Mwezi gwa 6

Yehova agishire Abakristu b’omu myaka igana mirhanzi bulya bal’ilamire kushimbana n’akanga kahyahya balimwo. Kanji-kanji balibuzibwe, mango malebe oko kwabahikire omu kasanzi barhal’irhanyize ciru n’ehitya. Rhuganirire ebyahikiraga Barnaba n’entumwa Paolo omu mango bakag’ihubiri omu eneo y’e Listra. Oku murhondero, abantu babayegereza bwinja banabayumvirhiza. Cikone enyuma z’aho, abantu bakag’ibahagalika “bayinjibana olubaga,” na bantu baguma na baguma b’omu lubaga babanda Paolo amabuye banamusiga bamanya mpu afîre. (Ebj. 14:19) Cikone Barnaba na Paolo baj’ihubiri omu yindi eneo. Malehe gahi bapasire? Bahindula ‘bantu banji [baba] baganda,’ n’enderho zabo n’olwiganyo lwabo lwazibuhya ababo bemezi. (Ebj. 14:21, 22) Bantu banji bayunguka bulya Barnaba na Paolo barhalekaga okuhubiri ciru akaba balibuzibwe. Yehova arhugisha erhi rhwakagendekera rhwajira omukolo arhuhîre buzira kurhama. w23.04 buk. 16 cif. 13-14

Mwami Daudi agwerhe bashombanyi banji bwenene omu kalamo kage, na kanji-kanji akag’ilonza oburhabale bwa Yehova kugerera isala. Daudi al’iyemire n’obwalagale oku Yehova akag’iyumvirhiza amasala gage anakag’igashuzako. Nawe wanayemera ntyo n’obwalagale. Ebibliya erhuyemezize n’obwalagale oku Yehova anarhuha obwenge n’emisi rhulagirireko lyo rhulembera. Anakolesa omulala gwirhu gw’ekiroho ciru n’abantu barhali bamuharamya ene ly’arhurhabala omu njira ndebe. Ciru akaba ensiku zoshi Yehova arhakashuza amasala girhu omu njira rhwal’irhanyizeko, rhumanyire oku agashuza. Anarhuhe ebi rhunalagirireko n’omu mango rhubilagirireko. Co cirhumire ogendekere wasalira omu buyemere, onayemere n’obwalagale oku Yehova akushibirira ene n’oku omu mango gayisha, ‘ayish’ilambûla okuboko, ayiguse n’obugale bwage ngasi coshi cibâmwo omûka’ omw’igulu lihyahya.​—Enna. 145:16. w23.05 buk. 8 cif. 4; buk. 13 cif. 17-18

Kuli kwinja okusegeza obwenge oku migisho ohâbwa erhi ohikira omuhigo gwawe. Migisho ehi nawe wakasegezako obwenge? Erhi akaba omuhigo gwawe guli gwa kujira obusomi bw’Ebibliya erhi okujira amasala gawe gabe minja bwenene, okarhanya lugenda gurhi oko kwakasezamwo obwîra bwawe haguma na Yehova. (Enna. 145:18, 19) Erhi akaba omuhigo gwawe guli gwa kuyerekana borhere bulebe bw’Ecikristu, osegeze obwenge lugenda gurhi oko kwakakurhabala obe n’obwîra bwinja haguma n’abandi. (Kl. 3:14) Kwanaba kwinja ojire eliste y’ebirhumire olonzize okuhikira omuhigo gwawe. Okalola kw’eyo liste ngasi mango. Bwenene, okageza akasanzi haguma n’abantu bakakuha omurhima ly’ohikira omuhigo gwawe. (Mig. 13:20) Cikone, okuderha okuli, rhweshi hali ensiku rhuciyumva rhurhagwerhi irala linji ly’okuhikira emihigo yirhu. K’oko kuli kuderha oku rhurhakacihangana lyo rhuhikira omuhigo gwirhu? Nanga. Rhwanajira okwirhu koshi lyo rhuhikira omuhigo gwirhu ciru n’amango rhurhayumvirhi irala linji ly’okuguhikira. Kobinali, oko kurhali kulembu. Ciru akaba ntyo, wanashagaluka erhi wakahikira omuhigo gwawe. w23.05 buk. 27-28 cif. 5-8

Okumanya oku rhushinganine rhuyemere amazibu gakarhuhikira enyanya z’emihigo rhurhôzire, kwanarhushumya rhuhungame ebyaha birhu, rhukubûle amagosa girhu, n’okuyaka okushub’ijira ago magosa. Okujira ntyo kwanarhurhabala lyo rhugendekera omu kamashigwe k’obuzine. Erhi akaba warhôzire omuhigo mubi, oyemere oku orhakahash’ishanja ebyagezire. Orhahezagya akasanzi kawe n’emisi yawe omu kucihalira erhi kucitumuza erhi kutumuza abandi. Lubero n’oko, oyemere amagosa gawe onajire okwawe koshi ly’okolesa bwinja akanga olimwo buno. Erhi wakayumva oli wacitumuza enyanya z’igosa wajijire, omu njira y’obwirhohye oyegere Yehova kugerera isala, oyemere igosa lyawe, onamuhûne akubabalire. (Enna. 25:11; 51:3, 4) Ohûne aba wagokize obwonjo, n’erhi akaba kuli kwa bulagirire, ohûne abagula oburhabale. (Yk. 5:14, 15) Ociyigirize kugerera amagosa gawe, onajire okwawe koshi ly’oyaka okugashubirira. Erhi wakajira ntyo, wanayemera n’obwalagale oku Yehova akuyeresa olukogo lwage n’oku akuha oburhabale olagirireko.​—Enna. 103:8-13. w23.08 buk. 28-29 cif. 8-9

