Chapitre 24

Ngbanga ti nyen Jésus aga na sese?

JÉSUS asala kusala mingi na lango so lo na adisciple ti lo osio aduti na Capernaüm. Na ndani, na la kui, awakodoro ti Capernaüm aga na azo kue ti ala so ayeke na kobela ti tene lo sava ala. Jésus awara ngoi pepee ti duti gi lo oko.

Ndade, na ndapelele, tongana ndo angba ti vuko, Jésus alondo lo sigigi lo oko. Lo gue na mbeni ndo so ade si lo lingbi sambela Baba ti lo ka. Me, lo ngba gi lo oko teti ngoi mingi pepee, teti tongana Pierre na ambeni zo abaa so lo hon, ala gue ti gi lo.

Tongana ala wara Jésus, Pierre atene na lo: “Azo kue ayeke gi mo.” Azo ti Capernaüm aye si Jésus angba na popo ti ala. Ala mu na nenee ni biani ye so lo sala ndali ti ala! Me Jésus aga na sese kozoni kue ti sala ye ti kpene ti sava tele ti azo? Lo tene nyen?

Mbeni buku ti Mbeti ti Nzapa afa na e kiringo tene ti Jésus na adisciple ti lo: “Zia e gue na mbeni ndo, na ambeni kodoro so ayeke ndulu ge, ti tene mbi fa nga tene da, teti mbi ga teti tene so.” Kamême so azo mingi aye ti gbanzi lo, Jésus atene na ala: “A yeke ngbanga ti mbi ti fa nzo tene ti royaume ti Nzapa na ambeni kodoro nga, teti ato mbi teti tene so.”

Taa tene, Jésus aga na sese kozoni kue ti fa tene ti Royaume ti Nzapa so ayeke sala si iri ti Baba ti lo aga nzoni kue na a yeke lungula teti lakue aye ti sioni so asi na azo. Me, ti fa na gigi so Nzapa ato lo, lo sala ye ti kpene ti sava tele ti azo. A yeke lege-oko tongana Moïse so asala aye ti kpene giriri kozoni ti fa na gigi so lo yeke wakua ti Nzapa.

Fadeso, tongana Jésus asigigi na Capernaüm ti fa tene na ambeni kodoro, adisciple ti lo osio ague na lo. Ala yeke Pierre na ita ti lo André, nga Jean na ita ti lo Jacques. Mo dabe mo, na yenga ti kozoni lo hiri ala ti ga akozo fo wakua ti lo na ti gue na lo na tambela ti lo.

Na adisciple ti lo osio, Jésus afa tene na sese ti Galilée kue. Kusala ti lo aga nzoni mingi! Biani, tene ti kusala ti lo akangbi même na sese ti Syrie kue. Azo mingi mingi ti sese ti Galilée, ti Judée na ti mbengu ti Jourdain ague na peko ti Jésus na adisciple ti lo. Marc 1:35-39; Luc 4:42, 43; Matthieu 4:23-25; Exode 4:1-9, 30, 31.

▪ Na peko ti lango so Jésus asala kua mingi na Capernaüm, ndade, na ndapelele, ye nyen asi?

▪ Ngbanga ti nyen Jésus aga na sese? Lo sala aye ti kpene ti fa na gigi nyen?

▪ Azo wa ague na tele ti Jésus tongana lo fa tene na sese ti Galilée? Azo ayeda na kusala ti Jésus?