Na gbe ti Royaume ti Nzapa, “siriri ayeke duti dä mingi”

Na yâ ti kete ngoi Royaume ti Nzapa, so e ku ni aninga mingi awe so, ayeke sara si siriri na mango terê amû ndö ti sese kue. “Siriri ayeke duti [ande] dä mingi” tongana ti so a mû zendo ni na Psaume 72:7. Me lawa la Royaume ni ayeke komanse ti komande sese kue? Tongana nyen la Royaume ni ayeke komande ande sese kue? Nyen la mo peut ti sara ti bâ nzoni na lege ti Royaume ni?

LAWA LA ROYAUME TI NZAPA AYEKE GA?

Bible afa kozo awe so ambeni ye ti ngangu ayeke si so ayeke fa so Royaume ti Nzapa aga nduru ti si awe. Aye ti ngangu so kue ayeke tongana mbeni “fä” so na yâ ni a yeke wara nga tënë ti aye tongana abira so amû ndo, kota nzara, kobela, ayengingo ti sese nga na azo mingi so ayeke kpe ndia pëpe.​—Matthieu 24:3, 7, 12; Luc 21:11; Apocalypse 6:2-8.

Mbeni prophétie ni nde atene: “Na lâ ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande azo so andoye gï terê ti ala wani, azo so andoye nginza, . . . azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye ti mä terê na amba ti ala pëpe, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, . . . azo so wuma ti ala ahon ndö ni, azo so andoye ngia ahon ti ndoye Nzapa.” (2 Timothée 3:1-4). Depuis la ambeni zo ayeke ka na mara ti asarango ye ni so. Me ti laso asarango ye ni so akiri amû ndo mingi.

Aprophétie so akomanse lani ti ga tâ tënë na yâ ti ngu 1914. Azo ti sungo mbaï, azo ti poroso nga na ambeni zo nga nde afa so dunia achangé na peko ti ngu ni so. Na tapande Peter Munch, wasungo mbaï ti kodro ti Danemark, atene: “Bira so asi lani na ngu 1914 achangé aye mingi na yâ ti mbaï ti azo. Kozo na ngu ni so, azo abâ so aye akomanse lani ti passé bien na yâ ti dunia, . . . me na pekoni e lï na yâ ti mbeni ngoi ti akota kpale, sarango sana na azo, kengo terê nga siriri ayeke dä ape na ndo kue.”

Ye ti nzoni ni ayeke so, na peko ti aye ni so siriri ayeke ga ande. Aye ni so afa so Royaume aga nduru ti komande sese kue awe. Ni la, na yâ ti tënë so Jésus atene na ndö ti aye so adoit ti si na lâ ti ndani, lo yôro nga tënë ti dengo bê so dä, lo tene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—Matthieu 24:14.

Nzoni tënë so ayeke mama-tene so aTémoin ti Jéhovah ayeke fa na azo. Ni la, a iri mbeti so ala yeke fa na tënë ti Nzapa mingi na azo: Tour ti Ba Ndo Afa Tene ti Royaume ti Jéhovah. Mo yeke wara mbeti ni so fadeso na ayanga ti kodro ahon 338. Tour ti Ba Ndo ayeke sara lakue tënë na ndö ti apendere ye so Royaume ti Nzapa ayeke sara ande ndali ti azo nga ndali ti sese.

NYEN LA ROYAUME NI AYEKE SARA TONGASO SI LO KOMANDE SESE KUE?

Kiringo tënë ni ayeke na yâ ti akota tënë osio so:

1. Royaume ni ayeke komande ande pëpe na lege ti azo ti poroso ti dunia so.

2. Agbia ti dunia ayeke ye ande dä ti zia pouvoir ti ala ape, ala yeke sara ande buba ti gi ti tiri na Royaume ti Nzapa.​—Psaume 2:2-9.

3. Royaume ti Nzapa ayeke futi ande aroyaume ti azo so aye gï ti ngbâ ti komande azo so (Daniel 2:44; Apocalypse 19:17-21). A iri tanga ti bira so Harmaguédon.​—Apocalypse 16:14, 16.

4. Azo kue so ayeda na Royaume ti Nzapa, a yeke bata ala ande na ngoi ti bira ti Harmaguédon ti lï na yâ ti fini dunia so siriri ayeke duti ande dä. Azo ni so la Bible airi ala “azo mingi mingi,” so wungo ti ala ayeke peut-être kutu mingi.—Apocalypse 7:9, 10, 13, 14.

NYEN LA MO PEUT TI SARA TI BÂ NZONI NA LEGE TI ROYAUME NI?

Ti duti mbeni zo ti gbe ti Royaume ti Nzapa, a lingbi a fa ye na mo si. Ndani la na yâ ti mbeni sambela, Jésus atene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.”​—Jean 17:3.

Tongana mbeni zo amanda ti hinga Jéhovah Nzapa, lo yeke wara gbâ ti anzoni ye. Zia e bâ gï ambeni ye ni use: Kozoni, lo yeke duti na kpengba mabe na Nzapa. Mabe ti lo ni, so aluti na ndö ti apreuve, ayeke pusu lo ti yeda biani so Royaume ti Nzapa ayeke vrai ye na aga nduru ti komande awe (aHébreu 11:1). Use ni, ndoye ti lo na mbage ti Nzapa nga na mbage ti amba ti lo ayeke kpengba. Ndoye ti lo na mbage ti Nzapa ayeke pusu lo ti mä yanga ti lo na bê ti lo kue. Ndoye ti lo na mbage ti amba ti lo ayeke pusu lo ti sara ye alingbi na tënë so Jésus atene lani lo tene: “Gï tongana ti so ala ye azo asara na ala, ala sara tongaso na azo ni nga.”​—Luc 6:31.

Nzapa so acréé e na so aye e mingi ayeke tongana babâ so aye gï nzoni ti e. Lo ye si e wara ye so Bible airi ni “fini so ayeke tâ fini ni biani.” (1 Timothée 6:19). Gigi ti e ti laso ayeke pëpe “fini so ayeke tâ fini ni biani.” Laso, gigi akpengba na azo mingi, ala yeke sara effort ti ngbâ gï na fini. Ti mû gï na mo mbeni idée na ndö ti “fini so ayeke tâ fini ni biani”, zia e bâ ambeni pendere ye so Royaume ti Nzapa ayeke sara ande ndali ti azo so ayeke na gbe ti Royaume ni.