Maatewoosi Wongeella

5 Yesuusi lowo manna lae ilaalu iimira fule ofolli; hakkunni gedensaanni rosaanosi isiwa martu. 2 Hakkiinni Yesuusi togo yaanni rosiisinsa:

3 “Ayyaanaamittete coye goodhinori* hagiirraammaho, gordu Gashshooti insahona.

4 “Dadillitannori hagiirraammaho, shesho afidhannona.

5 “Jooguullu* hagiirraammaho, baatto ragidhannona.

6 “Keeraanchimma hudidhannorinna goodhannori hagiirraammaho, duubbannona.*

7 “Maartannori hagiirraammaho, insano maarranninsana.

8 “Xalalu wodani noonsari hagiirraammaho, Magano laˈannona.

9 “Keere kalaqqannori hagiirraammaho, Maganu oosooti yinanninsana.

10 “Keeraanchimmate yiteenna xiimbanninsari hagiirraammaho, gordu Gashshooti insahona.

11 “Ane daafira yitineenna mannu mishiˈnero, xiiwiˈneronna kaphunni suˈmaˈne huniro, kiˈne kayinni hagiirraammaho. 12 Gordoho afidhinanni baraarshi lowoha ikkino daafira hagiidhe, tashshi yooˈne; konni albaanni heedhino masaalaanono hatto assine xiimboonninsana.

13 “Kiˈne uullate maxinete; maxine nyammo baˈuro galagalte hiitto ikkite nyammo afidhanno? Gobba fushshine hunneenna mannu kakkadannota agurranna kaaˈlitannori dino.

14 “Kiˈne alamete caabbichoho; ilaalaho noo katama golannori dino. 15 Mannu caabbicho xawise kae, mine noorira baalaho xawanno gede leellannowa woranno ikkinnina gimboola digombisanno. 16 Hatteente gede, mannu dancha loosoˈne lae iimi Annaˈne ayirrisanno gede caabbichiˈne mannu albaanni xawo.

17 “Ani Muse Seeranna Masaalaanote qaale hunammora dayommoha lawoonkeˈne; dayommohu wonshammoraati ikkinnina hunammora diˈˈikkino. 18 Halaale yeemmoˈnena, iiminna uulla sairo nafa kuni coyi baalu ikka geeshsha Seeru giddonni mitte shiimiidi fidale woy fidalete bicamme nafa woˈmitukki digattanno. 19 Hakko daafira, kuri shiimmaadda hajajo giddonni mitte diigannohanna wolootuno hatto assitanno gede rosiisannoha aye manchono gordu Gashshootira shiimiidiho* yinanni; kuri hajajo wonshannohanna rosiisannoha baala kayinni, gordu Gashshootira rooriidiho* yinanni. 20 Keeraanchimmaˈne Seeru rosiisaanotanna Farisootu keeraanchimma roora hoogguro gordu Gashshoote horonta eˈinannikkita kuleemmoˈne.

21 “Albi mannira, ‘Shitooti, manna shaannohu baalu yoote mine xaˈmamanno’ yinoonnita macciishshitinoonni. 22 Ani yeemmoˈneti kayinni, rodiisira hanqe agurannokkihu baalu yoote mine xaˈmamanno; qoleno rodoosi yinannikkita yee xone shollishannohu baalu Aliidi Yoo Mine* xaˈmamanno; ‘Balalu mancai kuni!’ yee xonannoha baala Gaannaamete* giira qorichi agarannosi.

23 “Kakkalo shiqishiˈrattora kakkalote darga marte heedheenna rodiikki atera koffi yiinori qulli yiihero, 24 kakkalattora massiˈroottore hakko kakkalote dargira albaanni worte agurte haˈri. Balaxxe rodiikki ledo araarami; hakkiinni galagalte dagge kakkalokki shiqishiˈri.

25 “Qahikki kassaseennahe isi ledo yoote minira hadhanni heedhe doogote rakke araarami; araarama hoogittoro kayinni qahikki daanyaho, daanyu qole yoote mini agaraanchira sayise eennahe usuru mine tugamattora dandaatto. 26 Halaale yeemmohena, mitte saante* nafa gattukki gudisse baaxxatto geeshsha hakkiichinni difulatto.

27 “‘Soorritooti’ yinoonnita macciishshitinoonni. 28 Ani yeemmoˈneti kayinni, meyata lae foorate yorinohu baalu wodanisinni ise ledo soorrinoho. 29 Hakko daafira, qiniiticho illekki guficho ikkituhero fushshite huni; korkaatuno woˈma mannimmakki Gaannaamete tungantenni mannimmakki giddonni mitte hoogittoro woyyannohe. 30 Qiniiticho angakkino guficho ikkituhero murte huni; korkaatuno woˈma mannimmakki Gaannaamete tungantenni mannimmakki giddonni mitte hoogittoro woyyannohe.

31 “Qoleno ‘Minaamasi fushshe haˈrisannohu baalu fushshe haˈrisate woraqata oosena’ yinoonni. 32 Ani yeemmoˈneti kayinni, foorretenni* kainohunni ikkiro ikkinnina hakkunni kaˈa minaamasi fushshe haˈrisannohu baalu ise soorritanno gede assara dandaanno; minaannise konni garinni fushshe haˈrisino mancho adhannohu baalu soorrinoho.

33 “Albi mannira, ‘Kaphunni xaartooti; Yihowara xaˈnootto xano wonshi’ yinoonnitano macciishshitinoonni. 34 Ani yeemmoˈneti kayinni: Horonta xaartinoonte; gordu Maganu zuufaaneetina gordunni xaartinoonte; 35 lekkasinni kaxxinotena baattotennino xaartinoonte; bayiru Moote katamaatina Yerusaalametennino xaartinoonte. 36 Mitto dananchokki nafa waajjo woy kolishsho assa didandaattona umikkinnino xaartooti. 37 ‘Ee’ yitiniro ee, ‘Deeˈni’ yitiniro deeˈni calla yiiyye; korkaatuno hakkunni kaˈi coyi bushuwiinni daannoho.

38 “‘Ille huninohura illesi hunnona, hinko hiiqqinohura hinkosi hiiqqinona’ yinoonnita macciishshitinoonni. 39 Ani yeemmoˈneti kayinni: Bushu manchi ledo giwantinoonte; qiniiticho baqqaalla qawaadannohehura guracho baqqaalla qolisi. 40 Mittu manchi yoote minira massiheronna shamisekki adhara hasiˈriro kootekkino ledde uyisi; 41 Mittu gashshaanchi mitte kiilomeetire haˈri yee qarrisihero ledosi lame kiilomeetire haˈri. 42 Huucciˈrannohehura uyi; atewiinni liqiiˈra* hasiˈrannohura fiile hoˈlitootisi.

43 “‘Olliichokki baxi, baarigaarakki giwi’ yinoonnita macciishshitinoonni. 44 Ani yeemmoˈneti kayinni: Baarigaarraˈne baxxe; xiibbannoˈnerirano huuccatto asse. 45 hatto assitiniro, iimi Anniˈnera oososi ikkitinoonnita leellishshinanni; isi bushuullehono danchuullehono arrishsho fushshanno; keeraanoteno keeraano ikkitinokkirirano xeena gananno. 46 Baxxannoˈnere calla baxxinanniha ikkiro maa afidhinanni? Qaraxaasine nafa dihatto assitanni no? 47 Roduuwaˈne calla keere haadhinanniha ikkiro, wolootu assitannorinni roorinore maa assitiniyya? Dagano dihatto assitanni no? 48 Iimi Anniˈne guuta* ikkinonte gede kiˈneno guuta ikka hasiissannoˈne.