“Mbi yeke na tere ti ala”

“Fade azo mingi akpe na ndo nde nde, na [tâ hingango ye, FD] awu mingi.”​—DAN. 12:4.

KIRINGO TËNË NI AYEKE SO WA?

Azo awara “tâ hingango ye” na ngoi ti e na lege wa?

Na lege wa azo so ayeda na tâ tënë aga “mingi”?

Tongana nyen la Nzapa asara si tâ hingango ye “awu mingi”?

1, 2. (a) E hinga tongana nyen so Jésus ayeke na tere ti azo ti lo laso nga lo yeke na tere ti ala ande na yâ ti ngoi so ayeke ga? (b) Ti gue oko na Daniel 12:4, mandango Mbeti ti Nzapa nzoni ayeke ga na nyen?

TARA ti bâ so mo yeke na yâ ti Paradis. Lakue na ndapre, mo zingo mo yeke na ngangu na mo yeke nduru ti komanse akua ti mo ti lango ni. Yâ ti tere ti mo ason ape. Ambeni ye ti tere ti mo so abuba ândö so akiri aga nzoni awe. Aye tongana lê ti mo, mê ti mo, hôn ti mo, menga ti mo nga na poro ti tere ti mo asara kua nzoni mingi. Mo yeke na ngangu, kua ti mo anzere na mo, mo yeke na gbâ ti akamarade nga agingo bê ti mo kue ahunzi awe. A yeke aye ti nzoni so mo yeke wara na gbe ti Royaume ti Nzapa. Jésus Christ, Gbia so Nzapa asoro lo, ayeke ga na aye ti nzoni na azo so lo komande na ndo ti ala nga lo yeke fa ye na ala na ndo ti Jéhovah.

² Jéhovah ayeke duti ande na tere ti awakua be-ta-zo ti lo na ngoi so ala yeke bi tere ti ala na yâ ti kua ti fango ye so a yeke sara na ndo ti sese kue. Nzapa na Molenge ti lo ayeke na tere ti abe-ta-zo awe teti angu ngbangbo mingi. Kozo si Jésus ague na yayu, lo tene na adisciple be-ta-zo ti lo lo tene ni yeke na tere ti ala. (Diko Matthieu 28:19, 20.) Ti tene e mä na bê ngangu na zendo so, zia e bâ gi mbeni prophétie oko so a sû ândö na Babylone ahon ngu 2500 awe. Prophète Daniel asara tënë ti alango ti nda ni so e yeke dä laso lo tene: ‘Fade azo mingi akpe na ndo nde nde, na tâ hingango ye awu mingi.’ (Dan. 12:4). Na lege ti fä nga ti gue oko na aye so asi na ngoi ti e, mbupa ti Hébreu so a kiri pekoni ge na “akpe na ndo nde nde” aye ti tene ti bâ mbeni ye nzoni. Kpengo na ndo nde nde so ayeke ga na aye ti nzoni mingi. Azo so amanda Mbeti ti Nzapa nzoni ayeke wara tâ hingango ye so ayeke na yâ ni. Prophétie ni atene nga so fade azo mingi ayeke mû peko ti “tâ hingango ye”. A tene nga so tâ hingango ye ni ayeke wu ande mingi. A yeke fa ande ni na ando mingi nga azo alingbi ti wara ni. Na ngoi so e yeke bâ tongana nyen la prophétie so aga tâ tënë, e yeke bâ so Jésus ayeke na tere ti adisciple ti lo laso nga Jéhovah alingbi biani ti sara si aye kue so lo mû zendo ni aga tâ tënë.

