Mungo maboko na kua ti Royaume na ndo so mo yeke dä nga na yâ ti dunia kue

SO ATÉMOIN TI JÉHOVAH afa nzoni tënë “juska na ambage ti sese so ayeke tâ yongoro” asara si prophétie so Jésus atene na ndö ti lâ ti nda ni aga tâ tënë (Kus. 1:8; Mat. 24:14). Ti sara ni, ala yeda na bê ti ala wani ti mû ngoi ti ala nga na ngangu ti ala ti fa aye ti yingo na azo. Teti so ala hinga biani so Jéhovah ayeke bâ lege ti bezoin ti azo so ayeke sara kua oko na lo, ala ngbâ lakue ti zia Royaume ti Nzapa na kozo ndo na yâ ti fini ti ala (Mat. 6:25-34; 1 aCor. 3:5-9). Aye ti peko ni afa polele so Jéhovah ayeda na ala nga so lo sara tufa na ndö ti ala.

MUNGO MABOKO NA KUA TI ROYAUME NA YÂ TI DUNIA KUE

² Tongana ambeni zo abâ akode so e yeke sara na kua ti fango tënë nga ala bâ so e yeke kangbi aBible nga na ambeti ti e na azo senge senge, ala yeke hunda terê ti ala: “Tongana nyen la ala peut ti sara aye so kue?” Tâ tënë, ti imprimé gbâ ti aBible nga na ambeti ti e so kue ahunda nginza. A yeke leke aDa ti Béthel nga a yeke bata ni si angbâ nzoni ndali ti aita so ayeke sara kua na amachine ti imprimengo na ambeti ti e, ala so ayeke bâ ndo na ndö ti kua ti fango tënë wala ala so ayeke sara nga ambeni kua nde ti sara si kua ti fango nzoni tënë ague na li ni. Aye so kue ahunda nga nginza mingi. Na ndö ni, asurveillant ti circonscription, amissionnaire so a tokua ala na yâ ti aterritoire, apionnier spécial nga na ambeni ita so ayeke sara gï kua ti ngoi kue ayeke wara mbeni mungo maboko na lege ti mitele, tongaso si ala ngbâ ti sara kua ti ala ni. A yeke polele so laso kua ti fango nzoni tënë, atâa na ndo so e yeke dä wala na yâ ti dunia kue, a hunda nginza mingi. Me a wara anginza ni so kue na ndo wa?

³ Azo mingi, so kua ti fango tënë so aTémoin ti Jéhovah ayeke sara anzere na ala, ayeke na ngia ti mû mbeni offrande ndali ti kua so e yeke sara na yâ ti dunia kue. Me kozoni kue, aTémoin wani la ayeke mû maboko na kua ni, ambeni ayeke tokua a-offrande ti ala na filiale ti aTémoin ti Jéhovah ti kodro so ala yeke dä. Bibe ti mungo ye so ala yeke na ni ague oko na ti awakua ti Jéhovah ti giriri so lani ala mû ye na bê ti ala wani ti tene a leke na mbeni da so a yeke voro Jéhovah dä (Ex. 35:20-29; 1 Chron. 29:9). A wara ambeni kota offrande na lege ti atestament so ambeni zo asara. Aita, acongrégation wala acirconscription ayeke mû nga a-offrande me so mingi ni akono mingi ape. Me tongana a bungbi anginza ni kue, a yeke mû maboko si kua ti fango tënë angbâ lakue ti gue na li ni.

