Ella

Umi xibbi diri Kiristaani heeꞌrino gari soorramirono iillinonsa qarra baala dandee saino daafira Yihowa maassiꞌrinonsa. Insa duucha woyite daramanno gede assinoonninsa; mito woyite togoo qarri iillinonsahu heddinokki yannaraati. Hanni Barnabaasinna soqqamaasinchu Phaawuloosi Lisxiru qooxeessira sabbakkanni heedheenna mayi iillinonsaro laꞌno. Umi qara mannu insa anga fane haaꞌrinonsa hattono sabbakkanna macciishshino. Kayinni gedensoonni gibbannonsari ‘dagge manna kakkayissino’; hattono hakko manni giddonni mitu Phaawuloosi kinnatenni awwaale reyinoha laweennansa agure haꞌrino. (Soq. 14:19) Ikkirono Barnabaasinna Phaawuloosi wolewa sabbaka diagurtino. Mayi guma afidhuyya? Insa “lowo manni” ammananno gede kaaꞌlitino; hattono coyidhinorinna lawishshinsa ammanate roduuwansa jawaachishino. (Soq. 14:21, 22) Barnabaasinna Phaawuloosi hedeweelcho qarru iillinsa yannara hexxo mudha hoogansa lowo manna kaaꞌlitino. Ninkeno Yihowa uyinonke looso loonseemmo woyite hexxo mudhineemmokkiha ikkiro atoote afiꞌneemmo. w23.04 16-17 guf. 13-14

Moote Daawitira batinye waajjishshanno baarigaarra noosi; konnira isi duucha woyite kaaꞌlannosi gede Yihowa huucciꞌranno. Daawiti Yihowa huuccattosi macciishshinotanna dawaro qolinosita dihuluullamino. Atino Yihowa huuccattokkira dawaro qolannota addaxxa dandaatto. Qullaawu Maxaafi Yihowa qarru amadannonke woyite dandiine saꞌneemmo gede hayyonna wolqa aannonketa buuxisannonke. Isi ninke kaaꞌlate ayyaanaamittete maatenke wole agurina iso magansiꞌrannokki manna nafa horoonsiꞌrara dandaanno. Yihowa huuccattonkera dawaro woꞌmanka woyite ninke hendoommo garinni qolannonkekkiha ikkirono, huuccattonkera dawaro qolannota kayinni anfoommo. Isi hasiisannonke coye hasiisse noo yannara aannonke. Hakko daafira Yihowa xaa yannara towaatannohetanna daggannote haaro alamera “woꞌmunku halcho wonshannota” addaxxite ammanatenni iso huucciꞌra agurtooti.—Far. 145:16. w23.05 8 guf. 4; 13 guf. 17-18

Mixokki wonshiꞌrittoro afiꞌratto atoote illachishi. Hiikkonne atoote illachisha dandaatto? Mixo fushshiꞌroottohu Qullaawa Maxaafa nabbawate woy huuccatto assiꞌrate ikkiro, hatto assakki Yihowa ledo noohe jaalooma kaajjishshanno gara hedi. (Far. 145:18, 19) Woy mixo fushshiꞌroottohu mitto Maganu baxanno akata woyyeessiꞌrate ikkiro, kuni akati wolootu ledo noohe aante seekkanno gara hedi. (Qol. 3:14) Mixokki wonshiꞌra hasiꞌrattohu mayiraatiro borreessite amaxxi; borreessiꞌrootto coye ganyite lai. Mixokki wonshiꞌratto gede kaaꞌlitannohe jaallawa aani. (Law. 13:20) Noore coyiꞌniro ninke baalunkura mixonke wonshiꞌrate hasatto heedhannonkekki woyiti no. Hatto yaa kayinni mixonke wonshiꞌrate sharrama didandiineemmo yaateni? Deeꞌni. ninkeno hasatto hooggunkero nafa mixonke wonshiꞌrate sharrama dandiineemmo. Hige tenne assa shota diꞌꞌikkitino; kayinni mixokki wonshiꞌratto woyite hagiidhatto. w23.05 27-28 guf. 5-8

