Akode ti fango nzoni tënë

TETI so Jésus ayeke lani mbeni zo so amû terê ti lo kue na kua ti fango nzoni tënë, lo zia nzoni tapande na adisciple ti lo. Lo mû li ni ti gue na mbage ti azo, lo sara lisoro na ala nga lo fa ye na ala na yanga-da ti ala nga na ando so azo mingi ayeke ga dä (Mat. 9:35; 13:36; Luc 8:1). Jésus asara lisoro na ambeni zo lo na ala use, lo fa ye na adisciple ti lo na ngoi so lo duti gï lo na ala nga lo fa tënë na agroupe ti azo saki mingi (Marc 4:10-13; 6:35-44; Jean 3:2-21). Lakue tongana lege ayeke dä lo yeke tene mbeni tënë so akpengba azo na so amû beku na ala (Luc 4:16-19). Même tongana Jésus abezoin ti wu terê ti lo kete na ti te kobe, lo yeke gbu alege kue so azi ti fa tënë (Marc 6:30-34; Jean 4:4-34). Tongana e diko atondo ti kua ti Jésus so a sû ni na mbeti na gbe ti yingo vulu, bê ti e ayeke pusu e biani ti mû tapande ti lo, legeoko tongana ti so abazengele asara giriri.—Mat. 4:19, 20; Luc 5:27, 28; Jean 1:43-45.

² Zia e bâ alege so azi na aChrétien laso ti mû mbage ti ala na kua so Jésus Christ azi li ni a sara fadeso nduru na ngu 2 000 awe.

FANGO TËNË DA NA DA

³ E aTémoin ti Jéhovah, e hinga so a yeke kota ye ti fa nzoni tënë ti Royaume da na da. E sara kua na kode ni so mingi, a sara si a ga mbeni ye so azo ahinga e na ni mingi. Ndara so e fa ni na gigi na sarango kua na kode ti fango tënë so ti ndu azo kutu mingi, gï na yâ ti kete ngoi, aga na gbâ ti aye ti nzoni so amû ngia mingi (Mat. 11:19; 24:14). Kode ti fango tënë da na da so ayeke mbeni nzoni lege ti fa na gigi yengo so e ye na Jéhovah nga na amba ti e.—Mat. 22:34-40.

⁴ Fango tënë da na da ayeke pëpe mbeni fini kode so aTémoin ti Jéhovah asigi na ni laso. Bazengele Paul asara tënë ti fango ye so lo fa lani na azo na da ti ala. Na ngoi so lo yeke fa peko ti kua ti lo na a-ancien ti Éphèse, lo tene: “Na kozo lango so mbi zia gere ti mbi na yâ ti kodro-komanda ti Asie, . . . mbi gbanzi terê ti mbi pëpe ti sara tënë na ala na ndö ti aye kue so ayeke nzoni ndali ti ala nga ti fa tënë na ala . . . da na da.” Atâa da na da wala na ambeni lege nde, Paul afa “nda ti tënë kue na aJuif nga na aGrec na ndö ti tënë ti changengo bê ti ga na Nzapa nga na tënë ti mabe na yâ ti Seigneur ti e Jésus.” (Kus. 20:18, 20, 21). Na ngoi ni so lani, atogbia ti Rome ayeke wa azo ti voro ayanda, na azo mingi ayeke “kpe mbeto ti anzapa mingi.” Ni la, a yeke lani ngoi ti tene hio ala gi “Nzapa so asara dunia nga na aye kue so ayeke na yâ ni,” Lo so na ngoi ni so lo yeke “fa na azo kue na ndo kue so a lingbi ala changé bê ti ala”.—Kus. 17:22-31.

⁵ Laso, ti fa nzoni tënë na azo a yeke mbeni ye so a hunda ti sara ni hio ahon ti kozo. Lâ ti futingo sioni dunia so aga nduru mingi. So e hinga ye ni tongaso, a pusu e ti kiri ti bi terê ti e mingi na yâ ti kua ni. Mbeni pendere kode ti gingo azo so asara nzara ti tâ tënë ti hon kode ti fango tënë da na da ayeke dä ape. Kode ni so angbâ ti ga na aye ti nzoni mingi laso, legeoko tongana ti giriri na ngoi ti Jésus nga na abazengele.—Marc 13:10.

⁶ Mo yeke fa tënë mingi da na da? Tongana a yeke tongaso, hinga so Jéhovah ayeke wara ngia na yâ ti kua so mo yeke sara na lo (Ézéch. 9:11; Kus. 20:35). Peut-être fango tënë da na da ayeke ngangu na mo. Mo yeke peut-être na kpale ti seni wala mo yeke fa tënë na yâ ti mbeni territoire so mingi ti azo ni aye ti mä tënë ni ape. Peut-être gouvernement ti kodro ni akanga lege na kua ni. Peut-être mo yeke zo ti kamene, na a yeke tâ ngangu na mo ti to nda ti lisoro na azo so mo hinga ala lâ oko ape. Ni la, lakue tongana mo yeke fa tënë da na da, mo yeke na mbeni gingo bê. Me découragé ape (Ex. 4:10-12). Aye so asi na mo asi nga na aita ti mo na yâ ti akodro mingi.