AZO AWARA “TÂ HINGANGO YE”

3. Nyen la asi na “tâ hingango ye” na peko ti kuâ ti abazengele?

³ Na peko ti kuâ ti abazengele, kengo tënë so a fa tënë ni kozo awe amaï na popo ti atâ Chrétien na amû ndo tongana wâ (Kus. 20:28-30; 2 aThes. 2:1-3). Teti angu ngbangbo mingi na pekoni, “tâ hingango ye” ayeke pëpe na popo ti azo so ahinga ye oko pëpe na ndo ti Bible nga na azo so atene ala yeke aChrétien. Amokonzi ti abungbi ti vorongo nzapa ti aChrétien ti wataka atene so ala mä na bê na Bible, me ala fa atënë ti mvene, “afango ye ti asioni yingo” so abi zonga na ndo ti iri ti Nzapa (1 Tim. 4:1). Ala sara si mingi ti azo angbâ na yâ ti bingo na lege ti yingo. Na popo ti afango ye ti wataka so, a yeke wara tënë ti Nzapa Babâ, Nzapa Molenge, na Nzapa Yingo vulu, tënë ti âme so ayeke kui pëpe nga na ti so atene ambeni âme ayeke bâ pasi lakue lakue na yâ ti enfer ti wâ.

4. Tongana nyen la mbeni kete groupe ti aChrétien ato nda ti gi “tâ hingango ye”?

⁴ Ye oko, nduru na ngu bale-osio tongaso kozoni si “alango ti nda ni” ato nda ni, mbeni kete groupe ti aChrétien so aye tâ tënë so ayeke na Pennsylvanie na Amerika awara tere ti manda Bible nzoni nga ti gi “tâ hingango ye”. (2 Tim. 3:1). Ala zia iri ti ala Awamandango Bible. Ala yeke pëpe “awandara nga na azo so ahinga ndo”, so Jésus atene a honde hingango ye na ala (Mat. 11:25). Ala sara tere ti ala kete nga ala ye biani ti sara ye so bê ti Nzapa aye. Ala sambela, ala diko Bible nzoni, ala sara lisoro dä nga ala gbu li nzoni na ndo ti ye so ala diko. Ala haka nga aversê nga ala diko ambeti so ambeni zo so agi nda ti ye tongana ala asû. Yeke na yeke, aWamandango Bible so aga ti hinga atâ tënë so azo ahinga ni pëpe teti angu ngbangbo mingi.

5. Fa ndani so a sigigi na molongo ti ambeni tract (The Old Theology)?

⁵ Atâa so tere ti aWamandango Bible so anzere lani mingi ndali ti aye so ala manda, ala zia pëpe si fini hingango ye so ala wara apusu ala ti sara baba; ala tene nga pëpe so ala la asigigi na mbeni fini ye (1 aCor. 8:1). Me, ala sigigi na molongo ti ambeni tract (The Old Theology) ti tene azo so adiko ni ahinga atâ tënë so ayeke na yâ ti Bible. Kozo tract ni afa na zo “ambeni ye so lo lingbi ti manda Bible na ndo ni tongaso si lo sigigi na yâ ti afango ye ti wataka kue nga akiri na atâ fango ye so Seigneur ti e nga na abazengele afa.”​—The Old Theology, No. 1, avril 1889, l. 32.

6, 7. (a) A mû maboko na e ti gbu nda ti atâ tënë wa ngbene ye na ngu 1870? (b) Atâ tënë wa anzere na mo mingi ti manda?

⁶ A sigigi na apendere tâ tënë mingi ngbene ye so kete groupe so ato nda ni ahon ngu 100 awe.a Atâ tënë so ayeke pëpe ambeni tënë so ayeke gi tongaso, atënë so a lingbi awasenda-nzapa apika patara dä ngbii si. A yeke atâ tënë so anzere, so azi zo nga asara si fini ti e anzere, amû na e ngia nga na beku. A mû maboko na e ti hinga Jéhovah so ayeke sara ye na ndoye nga ti hinga aye so lo leke ti sara. A mû nga maboko na e ti hinga kusala ti Jésus, ndani so lo ga na sese na lo kui nga ye so lo yeke sara na ndembe so. Apendere tâ tënë so afa ndani so Nzapa azia lege na pasi, ndani so e yeke kui, afa tongana nyen ti sambela nga ye so e lingbi ti sara ti duti biani na ngia.