Mwami Yowasi ayungusire kugerera olwiganyo lwinja lwa Yehoyada. Co cirhumire oyo mwami musole al’ilonzize okusimisa Yehova. Cikone enyuma z’okufâ kwa Yehoyada, Yowasi ayumvirhiza abaluzi bagoma. (2 Nga. 24:4, 17, 18, Mashi Bible) Ciru akaba Yehova agayire bwenene enyanya z’oko, “akazibarhumira abalêbi bakazagihamiriza ekarhi kabo, ci barhayumvagya.” Ciru barhayumvirhizagya na Zakariya, mugala wa Yehoyada, orhali kone mulêbi wa Yehova na kuhani cikone kandi ali muzala wa Yowasi. Mwami Yowasi ciru anigisa Zakariya. (2 Nga. 22:11; 24:19-22) Yowasi arhagendekeraga ayoboha Yehova omu njira eshinganine. Yehova ali erhi adesire ntya: “Abampeba kw’akagayo nabo bagayaguzibwa.” (1 Sam. 2:30, Mashi Bible) Buzinda, omurhwe musungunu gw’Abasiriya gwahima omurhwe gwali “gwa bantu banji bwenene” gwa Yowasi banamusiga “ayunjwire bibande.” (2 Nga. 24:24, 25) Abakozi ba Yowasi bamuniga bulya naye anizire Zakariya. w23.06 buk. 18 cif. 16-17

Paolo agezize kasanzi kalebe e Efezi, ali ayaliza n’okuyigiriza omwanzi mwinja. (Ebj. 19:1, 8-10; 20:20, 21) Al’izigire bene wabo bwenene, anal’ilonzize abarhabale bagendekere babêra bishwekerezi kuli Yehova. Abefezi Paolo ayandikiraga amaruba, embere bal’igwerhe obuyemere bw’amadîni g’obunywesi, bananal’iyemire eby’obukurungu. Abantu b’e Efezi bagwerhe olugenzi lw’okujira eby’enshonyi, barhanagwerhe nshonyi omu lugenzi lwabo. Emyanzi eyerekire eby’enshonyi yakag’iyumvikana ngasi hoshi ciru n’amango g’amadinye g’amadîni. (Ef. 5:3) Bantu banji ba mw’eyo vile bali “bacikala-shonyi,” luderho luhugwîre oku barhacikag’ishishwa n’olugenzi lwabo lw’okujira eby’enshonyi. (Ef. 4:17-19) Embere Abefezi bayige ebintu binja n’ebibi, ezamiri yabo erhakag’ibatumuza. Co carhumaga Paolo aderha oku “obukengere bwabo buyunjwire mwizimya, n’obuhwinja bw’omurhima gwabo guhûsire bwarhumire barhabona obuzine bwa Nyamuzinda.” Cikone, bantu baguma na baguma b’e Efezi barhagendekeraga babêra omu mwizimya. w24.03 buk. 20 cif. 2, 4; buk. 21 cif. 5-6

Omukolo gwa Gideoni gw’obuzuzi gwal’ihûnyire okukola na misi minji bwenene. Erhi Abamidyani balibirha omu ntambala abalwisagya budufu, Gideoni abalibirhako kurhenga omu Kabanda k’e Yezreli n’enjira yoshi kuhika oku Lwishi Yordani. (Bac. 7:22) Ka Gideoni ayimanzire erhi ahika oku Lwishi Yordani? Nanga! Ciru akaba ali amarhama, ye n’abalume 300 bali haguma naye bayikira banagendekera babakulikira. Buzinda, bagwarha Abamidyani banabahima. (Bac. 8:4-12) Gideoni al’ilangalire oku Yehova amuha emisi, na Yehova amuhire yo. (Bac. 6:14, 34) Mango maguma, Gideoni n’abalume bali haguma naye balibirhako bami babirhi Bamidyani oku magulu n’obo nkaba abo bami bohe bali bashonyire oku ngamiya. (Bac. 8:12, 21) Cikone, kugerera oburhabale bwa Nnâmahanga, Abaisraheli babagwarha banahima entambala. Ko n’oko, abagula banalangalira Yehova, bulya “arhakarhama ciru n’olusiku luguma nisi erhi acîlîkirire.” Abaha emisi amango bayilagirireko.​—Iz. 40:28, 29. w23.06 buk. 6 cif. 14; buk. 7 cif. 16

Rhwanaba n’omurhima gusezire ciru marhangulo gahi gakarhuhikira. Co cirhumire olangalire Yehova. Rhuganirire gurhi Baraki ahimiremwo ivita bulya al’ilangalire obulongozi bwa Yehova. Ciru akaba nta mpenzi erhi itumu lyakabonekine omu cihugo coshi, Yehova amurhegeka oku aj’ilwisa omurhwe gw’Abakanani gwal’ilongozibwe na Sisera gwanal’igwerhe ebikolanwa binji by’okulwa ivita. (Bac. 5:8) Omulebi-kazi Debora abwira Baraki agende omu kabanda aj’irhimanana na Sisera n’emituga yage 900 y’okulwa ivita. Ciru akaba kwakabire kuzibu bwenene oku Baisraheli okulwisa eyo mituga ya Sisera omu cidekerera, Baraki arhumikira. Erhi abasoda ba Sisera baba bali bayandagala oku Ntôndo Tabori, Yehova aniesa enkuba y’ecihonzi kurhenga e mpingu. Emituga ya Sisera yashaya omu bijondo, na Yehova aha Baraki obuhimi. (Bac. 4:1-7, 10, 13-16) Nirhu, Yehova arhurhabala rhuhime erhi rhwakamulangalira n’okulangalira obulongozi arhuha kugerera ikubuliro lyage. w23.07 buk. 19 cif. 17-18

