Chapitre 19

Afa ye na wali ti Samarie

TI LONDO na Judée ti gue na Galilée, Jésus na adisciple ti lo ahon na ya sese ti Samarie. Tongana ala nze teti ala tambela mingi, ala luti na midi ti wo tele ti ala ndulu na mbeni du-ngu so ayo pepee na gbata ti Sychar. Jacob asala du-ngu so a sala la ni ngu ngbangbo mingi. Ndulu na gbata ti Naplouse ti laso, du-ngu so ayeke da lakue.

Tongana Jésus ayeke wo tele ti lo na ndo so, adisciple ti lo ague ti ala na gbata ni ti vo kobe. Tongana mbeni wali ti Samarie aga ti to ngu, Jésus atene na lo: “Mu na mbi ngu, mbi nyon.”

Na lege ti tene ti kangbi so alondo na ngoi ti giriri, aJuif asala songo la oko na azo ti Samarie pepee. Ni laa, na dongo be, wali ni ahunda Jésus: “Teti nyen, mo so mo yeke Juif, mo hunda mbi na ngu ti nyon, mbi so mbi yeke wali ti Samarie?”

Jésus akiri tene: “Tongana mo hinga lo so atene na mo: ‘Mu na mbi ngu, mbi nyon’, ka mo hunda lo kozoni, si lo mu na mo ngu so amu fini.”

Wali ni akiri tene: “Seigneur, mo yeke na ye ti to na ngu pepee, na du-ngu so ali mingi. Tongaso mo wara ngu so amu fini na ndo wa? Mo yeke kota ahon baba ti e Jacob? lo so amu na e du-ngu so lo mveni na amolenge ti lo na abagara ti lo anyon ngu so.”

Jésus atene: “Zo so anyon ngu so, fade nzala ti ngu asala lo mbeni. Me zo so anyon ngu ni so mbi mu na lo, fade nzala ti ngu asala lo mbeni pepee. Me ngu so fade mbi mu na lo fade aga li-ngu na ya lo si asi na fini ti lakue lakue.”

“Seigneur, mu na mbi ngu so, si nzala ti ngu asala mbi mbeni pepee, na mbi ga na lege so ti to ngu mbeni pepee”, wali ni atene.

Tongaso, Jésus atene: “Mo gue, mo hiri koli ti mo.”

Wali ni akiri tene: “Mbi yeke na koli pepee.”

Jésus abaa so lo tene taa tene. Lo tene na lo: “Mo sala tene so na lege ni, tongana mo tene: ‘Mbi yeke na koli pepee.’ Teti so mo kamata koli oku giriri, na koli so mo yeke na ni fadeso ayeke koli ti mo pepee.”

Wali ni atene na Jésus: “Seigneur, mbi baa mo yeke prophète.” Lo fa na gigi so lo yeke na nzala ti aye ti yingo, lo tene azo ti Samarie “asambela na hoto so [Guérizim, so ayeke ndulu]; me i [aJuif] tene Jérusalem ayeke ndo so a lingbi azo asambela da.”

Jésus afa na lo tongana nyen ndo ti vorongo Nzapa si ayeke kota ye pepee. Lo tene: “Ngoi ayeke ga, so fade azo so avoro Nzapa taa na lege ni, fade ala voro Baba na yingo na taa tene, teti Baba agi mara ti azo tongaso ti voro lo. Nzapa ayeke yingo, na ala so avoro lo, a lingbi ala voro lo na yingo na taa tene.”

Tene ti Jésus andu be ti wali ni mingi. Tongaso lo tene: “Mbi hinga Messie ayeke ga, lo so adi iri ti lo Christ. Tongana lo si, fade lo fa ye kue na e.”

Jésus atene na lo: “Mbi so mbi sala tene na mo, mbi yeke lo.” Mo baa kete si! Wali ti Samarie so aga ti to ngu na midi, ngbanga ti so lo kpe peut-être ti tingbi awali ti gbata so ake lo ndali ti dutingo ti lo. Me, baa, Jésus amu na lo taa kota matabisi. Lo fa polele tene so lo de ti tene na mbeni zo pepee. Nyen asi na peko ti tene ni?

