XIINXALLO 4

Qummeeshsha Danchu Garinni Egensiisa

Maatewoosi 22:41-45

ASSA HASIISSANNOHERE: Mitto qummeeshsha nabbawattora albaanni macciishshaano afate quqquxantanno gede assi.

Hakko qummeeshsha nabbawattohu mayiraatiro hedi. Mitto mittonka qummeeshsha, macciishshaano xawisate hasiꞌrootto hedo huwattanno gede assanno garinni egensiisi.

Qooxeessaho noo hedo wodanchi. Qullaawu Maxaafi giddo noota mitte hedo ayi coyiꞌrinoronna hakko maxaafa borreessinohu ayetiro xawisatto woyite, coyiꞌrattori adda ikkinota buuxi.
Coyiꞌrattori Qullaawu Maxaafi aana xintaminoha ikko. Maganu noota ammananno mannira coyiꞌratto woyite, macciishshaano Maganu Qaale ikkinohu Qullaawu Maxaafi aana illachishshanno gede assi; hatto assakki Qullaawu Maxaafi taalle nookkiha hayyote buicho ikkinota leellishshanno.
Macciishshaano quqquxantanno gede assi. Nabbawatto qummeeshshi dawaro qolanno xaꞌmo xaꞌmi; mitto qarra qummi assite, nabbawatto qummeeshshi hakkonne qarra tirate kaaꞌlannota xawisi. Woy mitto xintu seera kulte kaꞌe, aanchite nabbawattoti Qullaawu Maxaafi xagge hakkonne xintu seera luphi assitannota xawisi.

Macciishshaano hatte hajonna hakko qummeeshshi daafira mageeshshire affinoro hedi. Rosamino qummeeshsha ikkiro nafa, baxisanno garinni egensiisi; hattono macciishshaano hakko qummeeshshinni haaro hedo huwattanno gede assi.