Mbeni Beku so Ayeke Nde!
“Zo kue so ayeke na fini na afa na gigi mabe na yâ mbi ayeke kui ande la oko pepe.”—JEAN 11:26, NW.
1. Fade a yeke kiri na fini azo kutu mingi so laso akui na yâ ti mara ti ndo wa?
TONGANA ayä ande akinda kutu mingi, ala yeke kiri na fini pepe na ndo sese so zo ayeke dä pepe. (Kusala 24:15) Ala yeke zingo na yâ mbeni ndo so aleke ni pendere mingi na ala yeke wara ada ti lango, abongo na gbâ ti kobe so aleke teti ala. Azo wa ayeke leke ande aye so kue? Biani, a lingbi ambeni zo aduti na ndo fini sese kozo na tongo nda ti londongo ti akinda na ndo sese. Me azo wa?
2-4. Beku wa so ayeke nde ayeke ku ala so ayeke na fini na ngoi ti “la ti nda ni”?
2 Gango tâ tene ti aprophétie ti Bible afa so e yeke na “la ti nda ni” ti aye ti fadeso.a (2 Timothée 3:1) Tongaso, gi na yâ ngoi kete, Jéhovah Nzapa aga ti lï na yâ tene ti azo na ti lungula sioni na ndo sese. (Psaume 37:10, 11; aProverbe 2:21, 22) Na ngoi so, fade ye nyen ayeke si na ala so ayeke sala na Nzapa na be-biani?
3 Fade Jéhovah ayeke futi pepe azo ti mbilimbili na azo ti sioni legeoko. (Psaume 145:20) Lo sala mara ti ye so la oko pepe, na lo yeke sala ande ni pepe tongana lo sukula sese na aye ti sioni kue. (Ba Genèse 18:22, 23, 26.) Biani, ndangba buku ti Bible asala tene ti “azo mingi so asi singo, so zo alingbi diko ala pepe, ala yeke ti amara kue, ti akete mara kue, ti azo nde nde kue, na ti yanga nde nde kue,” so asigigi na yâ “kota ye ti vundu.” (Apocalypse 7:9-14) Tâ tene, fade azo mingi so asi singo ayeke sö kuâ na kota ye ti vundu so na yâ ni sese ti sioni so ayeke hunzi, na ala yeke lï na yâ fini sese ti Nzapa. Azo so amä yanga ayeke wara ande ye ti nzoni biani na lege ti pendere ye so Nzapa aleke ti zi azo na yâ siokpari nga na kui. (Apocalypse 22:1, 2) Tongaso fade a yeke hunda pepe ti tene “azo mingi so asi singo” awara kuâ. So tâ beku so ayeke nde!
4 E lingbi ti zia bê ti e na beku ti dongo bê so? Biani! Jésus Christ lo mveni afa so mbeni ngoi ayeke ga ande so azo ayeke kui mbeni pepe. Kozoni si lo kiri na fini ndeko ti lo Lazare, Jésus atene na Marthe: “Zo kue so ayeke na fini na afa na gigi mabe na yâ mbi ayeke kui ande la oko pepe.”—Jean 11:26, NW.
Mo nga, Mo Lingbi ti Duti na Fini ti Lakue Lakue
5, 6. A lingbi mo sala nyen tongana mo ye ti duti lakue lakue na fini na yâ Paradis na ndo sese?
5 Mo ye ti duti lakue lakue na fini na yâ Paradis na ndo sese? Mo yeke na nzala ti kiri ti ba ala so mo ndoye ala? Tongaso, a lingbi mo wara tâ hingango ye na ndo ye so bê ti Nzapa aye na aye so lo leke na bê ti lo ti sala. Jésus atene na yâ mbeni sambela: “So ayeke fini ti lakue lakue, ti wara hingango ye na ndo ti mo, so gi mo oko ayeke tâ Nzapa, nga na ndo ti Jésus Christ, lo so mo to lo awe.”—Jean 17:3, NW.
6 Nzapa aye si “mara ti azo nde nde kue alingbi sö kuâ na awara tâ hingango ye ti tâ tene.” (1 Timothée 2:3, 4, NW ) A yeke fadeso ngoi ti manda tongana nyen, legeoko na ambeni zo kutu mingi so ayeke sala awe ye so bê ti Nzapa aye, mo lingbi ti duti na fini ti lakue lakue na yâ Paradis na ndo sese. A-Témoin ti Jéhovah ayeke duti ande na ngia ti mu maboko na mo ti manda ye mingi ahon na ndo Nzapa nga na ndo ye so lo ku na mbage ti e. Ngbanga ti nyen mo tingbi na ala pepe na yâ ti mbeni Da ti Royaume so ayeke ndulu na mo wala mo to pepe mbeti na bozo ti mbeti so ayeke ndulu na mo na popo ti ala so afa na lembeti so ayeke ga na peko?
[Kete Tene na Gbe Ni]
a Ba Hingango Ye So Ague na Fini ti Lakue Lakue, lembeti 98-107, so aTémoin ti Jéhovah asala ni.
[Foto na lembeti 31]
A yeke hunda ande pepe na “azo mingi so asi singo” ti wara kuâ