Omubalamo omu Lwishi Maroni

Eyo munda eba abantu ba ngasi bûko, lulimi na b’omu bihugo biri lubero balama omu muzirhu gw’e Amazone omu Amarérique du sud kuli bwenene n’evile nnenene zibamo bantu banji na lubi lunji. Muli oko, omu Mwezi gwa 7, 2017, Bahamirizi ba Yehova 13 bajira omubalamo omu Lwishi lw’e Maroni n’omu nyishi zayo nsungu-ngunu ziba ekulyo lyo bacihubiri abantu balama oku burhambi-rhambi bw’olwishi.

Amarheganyo

Mwezi muguma embere ogo mubalamo gwajiraga nsiku 12 gurhangire, abantu boshi bakajire eyo babuganana lyo bapanga omubalamo. Winsley adesire ntya: “Rhwacifunza lugenda eyo eneo n’e histware yayo, kandi rhwaganirira gurhi rhwacirheganya oku mubalamo.” Ngasi mwene wirhu na mwali wirhu ahâbwa ahantu akabîka kantu kalebe k’okugwishirako n’omustikere. Mw’ogo mubalamo rhwarhozire e aviyo kabirhi na kanji ko rhwabalamire omu bwarho.

Gurhi abantu bacagulagwa baje mw’ogo mubalamo baciyumvirhe? Claude na Lisette, bakola bagwerhe hofi myaka 65, bayemera okujira kw’ogo mubalamo buzira kurhindira. Claude adesire ntya: “Nashagaluka bwenene, cikoki nayoboha hitya. Nali erhi nayumvirhe oku Olwishi Maroni lubam’omuhusi mudarhi.” Lisette naye akagiyobohera akandi kantu. Adesire ntya: “Nakacidosa erhi nanahasha nahubiri omu lulimi lw’e Ciamerendye.

Mickaël wajiraga kw’ogo mubalamo naye agwerhe oboba. Adesire ntya: “Rhurhalimanyire binji lugenda obûko bwa Wayana. Muli oko nalonza emyanzi oku Enternete lyo nciyigiriza nderho nguma nguma lyo manya gurhi nakabalamusa omu lulimi lwabo.”

Shirley wajiraga kw’ogo mubalamo ye n’iba Johann ajira e liste y’endimi ziganirwa n’abantu balama oku burhambi bw’Olwishi Maroni. Adesire ntya: “Rhwajirhola oku Jw.org evideo mw’ezo ndimi na muli oko, rhwapata ecitabu caligwerhe enderho ndebe abantu b’obûko bwa Wayana balugikolesa.”

Okuhika omu Eneo z’Aba Amerendye

Omu Nsiku 4, Mwezi gwa 7, balya Bahamirizi ba Yehova barholera e aviyo omu lugo lwa Saint-Laurent y’e Maroni lyo baja omu Maripasoula, lugo lusungunu luba omu Guyane y’e France.

Akarte k’e Amérique du Sud n’Olwishi Moroni n’evile ziba oku burhambi-rhambi bw’Olwishi. Ezo vile zihiremo (Nord erhi Sud) Saint-Laurent du Maroni, Apatou, Grand Santi, Maripasoula, na Antécume Pata.

Eburhambi bw’enyishi nsungunu ngunu zihonokera omu Lwishi Moroni, enyanya. Bakabalama omu kukolesa amarho g’omotere. Roland, wali mw’ogo mubalamo adesire ntya: “Rwabona oku Aba Amerendye bashagalukire bwenene emyanzi y’Ebibliya. Bagwerhe madoso manji, na baguma ba mulibo balisimire rhuciyirize Ebibliya haguma nabo.”

Omu lugo luguma, Johann na Shirley babugana abakazi n’abalume baciri misole, aba omuntu w’omulala gwabo acizindigiciniga. Johann adesire ntya: “Rhwaja omu JW Télédiffusion, rhwabayereka evideo edesire Muamerindia Anapata Muumbaji Wake.” Eyo video yabahuma oku murhima bwenene. “Babaha e adrese mail yabo bulya balisimire rhugendekere rhwabaganiza.”

