeke mbilimbili-kue, na so Jésus afa na adisciple ti lo ti sambela ndali ni (Matthieu 6:9, 10). Royaume so ayeke yanga-ti-komande ti Nzapa so ayeke na yayu, so ‘ayeke futi lâ oko pëpe’, me tongana ti so prophète Daniel atene, fade Royaume ni ‘ayeke fâ mbeni royaume [ti azo] so kue ndulu ndulu, na lo yeke hunzi aroyaume nde nde so kue; na fade lo yeke ngbâ teti lakue lakue.’​—Daniel 2:44.

Dutingo nde ti aChrétien na gbele bingo kpale ti a-terroriste

⁵ Teti angu mingi, akpale so a-terroriste abi asala si azo saki mingi mingi agirisa fini ti ala. Na peko ti ye ti ngangu so ala sala na yâ gbata ti New York nga na ti Washington na lango 11 ti nze ti septembre ngu 2001, azo na ndo sese mobimba kue ato nda ti bi bê ti ala ngangu na ndo kpale so. Teti so asalango ye ti a-terroriste amû ndo ti sese mingi na a gue na li ni ngangu, akodoro ti sese alondo hio ti bungbi ngangu ti ala oko ti sala bira na ni. Na tapande, na lango 4 ti nze ti décembre ngu 2001, ambeni tondo so a mû na yâ asango atene so “agbenyon-gbia so abâ tënë ti agene na so alondo na akodoro 55 ti Poto, ti Amerika ti Banga, na ti Asie abungbi yanga oko ti sigigi na mbeni kapa ti kusala” so ayeke fa tongana nyen si ala yeke bungbi angangu ti ala ti sala bira so. Mbeni kota zo ti Amerika agonda salango ye tongaso, lo tene so a yeke mû “mbeni fini ngangu ti salango ye” na ye so a leke ti kinda na akpale so a-terroriste aga na ni. Mo ye ti bâ gi tongaso, azo kutu mingi abi tele ti ala na yâ ye so mbeti-sango The New York Times Magazine ahiri ni “tongo nda ti mbeni bira so ayeke duti kota mingi.” Wala ye so ala leke ti sala ayeke tambela ande nzoni wala pëpe, fade e yeke bâ. Ye oko, ye so ayeke si na peko ti mara ti bira tongaso adü mbito nga na gingo bê na yâ azo mingi, me pëpe na yâ ala so azia bê kue na Jéhovah.

⁶ A hinga aTémoin ti Jéhovah nzoni mingi teti dutingo ti ala nde na aye ti poroso. Tongana a yeke na ngoi ti siriri, mingi ti azo alingbi ti tene so ala bâ ti ala kpale pëpe na yâ bango ndo so ti aTémoin ti Jéhovah; ye oko, tongana ambeni ye ti ngangu asi, a-oko zo so alingbi pëpe ti yeda na bango ndo ti aTémoin so. Fani mingi, ndali ti bira, tongana zo ayeke na mbito na lo hinga pëpe ye so lo lingbi ti sala, a lingbi ti dü na yâ lo angangu bibe ti bâ gi kodoro ti lo ahon ye kue. Ye so alingbi ti sala si a duti ngangu na ambeni zo ti hinga ngbanga ti nyen mbeni zo aye pëpe ti mû mbage na aye so azo ayeke sala teti kodoro ti ala. Ye oko, atâ Chrétien ahinga so a lingbi ala mä komandema ti Jésus ti duti “ti sese so pëpe”. (Jean 15:19; 17:14-16; 18:36; Jacques 4:4). Ye so ahunda ti tene ala bata dutingo nde ti ala na yâ atënë ti poroso wala ti ambeni ye so azo aleke ti sala. Jésus mveni azia tâ nzoni tapande na aChrétien. Na bango gi ndara so lo yeke na ni na so ayeke mbilimbili-kue, nga akpengba kode ti lo ti salango na aye, lo lingbi fade ti sala aye ti nzoni mingi ti leke ambeni ye teti nzoni duti ti azo ti ngoi ti lo. Me lo ke ti bi tele ti lo na yâ aye ti poroso. Na tongo nda ti kusala ti lo ti fango tënë, lo ke tâ na kuru go ti yeda na Satan so aye ti mû na lo komandema na ndo aroyaume kue ti sese. Na pekoni, lo ke nga na bê kue ti tene a gbu lo na ngangu ti mû na lo mbeni mbata ti poroso.​—Matthieu 4:8-10; Jean 6:14, 15.

