Nzapa ayeke kota ahon azo kue

MBI hinga so mo yeke ye ande dä so mbeni zo ayeke dä so ayeke kota nga ngangu ahon e kue. A yeke zo wa?— Jéhovah Nzapa. Ka ti Molenge ti lo, Kota Wafango ye, lo yeke kota ahon e?— Biani, lo yeke kota ahon e.

Jésus aduti lani na tele ti Nzapa na yayu. Lo yeke ândö mbeni ange. Nzapa aleke nga ambeni ange na tele ti lo?—Biani, lo leke ala mingi mingi. A-ange so nga ayeke kota nga na ngangu mingi ahon e.​—Psaume 104:4; Daniel 7:10.

Mo dabe ti mo na iri ti ange so asala lani tënë na Marie?— A yeke Gabriel. Lo tene lani na Marie so lo yeke dü ande Molenge ti Nzapa. Nzapa azia fini ti Molenge ti lo na yâ ti Marie, si a lingbi ti dü Jésus tongana mbeni bébé na ndo ti sese.​—Luc 1:26, 27.

Mo mä na bê na miracle so? Mo mä na bê so Jésus ayeke lani na tele ti Nzapa na yayu kâ?— Jésus mveni atene so lo yeke lani kâ. Lo hinga ni tongana nyen? Biani, tongana lo de lani kete molenge, peut-être Marie atene peko ti tënë ti Gabriel na lo. Na, peut-être Joseph nga kue atene na Jésus so Nzapa ayeke tâ Babâ ti lo.

Tongana Jésus awara batême awe, na yayu kâ Nzapa atene: “So ayeke Molenge ti Mbi.” (Matthieu 3:17). Nga na bï so aga kozo na kuâ ti lo, Jésus asambela, lo tene: “Babâ, mû gloire na Mbi na tele ti Mo mveni, gloire ni so ayeke na Mbi tongana Mbi yeke na Mo giriri kozoni si sese so ayeke.” (Jean 17:5). Biani, Jésus ahunda ti kiri na tele ti Nzapa na yayu. Me lo lingbi ti duti kâ tongana nyen?— Gi tongana Jéhovah Nzapa akiri asala si lo ga mbeni zo ti yingo, wala ange.

Mbi ye fadeso ti hunda na mo mbeni kota tënë. A-ange kue ayeke nzoni? Mo tene ti mo nyen?— Giriri, ala kue ayeke nzoni, ngbanga ti so Jéhovah la aleke ala. Ye kue so Jéhovah asala ayeke nzoni. Me mbeni lâ mbeni ange ni aga sioni. Tongana nyen?

Ti wara kiringo tënë ni, a lingbi e kiri na ngoi so Nzapa asala kozo koli na kozo wali, Adam na Eve. Ambeni zo atene ti ala so tënë ni so ayeke tâ tënë pëpe. Me Kota Wafango ye ahinga so a yeke tâ tënë.

Tongana Nzapa asala Adam na Eve awe, lo zia ala na yâ ti mbeni pendere ndo so akeke na anyama ayeke dä wala paradis. A hiri ndo so Eden. Ala lingbi lani ti dü gbâ ti amolenge, ti wara kota sewa, na ti duti na yâ Paradis ni kpu na kpu. Me a lingbi ala manda mbeni kota ye. E sala tënë na ndo ye ni so awe. Zia e bâ wala e dabe ti e na ni.

Jéhovah atene ândö na Adam na Eve so ala lingbi ti te lê ti keke kue ti yaka ni. Me mbeni keke ayeke dä so lo gbanzi ala ti te lê ni. Nzapa afa na ala ye so ayeke si tongana ala te ni. Lo tene: ‘I yeke kui biani.’ (Genèse 2:17). Tongaso, a lingbi Adam na Eve amanda nyen na lege ti tënë so?—

A lingbi ala manda ti mä yanga. Biani, zo ayeke ngbâ na fini gi tongana lo mä yanga ti Jéhovah Nzapa! Ti tene Adam na Eve atene gi na yanga so ala yeke mä yanga, so alingbi pëpe. A lingbi ala fa ni na lege ti aye so ala sala. Tongana ala mä yanga ti Nzapa, ala yeke fa so ala ye lo nga so ala ye si lo komande na ndo ti ala. Gi na pekoni si ala lingbi ti duti na yâ Paradis kpu na kpu. Me tongana ala te lê ti keke so, a yeke fa nyen?—