⁷ Jésus amû lani zendo na adisciple ti lo, lo tene: “Bâ, mbi yeke na terê ti ala lango oko oko kue juska na lâ ni so aye ti ngoi so ayeke gue ti hunzi.” (Mat. 28:20). Zendo so amû ngangu na e na yâ ti kua ti sarango adisciple. E yeke na oko bibe ti bazengele Paul, so lo tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhil. 4:13). Tongana congrégation aleke kapa ti fango tënë da na da, mû mbage ti mo kue na ni. Tongana mo sara kua na terê ti amba ti mo, a yeke kpengba ande mo nga ala yeke mû maboko na mo ti fa tënë na azo nzoni. Sambela ti wara mungo maboko ti hon ndö ti akpale kue so mo lingbi ti wara, na sara ngangu kue ti fa nzoni tënë mingi.—1 Jean 5:14.

⁸ Na ngoi so mo yeke fa nzoni tënë na azo, mo yeke wara lege ande ti fa na ala “nda ti beku” ti mo (1 Pi. 3:15). Lê ti mo ayeke kiri ti zi ti bâ tâ kangbi so ayeke na popo ti ala so ayeke na beku ti Royaume na ala so ayeke na beku pëpe (És. 65:13, 14). Mo yeke duti na ngia ti bâ so mo sara ye alingbi na commandement ti Jésus so ayeke ti ‘zia lumière ti mo aza’, na peut-être même mo yeke wara pasa ti mû maboko na ambeni zo ti hinga Jéhovah nga ti hinga tâ tënë so ague na zo ti wara fini ti lakue lakue.—Mat. 5:16; Jean 17:3; 1 Tim. 4:16.

⁹ A leke akapa ti fango tënë da na da na anda-yenga nga na asenge lango ti yenga. Na ando so a yeke tâ ngangu mingi ti wara azo na ndo ti ala na ndapre, ambeni congrégation aleke ti fa tënë na lakui. Peut-être ambeni zo ayeke nduru ti mä azo so ayeke ga na ndo ti ala tongana a yeke na lakui wala na ngoi so ndo ade ti vuko mingi ape, ahon ti tene a duti na ndapre.

GINGO AZO SO ALINGBI

¹⁰ Jésus ahunda lani na adisciple ti lo ti “gi” azo so alingbi (Mat. 10:11). Na ngoi so lo yeke gi lani azo so alingbi ti mä tënë ni, lo ngbâ gï pëpe na ndö ti fango tënë da na da. Me, lo fa tënë lani na ngoi kue so lo bâ so a yeke nzoni ti sara ni, atâa a yeke da na da wala na ambeni lege nde so azi na lo (Luc 8:1; Jean 4:7-15). Abazengele nga kue afa tënë lani na azo na ando nde nde.—Kus. 17:17; 28:16, 23, 30, 31.

¹¹ Legeoko nga laso, ye so e zia na gbele e ayeke ti tene zo oko oko kue amä tënë ti Royaume. So aye ti tene, e mû tapande ti Jésus na abazengele ti lo na ndö ti kode so ala yeke fa na tënë lani ti sara na adisciple, nga ti tene e hinga agbiango ye so ayeke si na yâ ti dutingo ti azo ti territoire ti e (1 aCor. 7:31). Na tapande, awafango tënë mingi awara ye ti nzoni na sarango lisoro na azo na ando ti dengo buze. Na yâ ti ambeni kodro, fango tënë na ndö ti lege aga na aye ti nzoni mingi, legeoko nga na fango tënë na yâ ti aparc, na ando so a-oto ayeke luti dä wala na ando kue so a lingbi ti wara azo dä. Ambeni congrégation ayeke sara kua na atable wala na aprésentoir na yâ ti territoire ti ala. Na ndö ni, bureau ti filiale alingbi ti leke kapa ti fango tënë na ambeni ndo ni so azo ayeke hon dä na gere mingi na yâ ti mbeni gbata, na ala lingbi ti sara kua na aita ti acongrégation nde nde. Ye ti peko ni ayeke so a lingbi ti wara lege ti fa nzoni tënë na azo so ayeke ka na yanga-da ti ala pëpe na angoi so aita ayeke gue ti fa nzoni tënë.

¹² Tongana na aplace so azo ayeke ga dä mingi e tingbi na azo so tënë ti Bible anzere na ala, e lingbi ti fa na ala mbeni mbeti ti e so apeut ti nzere na ala. Ti zia nzara ti tënë ni na yâ ti mbeni zo, mo lingbi ti fa na zo ni adresse ti mo wala numero ti téléphone ti mo nga leke ti gue ti bâ lo, fa na lo site jw.org wala fa na lo mbeni Da ti Royaume so ayeke nduru na lo. Peut-être mo yeke bâ so fango tënë na aplace so azo ayeke ga dä mingi ayeke mbeni pendere lege ti fa tënë mingi.

¹³ Ye oko, kua so a mû na e aChrétien laso angbâ gï pëpe na ndö ti kua ti fango nzoni tënë. Tongana mo ye ti mû maboko na azo ti tene ala yeda na tâ tënë so ague na fini ti lakue lakue, a lingbi mo kiri lakue ti bâ ala so asara nzara ti tënë ni, tongaso si ala lingbi ti gue na li ni ti ga aChrétien so ayeke abiazo.

