“Sarango ye ti mbi ayeke lani sioni mingi”

GIGI TI MBI ÂNDÖ:

Mbi kono na yâ ti mbeni quartier ti awayere na gbata ti Turku, mbeni gbata so ayeke na tere ti ngu-ingo. Babâ ti mbi ayeke lani mbeni kota boxeur, a sara si mbi na ngambe ti mbi ti koli, e bi tere ti e na yâ ti boxe nga. Na ekole, amolenge aye ti gi ka yanga ti mbi mingi, na e yeke yô tere na tiri. Tongana mbi kono kete, mbi lï na yâ ti mbeni groupe ti ambeni akota abandii si e yeke tiri na ambeni zo sioni sioni. Ge la mbi to nda ti pika mozoko so a iri ni heavy-metal, na mbi ye ti ga lani kota zo ti hengo bia ti rock.

Mbi vo lani ango, si mbi na ambeni mba ti mbi ni e to nda ti pika mozoko. Hio mbi la mbi ga chef ti ala. Mbi ye ka ti sara ye kirikiri na ngoi ti pikango mozoko ni. E kue na yâ ti groupe ni, sarango ye ti e ayeke gi sioni na e yeke yü bongo kirikiri. Ye so asara si iri ti e ato nda ti wu. Na pekoni, lege azi na e ti pika mozoko na gbele gbâ ti azo. E enregistré ambeni bia, na andangba bia so e sigigi na ni anzere na azo mingi. Nduru na ngu 1990, e voyagé na États-Unis ti sara sabango ti groupe ti e. E he bia kete na New York nga na Los Angeles, nga e wara tere na ambeni kota zo ti lekengo abia si e mä tere na popo ti e kozoni si e kiri na Finlande.

Atâa so a nzere na mbi lani ti duti na popo ti amba ti mbi azo ti hengo bia ni, mbi bâ so mbeni ye amanke na yâ ti gigi ti mbi. Bê ti mbi akomanse ti son na tere ti andokua so ayeke sigigi na amozoko. Ye ti ala kue gi nginza, na ala yeke sara ngia na ni ape. Gigi ti mbi ni, so gi ngia la ahon ndo ni, ato nda ti nzere na mbi ape. Ti mbi, mbi tene mbi yeke sioni, na mbeto ti tene mbi gue na lê ti wâ asara mbi. Mbi diko lani ambeti ti Nzapa ndenge na ndenge ti wara ambeni kiringo tënë na ahunda ti mbi. Mbi sambela nga Nzapa ngangu ti mû maboko na mbi, atâa so na mbi, mbi kpa oko ape ti nzere na lê ti lo.

LEGE SO BIBLE ACHANGÉ FINI TI MBI:

Ti wara kobe ti yanga ti mbi, mbi sara kua na laposte ti gbata ti mbi. Mbeni lâ, mbi ga ti hinga so mbeni mba ti mbi wakua ni ayeke Témoin ti Jéhovah. Mbi hunda na lo gbâ ti atënë. Akiringo tënë ti lo ni agbu ngu nga aluti na ndo ti Bible. Ye so apika bê ti mbi mingi, na mbi yeda ti tene lo manda Bible na mbi. Ambeni yenga na peko ti so mbi to nda ti manda Bible, groupe ti mbi ti hengo bia ni awara mbeni pendere contrat ti tene a enregistré bia ti e na a sigigi na ni na États-Unis. Mbi tene so chance la akä na mbi awe so.

Mbi tene na Témoin so ayeke manda Bible na mbi so mbi ye biani ti sigigi na ambeni bia ni na so na pekoni awe mbi yeke komanse ti kpe andia ti Nzapa. Lo fa tënë ti bê ti lo na ndo ni ape, me lo hunda gi na mbi ti diko atënë so Jésus atene na Matthieu 6:24. Versê ni atene: “Zo alingbi ti duti ngbâa ti azo use pëpe.” Li ti mbi akpe kue na nda ti atënë ti Jésus so. Alango kete na pekoni, mbi tene na Témoin ni so mbi zi tere ti mbi na yâ ti groupe ni ngbanga ti so mbi ye ti ga disciple ti Jésus. Na mango tënë so, li ti lo akpe kue.

Bible ayeke tongana mbeni tatara so ayeke fa na mbi asioni ti mbi na gigi (Jacques 1:22-25). Mbi bâ lani so sarango ye ti mbi ayeke lani sioni mingi. Huma ti mbi ahon ndo ni, mbi ye gi ti tene iri ti mbi awu. Mbi yeke na sioni yanga, nga mbi yeke tiri, mbi yeke nyon manga na nga mbi hinga ti nyon sämba. Na ngoi so mbi bâ so sarango ye ti mbi ague nde na ye so Bible afa, ye ni asara mbi nzoni ape. Me atâa nyen, mbi yeke nduru ti changé.​—aÉphésien 4:22-24.

Na tongo nda ni, mbi regretté mingi ndali ti asioni ye so mbi sara ândö, na ye so asara mbi nzoni ape. Me Témoin ni amû maboko na mbi mingi. Lo diko na mbi Ésaïe 1:18, so atene: “Kamême siokpari ti i ayeke tongana bengba ye, fade a vuru tongana neige.” Versê so nga na ambeni versê ni nde afa na mbi so, ti tâ tënë ni, Babâ ti e ti yayu ayeke bâ mawa ti azo, na lo yeke nduru ti pardone siokpari ti ala so achangé bê ti ala kue kue kue.

Na ngoi so mbi hinga ye mbilimbili na ndo ti Jéhovah, mbi ga mbi ye lo mingi, si mbi mû desizion ti mû fini ti mbi na lo (Psaume 40:9). Mbi wara batême na ngu 1992 na ngoi ti mbeni assemblée internationale ti aTémoin ti Jéhovah so e sara na St. Pétersbourg, na kodoro ti Russie.

NZONI YE SO MBI WARA NA PEKONI:

Mbi wara gbâ ti anzoni kamarade na popo ti awakua ti Jéhovah. E yeke wara ka tere ti pika anzoni mozoko, so ayeke mbeni pendere ye so alondo na Nzapa (Jacques 1:17). Mbeni kota ye ti nzoni so mbi wara ayeke wali ti mbi Kristina. Mbi na lo e kangbi aye mingi, angia ti e nga na akpale ti gigi, me nga mbi yeke fa na lo ye kue so ayeke na gbe ti bê ti mbi.

Tongana mbi ga fade Témoin ti Jéhovah ape, ka peut-être mbi kui laso awe. Ândö akpale ahon ndo ti mbi, me fadeso mbi yeke na ngia, nga gigi ti mbi aga nzoni.