Ti voro Nzapa aye ti tene nyen?

A lingbi ti tene so ti voro mbeni nzapa ayeke “mbeni ye so zo asara ti fa so lo ne mbeni nzapa nga lo ye lo.” Na yâ ti Bible, tënë so a kiri peko ni na “voro” alingbi ti sara tënë ti ye so zo asara ti fa so lo ne mingi acréature wala lo woko terê ti lo na gbe ti ala (Mat. 28:9). Atënë so alingbi nga ti sara tënë ti vorongo tâ Nzapa wala mbeni nzapa nde (Jean 4:23, 24). Atënë so angoro tënë “voro” ni la alingbi ti sara si zo amä yâ ni nzoni.

Gï Jéhovah oko, Lo so asara aye kue nga Kota Gbia ti dunia kue, la alingbi ti tene e voro lo (Apoc. 4:10, 11). E yeke voro Jéhovah na lege so e ne lo tongana Gbia ti dunia kue nga e ne iri ti lo (Ps. 86:9; Mat. 6:9, 10). Akota tënë use so mbeti ti Ézéchiel asara tënë na ndö ni mingi ayeke droit ti Jéhovah ti komande dunia kue nga na iri ti lo. Gï na yâ ti mbeti ti Ézéchiel oko, tënë “Jéhovah, Seigneur ti dunia kue” asigi fani 217 nga tënë “hinga so mbi yeke Jéhovah” asigi fani 56.​—Ézéch. 2:4; 6:7.

Ye oko, vorongo Nzapa ti e ayeke pëpe mbeni ye so angbâ gï na bê ti e; me a hunda ti sara ambeni ye ti fa ni (Jacq. 2:26). Na ngoi so e mû fini ti e na Jéhovah, e mû zendo na lo so na yâ ti aye kue e yeke mä yanga ti lo so lo yeke Kota Gbia ti e nga e yeke ne iri ti lo mingi. Girisa ape so na yâ ti kiringo tënë ti Jésus na ota tara ni, lo tingbi vorongo Nzapa na “kusala so ayeke nzoni-kue.” (Mat. 4:10). So e yeke awakua ti Jéhovah, e yeke na ngia ti sara na lo.a (Deut. 10:12). E yeke sara kusala so ayeke nzoni-kue na Nzapa ti e na ngoi so e yeke sara akua so andu vorongo so e yeke voro na lo nga na akua so a hunda ti sara asacrifice. Akua ni so ayeke akua wa?

Zo alingbi ti sara kusala so ayeke nzoni-kue na alege nde nde, na Jéhovah abâ ni kue na nene ni mingi. Na ngoi so e yeke fa tënë na azo, e yeke mû mbage na abungbi na Da ti Royaume, e yeke leke ada so e yeke sara abungbi dä nga e yeke bâ lege ni, andâ e yeke sara akusala so ayeke nzoni-kue la. Na ndö ni, na ngoi so e yeke voro Nzapa na yâ ti sewa, e yeke mû maboko na kua so a sara ti mû maboko na aita so awara kpale, e yeke avolontaire na ngoi ti akota bungbi wala e yeke sara kua na Béthel, andâ e yeke sara kusala so ayeke nzoni-kue la (aHéb. 13:16; Jacq. 1:27). Tongana tâ vorongo Nzapa agbu bê ti e mingi, e yeke sara “kusala so ayeke nzoni-kue bï na lâ”. A nzere na e mingi ti voro Jéhovah, Nzapa ti e.​—Apoc. 7:15.