Assinoommohu gara ikkinokki coyira xaꞌmammeemmota afanke cubbonke kulle maaro eꞌneemmo gede, soꞌronke biddi assiꞌneemmo gedenna tenne soꞌro wirro loonseemmokki gede kakkayissannonke. Tenne assanke heeshsho afiꞌrate qolchammeemmo qolchansho agurre fulleemmokki gede kaaꞌlitannonke. Doodhoottoha gara ikkinokki doorsha biddi assa dandaattokkiha ikkiro, iillinohe coye ammante adhi. Ateneeto woy woloota bushiishate woꞌnaaltanni yannakkinna wolqakki beebba guxxitooti. Hatteentenni soꞌrokki ammante adhi; hattono danchare assate dandiittore baala assi. Loosootto soꞌrora ateneeto busha assitanni noottoha ikkiro, umokki heeshshi assite huuccattotenni Yihowawa shiqi, soꞌrokki xawisse kuli hattono gatona yaannohe gede iso huucciꞌri. (Far. 25:11; 51:3, 4) Koffi assootto manni heeꞌriro maaro xaꞌmiꞌri; hattono hasiisannoha ikkiro, kaaꞌlitannohe gede songote cimeeyye amaaꞌli. (Yai. 5:14, 15) Loosootto soꞌronni rosi; hattono tenne soꞌro wirro loosattokki gede sharrami. Hatto assittoro Yihowa gatona yaannohetanna hasiisannohere asse kaaꞌlannoheta addaxxa dandaatto.—Far. 103:8-13. w23.08 28-29 guf. 8-9

Yoodahe, Moote Iyoaasi lowo geeshsha kaaꞌlinosi. Hakko daafira kuni wedellichu moote Yihowa hagiirsiisa hasiꞌrino. Yoodahe reyihu gedensaanni kayinni Iyoaasi kaadaasine roorrooti yitannore macciishshino. (2 Dud. 24:4, 17, 18) Yihowa lowo geeshsha hanqino daafira, ‘manna isiwa higanno gede qaagiissitannota himanaano soyino; mannu kayinni dimacciishshino.’ Insa Yoodahe beetti Zakkaariyaasi yaannore nafa dimacciishshitino; Zakkaariyaasi Yihowa masaalaanchonna kakkalaancho calla ikkikkinni Iyoaasira wosiilisi beettooti. Isinni Iyoaasi Zakkaariyaasi nafa shiishiishino. (2 Dud. 22:11; 24:19-22) Iyoaasi Yihowa waajjannoha ikkinota dileellishino. Yihowa “Mishshannoerino mishantanno” yiino. (1 Sam. 2:30) Gedensoonni shiima Sooriyu olanto “lowota” Iyoaasi olanto qeeltino; hattono iso ‘jaddote mada madiissitino.’ (2 Dud. 24:24, 25) Zakkaariyaasi shiino daafira ledosi gashshaano Iyoaasi shitino. w23.06 18-19 guf. 16-17

Soqqamaasinchu Phaawuloosi Efesooni dancha duduwo sabbakanninna rosiisanni mite yanna keeshshino. (Soq. 19:1, 8-10; 20:20, 21) Isi ammanate roduuwasi lowo geeshsha baxanno; hattono Yihowara ammanante heedhanno gede kaaꞌla hasiꞌrino. Phaawuloosi sokka borreessinohu Efesooni heeꞌranno Kiristaani, alba kaphu ammaꞌno rosiranna haafa ammanara borojje ikke heeꞌrinoho. Efesooni heeꞌranno manni amanyootunni maaeelinohonna mancaꞌꞌare assannoho. Filmuwa leellinshanniwa wole agurina ammaꞌnote ayyaanna ayirrinsanniwa maaeela coye coyiꞌra rosantinote. (Efe. 5:3) Hakko heeꞌrannohu batinyu manni, ‘addi addi batte assanno’; togo yaa noo gedeenni tirriro ‘wodaninsa dillaawino’ yaate. (Efe. 4:17-19) Efesooni heeꞌranno manni garanna gara ikkinokkiri daafira rosara albaanni, tiiꞌꞌinsa dibushiishannonsa. Hakko daafira Phaawuloosi insa, “wodaninsa tunsino; Maganuwiinnino baxxitino” yiino. Efesooni heeꞌranno manni giddo mitu kayinni tunsichu giddo dikeeshshino. w24.03 20 guf. 2, 4; 21 guf. 5-6

Gedewooni daanya ikkino daafira diinaggaawe loosa hasiissinosi. Hashsha olu yannara Midiyaami manni xooqita Gedewooni insa Iyiziraeeli xeichinni kayise Yordaanoosi Lagi geeshsha shorrino. (Eje. 7:22) Gedewooni Yordaanoosi iilliti agure higinoni? Dihigino! Isinna ledosi noohu 300 manni daafurinoha ikkirono, laga tayise sae shorra diagurino. Jeefote insa Midiyaami manna shorrite amaddino; hattono qeeltino. (Eje. 8:4-12) Gedewooni Yihowa jawaachishannosita addaxxino; Yihowano diꞌꞌirraawisinosi. (Eje. 6:14, 34) Mitte yannara Gedewooninna mannisi lame Midiyaami mootoolla lekkatenni shorritu yannara, tini mootoolla gaalla guluffe xooqqanni nooha ikkara dandaanno. (Eje. 8:12, 21) Ikkirono Maganu kaaꞌleennansa Israeele insa shorrite amaddino; hattono qeeltino. Hatteente gede songote cimeeyyeno ‘daafurannokkihanna wolqa hoogannokkiha’ Yihowa addaxxa dandiitanno. Isi hasiissannonsa yannara jawaante aannonsa.—Isa. 40:28, 29. w23.06 6 guf. 14, 16