Rhushinganine rhube ba kulembera lyo rhuyish’iyokoka. Aka abakozi bishwekerezi ba Nnâmahanga b’omu mango ga mîra, rhushinganine rhugendekere rhwalingûza oku Nnâmahanga ahikiriza ebiragane byage. (Hb. 6:11, 12) Ebibliya erhushushanyize n’omuhinzi. (Yk. 5:7, 8) Omuhinzi anakole n’obushiru ly’arhwera emburho n’okuyidomera, cikone arhaba amanyire mangaci yakula kobinali. Co cirhumire omuhinzi anagendekere alingûza, erhi analangalire oku asarula emburho yage. Ko n’oko, rhunagendekere rhwaba na binji bya kujira omu mikolo y’ekiroho ciru akaba ‘rhurhamanyiri olusiku Nnawirhu ayîsha.’ (Mt. 24:42) Rhuli rhwalingûza, erhi rhunayemire n’obwalagale oku omu kasanzi kage kakwanine, Yehova ahikiriza ebi alaganyize byoshi. Erhi rhwakahikira aha rhwabula obulembedu, rhwanarhama n’okulinda rhwananarhondera okuleka okuli bunyi-bunyi. Kandi rhwanarhondera rhwasegeza obwenge oku bintu byakarhulerhera omwishingo ho n’aho. Cikone erhi akaba rhuli balembedu, rhwanalembera kuhika e buzinda n’okuyokoka.​—Mik. 7:7. w23.08 buk. 22 cif. 7.

Omu kushushanya obo bulebi buli omu Daniyeli 2:41-43 n’agandi malebi gali omu citabu ca Daniyeli n’ec’Amafulûlo, rhwanaderha oku ezo nshando zishushanyize omulungano gwa Angleterre na Amérique, burhegesi bukulu bw’igulu lyoshi ene. Lugenda obo burhegesi bw’igulu lyoshi, Daniyeli adesire oku ‘obwola bwami bwayishiba lunda luguma buzibu n’olundi lunda bube bulembagusire.’ Bulya gurhi lunda luguma bwaba bulembagusire? Bulya abantu barhalengeriri, bashushanyizibwe n’ibumba, banazambanye obuhashe bw’obo burhegesi bw’okukola n’emisi eri nka cuma. Amahugûlo ga Daniyeli lugenda ensalamu y’omu cilorho, garhuyigirizize nyigirizo nyinji z’obulagirire. Burhangiriza, Oburhegesi Bukulu bw’Igulu Lyoshi bwa Angleterre na Amérique bwayerekine emisi yabo omu njira ndebe. Kwa lwiganyo, bwajijire cigabi cinene omu kuhima Ivita lya Burhanzi ly’Igulu n’Ivita lya Kabirhi ly’Igulu. Cikone, obo burhegesi bukulu bw’igulu lyoshi bwazambanyibwe bwanagendekera bwazambanyibwa n’akavulindi egarhi ka bacikala babo. Bwa kabirhi, ogo mulungano gwa Angleterre na Amérique bo burhegesi bukulu bw’igulu lyoshi buzinda bwarhegeka embere Obwami bwa Nnâmahanga bushereze amarhegesi goshi ga bene bantu. w23.08 buk. 10-11 cif. 12-13

Hali amango Daudi akag’iciyumva ababire enyanya z’amazibu n’amarhangulo goshi akag’ilwisa. (Enna. 18:4, 5) Cikone, obuzigire bunji bwa Yehova n’oku akag’imushibirira byakamuha emisi. Yehova ayerekeza omwîra wage wal’irhamire ebwa “bulambo bw’akahasi kinja” n’ebwa “ntûla y’amîshi gashongwire.” Oko kwarhuma Daudi acib’iba n’emisi anahasha okugendekera akolera Yehova n’omwishingo. (Enna. 18:28-32; 23:2) Ko n’oko ene, “enyanya z’obuzigire bwishwekerezi bwa Yehova co cirhuma rhurhahwa” amango rhuli rhwalwisa amarhangulo n’amazibu g’akalamo. (End. 3:22, NWT; Kl. 1:11) Kanji-kanji akalamo ka Daudi kali omu mazibu, anal’igwerhe abashombanyi b’emisi. Cikone, obuzigire bwa Yehova bwakag’imujira aciyumve ali omu murhûla analanzirwe. Daudi akaciyumvirhe oku Yehova ali haguma naye omu ngasi kanga, n’oko kwakag’irhuma arhayoboha. Co carhumire ayimba ntya: “[Yehova] ankûla kw’ebihamba byandi kwo.” (Enna. 34:4, Mashi Bible) Ciru akaba hali amango Daudi akag’iciyumva ayobohire, ahashire okuhima oboba bwage bulya al’imanyire oku Yehova al’imuzigire. w24.01 buk. 30 cif. 15-17

