Fade mara ti azo nde nde kue ayeke sö kuâ
1. Dutingo ti e na gbele Jéhovah aluti na ndo ti nyen?
1 Nzobe ti Nzapa so zo alingbi na ni pëpe asala si azo ayeke wara salut. Ye so bê ti Jéhovah aye ayeke ti tënë “azo kue awara salut, na ahinga tene-biani mbilimbili.” (1 Tim. 2:3, 4). Dutingo ti e na gbele Nzapa aluti pëpe na ndo tënë ti mara ti e, ti kua so e yeke sala, ti angangu ti e wala ti yungo bongo ti e, me na ndo ti mabe so e yeke fa ni na yâ sandaga ti Jésus so azi zo (Jean 3:16, 36). Tongana afon Nzapa na kusala, a lingbi e zi na yâ bê ti e abibe kue so alingbi ti pusu e ti ke azo so Jéhovah ayeke ndulu ti yeda na ala.
2, 3. Ye wa alingbi ti mû maboko na e ti fâ ngbanga pëpe na ndo ti azo gi na bango ala?
2 Kpe ti fâ ngbanga: Jéhovah ayeke bâ ye so ayeke na yâ bê ti azo, lo yeke sala ni na sioni bê pëpe wala na mungo mbage ti mbeni zo (1 Sam. 16:7). Lo yeke bâ nga ngangu so ala yeke na ni ti sala na ye. Tongaso, lo yeke bâ na nzoni lê ala so aye ti nzere na lê ti lo (Ag. 2:7). E yeke bâ amba ti e tongana ti Jéhovah?
3 Bê ti e alingbi ti so na bango ambeni zo so e yeke tingbi na ala na fango tënë. Ala lingbi ti yü agbagbara bongo wala abongo so ayeke kirikiri, ala lingbi ti fâ kuä ti yanga ti ala pëpe, wala ala yü bague na hon wala na poro ti yanga ti ala. Ambeni alingbi ti duti na da ti lango pëpe. Ambeni nde alingbi ti sala ye na e na ngangu. Ahon ti tene e fâ ngbanga na ndo ti azo tongaso na tenengo so ala lingbi lâ oko pëpe ti ga awavorongo Jéhovah, a lingbi e duti na mbeni nzoni bango ndo na ndo ti ala, “teti giriri e yeke awabuba nga, e ke tënë, e mä handa”. (Tite 3:3). Na hingango ye so na li, e yeke duti ande na wâ ti fa tënë na azo kue, même na ala so, gi na bango ala, ala lingbi pëpe.
4, 5. Ye wa e manda na lege ti tapande ti Jésus na ti Paul?
4 Atapande ti giriri: Jésus Christ amû lani maboko na azo so a bâ ala tongana azo so alingbi lâ oko pëpe ti ga awavorongo Jéhovah (Luc 8:26-39). Atâa so lo kanga lê lâ oko pëpe na ndo aye ti sioni, lo hinga so azo alingbi ti bi tele ti ala na yâ ti asioni lege ti tambela (Luc 7:37, 38, 44-48). Tongaso lo hinga nzoni mingi ye so asi na ala, “lo ye ti sala be-nzoni na ala, teti ala yeke tongana angasangbaga so ayeke na berger pëpe”. (Marc 6:34). E lingbi ti sala ngangu mingi ahon ti kozo ti mû peko ti tapande ti lo?
5 A bo bazengele Paul na tënê, a pika lo nga a bi lo na da ti kanga (Kus. 14:19; 16:22, 23). Angangu ye so asi na lo asala si lo zia azo na bê na tenengo na nda ni so lo yeke buba lani ngoi ti lo na mbana na popo ti ambeni mara wala ti mbeni kete mara? Oko pëpe. Lo hinga lani so na popo ti akete mara kue lo lingbi ti wara azo ti nzoni bê, nga lo leke na bê ti lo ti wara ala. A yeke tongaso si e yeke bâ mara ti azo nde nde so ayeke na yâ ti territoire ti e?
6. Ngangu wa salango ye ti e alingbi ti sala na ndo afini zo so aga na abungbi ti kongregation?
6 Yambango azo laso: Mingi ti azo ti Nzapa ayeke na ngia so aita-koli na aita-wali ayamba ala lani na yâ ti kongregation sân ti tene aita ni azia lege na ye so lê ti ala abâ ti sala ngangu na ndo ti ala. Mbeni koli so afâ kuä ti yanga ti lo pëpe, so azia kuä ti li ti lo ayo atuku na peko ti lo na so ayü asaleté bongo aga na yâ mbeni Da ti Royaume na Zamani. Lo yeke mbeni zo so azo ayeke sala nzoni tënë ti lo pëpe. Ye oko, a yamba lo na ngia na bungbi ni. Bê ti lo adö na lo kiri lo ga na yenga ti peko. Kete na pekoni lo fâ kuä ti yanga ti lo nga lo leke tele ti lo nzoni, lo zia lege ti nyongo manga na lo sala mariage na ndeko ti lo. A ninga pëpe, lo na wali ti lo nga na amolenge ti lo ayeke sala na Jéhovah beoko.
7. Na lege wa e lingbi ti mû tapande ti Nzapa ti e so ayeke mû ka mbage ti zo pëpe?
7 Na mungo peko ti tapande ti Nzapa ti e so ayeke mû ka mbage ti zo pëpe, zia e gboto yâ ti tisango ndo so ti tene azo kue abâ nzoni na lege ti be-nzoni ti Nzapa so e lingbi na ni pëpe.
[Kete tënë na lembeti 3]
“Nzapa ayekia mbeni zo teti lê ti lo pëpe; me na yâ amara kue, zo so akpe mbito ti Nzapa, na lo sala ye ti mbilimbili, lo lingbi na lê ti Lo.”—Kus. 10:34, 35.