Iillannonke fonqoli ikkihano ikkiro shafamannokki wodani heeꞌrannonke gede assiꞌra dandiineemmo. Konnira Yihowa addaxxi. Hanni Baaraaqi Yihowa biddishsha addaxxino daafira coyi qiniinosi gara laꞌno. Israeelete mannira wonqonna amaxxo nafa noonsakkiha ikkirono, Yihowa Baaraaqi Kanaꞌꞌaani olanto roorricha Sisaaranna lowoha olu uduunne afidhino olantosi ledo olamanno gede hajajinosi. (Eje. 5:8) Masaalaancho Diboora Baaraaqi ilaalunni xawo dirre Sisaaranna 900 faradi gaare afidhino olantosi ledo olamanno gede kultinosi. Xawoho lowo geeshsha doddanno faradi gaarera noo olanto ledo olama lowo geeshsha qarrissannota ikkiturono Baaraaqi kayinni hajajamino. Olanto Taaboori ilaalinni dirrituta Yihowa iiminni biite xeena dirrisino. Sisaarata olu faradi gaare lixu amadino; hattono Yihowa Baaraaqira qeelle uyinosi. (Eje. 4:1-7, 10, 13-16) Hatteente gede, Yihowa isonna dirijjitesi uyitannonke biddishsha addaxxineemmoha ikkiro ninkerano qeelle aannonke. w23.07 19 guf. 17-18

Hegere heeshsho afiꞌrate cincineemmore ikka hasiissannonke. Hunda heedhinori ammanantino soqqamaano gede Maganu uyino hexxo wonsha geeshsha cincine agadha hasiissannonke. (Ibi. 6:11, 12) Qullaawu Maxaafi ninke baatto loosiꞌre galino manchi ledo heewisiisanno. (Yai. 5:7, 8) Baatto loosiꞌre galino manchi wixa wixatenna waa hayikkisate diinaggaawe loosannoha ikkirono wixino gidi lophannohu mamooteetiro kayinni diafanno. Ikkirono isi wixiꞌrino wixa mixxannota hexxe cince agadhanno. Hatteente gede ninkeno ‘Mootichu ma barra daannoro anfoommokkiha’ ikkirono ayyaanaamittete looso woꞌmanka woyite diinaggaambe loonseemmo. (Mat. 24:42) Yihowa uyino hexxo baala isi hedino yannara wonshannota addaxxine cincine agadhineemmo. Cincineemmokkire ikkinummoro, Yihowa barra agadha agurrammora hattono sunu sununni halaalu mininni fullammora dandiineemmo. Qoleno yannate geeshshi hagiirre shorra hananfammora dandiineemmo. Cincineemmore ikkinummoro kayinni goofimarchu geeshsha kaajjine uurranna hegere heeshsho afiꞌra dandiineemmo.—Mik. 7:7. w23.08 22 guf. 7

Daanieeli 2:41-43 noo masaalo wole masaalo ledo heewisiinse, lekka xaa yannara alamenniha wolqaataamo gashshoote ikkinohu Angilo Ameerikunniha buusamino gashshoote riqibbannota buuxa dandiineemmo. Daanieeli konni alamennihu wolqaataamu gashshooti daafira kulanni ‘gama darate jawaata gama darate wolqiweelo ikkanno’ yiino. Gama darate wolqiweelo ikkannohu mayiraati? Konni gashshooti giddo heeꞌrannohu dorunni lawinsoonni manni, kuni gashshooti siwiilu gede kaajjado ikke dandoosi horoonsiꞌrannokki gede assanno daafiraati. Daanieeli misilete daafira kulino xawishshinni batinye hasiisanno halaale ronseemmo. Umihunni, Alamennihu Wolqaataamu Gashshooti Angilo Ameeriku jawaata ikkinota leellishinota mite doogga laꞌneemmo. Lawishshaho Umihanna Layinkiha Alamete Ola qeele wolqaataamo ikkinota leellishino. Ikkirono konni gashshooti giddo heeꞌranno manni mimmitu ledo sumuu yaannokki daafira kuni gashshooti wolqiweelo ikke heeꞌranno. Layinkihunni, Maganu Gashshooti mannu gashshoote baala huna geeshsha heeꞌrannohu jeefote gashshooti konneeti. w23.08 10-11 guf. 12-13