⁷ Tongana aTémoin ti Jéhovah aduti ti ala nde na sese so, a lingbi a bâ ni pëpe tongana mbeni lege teti ala ti mû mbage na aye ti sioni so azo ayeke sala na amba ti ala, wala so ala yeke kanga lê dä. Tongana a yeke fade tongaso, ka a yeke duti na lege ni pëpe ti tene ala bâ tele ti ala tongana awakua ti “Nzapa ti ndoye na ti siriri”. (2 aCorinthien 13:11). Ala manda tënë awe na ndo bango ndo ti Jéhovah na mbage ti salango ye na mba ti mo na ngangu. Wasungo psaume atene: “L’Eternel atara azo ti mbilimbili; me Lo ke zo ti sioni na zo so andoye sioye ti ngangu.” (Psaume 11:5). Ala hinga nga nzoni mingi tënë so Jésus atene na bazengele Pierre: “Kiri épée ti mo na yâ bozo ni; teti azo kue so akamata épée, fade ala kui na lege ti épée.”​—Matthieu 26:52.

⁸ Atâa so mbaï afa polele so fani mingi aChrétien ti wataka asala kusala na “épée”, aTémoin ti Jéhovah asala ti ala tongaso pëpe. Ala duti yongoro na mara ti akusala kue tongaso. Na be-biani, aTémoin abata wango so a wara na aRomain 13:1, 2 (NW): “Zia âme oko oko aduti na gbe ti azo ti komande ti kota ahon, teti yanga-ti-komande kue ayeke gi teti so Nzapa ayeda; na ala so ayeke dä aduti na ndo so Nzapa azia ala oko oko mbeni na tele ti mbeni. Tongaso, zo so alondo ti ke yanga-ti-komande, lo londo ti ke ye so Nzapa aleke; ala so alondo ti ke ni, fade ala yeke wara ngbanga na ndo ala.”

⁹ Me teti so aye so a-terroriste ayeke sala ayeke tâ sioni mingi, a lingbi aTémoin ti Jéhovah agi ti sala mbeni ye nga pëpe ti kanga lege na ni? Biani, a lingbi ala sala ye, na a yeke ye so ala yeke sala laso. Kozoni kue, ala bi tele ti ala oko pëpe na yâ mara ti asalango ye so a-terroriste ayeke sala. Use ni, ala yeke fa na azo akpengba-ndia ti aChrétien, na tongana azo ni abata akpengba-ndia so, a yeke sala si ala ke alege kue ti salango ngangu.a Na ngu so ahon, aTémoin amû angbonga 1 202 381 302 ti mû maboko na azo ti hinga ye na ndo salango ye ti aChrétien tongaso. A yeke pëpe mbeni ngoi so ala buba ni gi senge senge, teti kusala ti ala so asala si azo 265 469 awara batême tongana aTémoin ti Jéhovah, na ye so afa na gigi so ala ke asalango ye ti ngangu na yâ alege ni kue.

¹⁰ Na ndo ni, aTémoin ti Jéhovah ahinga so na ngangu ti ala mveni, ala lingbi lâ oko pëpe ti lungula sioni na sese so. Ndani la si ala zia bê ti ala kue gi na lo so alingbi ti sala ni, so ti tene Jéhovah Nzapa (Psaume 83:19). Atâa angangu so azo ayeke sala na bê ti ala kue, ala lingbi pëpe ti hunzi salango ngangu na zo na sese so. Na salango tënë na gbe ti yingo ti Nzapa, wasungo mbeti ti Timothée agboto lê ti e na ndo ngoi ti e ti “lâ ti nda ni” so, na lo tene: “Fade lege ti azo ti sioni na azo ti handa azo aga sioni ahon, ala yeke handa azo, na azo ahanda ala.” (2 Timothée 3:1, 13). Tongana e luti gi na ndo versê so, e lingbi ti tene so abeku so azo ayeke na ni ti sö benda na ndo sioye ayeke na pasa mingi pëpe ti ga nzoni. Na mbeni mbage nde, e lingbi ti zia bê ti e na Jéhovah so lo yeke lungula biaku nga teti lakue lakue salango ngangu na zo.​—Psaume 37:1, 2, 9-11; aProverbe 24:19, 20; Esaïe 60:18.