SARANGO AVIZITE

¹⁴ Jésus atene na adisciple ti lo, lo tene: “Ala yeke duti atémoin ti mbi . . . juska na ambage ti sese so ayeke tâ yongoro.” (Kus. 1:8). Me lo tene nga na ala, lo tene: “Tongaso ala gue, ala sara si azo na popo ti amara kue aga adisciple. . . . Ala fa na ala ti bata aye kue so mbi mû yanga na ala ti sara.” (Mat. 28:19, 20). Sarango avizite alingbi ti mû ngia mingi na e na yâ ti kua ti Jéhovah. Azo so tënë ni anzere na ala na kozo gango ti mo na ndo ti ala alingbi peut-être ti duti na ngia mingi tongana mo kiri ti bâ ala. Tongana mo kiri mo fa ambeni tënë ti Bible na ala, peut-être mo yeke wara lege ti kpengba mabe ti ala na Nzapa, na mo yeke mû maboko na ala ti hinga so ala yeke na bezoin ti aye ti yingo (Mat. 5:3). Tongana mo leke terê ti mo nzoni nga mo leke ti kiri ti bâ ala na mbeni ngoi so alingbi na ala, mo lingbi peut-être ti komanse ti manda Bible na ala. A yeke ye so mo yeke gi ka ti sara tongana mo yeke sara avizite. Kua ti e ayeke gï pëpe ti lu ngongoa ti tâ tënë, me nga ti zia ngu dä.—1 aCor. 3:6.

¹⁵ Ti ambeni wafango tënë, a yeke ngangu na ala ti sara avizite. Peut-être mo hinga nzoni mingi awe ti fa tënë nduru, na mo ye kode ti fango tënë ni so mingi. Ye oko, mo bâ so a yeke duti ande ngangu na mo ti kiri ti bâ zo ni ti sara lisoro na lo na ndö ti Bible. Tongana mo leke terê ti mo nzoni mo yeke sara mbeto ape. Sara kue ti sara ye alingbi na anzoni wango so a mû na ngoi ti bungbi ti milieu ti yenga. Mo lingbi nga ti mä terê na mbeni ita so ayeke na kode ti fango tënë mingi ti tene mo na lo ague.

MANDANGO BIBLE NA AZO

¹⁶ Lani tongana Philippe, so ayeke mbeni wafango nzoni tënë, atingbi na mbeni koli so avoro nzapa ti aJuif, so angbâ ti diko Mbeti ti Nzapa, lo hunda lo, lo tene: “Mo yeke mä yâ ti ye so mo yeke diko so biani?” Koli ni akiri tënë na lo, atene: “Ti tâ tënë ni, mbi lingbi ti mä yâ ni tongana nyen tongana mbeni zo ti fa ndani na mbi ayeke dä ape?” Mbaï ti Bible so ayeke na mbeti ti Kusala chapitre 8 atene na e so, Philippe akomanse ti “fa na koli so nzoni tënë na ndö ti Jésus” na lege ti tënë so koli ni ayeke diko na yâ ti Mbeti ti Nzapa so (Kus. 8:26-36). E hinga pëpe ngbonga oke la Philippe amû ti fa tënë na koli so, me e hinga so Philippe azi nda ti aye mingi na lo na ndö ti nzoni tënë ni, juska koli ni amä na bê, na lo hunda ti wara batême. Lo ga mbeni disciple ti Jésus Christ.

¹⁷ Mingi ti azo laso ahinga Bible nzoni ape. Tongaso, a lingbi peut-être ti hunda na e ti kiri fani mingi ti bâ ala na ti manda Bible na ala teti ayenga wala anze mingi, peut-être même ngu oko wala ahon so, kozo ti tene ala mä na bê nga ala lingbi ti wara batême. Me, tongana mo kanga bê nga mo sara ye na ndoye na ngoi so mo yeke mû maboko na azo so aye ti mä tënë ni ti tene ala ga adisciple, mo yeke wara ye ti peko ni, teti so Jésus atene: “Mungo ye na zo aga na ngia mingi ahon warango ye na tïtî zo.”—Kus. 20:35.

¹⁸ Kite ayeke dä ape so mo yeke ye ande ti sara kua na mbeni oko ti ambeti so a leke ni mbilimbili ti manda na Bible na azo ti manda na Bible na mbeni zo. Tongana mo sara ye alingbi na wango so a mû na ngoi ti bungbi ti milieu ti yenga nga mo sara kua na terê ti aita na yâ ti congrégation so ahinga ti fa ye nzoni, mo lingbi ande ti sara a-étude so ayeke gue na li ni nga ti mû maboko na azo ti ga adisciple ti Jésus Christ.

