A zingo amolenge-koli use na kuâ

TONGNA mo kui si a zingo mo, bê ti mama ti mo ayeke duti tongana nyen? Bê ti lo ayeke duti ande na ngia mingi! Me zo so akui awe, lo lingbi ti kiri na fini? Mara ti ye tongaso asi mbeni lâ awe?

Bâ koli so na lê ti foto so. Bâ nga wali ni na kete molenge-koli so. Koli so ayeke prophète Élie. Wali ni ayeke mbeni womua ti kodoro ti Sarepta, na molenge-koli so ayeke molenge ti lo. Mbeni lâ, tere ti molenge ni aso juska lo kui. Tongaso, Élie atene na wali ni, lo tene: ‘Mû na mbi molenge ni.’

Élie ayô kuâ ti molenge ni, lo gue na ni na chambre na nduzu na lo zia lo na gbogbo. Na pekoni lo sambela Jéhovah, lo tene: ‘O Jéhovah, sara si molenge ni akiri na fini.’ Kete na pekoni, molenge ni akomanse ti wu pupu. Tongaso, Élie akiri lo na mama ti lo, na lo tene: ‘Bâ! molenge ti mo ayeke na fini!’ Ni la si mama ti molenge ni ayeke na ngia mingi tongaso.

Élisée ayeke nga mbeni kota prophète ti Jéhovah. Lo sara lani kua na gbe ti Élie. Me na mbeni ngoi, Jéhovah asara nga kusala na lo ti sara amiracle. Mbeni lâ, Élisée ague na kodoro ti Sunem. Kâ, mbeni wali asara nzoni na lo mingi. Na pekoni, wali ni adü molenge ti koli.

Molenge ni akono kete awe. Tongaso, na mbeni ndapre, lo gue ti sara kua na tere ti babâ ti lo na yaka. Me mo ye ti bâ, molenge ni atoto li ti lo, lo tene: ‘Li ti mbi aso!’ Tongana a kiri na lo na kodoro, lo kui. Vundu asara mama ti lo mingi, si na lê ni lê ni, lo gue ti bâ Élisée.

Tongana Élisée aga awe, lo yô kuâ ti molenge ni, na lo gue na ni na yâ ti mbeni chambre. Lo sambela Jéhovah, na lo lango na ndo ti molenge ni. Kete na pekoni, tere ti molenge ni akiri amû wâ na lo ngasi fani mbasambala. Tongana mama ni alï na yâ ti chambre ni na lo bâ molenge ti lo na fini, tere ti lo anzere ngangu.

Laso, azo akui gbani. Ye so azia vundu mingi na bê ti afami ti ala nga na akamarade ti ala. E yeke na ngangu ti zingo akuâ pëpe. Me Jéhovah ayeke na ngangu so. E yeke bâ ande tongana nyen lo yeke zingo akuâ kutu mingi.