Ala duti na mbito oko pëpe atâa a yeke ndulu ti sala bira na ala

¹¹ Teti so Nzapa ti siriri ake tënë ti salango ngangu na zo, e lingbi ti bâ biani ngbanga ti nyen lo leke ambeni kapa ti aye ti tene lo zi ye so ayeke biani na gunda ti sioye so, so ti tene Satan Zabolo. Ti fadeso, Lo sala awe si Satan atï tingo ti kamene na gbele archange Michel, fini gbia so Nzapa amû komandema na lo, Christ Jésus. Bible afa peko ti ye so tongaso: “Bira alondo na yayu, Michel na a-ange ti lo atiri bira na kota ngbo so. Na kota ngbo na a-ange ti lo atiri bira, me ala hon na ngangu pëpe, na a wara ndo na yayu teti ala mbeni pëpe. Ala to go kota ngbo, ngbo ti giriri so, lo so ala di iri ti lo Zabolo na Satan, wahanda ti azo ti sese so kue; ala bi lo na sese, na ala bi a-ange ti lo na sese legeoko na lo.”​—Apocalypse 12:7-9.

¹² Kode so Bible ayeke fa na angoi so aye ayeke si na ni, nga aye so ayeke si fadeso na sese afa biani ngu 1914 tongana ngoi so bira ti yayu so asi. Ti londo na ngoi ni so, dutingo ti aye na sese ayeke ga gi sioni ahon ti kozo. Apocalypse 12:12 afa ngbanga ti nyen aye ni aga sioni tongaso tongana lo tene: “Tongaso i sala ngia, O ayayu, na i so i duti na yâ ni! Vundu aga na sese na kota ngu ti ingo! Teti zabolo azu na sese na i na ngonzo mingi, teti lo hinga lâ ti lo angbâ mingi pëpe.”

¹³ Tongana ye ni ayeke tongaso, a mû lege na e ti hinga ngbanga ti nyen Zabolo atuku ngonzo ti lo kozoni kue na ndo awavorongo Nzapa so a sa yingo na ndo ti ala, nga na afon ala “ambeni ngasangbaga”. (Jean 10:16; Apocalypse 12:17). Na yâ ngoi kete, fade bira so ayeke be tâ ngangu na lâ ni so Zabolo ayeke londo na ngonzo na bê ti lo ti ga ti sala ngangu bira na ala kue so amû mbage ti Royaume ti Nzapa na so azia bê ti ala na lo. A sala tënë ti kpengba bira so na yâ chapitre 38 ti Ezéchiel, na a fa so a yeke “Gog, zo ti sese ti Magog” si ayeke ga na bira so.

¹⁴ Ti londo na ngoi so a tomba Satan na yayu si lo ga na sese, tongana na ambeni ngoi Satan alondo na bira na tele ti azo ti Nzapa, ambeni kota zo ti poroso amû maboko na ala. Na lege ti fä, Apocalypse 12:15, 16 asala tënë ni. Ye oko, Bible afa so na ngoi ti ndangba bira so Satan ayeke ga na ni, ye ni ayeke duti ti lo tâ nde; fade zo oko pëpe na sese ayeke mû mbage teti ala so azia bê ti ala kue na Jéhovah. A lingbi ye so abi mbito na bê ti aChrétien na a sala si ala yengi? Oko pëpe!

¹⁵ Fade Nzapa ayeke mû maboko na azo ti lo legeoko tongana ti so lo mû maboko lani na mara ti lo ti giriri na ngoi ti Gbia Josaphat. E diko: “I mä, O i azo ti Juda kue, na i so i duti na Jérusalem, na mo gbia Josaphat, L’Eternel atene tongaso, I sala mbito pëpe, na i zia azo mingi so ayengi bê ti i pëpe. Bira so ayeke ti i pëpe me ti Nzapa. . . . A yeke ngbanga ti i ti tiri bira so pëpe, i leke tele ti i, i luti kpô ti bâ salut so L’Eternel amû na i. O i azo ti Juda, na i azo ti Jérusalem, i sala mbito pëpe, i zia ye ayengi i pëpe, kekereke, i gue ti sala bira na ala, teti L’Eternel ayeke na i.”​—2 Chronique 20:15-17.