¹⁹ Tongana mo ye ti tene a mû maboko na mo ti hinga tongana nyen ti to nda ti manda Bible na mbeni zo na ti sara ni nzoni, sara kamene ape ti hunda na mbeni ancien oko, wala na mbeni ita so ayeke na kode ti mandango Bible nzoni mingi na azo, ti mû maboko na mo. Awango so a zia na yâ ti Mbeti ti bungbi: Kusala ti e nga na gigi ti e ti Chrétien na so a sara démonstration na ndö ni na ngoi ti bungbi ni so ayeke mû nga maboko na mo. Zia bê ti mo kue na Jéhovah na mo zia tënë ni na yâ ti sambela (1 Jean 3:22). Tongaso, tongana lege ayeke dä, zia na gbele mo ti tene, nde na étude so peut-être mo yeke sara ni na yâ ti sewa ti mo, mo sara nga mbeni étude oko so zo ni ayeke na yâ ti sewa ti mo ape. Tongana mo yeke manda Bible na azo, mo yeke duti na ngia mingi na fango tënë.

FA LEGE TI BUNGBI TI JÉHOVAH NA AZO SO ASARA NZARA TI TÂ TËNË

²⁰ Tongana e yeke mû maboko na azo ti hinga Jéhovah Nzapa nga ti ga adisciple ti Jésus Christ, ala yeke ga na yâ ti congrégation. Azo so ayeke manda Bible ayeke gue ande na li ni na lege ti yingo nga ala yeke kpengba, tongana ala hinga bungbi ti Jéhovah nga ala sara kua maboko na maboko na ni. A yeke kota ye mingi ti fa na ala tongana nyen ti sara tongaso. A sigi na avidéo nga na brochure Azo wa la ayeke sara laso ye so Jéhovah aye? mbilimbili ndali ni. Ambeni sango so ayeke na Chapitre 4 ti buku so alingbi nga ti mû maboko na azo ni.

²¹ Gï na ngoi so mo yeke komanse ti sara lisoro na ndö ti Bible na mbeni zo, mû maboko na lo ti bâ so Jéhovah ayeke sara kua na mbeni bungbi na sese ge, ti sara si kua ti fango tënë amû ndö ti sese kue laso. Fa nene ti ambeti ti e so e yeke manda na Bible na azo, nga fa tongana nyen la awakua ti Jéhovah so amû terê ti ala na lo amû terê ti ala wani ti sigi na ambeti so nga ti kangbi ni na ndö ti sese kue. Tisa zo so mo yeke manda Bible na lo ti tene mo na lo aga na abungbi na Da ti Royaume. Fa na lo tongana nyen la abungbi ni ayeke tambela ka, nga fa lo na aita so aga. Mo lingbi nga ti mû maboko na lo ti hinga ambeni Témoin na ngoi ti akota bungbi ti lango oko na ti lango ota. Na ngoi ti akota bungbi so nga na ambeni ngoi nde, zia lege na fini zo ni so ti bâ na lê ti lo wani tongana nyen la awakua ti Jéhovah ayeke fa na gigi ye so ayeke hinga na atâ Chrétien, so ayeke ndoye (Jean 13:35). Tongana zo so asara nzara ti tâ tënë ahinga bungbi ti Jéhovah nzoni, lo yeke ga nduru mingi na Jéhovah.

SARANGO KUA NA AMBETI

²² Akozo Chrétien ayeke fa lani atënë ti Mbeti ti Nzapa na bê ti ala kue. Ala sara acopie ti Mbeti ti Nzapa ti tene ala wani asara na kua nga ti tene a manda na ye na congrégation. Ala yeke wa azo lani ti diko Mbeti ti Nzapa so tâ tënë ayeke na yâ ni. Ati so ala sû na maboko ayeke lani mingi ape, me ala bâ ni tâ na nene ni mingi (aCol. 4:16; 2 Tim. 2:15; 3:14-17; 4:13; 1 Pi. 1:1). Laso, aTémoin ti Jéhovah ayeke sara kua na afini kode ti imprimengo na ambeti ti mû lege na ala ti sigi na aBible kutu na kutu nga na ambeti ti mandango na Bible gbani gbani. Na popo ti ambeti ni so mo yeke wara atract, abrochure, abuku nga na apériodique na ayanga ti kodro ngbangbo mingi.

²³ Tongana mo yeke fa tënë na ambeni zo, gi ti sara kua nzoni na ambeti so bungbi ti Jéhovah asigi na ni ti manda na Bible na azo. Tongana mo wani mo bâ gbâ ti aye ti nzoni so mo wara na dikongo ambeti ti aTémoin ti Jéhovah nga na mandango ni, a yeke pusu mo ti fa na amba ti mo aye so mo manda dä.—aHéb. 13:15, 16.

²⁴ Azo gbani gbani ayeke sara kua na Internet tongana kozo ye so ayeke mû na ala asango. Ni la, na ndö ti ambeti so e sigi na ni, mbeni pendere ye so e yeke sara na kua ti kangbi na nzoni tënë ayeke site Internet ti e, jw.org. Azo ti yâ ti dunia kue alingbi ti sara kua na ordinateur ti diko na Bible nga na ambeti so asara tënë na ndö ti Bible, wala ala lingbi ti mä ni mango; na a sigi na aye ni so kue na ayanga ti kodro ngbangbo mingi. Azo so ayeke na mbeto ti sara lisoro na e, wala ala so alango na ando so a yeke ngangu na ala ti sara lisoro na aTémoin ti Jéhovah, alingbi ti hinga aye so e mä na bê na ni tongana ala sara kua na jw.org na yanga-da ti ala.