Ociyigirize kugerera emihigo mibi ya Yowasi. Enyuma z’okufâ kwa Kuhani Mukulu Yehoyada, Yowasi acishoga abîra babi. (2 Nga. 24:17, 18) Ahiga okuyumvirhiza abaluzi b’e Yuda barhal’izigire Yehova. Nkaba nawe oyemire oku Yowasi al’ishinganine ayake abo bantu babi. Ahali h’okujira ntyo, ayumvirhiza abo bal’idesirwe mpu bîra bage. Cikone, erhi Zakariya muzala wa Yowasi alonza okumuhanula, Yowasi amunigisa. (2 Nga. 24:20, 21; Mt. 23:35) Oko ajiraga kwali kubi bwenene bwanali buhwinja bwenene! Yowasi arhondire bwinja omu kalamo kage, cikone eby’okugayisa, ahikira aha aba mugoma na munizi. Buzinda, abakozi bage yene bamuniga. (2 Nga. 24:22-25) Akalamo kage kakabire lubero bwenene acigendekerage ayumvirhiza Yehova n’abantu bazigira Yehova! w23.09 buk. 9 cif. 6

Yezu al’imanyire oku Petro akabêzire mwishwekerezi. Oko kwarhuma Yezu abwira Petro ntya omu njira y’olukogo: “Orhayobohaga.” Yezu al’imulangalire n’oko kwarhuma akalamo ka Petro kashanja. Buzinda Petro na mulumuna wage Andreya baleka omukolo gw’okuduba ensamaki bahikira aha baba banafunzi ba Masiya b’akasanzi koshi, ogo muhigo gwabalerhera migisho minji bwenene. (Mk. 1:16-18) Petro acibwinire bintu binji by’okusomeza bulya ali mwanafunzi wa Kristu. Abwine oku Yezu ajaga afumya abalwala, afukuza abazimu, ciru n’okufûla abafîre. (Mt. 8:14-17; Mk. 5:37, 41, 42) Kandi Petro acibwinire ecibonekerezi c’obukuze bw’Obwami bwa Yezu bw’omu mango gayisha, ako kali kantu arhayibagiraga ciru n’ehitya. (Mk. 9:1-8; 2 Pt. 1:16-18) Petro abwine ebintu arhakabwine nk’arhabaga mwanafunzi wa Yezu. Oko kwarhumire ashagaluka bwenene bulya ahimire ezo ntanya mbi anacibonera eyo migisho yoshi! w23.09 buk. 20-21 cif. 4-5

Omu maruba gage marhanzi, entumwa Petro yakolesize enderho ‘kuzigirana bwenene.’ Obuzigire bwa ntyo, bunazaze arhali byaha bisungunu byone, cikone “byaha binji.” (1 Pt. 4:8, Mashi Bible) Nkaba Petro akengire isomo Yezu amuyigirizagya myaka minji embere z’aho lugenda okubabalira. Ago mango, bibonekine oku Petro al’iyemire oku anaba ali muntu mwinja erhi aderha oku anababalira mwene wabo kuhika “kali nda.” Cikone Yezu amuyigiriza, anarhuyigirizize nirhu, oku rhukababalira “kali 77,” ko kuderha buzira lugero. (Mt. 18:21) Erhi wakabona nka kuli kuzibu okukolesa er’ihano, orhavunikaga omurhima! Bulya abakozi ba Yehova boshi barhaba bimana, hali amango babona oku kuli kuzibu okubabalira. Akantu k’obulagirire bwenene wakajira ene kuli kujira okwawe koshi ly’obabalira mwene winyu n’okujira omurhûla haguma naye. w23.09 buk. 29 cif. 12

Omu nda y’ensamaki, Yona al’iyemire n’obwalagale oku Yehova ayumvirhiza er’isala lyage ly’obwirhohye na lya kuciyunjuza. n’oku Yehova akamurhabire. Buzinda, Yona agalulwa ebulambo, anaba mubidu okuyemera ogundi mukolo ahâbagwa n’okuguhikiriza. (Yon. 2:10–3:4) Amango oli walwisa amazibu, k’onaciyumve ohangayisire bwenene kuhika oyabirwe okubwira Yehova oku oli waciyumva? Erhi k’onaciyumve orhagwerhi misi y’okujira ifunzo? Okakengera oku Yehova ahugûsirwe bwinja akanga kawe. Co cirhumire ciru wakajira isala lyofofi, wanayemera n’obwalagale oku kobinali akuha ebi olagirireko. (Ef. 3:20) Erhi akaba amalumwa gawe g’omubiri erhi g’ekandalala garhumire kwaba kuzibu kuli we okusoma n’okuyiga, nkaba wanayumvirhiza e arejistrema y’obusomi bw’Ebibliya erhi y’ebicapo biyimangire oku Bibliya. Kandi nkaba okuyumvirhiza lwimbo luguma lw’omu nyimbo zirhu erhi okulaba evideo y’oku jw.org kwanakurhabala. Yehova aba alonzize akuzibuhye ananajira ntyo erhi wakamuyegera kugerera isala n’okulonza amashuzo oku masala gawe omu Bibliya n’omu bindi bintu byoshi arhuhirireho. w23.10 buk. 13 cif. 6; buk. 14 cif. 9

