Omubale gw’Ensimba z’Emuzirhu Gwanyihire Kuhika oku 73% omu Myaka 50​—Bici Ebibliya Edesire Lugenda Oko?

Omu Nsiku 9/10/2024, Ikubuliro Lishibirira Ensimba z’Emuzirhu (WWF) lyahanyire eraporo y’okugayisa lugenda amazibu emikolo ya bene bantu elerhera ensimba z’emuzirhu. Ely’ikubuliro lyayerekine oku “omu myaka 50 egezire (1970-2020), omubale gw’ensimba z’emuzirhu gwanyihire bwenene kuhika oku 73 okw’igana (73%).” Mw’eyo raporo bahana obu burhonde: “Rhurharhalusizi olugero omu kuderha oku ebyajirikana omu myaka irhanu yayisha byo byayerekana n’obwalagale gurhi akalamo kayish’iyorha okw’Igulu omu mango gayisha.”

Bantu banji banagayisibwe bwenene n’eraporo ziri nk’ezo. Rhuba rhuzigire igulu lirhu linja, rhunanagaye bwenene erhi rhubona ensimba z’emuzirhu zilibamwo ziri zalibuzibwa. Rhunaciyumve ntyo bulya Mungu arhulemire lyo rhulanga ezo ensimba.​—Omurhondêro 1:27, 28; Emigani 12:10.

Co cirhumire, nkaba wanacidosa ntya: ‘Ka rhwahasha okulanga ensimba z’emuzirhu ziba omw’igulu? Bici Ebibliya edesire lugenda oko?’

Obulangalire lugenda amango gayisha

Ciru rhwakajira okwirhu koshi, amango gayisha g’ensimba z’emuzirhu, garhali omu maboko girhu, ci gali omu maboko ga Mungu. Nk’oku olwandiko lwa Amafulûlo 11:18 ludesire, Mungu ‘aherêrekeza balya bashereza igulu.’ Olo lwandiko lurhuyigirizize bintu bibirhi:

1. 1. Mungu ayish’ihanza abantu barhag’ishereza loshi igulu.

2. 2. Mungu ajira kantu kalebe hano hofi-hofi. Gurhi rhumanyiremwo ntyo? Rhumanyire ntyo bulya ene bene bantu bagwerhe njira nyinji z’okushereza ensimba z’emuzirhu kulusha agandi mango goshi.

Bici Mungu ayish’ijira ly’ayusa ago mazibu? Ayish’ikolesa eguvernema yage y’empingu, erhi Bwami bwage, ly’arhegeka igulu lyoshi. (Mateyo 6:10) Eyo guvernema yayish’iyigiriza abantu birhohye n’okubakomereza lyo bashibirira n’okulanga ensimba z’emuzirhu.​—Izaya 11:9.