A yeke fa so ala kiri biani singila na Nzapa pëpe ndali ti ye so lo mû na ala. Tongana mo yeke kâ lani, mo yeke mä yanga ti Jéhovah?— A yeke ye so Adam na Eve asala na tongo nda ni la. Me na pekoni, mbeni zo so ayeke kota ahon ala aga ahanda Eve. Lo pusu lo ti ke yanga ti Jéhovah. A yeke zo wa?—

Bible atene so mbeni ngbo asala tënë na Eve. Me mo hinga so ngbo alingbi ti sala tënë pëpe. Ka, a sala tongana nyen si lo sala tënë so?— Mbeni ange akomanse ti bi bê ti lo na ndo aye ti sioni. Lo ye si Adam na Eve avoro lo. Lo ye ti tene ala sala ye so lo ye. Lo ye nga ti mû place ti Nzapa. Ni la, lo sala mo bâ mo tene ngbo ni si ayeke sala tënë. Me ti tâ tënë ni, a yeke ange ni so la si ayeke sala lani tënë.

Tongaso, sioni ange so azia sioni tënë na yâ li ti Eve. Na lege ti ngbo ni, lo tene na lo: ‘Nzapa atene tâ tënë na ala pëpe. Tongana ala te lê ti keke so, ala yeke kui pëpe. Ala yeke hinga ye mingi tongana Nzapa.’ Tongana mo yeke fade kâ, mo yeke mä na bê na tënë so?—

Eve akomanse ti sala nzara ti ye so Nzapa amû na lo pëpe. Lo te lê ti keke so Nzapa agbanzi na ala. Na pekoni lo mû mbeni na Adam. Adam amä na bê lani pëpe na tënë so ngbo ni atene. Me teti so lo ye Eve mingi ahon Nzapa, lo nga kue lo te lê ti keke ni.​—Genèse 3:1-6; 1 Timothée 2:14.

Nyen la asi na pekoni?— Adam na Eve aga azo so ayeke mbilimbili-kue pëpe, ala ga mbakoro, na ala kui. Teti so ala yeke mbilimbili-kue pëpe, amolenge ti ala nga kue ayeke mbilimbili-kue pëpe, nga na nda ni ala ga mbakoro, na ala kui. Nzapa atene mvene pëpe! Tâ tënë, zo ayeke ngbâ na fini gi na mango yanga ti lo (aRomain 5:12). Bible atene so iri ti ange so atene mvene na Eve so ayeke Satan Zabolo, nga a hiri a-ange so aga sioni adémon.—Jacques 2:19; Apocalypse 12:9.

Mo hinga fadeso awe ngbanga ti nyen nzoni ange so Nzapa asala lo aga sioni?— A yeke ngbanga ti so lo komanse ti bi bê ti lo na ndo aye ti sioni. Lo ye ti duti na kozo ndo. Lo hinga lani so Nzapa atene na Adam na Eve ti dü amolenge. Me lo, Satan, lo ye si ala kue avoro lo. Lo ye nga ti tene azo kue ake yanga ti Jéhovah. Tongaso, lo tara ti zia asioni tënë na yâ li ti e.​—Jacques 1:13-15.

Zabolo atene so zo oko aye biani Jéhovah pëpe. Lo tene so mbi na mo e ye Nzapa pëpe, na so e ye biani pëpe ti sala ye so Nzapa aye. Lo tene so e yeke mä yanga ti Jéhovah gi tongana aye kue atambela tongana ti so bê ti e aye. Zabolo atene tâ tënë? E yeke tongaso biani?

Kota Wafango ye atene so Zabolo ayeke zo ti tenengo mvene! Na mango yanga ti Jéhovah, Jésus afa so lo ye Nzapa biani. Lo mä yanga gi pëpe tongana lo bâ so a yeke ngangu na lo pëpe ti sala ni. Lo sala ni na ngoi kue, même tongana ambeni zo asala si a duti ngangu na lo ti mä yanga. Lo ke Jéhovah lâ oko pëpe juska na kuâ ti lo. A yeke ndani la si Nzapa akiri lo na fini teti lakue lakue.

Tongaso, ti mo zo wa la ayeke tâ kota wato ti e?— Tâ tënë, a yeke Satan Zabolo. Mo lingbi ti bâ lo?— Oko pëpe! Me e hinga so lo yeke dä, na so lo yeke kota nga ngangu mingi ahon e. Me zo wa la ayeke kota ahon Zabolo?— A yeke Jéhovah Nzapa. Ni la, e hinga so Nzapa alingbi ti bata e.