Ihema ly’entimanano n’amahekalu gayubakagwa buzinda omu Yeruzalemu byal’ishushine bwenene omu ndani. Omu ndani mwali byumpa bibirhi: ‘Ahatagatifu’ n’“Ahatagatifu h’Ebitagatifu [erhi Hatagatifu Bwenene]” n’ebyo byumpa bibirhi byal’igabirwemwo n’erido. (Hb. 9:2-5; Lub. 26:31-33) Omu Hatagatifu mwali ecimanikiro c’itara c’enoro, amazabahu g’okuyokerako obuku, n’ameza g’emigati y’enterekêro. “Abakuhani bashizirwe amavurha” bone bal’iyemerirwe okuja omu Hatagatifu lyo bahikiriza emikolo yabo mitagatifu. (Mib. 3:3, 7, 10) Omu Hatagatifu Bwenene mwali isanduku ly’endagano ly’enoro lyal’ishushanyize okubaho kwa Yehova. (Lub. 25:21, 22) Kuhani mukulu yene wal’iyemerirwe okusheshera enyuma z’erido ly’aja Ahatagatifu Bwenene Olusiku lwa ngasi mwaka lw’Okufunika Ebyaha. (Lev. 16:2, 17) Akag’ija omu Hatagatifu Bwenene adwirhe n’omuko gw’ensimba ly’afunika ebyaha byage yene n’ebyaha by’ishanja lyoshi. Buzinda, Yehova ayerekana n’obwalagale ebi ebyo bigabi by’ihema ly’entimanano byal’ishushanyize.​—Hb. 9:6, 7. w23.10 buk. 27 cif. 12

Omu Kanwa ka Nnâmahanga, muli irhegeko ligalukirwe kanji-kanji lirhuhûnyire ‘rhuzigirane.’ (Yn. 15:12; Rm. 13:8; 1 Ts. 4:9; 1 Pt. 1:22; 1 Yn. 4:11) Cikone, obuzigire buba borhere bw’omurhima, erhi muntu w’ekandalala, na nta mwene muntu wakabona ebirhuli omu murhima. Muli ntyo, gurhigi rhwakayerekanamwo oku rhuzigire bene wirhu na bali birhu? Kugerera enderho zirhu n’ebijiro birhu. Hali njira nyinji ziri lubero rhwakayeresamwo bene wirhu na bali birhu oku rhubazigire. Aha hali nyiganyo nguma na nguma: “Ngasi muguma akaz’ibwira mulungu wage okuli.” (Zak. 8:16) ‘Mube n’omurhûla mwêne na mwêne.’ (Mk. 9:50) Mukaba barhanzi “okuyerekana obukenge.” (Rm. 12:10, Mashi Bible) “Mukayankirirana mwêne na nnene.” (Rm. 15:7) ‘Mukababalirana.’ (Kl. 3:13) ‘Ngasi muguma akabarhula omuzigo gw’owabo.’ (Gl. 6:2) “Mukaz’irhulirizanya.” (1 Ts. 4:18) ‘Mukazibuhanya.’ (1 Ts. 5:11, Mashi Bible) ‘Mukasengererana.’​—Yk. 5:16. w23.11 buk. 9 cif. 7-8

Ngasi lusiku, rhunarhôle emihigo ehûna rhube n’obuyemere buzibu. Kwa lwiganyo, rhunarhôle emihigo lugenda abîra, eby’okucishagalusa, amasomo, obuhya, abana n’akazi. Kuli kwinja rhukacidosa ntya: ‘K’emihigo yani enayerekane oku nyemire n’obwalagale oku er’igulu liri lya kasanzi kasungunu n’oku hano hofi-hofi igulu lihyahya lya Nnâmahanga lyarhôla enafasi yalyo? Erhi k’emihigo y’abantu barhaba bayemire oku banalama ensiku n’amango enashumye emihigo yani?’ (Mt. 6:19, 20; Lk. 12:16-21) Rhwanarhôla emihigo minja erhi rhwakaba rhuyemire n’obwalagale oku igulu lihyahya liri hofi bwenene. Kandi rhunahikirwe n’amazibu gaba gahûnyire rhube n’obuyemere buzibu. Nkaba rhwanalembera okulibuzibwa, endwala erhafuma, erhi agandi mazibu gakarhuma rhwavunika omurhima. Cikone erhi gakagendekera, nk’oku amazibu ga ntyo galug’ijira, rhwanaba rhulagirire oku buyemere buzibu lyo rhugalembera n’okugendekera rhwakolera Yehova n’omwishingo.​—1 Pt. 1:6, 7. w23.04 buk. 27 cif. 4-5

Yehova alonzize rhujire kushimbana n’amasala girhu. Kwa lwiganyo, nkaba mwene wirhu muguma anahûna Yehova amurhabale bamuhe oluhusa ebw’akazi ly’aja oku ntimanano y’e eneo. Nkaba gurhi Yehova akashuzamwo er’isala? Nkaba anaha oyo mwene wirhu oburhwali alagirireko ly’aganiza omukulu wage w’akazi. Cikone byanahûna oyo mwene wirhu abone oyo mukulu wage w’akazi ly’amuhûna oluhusa. Nkaba ashinganine agendekere ahûna oluhusa. Nkaba anahûna owundi munya-kazi amurhabale lyo bashanja ensiku z’akazi erhi anahûna barhamulipaga ensiku ayish’iba arhakoziri. Yehova alonzize rhukasalira kanji-kanji lugenda amalagirire girhu. Kushimbana n’enderho za Yezu, masala girhu maguma na maguma garhakashuzibwa ho n’aho. (Lk. 11:9) Co cirhumire, orharhamaga! Okasalira kanji-kanji na kurhenga oku murhima. (Lk. 18:1-7) Erhi rhugendekera rhwasalira Yehova lugenda kantu kalebe, rhunamuyerese oku kobinali rhulagirire kw’ebi rhuli rhwamuhûna. Kandi rhunayerekane oku rhugwerhe obuyemere oku anarhurhabala. w23.11 buk. 22 cif. 10-11