Azo ti Samarie mingi ama na be

Tongana adisciple ague na Sychar na ala kiri na kobe na maboko ti ala, ala baa Jésus na tele ti du-ngu, na ndo so ala zia lo da. Me fadeso Jésus asala tene na mbeni wali ti Samarie. Na singo ti adisciple, wali azia ta ti ngu ti lo, lo londo ti gue na kodoro.

Teti so tene ti Jésus anzere na be ti lo mingi, lo tene na azo ti gbata: “I ga, i baa zo so afa na mbi ye kue so mbi sala giriri.” Ti tene ala duti na nzala ti baa zo ni, lo hunda na ala tene so: “Lo yeke Christ pepee?” Hundango tene ni asala kusala awe—ala gue ti baa lo na le ti ala mveni.

Na ngoi so, adisciple ayeke sala kue ti tene Jésus ate kobe so ala gue fade ti gi ni. Me lo kiri tene na ala: “Mbi yeke na kobe ti te so i hinga pepee.”

Adisciple ahunda tene na popo ti ala: “Mbeni zo aga na kobe na lo?” Jésus atene na ala: “Kobe ti mbi ayeke ti sala ye so lo so ato mbi aye, na ti sala kusala ti lo kue. I tene pepee? ndani nze osio, fade ngoi ti fango le-kobe asi.” Ti bi le ti azo na ndo fango le-kobe ti yingo, Jésus atene: “I yaa le ti i, i baa le-kobe ti yaka abe alingbi na fango ni. Zo so afa le-kobe ni awara futa ti lo, na lo bungbi lengo ni teti fini ti lakue lakue, si zo so alu na zo so afa le-kobe alingbi duti na ngia lege-oko.”

Jésus abaa awe peut-être nzoni ye so asi teti lo sala tene na wali ti Samarie, teti azo mingi ama na be na lo ndali ti tene ti témoin so lo sala. Lo fa tene na azo ni, lo tene: “Lo fa na mbi ye kue so mbi sala giriri.” Tongana azo ti Sychar aga ti baa Jésus na tele ti du-ngu, ala hunda na lo ti ngba na ndo ti ala ti fa na ala ye mingi ahon ti so. Jésus ayeda na tisango so ala tisa lo na lo ngba na ndo ti ala lango use.

Tongana azo ti Samarie ama tene ti Jésus, ambeni zo mingi ama na be. Tongaso ala tene na wali ni: “Fadeso e ma na be na lo gi teti tene ti mo pepee, me teti e mveni e ma lo, na e hinga lo yeke lo so aso sese so biani.” Wali ti Samarie so amu na e taa nzoni tapande, tapande ti sala tene ti témoin ti Christ na lege ti kode so azia nzala ti hinga ye na be ti ala so ayeke ma e, si ala lingbi ti gi lege ti hinga ye mingi ahon!

I dabe i so ye so asi nze osio kozoni na ngoi ti fango le-kobe—so ayeke le-kobe ti orge, so a sala ni na Palestine na ngoi so ndo wa ayeke mingi pepee. Tongaso Jésus afa ye na azo ti Samarie peut-être na nze ti novembre wala décembre. So ti tene na peko ti Pâque ti ngu 30 ti ngoi ti e, Jésus na adisciple ti lo angba nze miombe na sese ti Judée ti fa ye na ti mu batême na azo. Fadeso, ala gue na kodoro ti ala Galilée. Me ye nyen ayeke si ande na ala ka? Jean 4:3-43.

▪ Ngbanga ti nyen be ti wali ti Samarie ado tongana Jésus asala tene na lo?

▪ Ye nyen Jésus afa na lo so abaa ngu so amu fini na ndo ti vorongo Nzapa?

▪ Jésus afa tele na wali so tongana nyen, na ngbanga ti nyen salango tongaso ayeke ye ti dongo be?

▪ Wali ti Samarie so asala tene ti témoin wa, na nyen asi na pekoni?

▪ Jésus asala tene ti kobe wa so andu tene ti fango le-kobe?

▪ E lingbi ti fa lango ti kusala ti Jésus na Judée na peko ti Pâque ti ngu 30 tongana nyen?