Ye so Nzapa aye ti sara teti sese ayeke nyen?

1. Ngbanga ti nyen Nzapa aleke sese?

Jéhovah amû sese na e azo ti ga ndo ti e. Tongaso, a leke kozo koli Adam na kozo wali Ève ti duti na yayu pëpe; Nzapa asara a-ange na yayu kâ awe (Job 38:4, 7). Nzapa azia kozo koli na yâ ti mbeni pendere paradis so iri ni ayeke yaka ti Éden (Genèse 2:15-17). Jéhovah amû na lo na amolenge so lo yeke dü ande beku ti fini ti lakue lakue na ndo ti sese.​—Diko Psaume 37:29; 115:16.

Na tongo nda ni, gi yaka ti Éden la ayeke paradis. A yeke na Adam na Ève ti dü amolenge mingi ti mû ndo ti sese ni. Ala la ayeke komande ande na ndo ti sese kue na ala sara si sese ni aga paradis (Genèse 1:28). A yeke futi sese lâ oko pëpe. Azo ayeke ngbâ ti duti dä lakue.​—Diko Psaume 104:5.

Bâ vidéo Ngbanga ti nyen Nzapa aleke sese?

2. Ngbanga ti nyen sese ayeke paradis laso pëpe?

Adam na Ève ake yanga ti Nzapa, ni la lo tomba ala na yâ ti yaka ni. Paradis ni agirisa, na zo oko alingbi ti kiri na ni na place ni pëpe. Bible atene: “A zia sese na maboko ti azo ti sioni.”—Job 9:24.​—Diko Genèse 3:23, 24.

Jéhovah azia lege ti ye so lo ye lani ti sara teti azo na tongo nda ni so awe? Ên-ën! Lo yeke Nzapa ti Ngangu Ahon Kue. Ye ti karango lo ayeke pëpe (Ésaïe 45:18). Lo yeke sara si azo akiri aduti na ndo ti sese tongana ti so lo ye lani.​—Diko Psaume 37:11, 34.

3. Sese ayeke kiri ti ga paradis tongana nyen?

Sese ayeke kiri ti ga paradis na ngoi ti komandema ti Jésus, Gbia ti Royaume ti Nzapa. Na yâ ti bira so iri ni ayeke Harmaguédon, Jésus ayeke duti ande na li ti a-ange ti Nzapa ti futi azo kue so asara kpengba-li na Nzapa. Na pekoni Jésus ayeke kanga Satan teti ngu 1 000. Awakua ti Nzapa ayeke sö kuâ ndali ti so Jésus ayeke fa lege na ala nga lo yeke bata ala. Ala yeke duti ande na fini ti lakue lakue na yâ ti paradis na ndo ti sese.​—Diko Apocalypse 20:1-3; 21:3, 4.

4. Pasi ayeke hunzi ande lawa?

Lawa la Nzapa ayeke sara si sioni ahunzi na ndo ti sese? Jésus amû mbeni “fä” ti fa lawa la hunzingo ti aye aga nduru. Aye so ayeke si na yâ ti dunia laso ayeke sara sioni na fini ti azo na afa so e yeke fadeso na “ngoi so aye ti ngoi so ayeke gue ti hunzi”.​—Diko Matthieu 24:3, 7-14, 21, 22.

Na ngoi ti komandema ti ngu 1000 ti Jésus so na yayu kâ lo yeke komande na ndo ti sese, lo yeke hunzi apasi kue (Ésaïe 9:6, 7; 11:9). Na ndo ti so si Jésus ayeke sara kusala tongana Gbia, lo yeke sara nga kusala tongana Kota Prêtre nga lo yeke zi ande siokpari ti azo so aye Nzapa. Tongaso, na lege ti Jésus, Nzapa ayeke zi ande kobela, gango mbakoro nga na kuâ.​—Diko Ésaïe 25:8; 33:24.

5. Zo wa la ayeke duti ande na yâ ti fini paradis so?

Azo so amä yanga ti Nzapa ayeke duti ande na yâ ti paradis (1 Jean 2:17). Jésus atokua lani adisciple ti lo ti gi azo ti tâ be-ti-molenge na ti fa na ala ye so ala lingbi ti sara ti nzere na lê ti Nzapa. Laso, Jéhovah ayeke leke azo kutu mingi ti wara fini na yâ ti paradis so ayeke ga na ndo ti sese (Sophonie 2:3). Na yâ ti aDa ti Royaume ti aTémoin ti Jéhovah, a yeke fa na azo tongana nyen ti duti nzoni koli wala nzoni babâ nga ti duti nzoni wali wala nzoni mama. Ababâ na amama na amolenge ti ala ayeke voro Nzapa legeoko nga ala yeke manda tongana nyen nzoni tënë so alingbi ti sara ye ti nzoni na yâ ti fini ti ala.​—Diko Michée 4:1-4.