Fa aye so amû biani ngangu na tënë ti mo

TONGANA mo tene mbeni tënë, azo so ayeke mä mo ayeke na droit ti hunda: “Ngbanga ti nyen ye so ayeke tâ tënë? Ye wa afa so a lingbi zo ayeda na tënë so zo ni ayeke tene so?” Teti mo yeke wafango ye, mo yeke na kungba ti kiri tënë na mara ti ahundango tënë tongaso wala ti mû maboko na azo so ayeke mä mo ti wara akiringo tënë ni. Tongana ye ni ayeke kota ye mingi na yâ fango nda ti tënë ti mo, sala kue ti mû na azo so ayeke mä mo anzoni nda ti tënë ti yeda na ni. Ye so ayeke sala ande si fango ye ti mo aga na zo ti yeda na tënë ti mo.

Bazengele Paul aga na azo ti yeda na tënë ti lo. Lo sala tënë so gere ni aluti nzoni. Lo fa nda ti tënë na lege ni nga lo mû wango na azo. Na lege so, lo gi ti ga na azo so ayeke mä lo ti gbian bango ndo ti ala. Lo zia tâ pendere tapande ndali ti e (Kus. 18:4; 19:8). Tâ tënë, ti handa amba ti ala, azo so tënë ti yanga ti ala anzere mingi ayeke sala kusala na kode ti gango na zo ti yeda na tënë ti ala (Mat. 27:20; Kus. 14:19; aCol. 2:4). Ala lingbi peut-être ti to nda ni na mbeni tënë so ayeke na lege ni pëpe, ti zia bê ti ala na ambeti so afa atënë na mungo mbage ti azo. Ala lingbi nga ti sala tënë ti aye so gere ni aluti nzoni pëpe, ti hulu na ndo ti ambeni ye so ague nde na bango ndo ti ala wala ti pika gi bê ti azo ahon ti pusu ala ti gbu li ti ala. A lingbi e sala kue ti kpe mara ti akode so kue.

Luti ngangu na ndo Tënë ti Nzapa. Zia si ye so e fa alondo na e mveni pëpe. E yeke sala kue ti fa na azo ye so e manda na yâ ti Bible. Na yâ ti kusala ti e so, ambeti ti bungbi ti ngbâa be-ta-zo na ti ndara amû maboko na e mingi. Ambeti so awa e ti gi nda ti Bible nzoni. Ti e, e yeke gboto lê ti azo na ndo ti Bible, pëpe na beku ti fa so tënë ti e la ayeke na lege ni, me na tâ nzara ti gue na ala ti bâ ala mveni ye so Bible atene. E yeda na tënë ti Jésus Christ, so atene na yâ sambela na Babâ ti lo: “Tënë ti Mo ayeke tene-biani.” (Jean 17:17). Mbeni zo so ayeke na ndangba tënë ti hon Jéhovah Nzapa, Wasalango yayu na sese, ayeke dä pëpe. Ti tene gere ti fango nda ti tënë ti e aluti nzoni, a lingbi a luti na ndo Tënë ti lo.

Na ambeni ngoi, mo lingbi ti sala peut-être tënë na azo so ahinga Bible nzoni pëpe wala so abâ ni pëpe tongana Tënë ti Nzapa. A lingbi mo sala ye na ndara ti bâ na ngoi wa nga tongana nyen ti yôro aversê na yâ tënë ti mo. Me a lingbi mo sala kue ti gboto lê ti ala hio na ndo kpengba lingu ti asango so, tongana lege azi ti sala tongaso.

Ti mo, tongana zo afa peko ti mbeni versê so alingbi biani, ye so amû awe mbeni tënë so zo alingbi ti dë kite na ni pëpe? Oko pëpe. A hunda peut-être na mo ti gboto lê na ndo ye so angoro ni ti fa so versê ni amû biani ngangu na ye so mo yeke tene. Tongana mo gboto mbeni kpengba-ndia na yâ ti mbeni versê, nga tongana ye so angoro ni andu tënë ni pëpe, kiri mo fa ambeni ye na ndo ni. Peut-être a yeke nzoni ti sala kusala na ambeni versê nde so andu tënë ni, si azo so ayeke mä mo ahinga so ye so mo yeke tene aluti biani ngangu na ndo Mbeti ti Nzapa.

Kpe ti tene mbeni tënë nde na ti so versê ni aye ti tene. Diko ni nzoni. Versê ni alingbi peut-être ti ndu gi tongaso ye so mo yeke sala tënë na ndo ni. Ye oko, ti tene atënë ti mo aga na azo ti yeda na ni, a lingbi ala wara lege ti bâ na yâ ni ye so afa so atënë ti mo ni ayeke tâ tënë.

Ambeni tënë nde so afa so a yeke tâ tënë. Na yâ ti ambeni ye, a lingbi ti duti nzoni ti sala kusala na ambeni ye nde na Bible so amû asango, so zo alingbi ti zia bê ti lo dä, ti mû maboko na azo ti bâ so Bible afa nda ti tënë na lege ni.