²⁵ Ni la, e yeke sara tënë ti site jw.org na azo, na alege kue so azi na e. Tongana mbeni zo so e yeke fa tënë na lo ahunda mbeni tënë na e na ndö ti aye so e mä na bê na ni, e lingbi ti sara kua na mbeni téléphone wala na mbeni ordinateur ti fa kiringo tënë ni na zo ni gï na lê ni lê ni. Tongana e tingbi na mbeni zo so ayeke tene mbeni yanga ti kodro nde, so a ndu nga yanga ti awabuburu, e lingbi ti gue na lo na ndö ti site Internet ti e ti fa na lo Bible nga na ambeti ti e so ayeke na yanga ti kodro ti lo. Awafango tënë mingi asara kua na avidéo so ayeke na ndö ti site ti e ti to nda ti lisoro na ndö ti Bible.

FANGO TËNË NA ALEGE KUE SO AZI

²⁶ Jésus atene na ala so ayeke dengi mê lani na tënë ti lo, lo tene: “Ala yeke lumière ti dunia so. . . . Zia lumière ti ala aza na gbele azo, si azo ni alingbi ti bâ apendere kusala ti ala na ala mû gloire na Babâ ti ala so ayeke na yayu.” (Mat. 5:14-16). Adisciple so afa lani asarango ye ti Nzapa na gigi, na lege so ala mû tapande ti Jésus Christ, so atene: “Mbi yeke lumière ti dunia so.” Jésus azia tapande na aChrétien na lege so lo zia si “lumière so amû fini na zo” aza ndali ti nzoni ti ala kue so ayeke mä lo.—Jean 8:12.

²⁷ Legeoko nga, bazengele Paul azia na e tapande na ndö ti tënë so (1 aCor. 4:16; 11:1). Na ngoi so lo yeke lani na Athènes, lo yeke fa tënë lâ na lâ na azo so lo wara ala na gara (Kus. 17:17). A-Chrétien ti Philippes amû lani tapande ti lo. Ndali ni la si Paul asû mbeti na ala, lo tene so atâa so ala yeke “na popo ti azo ti ngoi so, so sarango ye ti ala aba bango na ayeke kirikiri mingi . . . , ala yeke su ti ala tongana aye ti zango lumière na yâ ti dunia”. (aPhil. 2:15). E nga kue laso e lingbi ti zia si, na lege ti tënë ti yanga ti e nga na sarango ye ti e, tâ tënë ti Royaume aza na ngoi kue so lege azi na e ti fa nzoni tënë na amba ti e. Tâ tënë, tongana e yeke sara ye na lege ni, gï nzoni sarango ye ti e wani la ayeke fa na azo atene e yeke nde na azo ti dunia so. Me, tongana e zi yanga ti e ti fa nzoni tënë na ala, ala yeke hinga ande ndani so e yeke nde na tanga ti azo.

²⁸ Awakua ti Jéhovah mingi ayeke fa nzoni tënë na azo so ala yeke tingbi na ala lâ na lâ na place ti kua ti ala, na ekole, na yâ ti bus wala taxi wala na ambeni ndo nde na ngoi so ala yeke sara ambeni kua ti ala. Tongana e yeke na voyage, lege alingbi ti zi na e ti sara lisoro na azo so e na ala e yeke voyagé. A lingbi e oko oko kue e gi ti fa tënë na angoi so e yeke sara asenge lisoro na azo. Zia e leke terê ti e ti fa tënë na azo na ngoi kue so lege azi.

²⁹ Tongana e zia na li ti e so, na ngoi kue so e yeke fa nzoni tënë e yeke sepela Lo so acréé e nga e yeke mû gonda na iri ti lo la, ye so ayeke pusu ande e ti fa nzoni tënë na azo. Na ndö ni, azo so aye biani ti hinga Jéhovah, e yeke wara lege ti mû maboko na ala ti hinga lo, tongaso si ala nga kue alingbi ti sara na lo nga ti wara beku ti fini so aga na lege ti mabe na Jésus Christ. Tongana e sara a-effort tongaso ayeke nzere na Jéhovah mingi nga lo yeke bâ ni tongana mbeni kua so ayeke nzoni-kue.—aHéb. 12:28; Apoc. 7:9, 10.

TERRITOIRE

³⁰ Jéhovah aye ti tene a fa tënë ti Royaume na sese kue, atâa na yâ ti agbata wala na yâ ti akete kodro. Ni la ti sara ni, filiale ayeke mû aterritoire na acongrégation nga na aita so ayeke fa tënë na ando so ayo (1 aCor. 14:40). Ye so ague oko na ye so a leke lani, so Nzapa la afa lege na ni, na ngoi ti abazengele (2 aCor. 10:13; aGal. 2:9). Teti so kua ti Royaume ayeke gue na li ni hio mingi na lâ ti nda ni so, tongana a leke ti fa tënë na yâ ti territoire ti congrégation ni nzoni ayeke sara si congrégation ayeke sara kua nzoni na yâ ti territoire ti lo.

