Umi Labbaahanna Meyaata

TENNE misilera haaruri mayi no? Mannu no. Insano umi labbaahonna meyaate. Kalaqinonsahu ayeeti? Maganoho. Suꞌmasi egennootto? Suꞌmisi Yihowaati. Manchunna manchote suꞌmi kayinni Addaaminna Heewaniiti.

Yihowa Maganu Addaami kalaqinohu togoonniiti. Baattote aaninni bushsha haaꞌre coꞌiima mannu biso kalaqi. Hakkiinnino kalaqino bisi sano widoo qole ufuufi; Addaamino heeshshonniha ikki.

Yihowa Maganu Addaamira looso uyiisi. Woꞌmante saadara suꞌma fushshanno gede kulisi. Duuchchunkura dancha suꞌma fushsha dandaanno gede Addaami saada seekke laikki digatino. Addaami saadate suꞌma fushshi wote mitto coye laino. Hakku coyi maatiro afootto?

Baalanti saada labbaahonna meyaate. Meyaatinna labbaa daaniichchi no; meyaatinna labbaa doobbiichchi no. Addaamira kayinni meyaati dinosi. Konni daafira Yihowa Addaamira lowo goxichchi daannosi gede assi; hakkiinnino midaadisinni miqichcho haaꞌri. Konne miqichchono meyaata asse kalaqi; iseno Addaami galte ikkitu.

Addaami kawoote hiitto hagiidhino! Qoleno Heewani tenne biifado kaashshu base giddo heedhanno gede worroonnise daafira mageeshsha hagiidhitinoro hedi! Xaate lamunku ooso ilanna hagiirrunni mitteenni heeꞌra dandaanno.

Yihowa Addaaminna Heewani hegerera heedhanno gede hasiꞌrino. Qoleno woꞌmanta uulla Edeenete kaashshu base gede biifado assitara hasiꞌrino. Addaaminna Heewani konne looso loossanno gara heddu wote mageeshsha hagiidhitinokka! Atino heeꞌroottoro uulla biifado kaashshu base assinanni loosira beeqqattonka? Ikkollana Addaaminna Heewani hagiirri seeda yanna dikeeshshino. Mayiraatiro hanni laꞌno.