Mo bâ na nene ni aita so ayeke mbakoro?

TONGANA azo ti Israël ti giriri ayeke ândö na yâ songo ti mbele so ala te na Nzapa, a hunda na ala na ngangu: “A lingbi mo londo, mo luti na gbele zo so kuali ti lo avulu, na mo yekia lê ti mbakoro zo, na mo kpe mbito ti Nzapa ti mo—Mbi yeke L’Eternel!” (Lévitique 19:32). Tongaso, yekiango azo so ayeke mbakoro ayeke lani mbeni kungba so ayeke ti nzoni-kue, ye so ague oko na mango yanga ti Nzapa. Atâa so aChrétien ti ngoi ti e ayeke mbeni pëpe na gbe ti Ndia ti Moïse, a dabe e so Jéhovah ayeke bâ ambakoro so ayeke sala na lo tongana ye ti ngele ngangu (aProverbe 16:31; aHébreu 7:18). E yeke na bango ndo ti Jéhovah na ndo ni? E yeke bâ na nene ni aita ti e ti koli na ti wali so ayeke mbakoro?

Lo bâ lani na nene ni kamarade ti lo so ayeke mbakoro

A yeke wara na yâ buku ti Use mbeti ti aGbia, mbeni tondo ti Bible so agboto lê na ndo fango na gigi yekiango ndo na mbage ti azo so ayeke kangba. A yeke fa na yâ ni tongana nyen maseka prophète Elisée amû ândö kusala ti prophète na peko ti Elie. Zia e bâ ye so asi na ndangba lango ti Elie tongana prophète na yâ royaume ti akete mara bale-oko ti Israël.

Na lango ni so, Jéhovah atene lani na prophète Elie so ayeke mbakoro ti tambela alondo na Guilgal ti si na Béthel, na Béthel ti si na Jéricho nga na Jéricho ti si na Ngu ti Jourdain (2 aGbia 2:1, 2, 4, 6). Na yâ ti atambela so asala ndulu na akilomètre 50, fani ota, Elie ahunda na Elisée ti zia ti mû peko ti lo. Ye oko, legeoko tongana ti so a sala asiècle mingi kozoni, maseka Ruth ake ândö na ngangu ti zia ti mû peko ti Naomi, Elisée ake nga ti zia ti ga na peko ti prophète so ayeke mbakoro (Ruth 1:16, 17). Lege ota Elisée atene: “L’Eternel ayeke! âme ti mo ayeke! fade mbi zia mo pëpe.” (2 aGbia 2:2, 4, 6). Na ngoi ni so, Elisée amû ândö maboko awe na Elie teti angu omene tongaso. Ye oko, lo ye lani ti sala kusala na Elie teti angu mingi ahon so. Biani, tondo ni atene: “Tongana ala de ti gue, na ala yeke sala tënë, bâ, . . . Elie ague na yayu.” (versê 11). Elie na Elisée ayeke sala lani lisoro juska na ndangba ngoi ti kusala ti Elie na Israël. A lingbi ti tene so prophète Elisée, so ayeke ngambe na Elie, ayeke ândö ndulu ti yeda na awango nga na gbâ ti atënë ti kpengbango zo so alondo na mbage ti mbakoro prophète ni so ahinga ndo mingi. Biani, lo bâ na nene ni kamarade ti lo so ayeke mbakoro.

‘Tongana ababâ na amama’

A yeke ngangu pëpe ti hinga nda ni so Elisée andoye lani prophète so ayeke mbakoro tongana mbeni kamarade, na même tongana mbeni babâ na lege ti yingo (2 aGbia 2:12). Ngoi kete kozoni ti tene lo hunzi kusala ti lo na Israël, Elie atene na Elisée: “Mo fa na mbi ye so mo ye mbi ti sala teti mo, kozoni si A [mû] mbi na tele ti mo.” (versê 9). Tongaso, juska na nda ni, Elie afa na gigi bibe ti lo na ndo nzoni duti na lege ti yingo ti zo so ayeke mû kusala ti prophète na peko ti lo, nga ti sala si kusala ti Nzapa angbâ ti gue na li ni.

Laso, a yeke ye ti mungo wâ na bê ti bâ so aita ti e ti koli na ti wali so ayeke mbakoro, na so ayeke sala ye tongana ababâ na amama, ayeke kangbi na nzoni bê hingango ye nga ndara ti ala na aita so ade maseka. Na tapande, aita so asala kusala na yâ ti abiröo ti filiale ti aTémoin ti Jéhovah teti angu mingi ayeke mû maboko na bê ti ala kue na afini ita ti Béthel ti wara akode so a hunda ti sala na kusala ti ala. Legeoko nga, asurveillant so ague na ndo nde nde, so asala vizite na akongregation teti angu mingi na awali ti ala, ayeke nga na ngia ti kangbi gbâ ti akode so ala wara na aita so a yeke leke ala ti sala kusala tongana awakua so ague na ndo nde nde. Na ndo ni, a yeke wara na yâ akongregation mingi ti aTémoin ti Jéhovah na ndo sese aita-koli na aita-wali so ayeke mbakoro, na so asala na Jéhovah na be-ta-zo teti angu mingi. Ala yeke na ngia ti kangbi tâ ndara nga akode so ala wara na afini membre ti kongregation.​—aProverbe 2:7; aPhilippien 3:17; Tite 2:3-5.

Bingo bê so aita so afa, aita ti e ambakoro so e ndoye ala mingi, asala si ti yekia ala amû biani ngia na bê. Ni la, e ye ti mû tapande ti Elisée na bango na nene ni mingi aita so ayeke mbakoro. Tongana ti so bazengele Paul adabe ti e, zia e ngbâ lakue ti bâ “mbakoro-koli . . . tongana babâ” nga “ambakoro-wali tongana amama”. (1 Timothée 5:1, 2). Na salango tongaso, e yeke mû mbage ti e na nzoni tambelango nga nzoni guengo na li ni ti kongregation ti aChrétien na ndo sese kue.

[Foto na lembeti 30]

Elisée aye lani ti sala kusala na Elie teti angu mingi

[Foto na lembeti 31]

Amaseka ayeke wara aye ti nzoni mingi na mbage ti ambakoro Chrétien