Na tapande, mo lingbi ti fa aye ti dunia so lê abâ tongana ye so afa so mbeni Wasalango ye ayeke dä. Mo lingbi ti gboto lê na ndo andia ti dunia tongana ngangu ti sese ti gboto ye na mbage ti lo, nga ti fa so mbeni Walungo ndia ayeke dä ndali ti so mara ti andia tongaso ayeke dä. Gere ti fango nda ti tënë ti mo ayeke duti ande nzoni tongana a gue oko na ye so Tënë ti Nzapa atene (Job 38:31-33; Ps. 19:2; 104:24; aRom. 1:20). Mara ti fango ye tongaso ayeke mû maboko ngbanga ti so a fa na gigi so ye so Bible atene ague oko na aye so lê abâ.

Mo yeke sala ngangu ti mû maboko na mbeni zo ti bâ so Bible ayeke biani Tënë ti Nzapa? Mo lingbi ti fa peko ti atënë ti awandara so atene a yeke tongaso, me ye so afa so a yeke tongaso biani? Fango peko ti atënë ti awandara so alingbi gi ti mû maboko na azo so ayekia ala. Mo lingbi ti sala kusala na senda-ye ti fa so Bible atene tâ tënë? Tongana mo sala kusala na atënë ti bê ti awandara so ayeke mbilimbili-kue pëpe tongana ndangba tënë, mo yeke leke ye na ndo mbeni ye so akpengba pëpe. Nde na so, tongana mo to nda ni na Tënë ti Nzapa nga na pekoni mo fa aye so senda-ye awara ti gboto lê na ndo tâ tënë ti Bible, gere ti atënë ti mo ayeke luti ande na ndo mbeni kpengba ye.

Atâa ye wa la mo ye ti fa tâ tënë ni, fa aye mingi so ayeda na ni alingbi na ni. Ye ni aluti mingi na ndo azo so ayeke mä mo. Na tapande, tongana mo yeke sala lisoro na ndo lâ ti nda ni so a fa tënë ni na 2 Timothée 3:1-5, mo lingbi peut-être ti gboto lê ti azo so ayeke mä mo na ndo asango so azo ahinga ni mingi, so afa so azo “andoye asongo ti ala pëpe”. Tapande oko so alingbi peut-être biani ti fa so mbage ti fä so ti lâ ti nda ni ayeke ga tâ tënë fadeso.

Mingi ni, hakango aye use so ayeke na a-oko ye alingbi ti mû maboko. Hakango aye ni mveni ayeke fa tâ tënë ti mbeni ye pëpe; a lingbi ye so Bible mveni atene afa na gigi nene ti hakango aye ni. Me ye so alingbi ti mû maboko na mbeni zo ti bâ tongana nyen mbeni tënë ayeke na lege ni. Na tapande, mo lingbi ti sala kusala na ni na ngoi so mo yeke fa so Royaume ti Nzapa ayeke mbeni ngorogbia. Mo lingbi ti fa so legeoko tongana angorogbia ti azo, Royaume ti Nzapa ayeke na amokonzi, azo so ayeke na gbe ni, andia, mbeni bungbi ti aye ti fango na ngbanga nga ti fango na ye na azo.

Mingi ni, mo lingbi ti sala kusala na aye so asi biani na azo ti fa ndara ti salango ye alingbi na wango ti Bible. Mo lingbi ti sala kusala nga na aye so asi na mo mveni ti mû ngangu na tënë so mo tene. Na tapande, tongana mo yeke fa na mbeni zo nene ti dikongo nga ti mandango Bible, mo lingbi peut-être ti fa tongana nyen salango tongaso asala si fini ti mo aga nzoni ahon ti kozo. Ti wa aita ti lo, bazengele Pierre asala tënë ti gbiango tele ti Jésus, so lo bâ lani na lê ti lo (2 Pi. 1:16-18). Paul nga afa aye so asi na lo mveni (2 aCor. 1:8-10; 12:7-9). Biani, a lingbi mo sala kusala mingi pëpe na aye so asi na mo mveni, si mo gboto lê senge senge pëpe na ndo mo mveni.

Ndali ti so ndo so azo alondo dä nga bibe ti ala ayeke nde, tâ ye so aga na mbeni zo ti yeda na mbeni tënë alingbi ti nzere na mbeni zo nde pëpe. Ni la, bi bê na ndo abango ndo ti azo so ayeke mä mo na ngoi so mo yeke soro atënë so mo yeke sala na kusala ande, nga tongana nyen ti fa ni. A-Proverbe 16:23 atene: “Bê ti zo ti ndara afa ye na yanga ti lo, na a sala si yanga ti lo amanda ye [“nga a zia na ndo yanga ti lo ngangu ti ga na zo ti mä na bê”, NW ].”