Enyanya y’Olwishi Maroni, kuli bwenene n’e Antécume Pata. Eyo, omukulu w’olugo aha abo Bahamirizi ba Yehova balibakola barhamire ah’okuhumûkira. Bakalabira omu lwishi nk’oku abantu b’eyo eneo bajira.

Enyuma z’okurhenga aho, baja omu lugo lw’e Twenké, omu kukolesa obwarho. Eyo babugana abantu bali omu ciriyo. Éric, muguma wa muli ab’abarheganyagya ogo mubalamo, adesire ntya: “Omukulu w’olo lugo, ohamagalwa ‘Grand Man,’ arhuyemerera oku rhulambagirire abantu ba mw’olo lugo lyo rhurhuliriza abali omu ciriyo. Oyo mukulu n’omulala gwage bashagalukira bwenene amandiko rhwabasomeraga kurhenga omu Bibliya omu lulimi lwa Wayana. Kandi rhwabayereka evideo ziyerekine eciragane ca Nnâmahanga lugenda obufûke.”

Omubalamo gw’Okuja e Grand-Santi n’e Apatou

Enyuma z’aho, rhwarhola e aviyo kurhenga e Maripasoula kuja omu lugo lusungunu lw’e Grand-Santi luba idako y’Olwishi Moroni. Lwakabirhi na lwa Kasharhu, balya Bahamirizi bahubiri abantu ba mw’eyo eneo. Lwakani bajira ogundi mubalamo gwa nsa irhanu n’enusu omu Lwishi Maroni lyo baja omu lugo lw’e Apatou.

Enyanya z’Olwishi Moroni n’omuzirhu Amazone.. — Olwishi Moroni n’omuzirhu Amazone ekagarhi ka Maripasoula na Grand-Santi

Embere olusiku luzinda lw’omubalama luhike, balya Bahamirizi balambagirira engo zali omu muzirhu gw’Abamoroni, baba iburha ly’akasharhu ly’abajà b’omu Afrique balerhagwa omu Amérique du Sud erhi ecihogo c’e Suriname ciba ciri omu koloni. Abahamirizii ba Yehova balalika abantu omu muzirhu aha bal’iyubasire e bashe nnenene yali nteganye okujiriramo entimanano. Claude adesire ntya: “Rhwashagaluka bwenene okubona bantu banji bayishire. Rhwabalalikaga elyo sezi lyo n’elyo.” Karsten orhalisagija omu eneo z’oku vilaje, ajira ehotuba omu lulimi lw’e Aukan. Eyo hotuba yalidsire ntya: “K’Aka Kone ko Kalamo?” Bantu 91 bw’omu lugo mberuluka baisha kw’eyo ntimanano.

Ecigusho c’abantu bali oku ntimanano y’abantu boshi omu bashe nnenene omu kagarhi k’omuzirhu.

“Rhucirheganyize Bwinja Okushubira Eyo!”

Oku buzinda, balya Bahamirizi bashubira omu lugo lw’e Saint-Laurent du Maroni. Boshi bashagaluka okubona oku abantu ba mw’eyo eneo balisimisibwe. Bayemera ebicapo binji banasomerwa okubona video nyinji z’Abahamirizi ba Yehova.

Lisette adesire ntya: “Nta nderho ngwerhe z’okuyerekana obushagaluke ngwerhe okubona najijire kw’ogo mubalamo.” Cindy naye ak’owabo adesire ntya: “Erhi obulyo bw’okushubira eyo bwakahaba, nanagenda buzira kurhindira. Ly’omuntu ahugûkwa omwishingo ngwerhe, byanahuna naye yenene agend’icibonera!”

Ogo mubalamo gwahîre bene wirhu na bali birhu enyorha y’okushubira eyo. Mickaël adesire ntya: “Rhucirheganyize bwinja okushubira eyo!” Winsley ahamira omu lugo lw’e Saint-Laurent du Maroni. Claude na Lisette, bahamira e Apatou.