Chapitre 20

Ye ti kpene use ni na Cana

TONGANA Jésus akiri na ndo so lo yeke lango da na peko ti kusala ti fango tene so aninga na Judée, a yeke ti tene lo wo tele ti lo pepee. Ye ni ayeke nde, lo tonda ti fa tene mingi ahon na Galilée, ndo so abata lo da. Me adisciple ti lo angba na tele ti lo pepee, ala gue na sewa ti ala, na ala kiri ti sala aye so ala zia giriri.

Tene wa si Jésus atonda ti fa? A yeke so: “Royaume ti Nzapa aga ndulu. I gbian be ti i, na i ma na be na nzo tene.” Azo ti Galilée abaa tene so tongana nyen? Ala yeda na Jésus. Ala kue agunda lo. Ye oko, a yeke gi ngbanga ti fango tene ti lo pepee, me ngbanga ti so mingi na popo ti ala ayeke na Jérusalem na ngoi ti Pâque ambeni nze kozoni, na ala baa afa ti kpene so Jésus asala.

E pensé kota kusala ti fango tene ti Jésus na Galilée atondani na Cana. I dabe i, a yeke na kodoro so si, mbeni ngoi kozoni, na londongo na Judée, Jésus asala si ngu aga vin na ngoi ti mbeni matanga ti mariage. Na ngoi so Jésus aga ti use ni na Cana, molenge koli ti mbeni kapitani ti gbia Hérode Antipas, tele ti lo aso mingi. Tongana kapitani so ama so Jésus alondo na Judée, lo si na Cana, lo tambela na yongoro lege, alondo na Capernaüm, kodoro so lo lango da, ti baa lo. Be ti lo ayeke na taa vundu, lo dema tele ti lo na Jésus tongaso: ‘Tongana mo ye mo ga hio kozoni si molenge ti mbi akui.’

Jésus akiri tene na lo: ‘Kiri na ndo ti mo. Molenge ti mo asava awe!’ Kapitani ti Hérode ama na be na lo, lo kiri lo mu yongoro lege ti lo, ti kiri na ndo ti lo. Na lege lo tingbi awakua ti lo so aga na gbele lo, ala ye ti tene na lo hio so ye kue aga nzoni awe—molenge koli ti lo asava awe! ‘La wa si lo ga nzoni?’ lo hunda ala.

‘Biri na ngbonga oko ti peko ti bikombite’, awakua ti lo akiri tene na lo.

Kapitani adabe lo so a yeke na taa ngbonga so si Jésus atene na lo: ‘Molenge ti mo asava awe!’ Na pekoni koli ni na azo ti da ti lo kue aga adisciple ti Christ.

Cana ayeke mbeni kodoro so awara ye ti nzoni. Jésus asala lege use ye ti kpene ka na londongo ti lo na Judée. Biani, a yeke gi amiracle so si lo sala ti si na ngoi so pepee, me a yeke ye so ndani ayeke da, ngbanga ti so ala fa kiringo ti lo na Galilée.

Jésus ague fadeso na Nazareth, kodoro so sewa ti lo ayeke da. Ye nyen aku lo ka? Jean 4:43-54; Marc 1:14, 15; Luc 4:14, 15.

▪ Tongana Jésus akiri na Galilée, ye nyen adisciple ti lo asala, na azo ni awara lo tongana nyen?

▪ Ye ti kpene wa Jésus asala, na ala so awara nzoni da asala nyen?

▪ Na lege wa kodoro ti Cana awara ye ti nzoni na lege ti Jésus?