Yehova al’ilaganyize omwîra wage Abrahamu oku amashanja goshi g’igulu gakagishirwe kugerera iburha lyage. (Murh. 15:5; 22:18) Bulya Abrahamu al’igwerhe obuyemere busezire muli Nnâmahanga, al’iyemire n’obwalagale oku eciragane ca Nnâmahanga cakahikirire. Ciru akaba ntyo, erhi Abrahamu agwerhe myaka 100 na mukage myaka 90, oyo mulume na mukage bishwekerezi barhal’iciba n’omwana. (Murh. 21:1-7) Cikone, Ebibliya edesire ntya: “Omu kulangalira, . . . Abrahamu ayemire, na ntyo ahinduka ishe w’amashanja mwandu, nk’oku âli abwizirwe.” (Rm. 4:18) Omanyire oku obulangalire bwa Abrahamu bwahikirire. Aba ishe wa Izaki, mwana alangaliraga omu kasanzi kanji. Bulya gurhi Abrahamu al’iyemire n’obwalagale oku Yehova akahikirizize eco ciragane cage? Enyanya z’obwîra bwa hofi-hofi na bwago-bwago agwerhe haguma na Yehova, Abrahamu “âli amanyire buzira karhinda emurhima oku Nyamuzinda agwerhe obuhashe bw’okuyunjuza eciragane cage.” (Rm. 4:21) Yehova ayemire Abrahamu anamuhamagala mushinganyanya erhi buyemere bwage burhuma.​—Yk. 2:23. w23.12 buk. 8 cif. 1-2

Mwene wirhu ociri musole oba wa kulangalirwa anahikirize bwinja-bwinja emikolo yage yoshi. Rhuganirire olwiganyo lwimana lwa Yezu. Yezu arhali molo arhanali muntu orhashibirira bwinja-bwinja omukolo gwage. Lubero n’oko, ahikirizize omukolo Yehova amuhâga, ciru n’amango kwali kuzibu okujira ntyo. Al’izigire abantu, ci bwenene abanafunzi bage, anahâna obuzine bwage buzira kusezibwa erhi bo barhuma. (Yn. 13:1) Omu kuyiga olwiganyo lwa Yezu, ocihangane okuhikiriza ngasi mukolo ohâbirwe. Erhi wakaba orhamanyiri bwinja gurhi wagujira, obe mwirhohye onahûne bene wirhu bakuzire kiroho oburhabale. Orhakag’ijira hisungunu hyone kulusha ebi ohûnyirwe. (Rm. 12:11) Lubero n’oko, okaguyukiriza omu kumanya oku ‘Nyakasane [Yehova, NWT] ye ojîre wakolera, c’arhali bantu.’ (Kl. 3:23, Mashi Bible) Kobinali, orhaba mwimana, co cirhumire obe wa lugero n’okuyemera ngasi igosa wakajira.​—Mig. 11:2. w23.12 buk. 26 cif. 8

Rhunashagaluke bwenene erhi rhubatizibwa n’okuba baguma b’omu mulala gwa Yehova. Luba lukengwa lunene bwenene okuba n’obwîra bwa ntyo haguma na Yehova. Rhuyemire n’obwalagale ezi nderho z’omwandisi w’ennanga Daudi, waderhaga ntya: “Ow’obushagaluke ali muntu ocishozire n’okumulerha hofi ly’alama omu ngo zawe.” (Enna. 65:4, NWT) Arhali ngasi muntu yeshi ye Yehova alerha omu mulala gwage. Anacishoge okukulula emunda ali balya boshi bayerekine oku balonzize okuba n’obwîra bwa hofi-hofi haguma naye. (Yk. 4:8) Erhi ocihâna emwa Yehova n’okubatizibwa, onamuyegerere omu njira yago-yago. Wanayemera n’obwalagale oku enyuma z’okubatizibwa ‘akubulagira emigisho kuhika nta kantu kabulikanage.’ (Mal. 3:10, NWT; Yer. 17:8) Obubatizo, guli murhondero gw’akalamo kawe k’okukolera Yehova. Wayish’ijira okwawe koshi ly’ohikiriza eciragane c’okukolera Yehova, n’okugendekera wabêra mwishwekerezi kuli ye, ciru n’amango oshumibwe okujira kantu kalebe kabi erhi amango oli omu marhangulo. (Muh. 5:4, 5) We nka mwanafunzi wa Yezu, wakulikira olwiganyo lwage n’okurhumikira amarhegeko gage nk’oku binahashikine.​—Mt. 28:19, 20; 1 Pt. 2:21. w24.03 buk. 8 cif. 1-3

