Jésus Christ ayeke zo wa biani?

“Na ngoi so lo lï na Jérusalem, gbata ni kue ayengi, na azo atene: ‘So zo wa la?’ Gbâ ti azo ni ayeke tene: ‘So ayeke prophète Jésus, so lo londo na Nazareth ti Galilée!’”​—MATTHIEU 21:10, 11.

NGBANGA TI NYEN singo ti Jésus Christa na Jérusalem na tongo nda ti ngu 33 asara si ndo ayengi tongaso? Mingi ti azo ti yâ ti gbata ni amä tënë ti Jésus na aye ti kpene so lo sara. Ala ngbâ lakue ti sara tënë ti lo na azo (Jean 12:17-19). Ye oko, gbâ ti azo ni so ahinga pëpe so na popo ti ala mbeni koli ayeke dä so ayeke sara ngangu mingi na ndo ti azo ti dunia. Nga, ye so ayeke ninga teti angu mingi mingi juska na ngoi ti e.

Bâ gi ambeni tapande so afa so Jésus asara ngangu mingi na ndo ti azo na yâ ti mbaï.

▪ Calendrier so a yeke sara kua na ni na yâ ti mingi ti akodoro aluti na ndo ti ngu so azo apensé atene a dü Jésus na ni.

▪ Azo ngbundangbu use na yâ ti dunia atene ala yeke aChrétien so ti tene tongana a mû azo ota, zo oko atene ni yeke Chrétien.

▪ A-Musulman, so wungo ti ala ahon ngbundangbu oko na yâ ti dunia, afa so Jésus ayeke “prophète so ayeke kota mingi ahon Abraham, Noé na Moïse.”

▪ Mingi ti atënë ti Jésus so lo tene na lege ti ndara, na alege nde nde, azo ayeke tene ni lâ na lâ na yâ ti atënë ti ala. Bâ ambeni la:

‘Tongana zo apika ngbangba ti mo ti mbage ti koli, mo dengi na lo ti mbage ti wali.’​—MATTHIEU 5:39.

‘Mo pika yanga-da, si a zi ni na mo.’​—MATTHIEU 7:7.

‘Ndoye mba ti mo tongana tere ti mo wani.’​—MATTHIEU 22:39.

‘Ye so maboko ti mo ti wali amû zia maboko ti mo ti koli ahinga pëpe.’​—MATTHIEU 6:3.

‘Ngbanga ti nyen mo yeke bâ kete pere so ayeke na yâ ti lê ti ita ti mo, me mo bâ pëpe kota keke so ayeke na yâ ti lê ti mo wani?’​—MATTHIEU 7:3.

‘Mû ye ti César na César, me ye ti Nzapa na Nzapa.’​—MATTHIEU 22:21.

A yeke polele so Jésus asara ngangu mingi na yâ ti mbaï ti azo. Ye oko, azo ayeke na gbâ ti abango ndo so ayeke nde nde na ndo ti lo nga atënë ti mabe ti ala ayeke nde nde na ndo ti lo. Tongaso, mo lingbi ti hunda tere ti mo, ‘Jésus Christ ayeke zo wa biani?’ Gi Bible la alingbi ti fa na e ndo so Jésus alondo dä, lege so lo sara ye na fini ti lo nga ngbanga ti nyen lo kui lani. Hingango atâ tënë so na ndo ti lo alingbi ti sara aye mingi na ndo ti fini ti mo laso nga kekereke.

[Kete tënë na gbe ni]