Fa so mo hinga ye ni biani na bê ti mo kue

TONGANA mbeni zo asala tënë na lo fa so lo hinga ye ni biani na bê ti lo kue, azo ayeke bâ so lo mä na bê ngangu na ye so lo yeke tene. Mara ti hingango ye na bê kue tongaso asigigi lani polele na yâ kusala ti Paul. Lo sû mbeti so na azo so amä na bê na kodoro ti Thessalonique, lo tene: “Tene-nzoni ti e aga na i gi na lege ti tënë pëpe, me na . . . bê so ahinga biani.” (1 aThes. 1:5). Ye so asigigi polele na yâ ti kode ti salango tënë ti lo nga na lege so lo duti na fini. A lingbi azo abâ polele na lege so e yeke fa na atâ tënë ti Bible so e hinga tënë ni biani na bê ti e kue.

Ti tene zo afa so lo hinga ye ni biani na bê ti lo kue ayeke nde na ti luti ngangu na ndo tënë ti lo mveni wala ti bâ tele ti lo na nene ni ahon ndo ni. Nde na so, tongana zo so afa so lo hinga tënë biani na bê ti lo kue ayeke sala tënë ti aye so ayeke na yâ Tënë ti Nzapa, lo yeke sala ni na mbeni lege so afa atene lo yeke na mabe so akpengba.​—aHéb. 11:1.

Angoi ti fa so mo hinga ye ni biani na bê ti mo kue. A yeke kota ye ti tene na fango tënë mo sala tënë na mbeni lege so afa so mo hinga tënë ni biani na bê ti mo kue. Mingi ni, azo ayeke bâ lege so mo yeke sala na tënë nga na tënë so mo ga na ni. Ala yeke hinga tongana nyen tënë so mo yeke tene agbu bê ti mo. Ahon atënë kue so mo lingbi ti tene, tongana mo fa so mo hinga ye biani na bê ti mo kue, ye so alingbi ti fa na gigi so mo yeke na mbeni ye ti ngele ngangu ti kangbi ni na ala.

A hunda nga na e ti fa so e hinga ye biani na bê ti e kue tongana e yeke sala tënë na amba ti e Chrétien. Bazengele Pierre asû kozo mbeti ti lo na gbe ti yingo ti “wa [zo na ti] sala tënë ti témoin, so ayeke tâ grâce ti Nzapa”. Na yâ ni, lo wa aita ti lo, lo tene: “I duti kpô na yâ ni [“i luti ngangu”, NW ].” (1 Pi. 5:12). Tongana lo yeke sû mbeti na kongregation ti Rome, bazengele Paul afa so lo hinga ye biani na bê ti lo kue, na ye so asala nzoni na ala. Lo tene: “Mbi hinga biani, fade kui, wala fini, wala a-ange, wala akozo-gere-ti-komande, wala ye ti fadeso, wala ye so ayeke ga, wala angangu, wala yongo ni na nduzu, wala yongo ni na gbe ti sese, wala mbeni ye nde so A créé awe, alingbi kangbi e pëpe na ndoye ti Nzapa so ayeke na yâ Christ Jésus Seigneur ti e.” (aRom. 8:38, 39). Paul asû nga mbeti na ndo nene ti fa tënë na azo, na lo ga na azo ti yeda na tënë ni. Na ndo ni, wâ ti lo mveni na yâ kusala so afa polele so lo mveni lo hinga biani na bê ti lo kue nene ti kusala so (Kus. 20:18-21; aRom. 10:9, 13-15). A lingbi a bâ nga mara ti ye tongaso na mbage ti a-ancien laso na ngoi so ala yeke fa ye na lege ti Tënë ti Nzapa.

Na angoi ti mandango ye nga na ambeni ngoi nde, a lingbi ababâ na mama asala tënë na lege so afa so ala hinga tënë ni biani na bê ti ala kue tongana ala yeke sala lisoro na ndo aye ti yingo na amolenge ti ala. Ye so ahunda ti tene ababâ na mama ni akono na yâ ti bê ti ala mveni ndoye teti Nzapa nga teti asalango ye ti lo. Tongaso ala lingbi ti sala tënë na bê ti ala kue na amolenge ti ala, “teti yanga ti zo asala tënë ti ye so asi bê ti lo.” (Luc 6:45; Deut. 6:5-7). Teti so ababâ na mama ahinga ye ni biani na bê ti ala kue tongaso, ye so ayeke pusu nga ala ti zia mbeni tapande ti “tâ mabe”.​—2 Tim. 1:5.

A yeke mbilimbili kota ye ti fa so mo mveni mo hinga ye biani na bê ti mo kue tongana azo adë kite na ndo mabe ti mo. Li ti mbeni kamarade ti ekole, ti mbeni wafango mbeti wala ti mbeni zo so mo na lo ayeke sala kua oko alingbi ti kpe ndali ti so mo mû mbage ti mo pëpe na mbeni matanga. Tongana gere ti kiringo tënë ti mo aluti nzoni, ye so alingbi ti mû maboko na lo ti bâ na nene ni salango ye ti mo so Bible afa lege na ni. Ka tongana mbeni zo ayeke gi ti pusu mo ti sala sioni, na tapande ti nzi, ti nyon mbangi wala ti sala pitan? A yeke kota ye ti fa polele so mo yeke bi ande tele ti mo pëpe na yâ mara ti salango ye tongaso, nga so ngangu kue so zo ayeke sala ande ti ga na mo ti changé ti sala mbeni ye nde ayeke lï ngu ande. Tongana mo yeke ke mara ti ahundango ye tongaso, a lingbi mo sala tënë na mbeni lege so afa so mo hinga ye ni biani na bê ti mo kue. Na ngoi so lo yeke ke tënë ti wali ti Potiphar so ahunda na lo ti sala pitan na lo, Joseph atene tâ polele tënë so: “Mbi lingbi sala kota sioye so na siokpari ti ke Nzapa tongana nyen?” Tongana wali ni angbâ ti hunda ye so na lo, Joseph akpe da ni.​—Gen. 39:9, 12.