⁴ A-Témoin ti Jéhovah abâ so a yeke mbeni pasa la ala yeke na ni ti mû nginza ti ala nga na amosoro ti ala ti sara si kua ti fango tënë ague na li ni. Jésus na adisciple ti lo ayeke bata lani nginza na yâ ti mbeni sanduku, na nginza ni amû maboko lani na ala ti sara adépense (Jean 13:29). Bible asara nga tënë ti awali so amû maboko lani na Jésus nga na adisciple ti lo (Marc 15:40, 41; Luc 8:3). Ambeni ita so aye lani ti tene fango nzoni tënë ague na li ni nga so aye ti mû maboko na bazengele Paul na yâ ti kua so lo yeke sara amû maboko na lo na nzoni bê na lege ti mitele. Lo yeda lani na mungo maboko ni nga lo kiri singila ndali ni (aPhil. 4:14-16; 1 aThes. 2:9). A-Témoin ti Jéhovah angbâ lakue ti mû peko ti atapande ti awakua ti Jéhovah ti ândö so asara kua na bê ti ala kue nga amû ye na zo na bê ti ala wani. Tongaso, na ndo kue, azo so bê ti ala ayeke nzoni alingbi ti wara ‘ngu so amû fini na zo senge senge.’—Apoc. 22:17.

BANGO LEGE TI AYE SO CONGRÉGATION ABEZOIN NI

⁵ A yeke nga na lege ti a-offrande so aita amû na bê ti ala wani la a yeke sara na adépense ti congrégation. A yeke ro nginza na tïtî azo ape, nga a yeke fa na azo ape wungo ti nginza so ala doit ti mû na offrande. Na ando so e yeke sara bungbi dä, a zia aboîte ti offrande ti tene zo oko oko alingbi ti zia mbeni ye na yâ ni “tongana ti so lo leke na bê ti lo ti sara”.—2 aCor. 9:7.

⁶ A-offrande so aita amû ayeke kozoni kue ti vo na aye teti Da ti Royaume nga ti bata na da ni si angbâ nzoni. Bungbi ti a-ancien alingbi ti mû desizion ti tokua mbage ti nginza ni na filiale ti aTémoin ti Jéhovah ti kodro ti ala ti mû maboko na kua ti Royaume na yâ ti dunia kue. Tongana a bâ so a yeke nzoni ti tokua ni, congrégation ayeke mû yanga ti sara ni. A yeke tongaso la si acongrégation mingi ayeke tokua lakue a-offrande ndali ti kua so a yeke sara na yâ ti dunia mobimba. Tongana aita kue ahinga so congrégation ayeke na bezoin ti nginza ngoi na ngoi, a yeke kota ye pëpe ti sara tokua na ndö ti offrande fani mingi.

BANGO LEGE TI A-OFFRANDE

⁷ Lakue na peko ti bungbi, aita-koli use ayeke zi yanga ti aboîte ti offrande ti mû anginza so a zia dä, na ala yeke sû na mbeti wungo ti nginza so ala wara (2 aGbia 12:9, 10; 2 aCor. 8:20). Bungbi ti a-ancien ayeke leke ti tene a bata nginza ni nzoni juska ti tene a tokua ni na filiale wala ti tene a payé na ambeni ye so congrégation ayeke na bezoin ni. Nze oko oko, ita so ayeke bâ lege ti acompte ti congrégation ayeke leke mbeni tokua ti fa na congrégation tënë na ndö ti nginza ni; fani oko na yâ ti nze ota, coordinateur ti bungbi ti a-ancien ayeke leke ti tene a kiri a bâ peko ti compte ti congrégation ni.

ADÉPENSE TI CIRCONSCRIPTION

⁸ A-offrande so aTémoin ti Jéhovah ti mbeni circonscription abi la a yeke mû ti sara na adépense so andu akota bungbi ti lango oko nga na ambeni dépense ti circonscription ni. A yeke zia aboîte ti offrande na ando ti akota bungbi ni, tongaso si azo alingbi ti mû a-offrande ti bê ti ala ndali ti circonscription ni. Na ndö ni, acongrégation alingbi ti mû a-offrande na ambeni ngoi nde ndali ti adépense so circonscription ayeke sara ka.