¹⁶ A dë bê ti azo ti Juda so a yeke ti ala ande pëpe ti sala bira ni. Legeoko nga, tongana Gog ti Magog aga ande ti sala bira na azo ti Nzapa, fade ala yeke mû pëpe aye ti bira ti bata na tele ti ala. Nde na so, fade ala yeke ‘luti kpô ti bâ salut ti Jéhovah’ na mbage ti ala. Biani, ti luti kpô aye pëpe ti tene so ala yeke sala ande ye oko pëpe; même azo ti Nzapa ti ngoi ti Josaphat aduti lani gi senge tongaso pëpe. E diko: “Josaphat azuku, lo zia lê ti lo na sese, na azo ti Juda kue na awakodoro ti Jérusalem atï na sese na gbele L’Eternel, ala sambela L’Eternel. . . . Na tongana [Josaphat a] wa tele ti lo na azo ni, lo hiri azo ti bia ti yü ye ti pendere ti nzoni-kue na ti sepela L’Eternel. Ala tambela na gbele aturugu, ala tene, Mû merci na L’Eternel, teti nzobe ti Lo angbâ lakue.” (2 Chronique 20:18-21). Biani, même na gbele bira so wato ayeke ga na ni na ndo ala, azo ni angbâ lakue ti gonda Jéhovah na wâ. Ye so aduti tapande so aTémoin ti Jéhovah ayeke mû pekoni tongana Gog ayeke ga ande ti sala bira na ala.

¹⁷ Ti ku na ngoi so, na même na pekoni so Gog ayeke ga na bira ti lo, aTémoin ti Jéhovah ayeke ngbâ lakue ti mû mbage ti ala na Royaume ti Nzapa. Fade ala yeke ngbâ lakue ti wara ngangu nga na batango tele na yâ akongregation 94 600 ti sese kue (Esaïe 26:20). So ayeke duti ande tâ nzoni ngoi ti gonda Jéhovah na mbito pëpe! Biani, kungo ngoi so ayeke ndulu ti si so Gog ayeke ga na bira na ndo ala, asala pëpe si aTémoin adö na mbito. Nde na so, a yeke pusu ala ti kiri ti mû mingi sandaga ti ala ti gonda, alingbi na ye so ala lingbi biani ti sala.​—Psaume 146:2.

¹⁸ Nzoni bango ndo so asigigi pendere mingi na yâ salango ye ti amaseka saki mingi mingi ti ndo lê sese kue so amû kusala ti ngoi kue. Ti fa so sorongo mara ti kusala tongaso ayeke kota mingi ahon kusala kue so zo alingbi ti soro, a sigigi na mbeni tract so li ti tënë ni ayeke Jeunes gens—Qu’allez-vous faire de votre vie? na ngoi ti akota bungbi ti district ti ngu 2002. A-Chrétien kue so ade pendere wala so aga mbakoro awe akiri singila mingi teti mara ti adango bê tongaso, so atï tâ na ngoi ni.​—Psaume 119:14, 24, 99, 119, 129, 146.

¹⁹ Atâa aye ti ngangu so ayeke si fadeso na ndo ti sese, a lingbi aChrétien aduti na mbito pëpe na azia pëpe si ye ayengi ala. Ala hinga so na yâ ngoi kete, fade Royaume ti Jéhovah ayeke zi biaku alege nde nde kue ti salango ngangu na zo. Ala wara nga dengo bê ti hinga so azo mingi so awara kuâ ndali ti salango ngangu ayeke kiri ande na fini na londongo ti akuâ. Ti ambeni zo so ayeke zingo na popo ti akuâ, a yeke duti ande kozo lege so azi na ala ti manda ye na ndo Jéhovah; me ti ambeni zo ni nde, ye so ayeke mû ande lege na ala ti ngbâ ti sala kusala ti ala teti Jéhovah.​—Kusala 24:15.