Gurhigi erhi akaba we na mukawe erhi balo murhashagalukira okugeza akasanzi haguma? Gurhi mwakajira? Orhanye oku muliro. Gurharhondera gwagulumira ho n’aho. Biba bihûnyire omuntu agendekere ahirako enshali nnenene. Ko n’oko, kwanaba kwinja murhondere okugeza kasanzi kasungunu haguma ngasi lusiku. Mwanacihangana okujira kantu kalebe mushagalukire mwembi. (Yk. 3:18) Omu kurhondera bunyi-bunyi, mwanacib’irhondera mwayasa obuzigire bwinyu. Obukenge buba bwa bulagirire omu buhya. Ko buba nka hihusi hirhuma omuliro gwayaka bwenene. Buzira hihusi, omuliro gunazime duba-duba. Ko n’oko, buzira bukenge, obuzigire egarhi k’omulume na mukage bwananyiha duba-duba. Oku bundi, omulume na mukage bacihangana okuyerekana obukenge banabe bali bakola haguma lyo bagendekera bayasa obuzigire bwabo. Cikone, okengere oku, arhali we shinganine orhanye oku onakenge balo erhi mukawe, cikone balo erhi mukawe ye shinganine aciyumve oku onamukenge. w23.05 buk. 22 cif. 9; buk. 24 cif. 14-15

Omu Bibliya, abakozi bishwekerezi ba Nnâmahanga baganirire amango bakag’iciyumva bababire banali bajuguma enyanya z’abashombanyi babo erhi agandi mashumi. (Enna. 18:4; 55:1, 5) Ko n’oko, nkaba rhwanahagalikwa ebwa masomo, ebwa kazi, n’abantu b’omulala gwirhu erhi abarhegesi. Nkaba ciru rhwanayoboha oku rhwafâ enyanya z’amazibu g’okubukwa. Omu mango ga ntyo, nkaba rhwanaciyumva nka rhurhagwerhi burhabale ak’omwana murho. Gurhi Yehova arhurhabalamwo omu mango ga ntyo? Anarhuhe omurhima n’okurhurhuliriza. Co cirhumire, ngasi mango okageza akasanzi haguma na Yehova omu kusalira n’okusoma Akanwa kage. (Enna. 77:1, 12-14) Erhi wakaba ogwerhe eyo nkomedu, akantu karhanzi wakajira amango oli omu mazibu kuli kuhûna Sho w’omu mpingu oburhabale. Okamanyisa Yehova ebi oyobohire n’ebikuhangayisize. Buzinda okamuyumvirhiza omu kusoma Akanwa kage na muli ntyo wabona gurhi akurhuliriza.​—Enna. 119:28. w24.01 buk. 24-25 cif. 14-16

Okuba n’irala ly’okuhikira emihigo yawe y’ekiroho kuli kwa bulagirire bwenene. Erhi akaba ojira irala linji ly’okuhikira omuhigo gwawe, wanajira okwawe koshi ly’oguhikira. N’erhi akaba irala lirhu liri linji bwenene, ko rhwakanahikira duba emihigo yirhu. Co cirhumire, gurhigi wakajira ly’ociyumva ogwerhe irala linji ly’okuhikira omuhigo gwawe? Okahûna Yehova akuhe irala linji. Kugerera iroho lyage, Yehova anakuha irala ly’okuhikira omuhigo gwawe. Mango maguma na maguma rhunacihirireho omuhigo bulya rhumanyire oku rhushinganine rhujire ntyo, n’oko kuli kwinja. Cikone, nkaba kobinali rhwanaba rhurhagwerhi irala linji ly’okuguhikira. Okarhanya bwenene kw’ebi Yehova akujirire. (Enna. 143:5) Paolo akag’irhanya bwenene oku lukogo lurhashinganinwi Yehova amuyeresire, n’oko kwamushumya ajire binji omu mukolo gwa Yehova. (1 Kr. 15:9, 10; 1 Tm. 1:12-14) Ko n’oko, erhi wakakarhanya bwenene kw’ebi Yehova akujirire, oko kwanakushumya obe n’irala linene ly’okuhikiriza omuhigo gwawe.​—Enna. 116:12. w23.05 buk. 26-27 cif. 3-5

Rhunashagaluse Larha wirhu w’omu mpingu erhi rhukuza izino lyage. (Enna. 119:108) Ka kuli kuderha oku Nnâmahanga wirhu ogala-byoshi aba aka bene bantu barhali bimana baba balonzize okukuzibwa lyo bahâbwa omurhima? Nanga. Erhi rhukuza Larha wirhu w’omu mpingu, rhunarhabale okuyerekana oku ebi Shetani aderheraga ngasi muguma wirhu biba bya bunywesi. Shetani aderha oku nta muntu wakahalira n’obwishwekerezi izino lya Nnâmahanga. Aderha oku nta mwene muntu wakabêra mwishwekerezi kuli Nnâmahanga amango ali omu marhangulo. Aderha oku rhweshi rhwanaleka okukolera Nnâmahanga erhi rhwakabona oku oko kwarhulerhera obunguke. (Ayu. 1:9-11; 2:4) Cikone Ayubu omu kugendekera abêra mwishwekerezi kuli Nnâmahanga, ayerekana oku Shetani ali munywesi. Ka nawe wagendekera wabêra mwishwekerezi kuli Nnâmahanga? Ngasi muguma wirhu agwerhe olukengwa lw’okuhalîra izino lya Nnâmahanga wirhu n’okumushagalusa omu kumukolera n’obwishwekerezi. (Mig. 27:11) Kobinali luli lukengwa okujira ntyo. w24.02 buk. 8-9 cif. 3-5