³¹ A yeke surveillant ti kusala la ayeke bâ lege ti kua ni so. Me a lingbi ti hunda na mbeni wakua ti mungo maboko ti tene kua ti lo aduti gï ti fa territoire na aita ti tene ala sara kua dä. Yâ ti aterritoire ayeke use: mbeni ayeke territoire ti groupe, na mbeni ayeke territoire so a yeke mû ka na ambeni ita. Na ando so aterritoire ni akono ape, mingi ni asurveillant ti groupe la ayeke bata territoire so awafango tënë ti groupe ti ala ayeke fa tënë dä. Me, na ando so aterritoire ni akono mingi, awafango tënë alingbi ti wara aterritoire ti ala wani.

³² Wafango tënë so ayeke na territoire ti lo wani, alingbi ti gue ti fa tënë dä même na ngoi so bungbi ti fango tënë ayeke dä ape wala na ngoi so a yeke ngangu na lo ti gue na bungbi ti fango tënë ni. Na tapande, ambeni wafango tënë ayeke hunda ti wara territoire so ayeke nduru na place ti kua ti ala, na ala yeke fa tënë dä na ngoi ti wungo terê wala na peko ti kua. Ti ambeni sewa, ala yeke hunda ti wara territoire so ayeke nduru na ndo so ala lango dä, na ala yeke fa tënë dä na ambeni lakui. Tongana mbeni wafango tënë ayeke na territoire ti lo wani na ndo so lo lingbi ti gue dä hio, a yeke mû ande lege na lo ti sara kua nzoni na ngoi ti lo ti fa tënë. A lingbi nga ti sara kua na territoire so ambeni ita amû ti fa tënë dä, na ngoi ti fango tënë na congrégation. Tongana mo ye ti wara mbeni territoire ti mo wani, mo lingbi ti hunda ni na ita so ayeke bâ lege ti aterritoire.

³³ Atâa a yeke territoire ti mbeni groupe ti fango tënë, so surveillant ti groupe ni la ayeke na ni, wala a yeke territoire so mbeni wafango tënë la amû ni, a yeke nzoni zo so amû territoire ni so asara effort ti fa tënë na ada oko oko kue ti yâ ti territoire ni. A lingbi aye so a leke ti sara ti fa tënë na yâ ti territoire ni kue ague oko na andia ti batango asango na ndö ti azo. A lingbi surveillant ti groupe wala mbeni ita so amû mbeni territoire asara kue ti hunzi territoire ni na yâ ti anze osio. Tongana a hunzi kue awe, a yeke nzoni lo sara tënë ni na ita so ayeke bâ lege ti aterritoire. A lingbi na ye so asi, surveillant ti groupe ni wala wafango tënë ni alingbi ti bata territoire ni na ti kiri ti sara kua na yâ ni wala lo lingbi ti kiri na ni na ita so ayeke bâ lege ti aterritoire.

³⁴ Tongana aita kue ti yâ ti congrégation ayeke sara kua maboko na maboko, a yeke wara lege ti fa tënë na ada oko oko kue ti territoire ti congrégation ni. Nga, a lingbi e sara hange si awafango tënë use wala ahon so afa tënë na peko ti terê na même ndo pëpe, teti ye so alingbi ti sara si bê ti azo ti territoire ni ason. Tongana e sara tongaso, e yeke fa so e ne aita ti e nga na azo ti territoire ni.

E SARA KUA MABOKO NA MABOKO TI FA TËNË NA AZO SO ATENE AYANGA TI KODRO NDE NDE KUE

³⁵ Azo kue abezoin ti hinga ye na ndö ti Jéhovah Nzapa, na ndö ti Molenge ti lo nga na ndö ti Royaume (Apoc. 14:6, 7). E ye ti mû maboko na azo so ayeke tene ayanga ti kodro nde nde kue ti di iri ti Jéhovah ti wara salut, na ti sara ye tongana atâ Chrétien na yâ ti fini ti ala (aRom. 10:12, 13; aCol. 3:10, 11). Me ambeni kpale wa la e lingbi ti tingbi na ni na ngoi so e yeke fa nzoni tënë na ando so azo ni ayeke tene ayanga ti kodro nde nde? A lingbi ti leke mara ti akpale ni so tongana nyen ti mû lege na azo mingi ti mä tënë ti Royaume na yanga ti kodro so ala mä yâ ni nzoni?—aRom. 10:14.

³⁶ A yeke mû aterritoire na acongrégation alingbi na yanga ti kodro ti ala. Ni la, na yâ ti aterritoire so a yeke tene ayanga ti kodro nde nde dä, awafango tënë ti acongrégation nde nde alingbi ti fa tënë na yâ ti même vaka. Me na yâ ti aye tongaso, a yeke nzoni congrégation oko oko agi ti wara gï azo so ayeke tene yanga ti kodro ti congrégation ti lo, tongaso si lo fa tënë na ala. Tënë so abâ nga ngoi ti kangbingo ambeti ti tisango ndo. Me na ngoi so awafango tënë ayeke fa tënë na ando so azo ayeke dä mingi nga na alege kue so azi, ala lingbi ti sara lisoro na azo kue nga ti mû mbeti na ala na ayanga ti kodro nde nde.