²⁰ Teti so e yeke atâ Chrétien, e bâ biani nene ti bata dutingo nde ti e tongana Chrétien, na e ye ti ngbâ lakue ti sala tongaso. E ye ti bata lakue pendere beku so e yeke na ni ti ‘luti kpô na ti bâ salut ti Jéhovah’. Fade article ti peko ayeke kpengba mabe ti e na salango si e zi lê ti e nzoni na ndo aye so ayeke si fadeso na ndo sese na so ayeke mû lege na e yeke yeke ti hinga tënë mingi na ndo gango tâ tënë ti aprophétie ti Bible.

[Kete tënë na gbe ni]

Mo lingbi ti fa pekoni?

• Ngbanga ti nyen azo mingi laso ayeke na nzoni bango ndo pëpe na ndo kekereke?

• Ngbanga ti nyen aTémoin ti Jéhovah ayeke na nzoni bango ndo na ndo kekereke?

• Ye nyen Jéhovah asala awe na ndo ye so ayeke na gunda ti salango ngangu kue so zo ayeke sala na amba ti lo?

• Ngbanga ti nyen nda ti tënë ayeke dä oko pëpe teti e ti sala pëpe mbito ti bira so Gog ayeke ga na ni?

[Ahundango tënë ti manda na ye]

1. Salango ye ti a-terroriste ayeke sala nyen na ndo azo? Na ngbanga ti nyen dutingo na mbito ti ala ni ayeke na lege ni?

2. Bango ndo ti aTémoin ti Jéhovah ayeke tongana nyen na mbage ti a-terroriste? Na ye so aga na ahundango tënë wa?

3. Aye wa asala si zo aduti na mbito? Na tënë wa a fa kozoni awe na ndo ngoi ti e?

4. Atâa so 2 Timothée 3:1-3 afa gi asioni ye so ayeke si, ye ti nzoni ni na yâ versê so ayeke so wa?

5. A ninga mingi pëpe, ye nyen amara aleke ti sala ti hon ndo ti kpale so a-terroriste ayeke ga na ni?

6. (a) Ngbanga ti nyen a lingbi ti duti ngangu na ambeni ngoi ti yeda na dutingo nde ti aTémoin ti Jéhovah? (b) Na ndo tënë ti bingo tele na yâ poroso, tapande wa Jésus azia lani na adisciple ti lo?

7, 8. (a) Tongana aTémoin ti Jéhovah aduti nde na aye ti poroso, a ye ti tene nyen pëpe? Na ngbanga ti nyen? (b) Tongana nyen aRomain 13:1, 2 (NW) afa so a yeke sioni ti mû mbage na akusala ti salango ngangu na mbage ti ayanga-ti-komande?

9. Fa alege use so aTémoin ti Jéhovah ayeke tiri na asalango ye ti a-terroriste.

10. Abeku ti zo ti lungula biaku salango ngangu na amba laso ayeke tongana nyen?

11. Akapa ti aye wa Jéhovah aleke awe ti lungula salango ngangu na zo?

12, 13. (a) Ye nyen apika bê ti e na ndo ngu 1914? (b) Ye wa prophétie ti Ezéchiel afa kozoni awe teti ala so amû mbage ti Royaume ti Nzapa?

14. Na yâ angoi so ahon, tongana nyen a mû maboko na aTémoin ti Jéhovah na yâ aye ti ngangu? Na fade ye ni ayeke duti gi tongaso lakue?

15, 16. (a) Tënë ti dengo bê so Jéhovah amû ni na azo ti lo na ngoi ti Josaphat amû pendere beku wa teti aChrétien laso? (b) Tapande wa Josaphat na azo ni azia teti awakua ti Nzapa laso?

17, 18. (a) Nzoni bango ndo wa aTémoin ti Jéhovah ti laso ayeke na ni na ndo bira ti Gog? (b) Dango bê wa a mû na amaseka Chrétien, na yâ angoi so ahon ade ti ninga pëpe?

19, 20. (a) Ngbanga ti nyen aChrétien ayeke na nda ti tënë oko pëpe ti duti na mbito wala ti zia si ye ayengi ala? (b) Fade article ti peko ayeke sala nyen?

[Foto na lembeti 13]

Jésus azia tâ nzoni tapande so afa na aChrétien ti duti nde na sese so

[Afoto na lembeti 16]

Amaseka Témoin saki mingi ayeda na ngia ti mû kusala ti ngoi kue

[Lingu ti foto na lembeti 12]

FOTO TI BENDO TI GIGI 186226/M. Grafman