Enyuma z’ensiku za Musa na Yozwe, Yehova ahiraho abaciranûzi lyo balongoza abantu bage. Enyuma z’aho, omu mango g’abami, Yehova ahiraho abalebi lyo balongoza abantu bage. Abami bishwekerezi bakulikire amahano g’abalebi. Kwa lwiganyo, Mwami Daudi ayemire n’obwirhohye okukubûlwa n’omulebi Natani. (2 Sam. 12:7, 13; 1 Nga. 17:3, 4) Mwami Yozafati alangalire obulongozi bw’omulebi Yahazieli anaha abantu b’e Yuda omurhima ‘bacihire omu maboko g’abalêbi [ba Nnâmahanga].’ (2 Nga. 20:14, 15) Amango Mwami Hezekiya al’ibabire, aj’ihûna omulebi Izaya oburhabale. (Iz. 37:1-6) Ngasi mango erhi abami bakakulikire obulongozi bwa Yehova, Yehova akag’ibagisha n’okulanga abantu bage. (2 Nga. 20:29, 30; 32:22) Abantu bakabwine n’obwalagale oku Yehova akag’ikolesa abalebi ly’alongoza olubaga lwage. w24.02 buk. 21 cif. 8

Shetani anakalonza rhucilunge n’abantu bakarhuma kwaba kuzibu kuli rhwe okurhumikira amakanuni ga Yehova. Rhushinganine rhube masu bwenene bulya ene rhunageze akasanzi haguma n’abantu, arhali busu oku busu kone, cikone kandi kugerera esite z’e enternete z’okuganira na bantu banji. Rhushinganine rhulwise entanya z’igulu ziyerekine oku olugenzi lw’okujira eby’enshonyi lurhaba lubi. Rhumanyire oku olo lugenzi luba lubi bwenene. (Ef. 4:19, 20) Ciru akaba ntyo, rhushinganine rhucidose ntya: ‘Ka nambe masu amango kurhali kwa bulagirire okurhacilunga n’abirhu banyakazi, abirhu rhusoma rhweshi, erhi abandi barhakenga amakanuni mashinganyanya ga Yehova? Ka nambe n’oburhwali bw’okurhumikira ebi Yehova adesire oku bili binja erhi bibi ciru abandi bakaderha oku ntalusire olugero omu kujira ntyo?’ Nk’oku biyerekinwe omu 2 Timoteyo 2:20-22, rhushinganine rhube masu amango rhwacishoga aba rhwakomerana nabo ciru n’omu cigamba c’Ecikristu. Rhunakengere oku hali bantu baguma na baguma barhakarhurhabala rhugendekere rhwabêra bishwekerezi omu mukolo gwa Yehova. w24.03 buk. 22-23 cif. 11-12

Ka hali amango okola obwine omu bukengere bwawe oku Yehova ayorha? Ciru akaba Yehova arhabonekana, Ebibliya emuganirire omu njira ziri lubero. Yehova ahamagirwe “Kazubazuba, Mpenzi” na “ngulumira ya muliro.” (Enna. 84:11, Mashi Bible; Hb. 12:29) Ezekiyeli aganirire oku Yehova akag’ibonekana omu cibonekerezi nk’ibuye lya safiri, nka cuma ciri cayaka muliro, na mutirigongo gwakag’ilangashana. (Eze. 1:26-28) Bulya rhurhakabona Yehova, nkaba rhwanabona nka kuli kuzibu okuyemera oku aba arhuzigire. Enyanya z’ebyabahikire omu kalamo, bantu baguma na baguma banarhanya oku Yehova arhakabazigira ciru n’ehitya. Nkaba barhal’igwerhe ishe wal’ibazigire. Yehova anahugûkwe gurhi rhuciyumva anamanyire oku kwanarhuma kwaba kuzibu kuli rhwe okumuyegera. Ly’arhurhabala, arhufululîre amorhere gage minja bwenene omu Kanwa kage. Oluderho luguma luba luhugwîre bwinja oku Yehova ayorha buli buzigire. (1 Yn. 4:8) Yehova buba buzigire. Obuzigire bunashumye ngasi kantu ajira. Obuzigire bwa Nnâmahanga buba bunji bwenene bunajira buhashe bunji bwenene na ciru anabuyerese abantu barhaba bamuzigire.​—Mt. 5:44, 45. w24.01 buk. 26 cif. 1-3

Yehova ahizireho Musa ly’alongoza Abaisraheli kurhenga e Misri. Al’ihizireho omutungo gw’olwikungu mushi n’omutungo gw’omuliro budufu. (Lub. 13:21) Musa akag’ikulikira ogo mutungo gwanamulongoza ye n’Abaisraheli kuhika oku Nyanja Ndukula. Abantu bayoboha bwenene erhi barhanya oku Abamisri babagwarha bulya bacirhimanyire bali egarhi kabo n’Enyanja Ndukula. Baderha oku Musa ajijire igosa omu kubahêka ebwa Nyanja Ndukula. Cikone lirhali igosa. Yehova ye wabalongozagya eyo munda n’obulonza bwage kugerera Musa. (Lub. 14:2) Muli ntyo, Mungu abayokola omu njira y’okusomeza bwenene. (Lub. 14:26-28) Myaka 40 enyuma z’aho, Musa agendekire akulikira ogo mutungo gw’olwikungu ly’alongoza abantu ba Mungu omw’irungu. (Lub. 33:7, 9, 10) Kurhenga mw’ogo mutungo, Yehova aganiza Musa, na Musa naye abwira abantu ebi Yehova amubwiraga. Abaisraheli babwine bintu binji bwenene byal’iyerekine oku Yehova ye wakag’ikolesa Musa ly’abalongoza. w24.02 buk. 21 cif. 4-5