Bici Ebibliya Edesire Lugenda Omulume n’Omukazi Okulama Haguma Buzira Kujira Obuhya?
Ishuzo ly’Ebibliya
Ebibliya edesire oku Nnâmahanga aba alonzize abantu ‘baleke eby’enshonyi.’ (1 Abatesalonika 4:3) Oluderho “eby’enshonyi” lukolesibwe omu Bibliya, luhiziremo obugonyi, omulume okujira ecijiro c’obuhya n’owabo mulume n’omukazi okujira ecijiro c’obuhya n’owabo mukazi n’ecijiro c’obuhya egarhi k’omulume n’omukazi barhazig’ija omu buhya.
Bulya gurhi Nnâmahanga aba alonzize omulume n’omukazi barhang’ijira obuhya embere barhondere okujira ecijiro c’obuhya?
Nnâmahanga ye warhondezagya omupango gw’obuhya. Agurhondezagya erhi alunga haguma omulume n’omukazi barhanzi. (Omurhondêro 2:22-24) Arhalonzagya omulume n’omukazi bakalama haguma barhanazag’ijira obuhya.
Nnâmahanga aba amanyire ebyakalerhera bene bantu omw’ishingo. Ajijire obuhya gube mulungano gw’akasanzi koshi lyo gulerhera abantu b’omu mulala obunguke n’okubalanga. Orhanye k’olu lwiganyo. Nka kulya omuntu watulaga kantu kalebe ahâna amahano lugenda oku omuntu akahira haguma eby’atulaga ako kantu lyo kayenera koshi, ko n’amahano ga Nnâmahanga garhurhabala lyo rhubona gurhi rhwakayubakamwo omulala gwirhu. Amakanuni ga Mungu ganalerhere abagakulikira obunguke ngasi mango.—Izaya 48:17, 18.
Nka kulya omuntu watulaga kantu kalebe ahâna amahano lugenda oku omuntu akahira haguma eby’atulaga ako kantu lyo kayenera, ko n’amahano ga Nnâmahanga garhurhabala lyo rhubona gurhi rhwakayubakamwo omulala gwirhu
Okujira ecijiro c’obuhya n’abantu barhazig’ijira obuhya kwanalerha amazibu madarhi. Kwa lwiganyo, kwanarhuma omukazi aba izimi arhanal’ilonzize, kwanalerha endwala, n’amazibu g’ekandalala.
Nnâmahanga ahîre abalume n’abakazi engalo y’okujira ecijiro c’obuhya n’oko kunabarhabale babe n’abana. Nnâmahanga anabone obuzine oku buba butagatifu, n’engalo y’okuburha eba nyinja bwenene. Aba alonzize rhukakenga eyo ngalo omukurhumikira omupango gwage lugenda obuhya.—Abahabraniya 13:4.
Ka kuli kubi erhi omulume n’omukazi bakarhondera okulama haguma lyo balonza okumanyana embere bajire obuhya?
Birhahûnyiri omulume n’omukazi barhang’ilama haguma embere z’okujira obuhya lyo bamanya erhi obuhya bwabo bwayish’ibamo omwishingo. Lubero n’oko, obwîra bw’omulume n’omuakzi bunasêre amango basimine, n’amango bali bakola haguma lyo balwisa amazibu.a—Mateyo 19:6.
Gurhi omulume n’omukazi bakajira ly’obuhya bwabo busêra?
Harhaba obuhya bwimana. Cikone okukolesa amahano gali omu Bibliya kwanarhabala omulume n’omukazi babe n’obuhya busêzire. Rhuganirire enyiganyo za mahano maguma na maguma:
Okahira amalagire g’owinyu embere z’agawe.—1 Abakorinti 7:3-5; Abafilipi 2:3, 4.
Muzigirane munakakengana.—Abefezi 5:25, 33.
Okarhanya kw’ebi waderha.—Emigani 12:18.
Obe ba kulembera onabe babidu w’okubabalira.—Abakolosi 3:13, 14.
a Olole omwanzi gudesire “Mafanikio Katika Familia—Ushikamanifu.”