³⁷ A lingbi ti si so mbeni congrégation so azo ni ayeke tene mbeni yanga ti kodro nde ayeke na mbeni territoire so ayo, na so ala lingbi pëpe ti fa tënë lakue lakue na yâ ni kue. Tongana a yeke tongaso, a yeke nzoni asurveillant ti kusala ti acongrégation so ayeke fa tënë na yâ ti territoire ni amä terê ti sara kua na mbeni lege so ayeke sara si a fa tënë na yâ ti territoire ni kue. Ye so ayeke mû lege na zo oko oko kue ti mä tënë ti Royaume, nga a yeke sara si e mû ngoi ti e kue ti fa tënë gï na même ndo ape.—aProv. 15:22.

³⁸ E yeke sara tongana nyen tongana e tingbi na mbeni zo so ayeke tene mbeni yanga ti kodro so e mä yâ ni ape na territoire? A yeke nzoni ape ti tene e tene so gï awafango tënë so ayeke tene yanga ti kodro ni so la ayeke ga ande ti fa tënë na zo ni so. Ambeni wafango tënë amanda ambeni tënë so akpengba ape na mbeni yanga ti kodro so mingi ni azo ayeke tene na yâ ti territoire ti ala. E lingbi ti fa na zo ni tongana nyen la lo lingbi ti diko ambeti na yanga ti kodro ti lo na ndö ti site Internet ti e, jw.org, wala ti téléchargé ni. Wala e lingbi ti ga na lo ambeti na yanga ti kodro ti lo ni.

³⁹ Tongana zo ni asara nzara ti tënë ni, a yeke nzoni e sara kue ti wara mbeni zo so apeut ti mû maboko na lo na mbeni yanga ti kodro so lo hinga ni. E lingbi nga ti fa na lo ndo so a yeke sara bungbi dä na yanga ti kodro ti lo so ayeke nduru na lo. Tongana lo ye si mbeni zo so ayeke tene yanga ti kodro ti lo aga abâ lo, e lingbi ti fa na lo tongana nyen la, na ndö ti jw.org, lo lingbi ti hunda ti tene mbeni zo aga abâ lo. Filiale ayeke sara ande kue ti wara mbeni wafango tënë so alango nduru na ndo ni, mbeni groupe wala mbeni congrégation so apeut ti mû maboko na lo.

⁴⁰ A yeke nzoni e ngbâ lakue ti gue ti bâ zo ni juska na ngoi so lo yeke tene ande na e so lo wara mbeni zo so ayeke tene yanga ti kodro ti lo awe. A lingbi ti si so filiale atene na a-ancien ni so a lingbi pëpe ti wara mbeni ita so ayeke tene yanga ti kodro ti zo ni so. Tongana a si tongaso, a yeke nzoni e sara ye kue so e lingbi ti sara ti ngbâ ti maï nzara so ayeke na yâ ti bê ti zo ni. Tongana lege ayeke dä, e lingbi ti manda Bible na zo ni, peut-être na yâ ti mbeni mbeti so ayeke na yanga ti kodro ti zo ni. Tongana e sara kua nzoni na afoto nga e hunda na zo ni ti diko aversê so a fa tënë ti yâ ni ape, lo lingbi ande ti mä yâ ti ambeni ye ti yâ ti Bible. Peut-être mbeni zo ti yâ ti sewa ti lo ahinga yanga ti kodro ti lo ni nzoni nga lo hinga yanga ti kodro so a yeke tene na ndo ni. Na ngoi so e yeke fa tënë, zo ni so alingbi ti kiri na peko ti tënë ti e ni na mba ti lo ni.

⁴¹ Ti fa lege ti bungbi ti Jéhovah na zo ni, a yeke nzoni e tisa lo na abungbi ti e, atâa so lo lingbi ande ti mä yâ ti aye ni kue ape. Na ngoi so a yeke diko aversê, si mbeni Bible ti yanga ti kodro ti lo ni ayeke dä, e lingbi ti mû maboko na lo ti tene lo wara aversê ni na yâ ti Bible ni. Tongana lo yeke bungbi legeoko na congrégation, a lingbi ti mû maboko na lo ti kpengba nga ti gue na li ni na lege ti yingo.

⁴² Apré-groupe: Pré-groupe ayeke ambeni ita so ayeke fa tënë na mbeni yanga ti kodro nde na ti so congrégation ti ala ayeke tene, atâa so ala yeke pëpe na mbeni ancien wala mbeni wakua ti mungo maboko so alingbi ti mû li ni na mbeni bungbi yenga na yenga na yanga ti kodro ni so. Filiale alingbi ti leke ti tene mbeni congrégation abâ lege ti mbeni pré-groupe tongana:

1. (1) Azo mingi ti yâ ti territoire ti mbeni congrégation ayeke tene mbeni yanga ti kodro nde na ti so aita ti congrégation ni ayeke tene.

2. (2) Ambeni wafango tënë ahinga yanga ti kodro ni so wala ala yeda ti manda ni.

3. (3) Bungbi ti a-ancien ayeda ti mû li ni ti leke kapa ti fango tënë na yanga ti kodro ni.

Tongana bungbi ti a-ancien aye ti bâ lege ti mbeni pré-groupe, ala yeke sara lisoro na ndö ni na surveillant ti circonscription. Peut-être lo hinga ambeni congrégation so ayeke gi ti fa tënë na azo so ayeke tënë yanga ti kodro ni so nga peut-être lo hinga ambeni ye so ayeke mû maboko ti hinga congrégation wa la alingbi biani ti bâ lege ti pré-groupe ni. Tongana a wara congrégation ni awe, a-ancien ayeke tokua mbeti na filiale ti tene filiale ayeda so congrégation ti ala la ayeke bâ lege ti pré-groupe ni.

