Lettre ti Wabatango Bungbi

Aita ti e aTémoin ti Jéhovah,

Bazengele Paul agbu alege kue so azi na lo ti fa ndoye na singila ti bê ti lo na mbage ti amba ti lo awamabe. Na aChretien ti Rome, lo tene: “Mbi mû merci na Nzapa ti mbi teti i kue na lege ti Jésus Christ, teti tënë ti mabe ti i awu na sese kue.” (aRom. 1:8). Biani, na ando kue so ayeke giriri na gbe ti Kodoro-togbia ti Rome, a hinga akozo Chrétien ndali ti kpengba mabe ti ala nga kota nzara so ala yeke na ni teti fango tënë (1 aThes. 1:8). A yeke ye ti dongo bê pëpe so Paul ayeke na kota ndoye teti aita ti lo!

Tongana Paul, e kiri singila na Jéhovah lakue tongana e bi bê na ala. E ndoye ala mingi! Zia ala hinga so Jéhovah andoye zo oko oko na popo ti ala. Ambeni na popo ti ala ayeke tiri na ndembe so na akangango lege, me ala zia pëpe ti fa tënë. Zia ala hinga so sarango ye ti ala na mbeto pëpe azia ngia na bê ti Jéhovah!​—aProv. 27:11.

Ala diko na ala gbu li na ndo ti apendere ye so akpengba mabe so ayeke na gbe ti tënë “Les actes des Témoin de Jéhovah dans les temps modernes” so ayeke na yâ ti Annuaire ti ngu 2008. Fade ala yeke bâ aye so afa polele so Seigneur Jésus Christ ayeke sigigi ti “hon na ngangu, na lo gue ti hon na ngangu”; na fade ye ti bira so azo asara ti ke adisciple ti lo ayeke sara ye oko pëpe.​—Apoc. 6:2; Es. 54:17.

Na aChrétien ti Philippes, Paul asû tënë so: “Mbi mû merci na Nzapa . . . teti beoko so i sara na mbi na yâ kusala ti Tene-nzoni.” (aPhil. 1:3-5). E amembre ti Wabatango Bungbi, e yeke na oko bibe so na mbage ti ala. Na ngu ti kusala 2007, awafango tënë 6 691 790 amû angbonga 1 431 761 554 ti fa nzoni tënë na yâ ti akodoro 236 na ndo ti sese kue. So tâ kota ngangu si ala yeke sara ti tene nzoni tënë angbâ ti mû ndo! Ala bi bê na azo saki ngbangbo mingi so na lege ti ngangu ti e kue nzoni tënë andu ala, na ye so kue amû gonda na Jéhovah!

Na mbeni ngoi nga, Paul afa so lo bi bê ti lo mingi na aita ti lo. Lo sû tënë so na aThessalonicien: “E dabe e lakue na kusala ti i ti mabe . . . beku ti i so anze pëpe, beku so ayeke na yâ Seigneur ti e Jésus Christ, na gbele Nzapa Babâ ti e.” (1 aThes. 1:2, 3). Biani, gigi ni ayeke ngangu mingi. Akpale ayeke si, me kota ye ni ayeke ti gbu ngangu. Kpale wa mo yeke tiri na ni na ndembe so? Vundu asara mo ngbanga ti so tere ti mo aso mingi si akanga lege na mo ti sara kua mingi na Jéhovah? Wali ti mo wala koli ti mo so mo na lo aye tere teti ngu mingi akui? (aProv. 30:15, 16). Atâa so Mbeti ti Nzapa ahunda ti sara mariage na yâ Seigneur na mo bata tënë so, a yeke ngangu na mo ti wara mbeni zo so aye Jéhovah tongana mo ti sara mariage na lo? (1 aCor. 7:39). Mo yeke sara ngangu ti bata amolenge ti mo atâa kota kpale ti nginza so mo yeke na yâ ni? Atâa dutingo ti mo ayeke tongana nyen, tongana mo zia Royaume na kozo ndo, mo yeke hinga biani so Jéhovah alingbi pëpe ti “girisa kusala ti i, ndoye so i fa giriri teti iri ti Lo.” Aita koli na aita wali, zia si “bê ti e anze pëpe na sarango kusala ti nzoni”!​—aHéb. 6:10; aGal. 6:9.

Nyen la alingbi ti mû maboko na e ti gbu ngangu? Legeoko tongana aThessalonicien, a yeke “beku so ayeke na yâ Seigneur ti e Jésus Christ.” A yeke na lege ni si Paul ahaka “beku ti salut” na mbeni casque so akpengba, so alingbi ti bata mbeni Chrétien nde na asioni bibe nga na akite so angbâ gi ngbango na bê ti e.​—1 aThes. 5:8.

Biani, na gbungo ngangu na ngia, mo yeke kiri tënë na zonga ti Satan na ndo ti tënë so andu mbilimbili ti yanga-ti-komande ti Nzapa na yâ ti dunia kue. Satan atene so a dü awakua ti Nzapa na yâ ti kion, na kamême so ala lingbi ti yeda ti sara na Nzapa teti mbeni ngoi, ala yeke kiri na peko na yâ ti kusala ni tongana tara aga ngangu wala aye ti sese so atambela nzoni pëpe tongana ti so ala ku fade. Mo yeke na kota pasa ti fa na gigi so Satan ayeke tâ wamvene tongana ti so lo yeke! Lâ oko oko mo yeke pusu nduru nduru na aye ti nzoni so mo yeke ku.

Tongana Paul so agbu lege so azi na lo ti gonda aita ti lo ndali ti kpengba mabe ti ala, mungo mbage ti ala kue na kusala ti fango tënë nga gbungo ngangu ti ala, e nga kue, e gbu ngoi so ti gonda ala na ti fa na ala so e ndoye ala. Zia ala ngbâ lakue ti sara kusala so nzoni!

Zia si Jéhovah ahiri tënë nzoni mingi na ndo ti ala na yâ ti ngu so kue.

Aita ti ala,

Wabatango Bungbi ti aTémoin ti Jéhovah