XIINXALLO 7

Adda Ikkinore Rosiisi

Luqaasi 1:3

ASSA HASIISSANNOHERE: Macciishshaano qara hedo huwattanno gede kaaꞌlate, adda ikkitino taje shiqishi.

Addaxxinanni taje hasiꞌri. Coyiꞌrattori Maganu Qaali aana xintaminoha ikko; dandaamannoha ikkiro noo gedeenni nabbawi. Sayinsete taje, odoo, woꞌnaalsha, woy wole mashalaqqe taje assite horoonsiꞌrattora albaanni halaalenna haaro ikkase buuxi.
Afiꞌrootto mashalaqqe garunni horoonsiꞌri. Qummeeshsha qooxeessaho noo hedo ledo, hattono Qullaawu Maxaafite xaphoomu sokkanna “ammanaminohunna wodanaamu borojjichi” qixxeessino borro ledo sumuu yaanno garinni xawisi. (Mat. 24:45, NW) Alamete borrono garunni horoonsiꞌri; hattono borreessi manchi kulara hasiꞌrino sokka soorritooti.

Afiꞌrootto mashalaqqe ikkitinokki geeshsha assite shiqishshooti. Lawishshaho, “boodu manni” yaannoha “rooru manni” yite, woy “mito woyite” yaannoha “woꞌmanka woyite” yite, hattono “ikkara dandaanno” yaannoha “ikkikki digatino” yite shiqishattokki gede qorophi.
Macciishshaano heeshshi gotti assite heddanno gede assi. Mitto qummeeshsha nabbawitto woy wole borro yitannore qummi assitto gedensaanni, macciishshaano heeshshi gotti assite heddanno gede xaꞌmo xaꞌmi, woy hattenne hedo lawishshunni kuli.