Iillinosi fonqolinna qarri baalu Daawiti lowo geeshsha yaadanno gede assinosi woyiti no. (Far. 18:4, 5) Ikkirono Yihowa baxillenna towaanyo afiꞌrino daafira haarooꞌmino. Yihowa konne lowo geeshsha dadillino jaalasi ‘daffino qanchonna xalalu wayiwa haaꞌre massinosi.’ Hakko daafira Daawiti jawaatino; hattono Yihowara hagiirrunni soqqama diagurino. (Far. 18:28-32; 23:2) Xaa yannarano fonqolunna qarru iillinkerono, “Baꞌnummokkinni gantoommohu, bagamannokkihu Kaaliiqi [baxillinniiti].” (Erq. 3:22; Qol. 1:11) Daawitira duucha woyite buutote qarri iillinosi; hattono isira batinye wolqaataame diinna noosi. Ikkirono Yihowa baxilli beꞌe yaannokki gede assinosi; hattono agarinosi. Daawiti Yihowa woꞌmanka woyite ledosi noota addaxxino; tini qolte sheshifachishshinosi. Hakko daafira isi, “[Yihowa] waajjishannori baalunkunnino gatisie” yee faarsino. (Far. 34:4) Daawiti waajjasi garankolla; kayinni Yihowa baxilli waajjanno gede assannosi coye rooranno. w24.01 30 guf. 15-17

Iyoaasi doodhinohu bushu doorshinni rosse. Kakkalaanote Biili Yoodahe reyihu gedensaanni Iyoaasi busha jaalla doodhino. (2 Dud. 24:17, 18) Isi Yihowa baxxannokkiri Yihudu roorrooti yitannore macciishshino. Iyoaasi kuri busha jaallawiinni xeertiꞌra hasiissannosi yiniro sumuu yaattoti dihuluullissannote. Isi kayinni suꞌmi jaalla yitannore macciishshino. Isinni wosiilisi beetti Zakkaariyaasi seejjasira woꞌnaalita Iyoaasi iso shiishiishino. (2 Dud. 24:20, 21; Mat. 23:35) Tini lowo bunsheetinna gowwimmate! Iyoaasi umi qara dancha mooteeti; gedensoonni kayinni kaadaasinchonna lubbo shaannoha ikkino. Jeefote iso soqqamaanosi shitino. (2 Dud. 24:22-25) Isi Yihowanna iso baxxannori yitannore macciishshoommero heeshshosi togoota diꞌꞌikkitanno! w23.09 9 guf. 6

Yesuusi soqqamaasinchu Pheexiroosi ammaname heeꞌra dandaannota afino. Hakko daafira Yesuusi Pheexiroosi shaqqillunni “waajjitooti” yiinosi. Yesuusi Pheexiroosi ammaninosi daafira, Pheexiroosi heeshsho roore woyyaabbino. Gedensoonni Pheexiroosinna rodiisi Indiriyaasi qulxuꞌme woshshaadate loosonsa agurte Buuraminoha harusitannore ikkitino; hatto assansa dhagge ikkanno atoote afidhanno gede assitinonsa. (Maq. 1:16-18) Pheexiroosi Kiristoosi harunsaancho ikkino daafira batinye dhagge ikkanno atoote afiꞌrino. Isi Yesuusi dhiwantinore hursanna, busha ayyaana fushshanna wole agurina reyitinore kayisanna laino. (Mat. 8:14-17; Maq. 5:37, 41, 42) Qoleno Pheexiroosi, Yesuusi albillitte Maganu Gashshooti Moote ikkanno woyite afiꞌranno ayirrinye ajuujatenni laino; Pheexiroosi lainoha konne coye horo dihawanno. (Maq. 9:1-8; 2 Phe. 1:16-18) Addanko isi Yesuusi rosaancho ikka hoogoommero tenne dilaꞌꞌanno. Pheexiroosi umisi daafira gara ikkinokki coye hedasi konne atoote afiꞌrannokki gede assitasira wodhinokki daafira, lowo geeshsha hagiidhinoti dihuluullissannote! w23.09 21 guf. 4-5

Soqqamaasinchu Pheexiroosi umo borreessino sokkara “seekke baxa” yitanno yaatto horoonsiꞌrino. Togoo baxilli shiima cubbo ikkikkinni “batinye cubbo diwanno.” (1 Phe. 4:8) Pheexiroosi gatona yaate daafira Yesuusi lowo diri albaanni rosiisinosi roso qaaginoha ikkara dandaanno. Hatte yannara Pheexiroosi rodoosi “lamala hige” gatona yaate xaꞌminohu isi lowo geeshsha shaqqado ikkinohu gede asse hede ikkara dandaanno. Kayinni Yesuusi isono ninkeno 77 hinge yaano gawalo nookkiha gatona yineemmo gede rosiisinonke. (Mat. 18:21) Tenne amaale loosu aana hosiisa qarra ikkitinoheha ikkiro hexxo mudhitooti! Guuntete xeꞌne noonsari baalante Yihowa soqqamaanora gatona yaa qara ikkitannonsa woyiti no. Ninke assa hasiissannonkehu qaru coyi, roduuwanke gatona yaatenna insa ledo keere kalaqate dandiinummore baala assate. w23.09 29 guf. 12

