Atënë so azo ahunda
Na yâ ti lettre so bazengele Paul atokua na aHébreu, lo sara tënë ti ‘ziango maboko na li ti zo’. Lo yeke sara lani tënë ti ziango a-ancien na kua ti ala wala lo yeke sara tënë ti mbeni ye nde?—aHéb. 6:2.
Mbeni nda ti tënë ayeke dä pëpe ti ke tënë so. Me, kite ayeke dä pëpe so Paul ayeke sara lani tënë ti ziango maboko na ndo ti aita ti mû na ala amatabisi ti yingo.
Bible asara tënë ti ziango maboko na ndo ti azo si ala sara kua so Nzapa amû na ala. Moïse “azia maboko ti lo na ndo” ti Josué na ngoi so a soro lo ti mû place ti lo Moïse ni (Deut. 34:9). Na yâ ti kongregation ti aChrétien, a iri lani na kusala ambeni koli so alingbi, na lege so a zia maboko na ndo ti ala (Kus. 6:6; 1 Tim. 4:14). Paul amû wango ti tene a zia maboko na ndo ti zo na loro pëpe.—1 Tim. 5:22.
Ye oko, Paul awa aChrétien so ayeke aHébreu ti ‘ti ga abiazo’ ndali ti so fadeso ala zia lege ti ‘akozo tënë’ awe. Na pekoni, lo sara ‘tënë ti ziango lege ti kusala so fini ayeke dä pëpe, tënë ti mango na bê na Nzapa, tënë ti batême, tënë ti ziango maboko na li ti zo’. (aHéb. 6:1, 2). Tongaso, iringo a-ancien na kusala ayeke gi mbeni kozo ye so a hunda na aChrétien ti to nda ni dä ti ga abiazo? Ên-ën. Gango mbeni ancien ayeke mbeni ye so a lingbi aita-koli biazo azia na gbele ala ti wara nga ti bâ ni na nene ni na pekoni.—1 Tim. 3:1.
Me a zia maboko lani na ndo ti azo na mbeni lege nde. Na ngoi ti akozo Chrétien, Jéhovah ake ti tene azo ti Israël aduti azo ti lo, na lo soro Israël ti yingo, so ti tene kongregation ti aChrétien so a sa yingo na ndo ti ala (Mat. 21:43; Kus. 15:14; aGal. 6:16). Amatabisi ti yingo tongana tenengo ambeni yanga ti kodoro nde na lege ti miracle afa polele gbiango ye so (1 aCor. 12:4-11). Na ngoi so Corneille na azo ti sewa ti lo amä na bê, afini Chrétien so awara yingo vulu, na a bâ ni na lege so ala “sara tënë na yanga nde nde”.—Kus. 10:44-46.
Na angoi ni so, azo ayeke wara lani matabisi ti sarango amiracle na lege so a zia maboko na ndo ti ala. Na ngoi so Philippe afa nzo tënë na kodoro ti Samarie, azo mingi awara batême. Wabatango bungbi atokua bazengele Pierre na bazengele Jean kâ. Ndali ti nyen? Bible atene: “Tongaso Pierre na Jean azia maboko ti ala na ndo [ti azo so awara batême fini fini], na ala wara Yingo Vulu.” Ye so afa biani so ala wara amatabisi ti yingo, na azo abâ ye so polele. E hinga ni ndali ti so Simon, so kozo ayeke sara aye ti magie, abâ kusala ti yingo so, na kota bê apusu lo ti tara ti mû nginza na abazengele ni ti tene ala mû na lo ngangu ti zia maboko ti lo na ndo ti azo ti mû yingo vulu na ala si ala sara amiracle (Kus. 8:5-20). Na pekoni, azo 12 awara batême na gbata ti Éphèse. Bible atene: “Tongana Paul azia maboko ti lo na ndo ala, Yingo Vulu aga na ndo ala; na ala sara tënë na yanga nde nde, ala fa tënë na iri ti Nzapa.”—Kus. 19:1-7; bâ 2 Timothée 1:6.
Ni la, na aHébreu 6:2, a lingbi ti tene so Paul ayeke sara lani tënë ti ziango maboko na ndo ti azo so aga aChrétien fini fini si ala wara amatabisi ti yingo.