⁷ Fadeso e lingbi ti gbu nda ti aprophétie so a “kanga” ni teti angu mingi na so ayeke ga tâ tënë na lâ ti nda ni so (Dan. 12:9). Aprophétie ni so ayeke na popo ti ala so ayeke na yâ ti Mbeti ti Nzapa, mbilimbili aÉvangile nga na mbeti ti Apocalypse. Jéhovah amû même maboko na e ti gbu nda ti aye so e lingbi ti bâ na lê ti e pëpe: ziango Jésus na ndo ti mbata ti gbia, bira so asi na yayu nga na tombango Satan na yayu ti ga na ndo ti sese (Apoc. 12:7-12). Nzapa asara nga si e gbu nda ti aye so e yeke bâ. Aye tongana abira, asese so ayengi, asioni kobela, akota nzara nga na sarango ye ti tere ti azo so akpe Nzapa pëpe; aye so kue asara si e yeke na yâ ti “angoi ti akpale so ayeke ngangu na zo ti kanga bê na yâ ni”.​—2 Tim. 3:1-5; Luc 21:10, 11.

8. Zo wa la asara si e hinga tâ tënë?

⁸ A yeke ngangu pëpe na e ti tene peko ti tënë so Jésus atene lani na adisciple ti lo. Lo tene: “Ngia ayeke na lê so abâ aye so ala yeke bâ so. Teti mbi tene na ala: Aprophète nga na agbia mingi ayeke lani na nzara ti bâ aye so ala yeke bâ so, me ala bâ ni pëpe. Nga, ala yeke lani na nzara ti mä aye so ala yeke mä so, me ala mä ni pëpe.” (Luc 10:23, 24). E hinga so Jéhovah Nzapa la amû lege na e ti bâ aye so nga ti mä ni. E kiri singila mingi so a tokua “wamungo maboko”, yingo vulu ti Nzapa, ti fa lege na adisciple ti Jésus “na yâ ti tâ tënë kue”! (Diko Jean 16:7, 13.) Zia e bâ lakue tâ hingango ye na nene ni nga e fa ni na azo.

“AZO MINGI” AYEDA NA “TÂ HINGANGO YE”

9. Tisango ndo wa a zia lani na yâ ti Tour ti Ba Ndo ti avril ngu 1881?

⁹ Na yâ ti Tour ti Ba Ndo ti avril ti ngu 1881, nduru na ngu use na peko ti so a sigigi na kozo numero ti Tour ti Ba Ndo, a hunda ti wara awafango tënë 1000. Article ni atene: “Azo so dutingo ti ala amû lege na ala ti mû ndambo ti ngoi ti ala ti sara gi na kua ti Seigneur, e wa ala ti sara aye so: ala gue na yâ ti akota gbata wala akete gbata, tongana a lingbi na ngangu ti ala, ti sara kusala tongana aColporteur wala aÉvangeliste ti gi na ndo kue aChrétien so ayeke na nzara ti sara na Nzapa. Mingi ti aChrétien so ala yeke wara ande ayeke azo so ayeke na nzara ti sara na Nzapa me hingango ye la amanke ala; ala gi ti fa na azo ni amosoro ti nzobe ti Babâ ti e nga na pendere ti tënë ti Lo.”

10. Azo asara ye tongana nyen na pekoni so ala diko tokua so ahunda ti wara awafango tënë ti ngoi kue?

¹⁰ Tisango ndo so afa so aWamandango Bible ahinga so kota kusala ti atâ Chrétien ayeke ti fa nzoni tënë. So ala hunda ti wara awafango tënë ti ngoi kue 1000 afa so ala ye ti wara azo mingi me a yeke ngangu ndali ti so azo so ayeke gue na abungbi ti aWamandango Bible na ngoi ni so ayeke mingi pëpe. Ye oko, tongana azo mingi adiko mbeni tract wala périodique, ala hinga so tâ tënë la na hio ala yeda na tisango ndo so. Na tapande, na ngu 1882 na ngoi so mbeni koli na Londres na Angleterre adiko mbeni Tour ti Ba Ndo na mbeni brochure so aWamandango Bible asigigi na ni, lo sû mbeti lo tene: “Pardon, ala fa na mbi ye so a lingbi mbi fa nga tongana nyen ti fa ni tongaso si mbi sara nzoni kusala so Nzapa aye ti tene a sara.”