Yoonaasi qulxuꞌmichu godowi giddo heeꞌre umosi heeshshi asse maaro eꞌꞌe huucciꞌrino huuccatto, Yihowa macciishshannositanna kaaꞌlannosita addaxxino. Yoonaasi gedensoonni Yihowa aannosi looso loosate qixxaawino. (Yon. 2:10–3:4) Qarru amadeennahe lowo geeshsha yaadootto daafira giddokkita Yihowara hasaapha qarra ikkite egentinohe? Woy xiinxallate horo wolqa hoogge egennootto? Yihowa nootto gara seekke afannota deꞌooti. Hakko daafira harancho huuccatto huucciꞌrittoro nafa Yihowa hasiise noohere aannoheta addaxxa dandaatto. (Efe. 3:20) Daafurootto woy xissiisiꞌrootto daafira nabbawa woy xiinxalla qarra ikkituhero, qoonqotenni qaddaꞌnoonniha Qullaawa Maxaafa woy Qullaawu Maxaafi aana xintantino borruwanke macciishshate woꞌnaali. Qoleno faarsuwanke giddonni mitte macciishsha woy jw.org aana noo viidiyubba giddonni mitte laꞌꞌa kaaꞌlitahera dandiitanno. Yihowa huuccidhe hattono isi qixxeessinote ayyaanaamittete qixxaawo widoonni huuccattokkira dawaro qolanno gara wodanchite, isi jawaachishannohe gede assiꞌra dandaatto. w23.10 13 guf. 6; 14 guf. 9

Xaadooshshu dukkaninna gedensoonni Yerusaalamete minnoonnihu qullaawu mini mittu gariho. Lamunku mini giddo dukkanu hoccinni bandoonnihu ‘Qullaawu Darginna Qullaawu Holgi’ no. (Ibi. 9:2-5; Ful. 26:31-33) Qullaawa Bayicho caabbicho worrannihu culkunni seekkinoonni uduunnichi, hixaana wiliishshinannihu kakkalote bayichinna tima worranni xarapheessi no. Konne darga eꞌe qullaawa loosonsa loossanno gede fajjinoonniri ‘qeesimmate [kakkalote] soqqanshora bande buurroonnire’ callaati. (Kir. 3:3, 7, 10) Qullaawa Holge Yihowa hakko noota leellishannohu culkunni seekkinoonnihu gondooru taawooti no. (Ful. 25:21, 22) Hakkira Cubbo Agursiisate Barra dirunni mitte hige kakkalaanote biili calla eanno gede fajjinanni. (Lew. 16:2, 17) Isi, umisi cubbonna Israeelete cubbo agursiisate saadate mundee haaꞌre hakkiira eanno. Yihowa gedensoonni kuni xaadooshshu dukkani maa leellishannoro bande anfanni gede assino.—Ibi. 9:6, 7. w23.10 27 guf. 12

Maganu Qaali giddo duucha bayicho ‘Kiꞌne kiꞌneneewa baxamme’ yine hajanjoonninke. (Yoh. 15:12; Rom. 13:8; 1 Tes. 4:9; 1 Phe. 1:22; 1 Yoh. 4:11) Ikkirono baxillu wodaninke giddo noo akataati; wolu manni qole giddonketa afa didandaanno. Ikkina mimmitoho noonke baxilli leellanno gede assa dandiineemmohu hiittoonniiti? Coyiꞌneemmorinninna assineemmorinni tenne leellisha dandiineemmo. Ammanate roduuwanke banxeemmota leellinsheemmoti batinye doogga no. Hanni mite doogga laꞌno: “Mimmitiꞌnera halaale coyidhe.” (Zak. 8:16) “Kiꞌne kiꞌneneewa suumuu yitine keere heedhe!” (Maq. 9:50) “Mimmitoꞌne ayirrisate qolchamme.” (Rom. 12:10) “Mimmitoꞌne haadhe.” (Rom. 15:7) “Kiꞌne kiꞌneneewa koffi yitinoonni coye . . . agurre.” (Qol. 3:13) “Kiꞌne kiꞌneneewa kaaꞌlantine, mimmitiꞌne qarra beeqqe!” (Gal. 6:2) “Mimmito sheshifachisha agurtinoonte.” (1 Tes. 4:18, NW) “Mimmitoꞌne . . . dhaabbe.” (1 Tes. 5:11) “Kuꞌu kuꞌunnira huucco.”—Yai. 5:16. w23.11 9 guf. 7-8

