Umi Yohaannisi Sokka
3 Maganu ooso yine woshshinanninke gede, Maganu Annu mageeshshi baxille leellishinonkero laꞌe! Qoleno ninke oososiiti. Alame ninke affinokkihu iseraati; korkaatuno alame iso diaffino. 2 Baxantinoonni roduuwa, xa ninke Maganu oosooti; ikkollana albillitte hiittoore ikkineemmoro xaara dixawinsoonni. Isi xawanno woyite isi gedeere ikkineemmota anfoommo; korkaatuno iso addinta laꞌneemmo. 3 Iso hexxitannori baalu isi coꞌicha ikkinonte gede insano umonsa coꞌoota assidhanno.
4 Cubbo loosa roso assiꞌrinohu baalu seera diiganno; cubboho yaa seera diigate. 5 Isi xawanno gede assinoonnihu cubbonke haaꞌre hoolara ikkinota affinoonni; qoleno isira cubbu dinosi. 6 Isi ledo mitto ikke heeꞌrannohu baalu cubbo loosa roso diassiꞌranno; cubbo loosa roso assiꞌrinohu baalu iso dilaino; qoleno iso diafino. 7 Oosoꞌya, ayino soꞌrisiisoonkeꞌne; isi keeraancho ikkinonte gede, keeraanchimma loosanno manchino keeraanchoho. 8 Cubbo loosa roso assiꞌrino manchi Daawuloosi widooti; korkaatuno Daawuloosi uminni kayise* cubbo loosanni keeshshino. Maganu Beetti xawinohu Daawuloosi looso diigaraati.*
9 Maganu ila ikkinohu baalu cubbo loosa roso diassiꞌranno; korkaatuno Maganu wixi* togoo manchi giddo heeꞌranno; isi Maganu ila ikkino daafira cubbo loosa roso assiꞌra didandaanno. 10 Maganu oosonna Daawuloosi ooso bande anfannihu konninniiti: Keeraanchimma loosannokkihunna rodoosi baxannokkihu baalu Maganu wido diꞌꞌikkino. 11 Korkaatuno hanafotenni kayissine macciishshitinoonni sokka, mimmito baxa hasiissannonketa kultannote; 12 bushu* wido ikkinohunna rodoosi mararro nookkiha shiinohu Qaaeeli gedeere ikka dihasiissannonke. Qaaeeli rodoosi mararro nookkiha shiinohu mayiraati? Isi loosi busha, rodiisi loosi kayinni keeraancho ikkino daafiraati.
13 Roduuwa, alame gibbuꞌnero maalaꞌlitinoonte. 14 Ninke roduuwanke banxeemmo daafira, reyotewiinni heeshshonniwa saꞌnoommota anfoommo. Rodoosi baxannokkihu reyote giddo heeꞌranno. 15 Rodoosi giwannohu baalu lubbo shaannoho; lubbo shaannohura baalaho hegere heeshsho noosikkita affinoonni. 16 Isi heeshshosi* ninkera sayise uyino daafira tennenni baxille anfoommo; ninkerano heeshshonke* roduuwinkera sayise aate giddeeti noonke. 17 Ikkollana tenne alamehu maalaamittete coyi noosi manchi, rodiisi qarrame heeꞌreenna lae marara hoogiro, ‘Giddosi Maganu baxilli no’ yaa hiitto dandiinanni? 18 Oosoꞌya, loosunninna halaalunni ikkinnina coyiꞌneemmorinninna afuunni calla baxammoonke.
19 Halaalu wido ikkanke tennenni anfeemmo; wodaninkeno isi albaanni harshammi yaanno gede* assiꞌneemmo; 20 tenne assineemmohu wodaninke busha assannonke coyi baalahooti; korkaatuno Maganu wodaninkera aliidiho; isi baalankare afino. 21 Baxantinoonni roduuwa, wodaninke busha assannonkekkiha ikkiro Maganu ledo ruxxi yinummokki hasaawa dandiineemmo; 22 qoleno hajajosi agadhineemmo daafiranna iso hagiirsiisannore assineemmo daafira huucciꞌneemmore baala isiwiinni afiꞌneemmo. 23 Hajajosino tenneeti: Beettisi Yesuusi Kiristoosi suꞌma ammanneemmo gedeetinna isi hajajinonke garinni mimmito banxeemmo gedeeti. 24 Qoleno hajajosi agadhannohu baalu isi ledo mitto ikke heeꞌranno; isirano togoo manchi ledo mittimma heedhannosi. Isi ninke ledo mitto ikke heeꞌrannota uyinonke ayyaani widoonni anfeemmo.