⁹ A yeke na lege ni ti tene acirconscription asara adépense kue so ala doit ti sara na a-offrande so a mû, na a yeke tokua tanga ti nginza so angbâ ndali ti kua ti fango tënë na yâ ti dunia kue. Tongana nginza ti compte ti circonscription ni alingbi pëpe ti kanga dû ti adépense so a sara na ngoi ti kota bungbi ni, wala tongana a lingbi pëpe ti futa na akozo ye so a yeke na bezoin ni ndali ti kota bungbi ti peko, na tapande, ti loué mbeni ndo ndali ti kota bungbi so a yeke sara ande, surveillant ti circonscription alingbi ti mû yanga ti tene a dabe ti acongrégation na pasa so ala yeke na ni ti mû a-offrande. Bungbi ti a-ancien ti congrégation oko oko kue ayeke sara lisoro na ndö ti tënë ni ti fa wungo ti nginza oke la congrégation ti ala alingbi ti tokua na circonscription. Na pekoni, ala yeke fa tënë ni na congrégation ti tene aita amû yanga ti fa ye so ala lingbi ti tokua ni.

¹⁰ Tongana akpale ti nginza alondo so a hunda ti tene a-ancien ti circonscription abâ lege ni, a-ancien ayeke sara mbeni bungbi na lango ti kota bungbi ti lango oko. Adesizion kue so a ye ti mû so andu pëpe adépense so circonscription ayeke sara ka, a lingbi a-ancien amû yanga ti fa so ala yeda na ni. Lakue tongana circonscription aye ti sara adépense so ayeke nde na ati so lo yeke sara ka, a lingbi a sû mbilimbili wungo ti pata ni na mbeti nga a fa ni na a-ancien ti bâ wala ala yeda na ni.

¹¹ A yeke leke ti tene ngoi na ngoi a bâ wala a sara kua nzoni na nginza ti circonscription ni.

BANGO LEGE TI AWAYERE

¹² Mbeni raison so ndali ni Jésus na adisciple ti lo ayeke bata lani mbeni nginza na yâ ti sanduku ti ziango nginza dä ayeke ti mû maboko na awayere (Marc 14:3-5; Jean 13:29). Kua so angbâ lakue na ndö ti go ti aChrétien, teti so Jésus atene: “Awayere ayeke ngbâ lakue na ala.” (Marc 14:7). A-Témoin ti Jéhovah ayeke sara kua so laso tongana nyen?

¹³ Na ambeni ngoi, ambeni ita be-ta-zo na yâ ti congrégation alingbi ti duti na bezoin ti mungo maboko na lege ti mitele ngbanga ti so ala ga mbakoro awe, ala yeke na mbeni ngangu kpale ti seni wala mbeni kpale asi na ala na so ahon ngangu ti ala. Tongana azo ti sewa ti aita ni so wala ambeni fami ti ala ahinga bezoin ti ala, peut-être bê ti ala ayeke pusu ala ti mû maboko na aita ni. Tongana ala sara tongaso, ala yeke sara ye alingbi na atënë ti bazengele Jean so: “Zo kue so ayeke na aye ti gigi so, na lo bâ so ita ti lo ayeke na ye pëpe, me lo ke ti bâ mawa ti lo, tongana nyen si ndoye ti Nzapa ayeke ngbâ na yâ ti lo? Amolenge so mbi ndoye ala mingi, zia e ndoye terê na tënë pëpe wala na yanga pëpe, me na lege ti kusala nga na tâ tënë.” (1 Jean 3:17, 18; 2 aThes. 3:6-12). Tâ bungbi ti vorongo Nzapa ahunda ti bâ lege ti aita be-ta-zo so peut-être ayeke na bezoin ti wara mungo maboko na lege ti mitele.—Jacq. 1:27; 2:14-17.

