Lettre ti Bebungbi

Aita ti e ti koli na ti wali:

Babâ ti e ti yayu, Jéhovah, ayeke nzoni tapande ti ndoye. Ni la, Bible atene: “Nzapa ayeke ndoye.” (1 Jean 4:8) Atâa so Jéhovah ayeke Lo ti Ngangu Ahon Kue, Bible atene lâ oko pëpe so “Nzapa ayeke ngangu ni mveni”. Komandema ti lo aluti kozoni kue na ndo ti ndoye. Ye so agboto e biani na mbage ti lo!

Jéhovah ayeke gbu e na ngangu pëpe ti tene e sara na lo. Lo yeke pëpe mbeni gbia so akomande na ndo ti azo na ngangu. Lo ye si e sara na lo ngbanga ti so e ye lo na bê ti e kue. Tongana e sara ye so, e yeke fa so e ye komandema ti lo ngbanga ti so e mä na bê so lo yeke komande na lege ti mbilimbili nga na ndoye. Ye so ayeke polele na tongo nda ti mbaï ti azo.

Ahon ti tene lo gbu Adam na Ève na ngangu ti mä yanga ti lo, Jéhovah azi lani lege na ala ti soro ye so bê ti ala aye. Tongana ala ndoye Jéhovah biani nga ala bâ na nene ni ye so lo sara ndali ti ala, ka fade ala yeke dö sese na angangu kue so Satan ayeke sara ti tene ala ga azo ti kpengbango li.

Na pekoni, Moïse atene lani na amara ti Israël: “Bâ, laso mbi zia na gbele mo fini na nzoye, kui na sioye.” (Deut. 30:15). Azo ni ayeke lani na liberté ti soro ye na yâ ti fini ti ala. Legeoko nga, Josué atene na amara ti Israël: “Tongana a yeke sioni na lê ti i ti sara na L’Éternel, laso i kamata lo so bê ti i aye ti sara na lo.” Na yâ ti kiringo tënë ti ala, azo ni atene na Josué: “E leke na bê ti e oko pëpe ti zia L’Éternel.” (Jos. 24:15, 16). A yeke mara ti bibe so e kue e lingbi ti duti na ni laso. Ndali ti so e ye Jéhovah, “e leke na bê ti e oko pëpe” ti zia lo.

Na yâ ti congrégation ti aChrétien, e hinga biani so e yeke na liberté ti soro ye e wani. Atâa so a mû lege na a-ancien ti mû wango na même ti se zo, ala yeke gi pëpe ti komande na ngangu wala ti gi ti bâ ye kue so andu fini wala mabe ti aita. Bazengele Paul atene: “Mbi tene pëpe so e yeke azo so akomande na ndo ti mabe ti ala, me e yeke amba ti ala awakua ndali ti ngia ti ala, teti a yeke na lege ti mabe ti ala si ala yeke luti so.”​—2 aCor. 1:24.

So tâ ngia si e yeke wara tongana bê ti e la apusu e ti sara mbeni ye ahon ti tene a gbu e gbungo na ngangu si e sara ni! Jéhovah atisa e ti sara ye so ayeke nzoni na lege ti ndoye. E bâ nene ti ye so na lege ti atënë so Paul asû na gbe ti yingo: “Tongana mbi mû aye ti mbi kue ti bata na azo nga tongana mbi kä tere ti mbi na kuâ ti tene mbi pika kate ti mbi na pekoni, me mbi yeke na ndoye pëpe, mbi wara ye oko na pekoni pëpe.”​—1 aCor. 13:3.

A yeke mû ngia nga na gonda mingi na Jéhovah, ti bâ aita-koli na aita-wali kutu mingi so ayeke sara na lo, ngbanga ti so ala ndoye lo na bê ti ala kue!

Jéhovah nga aye mingi awakua ti lo kue, so na popo ni a yeke wara ala, amolenge na amaseka so afa so ala ndoye Jéhovah ahon dunia so nga ala kpe ti duti na nzara ti aye so ayeke na yâ ni. Zia ala hinga so, e ndoye ala mingi.​—Luc 12:42, 43.

Ndali ti so ala ndoye Jéhovah, aita-koli, aita-wali na amaseka amû angbonga 1 748 697 447 ti fa na nzoni tënë na ngu so ahon. Ndoye apusu azo, 7 782 346 ti fa tënë na ndo ti sese kue. E yeke na ngia ti bâ afini zo 268 777, so amû tere ti ala na Jéhovah na lege ti batême, so mingi na popo ni ayeke amaseka. So aye ti tene azo nduru na 5 168 ayeke wara batême yenga oko oko. Ye so andu bê ti e mingi!

Na ngoi ti nda ni so, a lingbi awakua ti Nzapa ahon ndo ti akpale, atara, sarango ye ti ngangu, kobela, nga a lingbi ambeni atiri na akpale so aga na lege ti mbakoro. Me e yeke leke na bê ti e ti “kiri na peko” pëpe. E tokua bara ti e na ala. E ye ala mingi.​—aHéb. 10:39; 2 aCor. 4:16.

Aita ti ala,

Bebungbi ti aTémoin ti Jéhovah