Barru baala doodhineemmo doorshira kaajjado ammana hasiissannonke. Lawishshaho jaalla, boohaarsha, roso, galte, ooso ilate woy ila hoogate daafiranna loonseemmo loosi daafira doodha hasiissannonke. Ninkeneeto togo yine xaꞌma hasiissannonke: ‘Doodheemmo doorshi muli yannara tini alame baꞌeenna Maganu abbannoti haaro alame daggannota ammaneemmota leellishannohonso hegerera heeꞌra didandiinanni yee hedanno manni doodhannohu gedeeho?’ (Mat. 6:19, 20; Luq. 12:16-21) Haaro alame gambissinota albinni roore ammannummoro kaajja doorsha doodhineemmo. Qoleno kaajjado ammana hasiissannonke gede assanno fonqoli tuncu yaannonke. Lawishshaho dartu iillankera, buuto dhiwankera, woy hexxo mudhineemmo gede assannohu wolu qarri iillankera dandaanno. Umi qara, iillinonke qarra dandiine saꞌneemmo yine hendeemmoha ikkara dandaanno. Ikkollana kuni qarri hendoommo yannanni roore keeshshanno woyite, cincine heeꞌratenna Yihowara hagiirrunni soqqammanni heeꞌrate kaajjado ammana hasiissannonke.—1 Phe. 1:6, 7. w23.04 27 guf. 4-5

Yihowa huuccattonke ledo sumuu yaannore assinammora hasiꞌranno. Lawishshaho mittu rodii qoqqowu gambooshshe haꞌrate loosiisaanchisi fajjannosi gede kaaꞌlasira Yihowa huucciꞌrara dandaanno. Yihowa tenne huuccattora dawaro qolannohu hiittoonniiti? Kuni rodii mare loosiisaanchosi fajjo xaꞌmiꞌrate worba ikkanno gede kaaꞌlasira dandaanno. Ikkirono kuni rodii mare loosiisaanchosi fajjo xaꞌmiꞌre huuccattosi ledo sumuu yaannore assa hasiissannosi. Isi fajjannosi gede duucha hige xaꞌmiꞌra hasiissannosiha ikkara dandaanno. Isi loosanno barra wolu ledosi loosannohu ledo soorriꞌrara woy baantannisi damoozi gateenna fooliishsho fulanno gede fajjasira xaꞌmiꞌrara dandaanno. Yihowa yaachishinonke coyi daafira agurrummokki huucciꞌnammora hasiꞌranno. Yesuusi coyiꞌrinori mite huuccattonkera dawaro bayichonkonni afiꞌra hoongammora dandiineemmota leellishanno. (Luq. 11:9) Hakko daafira hexxo mudhitooti! Agurittokkinni higge higge huucciꞌri. (Luq. 18:1-7) Hatto assineemmoha ikkiro, hakkonne coye lowo geeshsha hasiꞌnoommota leellinshanni heeꞌnoommo. Qoleno Yihowa ninke kaaꞌla dandaannota ammanneemmota leellinshanni heeꞌnoommo. w23.11 22 guf. 10-11

Yihowa jaalisi Abirihaamira baattote aana noo manni baalunku sirchisi widoonni maassamannota kule qaale einosi. (Kal. 15:5; 22:18) Abirihaamira kaajjado ammana noosi daafira Maganu eino qaale wonshannota ammanino. Isira 100 diro minaamasira kayinni 90 diro ikkinoseha ikkirono, kuri ammanamino minaanninna minaama ooso diꞌꞌilino. (Kal. 21:1-7) Ikkirono Qullaawu Maxaafi, Abirihaami “‘Sirchikki . . . batiꞌranno’ yinoonninte gede lowo gosa anna” ikkannota ammaninota kulanno. (Rom. 4:18) Abirihaami hexxo woꞌmitinota anfoommo. Isi lowo diro agadhe keeshshino beetti Yisihaaqira anna ikkino. Abirihaami Yihowa eino qaale wonshannota addaxxanno gede assinosiri maati? Abirihaamira Yihowa ledo muli jaaloomi noosi daafira, “Maganu uyino hexxo wonshannoha ikkinota seekke buuxino.” (Rom. 4:21) Abirihaami Yihowa hagiirsiisino; hattono ammana noosi daafira Yihowa iso keeraanchoho yiinosi.—Yai. 2:23. w23.12 8 guf. 1-2

Addaxxinanni wedellichi uyinoonnisi looso baala diinaggaawe loosanno. Hanni Yesuusi guuta lawishsha ikkinonke gara laꞌno. Isi uyinoonnisi looso horo lashshi asse diegennino. Hatteentenni isi Yihowa uyinosi looso loosa qarra ikkitusi woyite nafa uyinoonnisi looso umo fushshino. Qoleno manna roorenkanni rosaanosi baxanno; hattono heeshshosi insara sayise aate maahoyye yiino. (Yoh. 13:1) Yesuusi lawishsha harunsite uyinoonnihe looso baala umo fushshate sharrami. Konne looso loonsanni gara afa hoogittoro umokki heeshshi assite kaaꞌlitannohe gede ayyaanaamittetenni gikki yitino roduuwa amaaꞌli. Uyinoonnihe looso gama calla loosse agurtooti. (Rom. 12:11) Hatteentenni loossanni noottohu ‘mannaho ikkikkinni Yihowara’ ikkino daafira uyinoonnihe looso umo fushshi. (Qol. 3:23) Guuta ikkoottokkiti egennantinote; hakko daafira dhukakki afoottoha ikki hattono soꞌrokki baala ammante adhi.—Law. 11:2. w23.12 26 guf. 8