¹⁴ Na yâ ti kozo mbeti ti bazengele Paul na Timothée, lo fa tongana nyen la a lingbi ti mû maboko na lege ti mitele na ala so alingbi na ni. Mo lingbi ti diko wango so lo mû ni na 1 Timothée 5:3-21. A yeke kozoni kue na Chrétien oko oko kue ti bâ lege ti azo ti da ti lo. Ti aita so ayeke mbakoro wala so ayeke na ngangu encore ape, a yeke na amolenge ti ala, a-âta ti ala wala ambeni fami ti ala nde ti bâ lege ti ala. Na ambeni ngoi, gouvernement wala ambeni ndokua ti bango lege ti azo alingbi ti leke ambeni ye ti mû maboko na mara ti azo tongaso. Ni la, afami ti aita ni wala ambeni zo nde alingbi ti mû maboko na ala ti sara ademande so a hunda. Mbeni ye alingbi ti si so a lingbi ti hunda ti tene congrégation ni abâ tongana nyen ti mû maboko na aita so ye amanke ala na so ayeke sara na Jéhovah be-ta-zo teti angu mingi awe. Tongana mbeni zo ti sewa ti ala wala mbeni fami nde ayeke dä ti mû maboko na azo tongaso ape, na si gouvernement wala mbeni ndokua aleke mbeni ye pëpe ndali ti ala, bungbi ti a-ancien ti congrégation ni alingbi ti fa aye so a lingbi ti sara ti mû maboko na aita tongaso. A-Chrétien abâ so a yeke mbeni pasa ti mû aye ti mitele so ala yeke na ni na azo so ayeke na yâ ti bezoin ni.

¹⁵ A lingbi ti si so aita ti e mingi ayeke na ye ape, ndali ti sarango ye ti ngangu na ala, bira, yengingo ti sese, kota ngu so apika si abuba aye, kota nzara wala ambeni ngangu kpale nde so ayeke si mingi na yâ ti angoi ti ngangu so (Mat. 24:7-9). Na yâ ti mara ti angoi tongaso, a lingbi ti si so acongrégation ti kodro ni so ayeke na ye ti mungo ni na mba ape. Tongaso, Bebungbi ayeke bâ ndo na ndö ti aye so aita ti ambeni ndo nde ayeke mû ndali ti aita ni so. A yeke mara ti ye so lani aChrétien ti Asie Mineure asara na ngoi so ala tokua kobe na aita ti ala ti Judée na ngoi so mbeni kota nzara atï na yâ ti kodro ni (1 aCor. 16:1-4; 2 aCor. 9:1-5). Tongana e mû tapande ti ala, e yeke fa so e ndoye aita ti e nga e yeke fa so e yeke atâ disciple ti Jésus Christ.—Jean 13:35.

KUA TI KANGBINGO AMBETI

¹⁶ A-Bible nga na ambeti so asara tënë na ndö ti Bible ayeke sara kota kua mingi na yâ ti kua ti fango tënë ti Royaume. Mingi ni ka, bungbi ti a-ancien ayeke soro mbeni wakua ti mungo maboko ti bâ lege ti abuku, abrochure nga na ambeni mbeti nde tongaso, so ayeke ti congrégation ni. Aita so a soro ala ti bâ lege ti ambeti so ayeke bâ kua ti ala na nene ni. Ala yeke hinga lakue wungo ti ambeti so angbâ tongaso si wungo ti ambeti so congrégation ayeke na bezoin ni aduti lakue dä.

¹⁷ E aChrétien so e mû terê ti e na Nzapa awe, e hinga so ngoi ti e, hingango ye ti e, ngangu ti e, akode ti e, mosoro ti e nga même fini ti e ayeke amatabisi so Nzapa amû na e ti sara na kua ti lo (Luc 17:10; 1 aCor. 4:7). Tongana e sara kua nzoni na aye kue so e yeke na ni, e yeke fa so e ndoye Jéhovah mingi. E ye ti gonda Jéhovah na anzoni ye ti e teti e hinga so bê ti lo ayeke nzere mingi na matabisi kue so e mû na lo na âme ti e kue (aProv. 3:9; Marc 14:3-9; Luc 21:1-4; aCol. 3:23, 24). Jésus atene: “Ala wara ye senge senge, ala mû ni na azo senge senge.” (Mat. 10:8). Tongana e mû terê ti e wani nga na amosoro ti e ti sara na kua ti Jéhovah, e yeke wara ngia mingi na pekoni.—Kus. 20:35.