11, 12. (a) Ye wa acolporteur azia na gbele ala so ague oko na ti e? (b) Tongana nyen la acolporteur azia na sese “aklase,” wala acongrégation?

¹¹ Na ngu 1885, aWamandango Bible 300 tongaso ayeke sara kusala ti colporteur. A yeke oko ye so awafango tënë so azia na gbele ala lani la e zia nga na gbele e laso, so ayeke ti sara si azo aga adisciple ti Jésus Christ. Ye oko, akode ti ala ayeke nde na ti e. Laso, mingi ni e yeke manda Bible na zo oko oko. Na pekoni e yeke tisa zo ni ti bungbi oko na congrégation so ayeke dä awe. Ti acolporteur, ala yeke zia abuku na tîtï azo na pekoni ala bungbi ala so asara nzara ti tënë ni ti manda Bible na ala na groupe. Ahon ti manda Bible na zo oko oko, ala yeke zia na sese “aklase,” wala acongrégation.

¹² Na tapande, na ngu 1907 mbeni groupe ti acolporteur atambela na yâ ti mbeni gbata kue ti gi azo so ayeke na buku L’Aurore du Millénium (so a iri ni nga Études des Écritures). Mbeni Tour ti Ba Ndo atene: “A bungbi [azo so asara nzara ti tënë ni] oko na yâ ti da ti mbeni oko ti sara mbeni kete bungbi. Colporteur ni amû mbeni lango ti dimanche kue ti sara tënë na ala na ndo ti tënë Le divin Plan des Âges, nga na dimanche ti pekoni lo wa ala ti bungbi lakue.” Na ngu 1911, aita ni achangé kode ni. Ambeni wafango tënë 58 so kua ti ala ayeke ti gue na ndo nde nde amû adiskur na yâ ti États-Unis nga na Canada kue. Ala mû iri nga na adresse ti azo so aga amä adiskur ni na asara nzara ti tënë ni nga ala bungbi azo ni na yâ ti da ti azo ti ga mbeni fini “klase.” Na ngu 1914, na ndo ti sese kue acongrégation ti aWamandango Bible ayeke 1200.

13. Nyen la adö bê ti mo mingi na ndo ti “tâ hingango ye” so amû ndo mingi?

¹³ Laso, acongrégation ayeke 109400 tongaso na yâ ti dunia kue nga aita 895800 tongaso ayeke sara kua ti pionnier. Azo nduru na kutu miombe na ndembe so ayeda na “tâ hingango ye” nga ala yeke sara ye alingbi na ni na yâ ti fini ti ala. (Diko Ésaïe 60:22.)b A yeke mbeni ye so adö bê mingi ndali ti so Jésus atene lani kozoni na adisciple ti lo so fade ala yeke ga “azo so azo kue ake ala” ndali ti iri ti lo. Lo tene nga so a yeke sara ande ye ti ngangu na ala, a yeke bi ala na da ti kanga nga a yeke fâ même ala (Luc 21:12-17). Atâa kangango lege ti Satan, ti asioni yingo ti lo nga na ti azo ti dunia so, kusala ti azo ti Jéhovah so ayeke ti sara si azo aga adisciple ague na li ni na mbeni lege so apika bê mingi. Laso, ala yeke fa tënë na “ndo ti sese kue so azo ayeke dä” na yâ ti gbako, na yâ ti ando so dê ayeke dä mingi, na yâ ti ahoto, ayando, agbata nga na akete kodoro so ayo (Mat. 24:14). A yeke grâce na mungo maboko ti Nzapa la ala sara kusala so.