Lege so mo yeke fa so mo hinga ye ni biani na bê kue. Atënë so mo yeke tene alingbi ti sala kota ye mingi ti mû lege na mo ti fa so mo hinga ye ni biani na bê ti mo kue. Fani mingi, Jésus ato nda ti akota tënë tongaso: “Biani, biani, Mbi tene na mo.” (Jean 3:3, 5, 11; 5:19, 24, 25). Paul afa so lo hinga ye biani na bê ti lo kue na tenengo atënë tongana “mbi hinga biani,” “mbi hinga na bê ti mbi biani na yâ Seigneur Jésus” nga na “mbi tene tene-biani, mbi sala wataka pëpe”. (aRom. 8:38; 14:14; 1 Tim. 2:7). Na ndo gango tâ tënë ti atënë ti lo, na ambeni ngoi Jéhovah azia yingo ti lo apusu aprophète ti sala angangu tënë tongana “fade a ga biani”. (Hab. 2:3). Tongana mo yeke sala tënë ti aprophétie so, mo lingbi ti sala tënë tongaso nga. Tongana mo zia bê ti mo na mo mveni pëpe, me na Jéhovah, nga tongana mo sala tënë na azo na nengo ala, atënë so afa na gigi mara ti hingango ye biani na bê kue tongaso ayeke fa ande so mo yeke na ngangu mabe.

Tongana mo yeke sala tënë na wâ nga na ngangu, azo ayeke bâ so mo hinga biani na bê ti mo tënë so mo yeke tene. Salango maboko nga na lê ti mo ayeke mû lege na mo ti sala ye so, atâa so salango ye ti tele ti azo alingbi ti duti nde nde. Atâa tongana mo yeke zo ti kamene mingi wala mo yeke sala tënë ka na ngangu pëpe, tongana mo hinga biani na bê ti mo kue so ye so mo yeke tene ayeke tâ tënë na a lingbi azo amä ni, azo ni ayeke bâ ni polele.

Biani, a lingbi aye kue so e sala ti fa so e hinga ye biani na bê ti e aduti tâ ye. Tongana azo abâ so e yeke handa gi lê ti ala me e yeke sala tënë na bê ti e kue pëpe, ala lingbi ti tene na nda ni so yâ ti tënë ti e ni ane pëpe. Tongaso, ahon ye kue, sala ye gi tongana ti so mo yeke sala ka. Tongana mo yeke sala tënë na gbâ ti azo, a lingbi mo sala tënë na kota go ahon ti so mo yeke sala ka, nga na ngangu. Me a lingbi ye so mo zia na gbele mo ayeke ti fa tënë ti mo na bê kue nga tongana ti so mo yeke sala ka.

Aye so amû maboko ti fa so mo hinga ye ni biani na bê ti mo kue. Teti so atënë ti bê ti mo na ndo ye so mo yeke sala na kusala na yâ ti devoir ti mo si ayeke gue na mo ti fa so mo hinga tënë ni biani na bê ti mo kue, a yeke kota ye ti leke tele nzoni. Ti mû gi tënë ti yâ ti mbeni mbeti na ti fa gi pekoni alingbi pëpe. A lingbi mo mä yâ ti ye ni nzoni na mo lingbi ti fa ni na lege ti atënë ti mo mveni. A lingbi mo hinga na bê ti mo kue so a yeke tâ tënë nga so ye so mo yeke tene ayeke kota ye mingi teti azo so ayeke mä mo ande. So aye ti tene so tongana mo yeke leke devoir ti mo, mo yeke bi bê nga na dutingo ti ala nga ye so ala hinga peut-être awe na ndo tënë ni, wala tongana nyen ala yeke bâ ni.

Tongana tënë ti e asua pendere mingi, a yeke ngangu pëpe na azo ti bâ so e hinga ye ni biani na bê ti e kue. Ni la, na ndo ti lekengo tele nzoni kozoni, leke nzoni lege so mo yeke sala ande na devoir ni. Bi lê mbilimbili na ndo ambage ti devoir ti mo so ahunda ti sala tënë na wâ mingi si mo lingbi ti fa ni sân ti tene lê ti mo angbâ gi na ndo aye so mo sû na mbeti. Girisa nga pëpe ti sambela ti tene Jéhovah ahiri deba nzoni na ndo ngangu so mo yeke sala. Na lege so, fade mo “yeke na mbito pëpe na yâ Nzapa” ti mo ti sala tënë na mbeni lege so afa so mo hinga biani na bê ti mo kue so tokua so mo yeke gue ti fa ayeke tâ tënë nga ayeke kota ye.​—1 aThes. 2:2.