⁴³ Agroupe: Filiale alingbi ti yeda ti tene mbeni congrégation abâ lege ti mbeni groupe tongana:

1. (1) Wungo ti azo so asara nzara ti tâ tënë na yanga ti kodro ni so ayeke kamême mingi nga ambeni ye ayeke dä so afa atene ala yeke gue ande na li ni.

2. (2) Ambeni aita ayeke dä so atene yanga ti kodro ni wala ala yeke manda ni.

3. (3) Mbeni ancien wala mbeni wakua ti mungo maboko so alingbi ayeke dä ti mû li ni na ti sara kamême bungbi oko tongaso wala mbage ti mbeni bungbi na yâ ti yenga, na tapande diskur wala Mandango Tour ti Ba Ndo na yanga ti kodro ni.

Tongana a wara kamême aye ota so, a lingbi a-ancien asû mbeti na filiale ti fa anzene nzene tënë na ndö ni ti hunda ti tene filiale ayeda ti tene congrégation ti ala abâ lege ti groupe ni. Ancien wala wakua ti mungo maboko so ayeke mû li ni na yâ ti groupe ni so, a yeke iri lo “surveillant ti groupe” wala “wakua ti groupe.”

⁴⁴ Tongana a zia groupe ni na sese awe, bungbi ti a-ancien so congrégation ti ala ayeke bâ lege ti groupe ni ayeke bâ wala a lingbi a sara ambeni mbage ti abungbi ti congrégation nga ala yeke bâ fani oke la a lingbi a sara bungbi na yâ ti nze oko. A lingbi nga ti leke abungbi ti fango tënë ndali ti groupe ni so. Azo kue so ayeke na yâ ti groupe ni so ayeke sara kua na gbe ti bungbi ti a-ancien so ayeke bâ lege ti groupe ni. A-ancien ni ayeke fa na aita ti groupe ni ye so ala lingbi ti sara, nga ala yeke duti nduru ti bâ lege ti aye so amanke groupe ni. Tongana mbeni surveillant ti circonscription ayeke sara kua na yâ ti groupe ni na yenga ti vizite ti lo na yâ ti congrégation so ayeke bâ lege ti groupe ni, lo yeke tokua na filiale mbeni mbeti so afa nduru tënë na ndö ti guengo na li ni ti groupe ni nga na ambeni mbilimbili ye so amanke azo ni. Na ngoi so alingbi, groupe ni alingbi ti ga mbeni congrégation. Tongana azo kue agi ti sara ye alingbi na aye so bungbi ti Jéhovah afa, a yeke nzere na Jéhovah.—1 aCor. 1:10; 3:5, 6.

FANGO TËNË NA GROUPE

⁴⁵ A-Chrétien oko oko kue ayeke na kua ti fa nzoni tënë na azo. Alege ti sarango ni ayeke mingi, me mingi ti e aye ti sigi legeoko na ambeni ita na fango tënë (Luc 10:1). Ndali ni la si acongrégation ayeke leke ti wara terê na anda-yenga nga na ambeni lango ti yenga ni ti gue na fango tënë. Alango ti amatanga, so kua ayeke dä pëpe, ayeke nga angoi so azi ti fa tënë legeoko na congrégation, teti so aita mingi ayeke gue na kua na lango ni so ape. Komite ti service ti congrégation ayeke leke ti tene a sara abungbi ti fango tënë na angoi nga na ando so alingbi, na kota lâ nga na alakui.

⁴⁶ Ti fa tënë legeoko na congrégation ayeke mû lege na awafango tënë ti sara kua maboko na maboko nga ti ‘wa terê na popo ti ala’. (aRom. 1:12). Afini wafango tënë alingbi ti sara kua na terê ti awafango tënë so ayeke na anzoni kode, na ala lingbi ti manda ye na terê ti akpengba wafango tënë so. Na ambeni ndo so ayeke nzoni ape, a yeke peut-être nzoni ti tene awafango tënë use wala ahon so afa tënë legeoko. Même tongana mo leke ti fa tënë mo oko na yâ ti territoire ni, ti gue na abungbi ti fango tënë alingbi ti kpengba azo kue. Ti hinga so ambeni wafango tënë ayeke fa nga tënë na oko ndo so mo yeke fa tënë dä alingbi ti tomba mbeto na bê ti mo. Zia si apionnier nga na ambeni ita apensé pëpe so ala doit gï ti ga na abungbi ti fango tënë kue so congrégation aleke, mbilimbili tongana a yeke sara ni lâ oko oko. Me ala lingbi kamême ti ga na ambeni bungbi ti fango tënë ni yenga na yenga.

⁴⁷ Zia si e kue e mû tapande so Jésus na abazengele ti lo azia! E yeke na kite ape so Jéhovah ayeke iri tënë nzoni na ndö ti angangu kue so e yeke sara, ti mû terê ti e kue ti sara na kota kua ti fango nzoni tënë ti Royaume so.—Luc 9:57-62.