‘TÂ HINGANGO YE AWU MINGI’

14. Tongana nyen la na lege ti ambeti “tâ hingango ye” amû ndo mingi?

¹⁴ Azo mingi so ayeke fa nzoni tënë asara si “tâ hingango ye” awu mingi. Ambeti ti e ayeke sara nga si “tâ hingango ye” awu mingi. Na juillet ngu 1879, aWamandango Bible asigigi na kozo numero ti Tour ti Ba Ndo so iri ni lani ayeke Le Phare de la Tour de Sion et Messager de la Présence de Christ. A futa lani mbeni ndokua ti petengo mbeti ti sigigi na ni 6000 na anglais. A soro lani Charles Taze Russell so ayeke na ngu 27 ti sû ni nga ambeni Wamandango Bible oku so ayeke abiazo ayeke mû maboko lakue na yâ ti kua ni. Laso a sigigi na Tour ti Ba Ndo na ayanga ti kodoro 195. A sigigi na Tour ti Ba Ndo mingi ahon tanga ti ambeti-sango kue nga wungo ti numero oko oko so a sigigi na ni asi 42 182 000. Use ni ayeke Réveillez-vous! A sigigi na numero ni oko oko 41 042 000 na ayanga ti kodoro 84. Nga, ngu oko oko a yeke sigigi na abuku na aBible kutu 100.

15. A wara nginza na ndo wa ti pete na ambeti ti e?

¹⁵ Kota kusala so ayeke tambela na lege ti a-offrande so azo amû na bê ti ala wani. (Diko Matthieu 10:8.) Ye so adö bê ti azo so asara kua na andokua ti petengo mbeti ndali ti so ala hinga ngere ti amasini, akugbe-mbeti, encre nga na ambeni gbakuru ti kua. Mbeni ita so ayeke vo akungba ndali ti bungbi ti e atene: “Bê ti azo ti dengo buze so asara vizite na ando ti petengo mbeti ti e adö ti bâ so angangu masini so e yeke sara na kua nga na gbâ ti ambeti so e yeke sigigi na ni ayeke tambela gi na lege ti a-offrande so azo amû na bê ti ala wani. Bê ti ala adö nga ti bâ so azo so asara kua na Béthel ayeke amaseka nga ala yeke na ngia.”

HINGANGO YE TI NZAPA AYEKE MÛ NDO TI SESE KUE

16. Ngbanga ti nyen la Nzapa asara si azo awara “tâ hingango ye”?

¹⁶ Tongana “tâ hingango ye” awu mingi, ndani ayeke ti sara mbeni nzoni ye. Ye so Nzapa aye ayeke ti tene “mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:3, 4). Jéhovah aye si azo ahinga tâ tënë tongaso si ala voro lo na lege ni na lo iri tënë nzoni na ndo ti ala. Na lege ti fango tënë Jéhovah abungbi tanga ti groupe ti aChrétien so a soro ala ti gue na yayu. Lo yeke bungbi nga “azo mingi mingi” so alondo na “popo ti amara kue, akete mara kue, azo ti kodoro kue, ayanga ti kodoro kue” so ayeke na beku ti duti na fini lakue lakue na ndo ti sese.​—Apoc. 7:9.

17. So tâ vorongo amû ndo afa nyen?

¹⁷ So tâ vorongo amû ndo na yâ ti angu 130 so ahon afa biani so Nzapa na Gbia so lo soro lo, Jésus Christ, ayeke na tere ti awakua ti lo na sese ti fa lege na ala, ti bata ala, ti leke ala nzoni nga ti fa ye na ala. A fa nga so azendo so Jéhovah amû teti gigi ti kekereke ayeke ga ande biani tâ tënë. “Fade sese ni asi na ndara ti L’Éternel, legeoko tongana kota ngu ti ingo asi na ngu.” (És. 11:9). Azo ayeke wara ande aye ti nzoni mingi!

[Akete tënë na gbe ni]

[Foto na lembeti 6]

Akozo Wamandango Bible asara tere ti ala kete nga ala ye biani ti sara ye so Nzapa aye

[Foto na lembeti 7]

Jéhovah abâ na nene ni ngangu so mo yeke sara ti tene “tâ hingango ye” ti Nzapa amû ndo