Ngbâ ti fa tënë lakue
1 E yeke na lâ ti aye ti ngangu. Bira na popo ti azo ti kodoro oko, bira na popo ti azo ti akete mara, akpale ti dunia tongana yengingo ti sese, akota pupu, ngu so asuku na amû ndo kue nga ambeni ye ti vundu ni mingi ayeke dä. Laso, azo ayeke na bezoin mingi ti mä nzo tënë ahon ti kozo. Ye oko, salango sanka ti aye ti yingo amû ndo kue. Na yâ ti ambeni territoire, a lingbi ti duti ngangu ti wara azo na yanga-da, na même a yeke ngangu mingi ti wara azo so aye ti dengi mê ti mä e wala so aye ti manda Bible. Atâa so kue, a yeke kota ye ti tene e ngbâ lakue ti fa nzo tënë ti Royaume ti Nzapa so ato nda ti komande awe.—Mat. 24:14.
2 Ndoye teti azo: Kusala ti e ti fango tënë agboto lê ti azo na ndo ndoye so Jéhovah ayeke na ni na mbage ti azo. “Lo ye mbeni zo oko akui pëpe, me Lo ye azo kue achangé bê ti ala.” (2 Pi. 3:9; Ezéch. 33:11). Tongaso, lo mû yanga so, tongana ti so Jésus atene lani, ‘a lingbi a fa Tene-nzoni na amara kue kozoni.’ (Marc 13:10). Nzapa ahunda na azo ti ga na mbage ti lo na ti kpe fango ngbanga so ayeke tï na ndo sese ti Satan (Joël 2:28, 29, 32; Soph. 2:2, 3). Bê ti e apusu e ti kiri singila pëpe na Jéhovah so amû e ti sala kusala so?—1 Tim. 1:12, 13.
3 Tondo ti kusala ti fango tënë na ndo sese kue ti ngu 2004 afa so, na yâ ngu so ahon, a yeke manda Bible na azo 6 085 387 tongaso nze oko oko. Nga yenga oko oko, a yeke wungo ti azo 5 000 tongaso si ayeke wara batême. A wara afini zo so ndali ti deba nzoni ti Jéhovah na ndo angangu so awafango tënë ni angbâ lakue ti sala ti fa tënë na azo kue ti territoire ti ala. Ye so aga na kota ngia mingi na akongregation ni. So tâ matabisi ti duti mbeni fon Nzapa na yâ kusala ti songo fini ti azo!—1 aCor. 3:5, 6, 9.
4 Gonda iri ti Nzapa: E yeke ngbâ lakue ti fa tënë ndali ti mungo gonda na iri ti Jéhovah na ti sala si iri ti lo aga nzoni-kue na gbele azo kue (aHéb. 13:15). Satan ahanda “azo ti sese so kue” ti mä na bê so Nzapa ayeke na ngangu pëpe ti leke akpale ti azo, lo yeke bi bê pëpe na pasi so azo ayeke bâ wala lo yeke dä pëpe (Apoc. 12:9). A yeke na lege ti fango tënë si e yeke fa na gigi tâ tënë na ndo ti nzoni Babâ ti e ti yayu. Zia e ngbâ lakue ti gonda iri ti lo, laso nga teti lakue lakue.—Ps. 145:1, 2.