Cuuamme Yihowa maate wido ikka lowo geeshsha hagiirsiissanno. Tenne qoosso afidhinori faarsaanchu Daawiti coyiꞌrino hedora sumuu yitanno; isi togo yiino: “Ati dooroottohura, Qullaawa Darga heeꞌrara woshshoottosihura tashshi yoosi.” (Far. 65:4) Yihowa minisira woshshannohu baalanka manna diꞌꞌikkino. Yihowa isi ledo jaalooma kalaqiꞌra hasidhannoriwa shiqqi yaanno. (Yai. 4:8) Heeshshokki Yihowara sayisse uyite cuuamatto woyite, hakkunni gedensaanni isi ‘dancha atootesi batise aannoheta’ addaxxa dandaatto. (Mil. 3:10; Erm. 17:8) Cuuama Yihowara soqqamate hanafotella. Guficho ikkannori woy ammanakki fonqolannori iillihero nafa cuuamitto woyite eootto qaale agadhite heeꞌrate dandiittore baala assa hasiissannohe. (Ros. 5:4, 5) Yesuusi rosaancho ikkootto daafira, dandiitto deerrinni isi lawishsha harunsanna hajajosi seekkite agadha hasiissannohe.—Mat. 28:19, 20; 1 Phe. 2:21. w24.03 8 guf. 1-3

Galteꞌne ledo mitteenni sayissinanni yanna hagiirsiisalla hoogguꞌne? Hatto ikkiro maa assa dandiitinanni? Hanni giirate daafira laꞌno. Giira bayichonkonni bukki yite dibubbanno. Xigiro worranni hakkiinni sunu sununni jajjabba haqqe wora hasiissanno. Hatteente gede barru baala mitteenni shiima shiima yanna sayissine hanafa dandiitinanni. Lamenka hagiirsiisannoꞌne coye assa deꞌinoonte. (Yai. 3:18) Shiimare assitine hanaffine baxilliꞌne lexxanno gede assiꞌra dandiitinanni. Minaanninna minaama mimmito ayirrisa lowo geeshsha hasiissannote. Mimmito ayirrisa giira wala yite bubbanno gede assitanno oksijiine gedeeti. Oksijiine hoogguro giira bayichonkonni xoꞌara dandiitanno. Hatteente gede minaanninna minaama mimmito ayirrisannokkiha ikkiro baxillinsa bayichonko qiidara dandaanno. Mimmito ayirrisate sharramanno minaanninna minaama kayinni baxillinsa kaajje heeꞌranno gede assiꞌranno. Ikkirono qaru coyi kiꞌne galteꞌne ayirrissinannihu gede assitine heda ikkikkinni galteꞌne ayirrinsannie yite hedaseeti. w23.05 22 guf. 9; 24 guf. 14-15

Qullaawu Maxaafi giddo kulloonniri ammanantinori Maganu soqqamaano diinnansa waaddinonsahura woy wolu qarri amadinonsa daafira yaaddinonna lowo geeshsha waajjitino woyiti no. (Far. 18:4; 55:1, 5) Ninkeno ledonke rossannori, ledonke loossannori, mininke manni woy gashshaano gibbankera dandiitanno. Baasa dhiwammoommo daafira reyineemmo yine waajjineemmoha ikkara dandiineemmo. Togoo yannara qaaqquullu gede ikkine waajjinammora dandiineemmo. Togoo woyite Yihowa kaaꞌlannonkehu ma garinniiti? Isi jawaachishannonke hattono sheshifachishannonke. Hakko daafira, huuccatto assidhine hattono Qaalesi nabbabbine ganyitine Yihowa ledo yanna sayisse. (Far. 77:1, 12-14) Hatto assitinanniha ikkiro, yaaddo amaddannoꞌne woyite balaxxine alba iimi Anniꞌnewa higginanni. Waajjishinoꞌnerenna yaaddoꞌne Yihowara hasaaphe. Isi Qullaawa Borro widoonni hasaawisannoꞌnenna sheshifachishannoꞌne gede assidhe.—Far. 119:28. w24.01 24-25 guf. 14-16

Ayyaanaamittete mixo wonshiꞌrate qaru coyi hasatto heedhannonke gede assiꞌrate. Hasatto noosi manchi mixosi wonshiꞌrate diinaggaawe loosanno. Isinni lowo hasatto heedhunkero, mixonke mulenni wonshiꞌnammora dandiineemmo. Ikkina hasattonke lexxitanno gede maa assa dandiineemmo? Hasattokki lexxitanno gede kaaꞌlahera Yihowa huucciꞌri. Yihowa ayyaanisi widoonni mixokki wonshiꞌrate hasatto heedhannohe gede assannohe. Mito woyite mixo fushshiꞌneemmohu fushshiꞌra hasiissannonketa anfoommo daafiraati; tini qolte danchate. Ikkirono mixonke wonshiꞌrate hasatto hooggankera dandiitanno. Yihowa assinohere hiinci. (Far. 143:5) Soqqamaasinchu Phaawuloosi Yihowa uyinosi elto hiincino; tini qolte isi Yihowara diinaggaawe soqqamanno gede assitinosi. (1 Qor. 15:9, 10; 1 Xim. 1:12-14) Hatteente gede atino Yihowa assinohere hiincitto kiiro mixokki wonshiꞌrate noohe hasatto lexxitanno.—Far. 116:12. w23.05 27 guf. 3-5

Suꞌmasi guwinseemmo woyite iimi Anninke hagiidhanno. (Far. 119:108) Hatto yaa kayinni woꞌmanka dandaanno Maganira guuntete xeꞌne noonsari mannu ooso gede jawaante afiꞌrate guweenyu hasiisannosi yaateni? Deeꞌni. Iimi Annanke guwinseemmo woyite, Sheexaanu ninke mittu mittunku daafira coyiꞌrino kaphi xawo fulanno gede kaaꞌlineemmo. Sheexaanu Maganu suꞌmira ammaname halamanno manchi nookkihu gede asse coyiꞌrino. Qoleno fonqolu iillannosi woyite Maganoho ammanamannohu diheeꞌranno yiino. Sheexaanu, ninke baalunku uminke qiniitira yine Maganoho ammanama agurreemmohu gede asse coyiꞌrino. (Iyo. 1:9-11; 2:4) Kayinni ammanamino manchi Iyyoobi Sheexaanu kapho xawo fushshino. Atina Maganoho ammanante heeꞌratto? Ninke mittu mittunkura, Maganoho ammanamme soqqamme suꞌmisira halamatenna iso hagiirsiisate qoosso noonke. (Law. 27:11) Tenne assa ninkera lowo ayirrinyeeti. w24.02 8-9 guf. 3-5

Musenna Iyyaasu diri gedensaanni, Yihowa mannasi massagganno gede daanyoota doorino. Hakkiinni, mootoollate yannara Yihowa mannasi massagate masaalaano shoomino. Ammanantino mootoolla masaalaano kultannonsa amaale macciishshitino. Lawishshaho Moote Daawiti Masaalaanchu Naataani seejjinosi seejjo umosi heeshshi asse macciishshe adhino. (2 Sam. 12:7, 13; 1 Dud. 17:3, 4) Moote Iyosaafiixi masaalaanchu Yahazieeli uyinosi biddishsha harunsino; hattono Yihudu manni ‘Maganu himanaano ammananno’ gede jawaachishino. (2 Dud. 20:14, 15) Moote Hiziqiyaasi qarru amadisi yannara masaalaancho Isayaasi amaaꞌlino. (Isa. 37:1-6) Mootoolla biddishshasi harunsitino yanna baalantera Yihowa maassiꞌrinonsa; hattono mannasi agarino. (2 Dud. 20:29, 30; 32:22) Yihowa mannasi massagate masaalaano horoonsiꞌrinoti xabbe leeltino. w24.02 21 guf. 8

Sheexaanu Yihowa biddishsha harunsa qarra ikkitannonke gede assanno manniwa aannammora hasiꞌranno. Xaa yannara mannu ledo xaande calla ikkikkinni dagoomittete webisayite widoonnino yanna sayinseemmotano qaaga hasiissannonke. Amanyoote bainore assa qarra diafidhino yine hendanni gede assitannota alamete hedo hooꞌlate sharrama hasiissannonke. Tini gara ikkitinokkita seekkine anfoommo. (Efe. 4:19, 20) Ninkeneeto togo yine xaꞌma hasiissannonke: ‘Yihowaha keeraancho biddishsha ayirrissannokkiri ledoꞌya loossannori, ledoꞌya rossannori woy wolootu ledo jaalooma kalaqiꞌra qoropheemmo? Mitu manni wolu yaannore macciishsheemmokkihu gede asse coyiꞌriro nafa, worbimmatenni Yihowa biddishsha harunseemmo?’ Layinki Ximootewoosi 2:20-22 kultannonte gede, Kiristaanu songo giddonni muli jaalla doodhineemmo woyiteno qoropha hasiissannonke. Mitootu Yihowara ammanamme soqqammanni heeꞌneemmo gede kaaꞌla hooggankera dandiitannota qaaga hasiissannonke. w24.03 22-23 guf. 11-12

Yihowa hiittoohoro hedate woꞌnaalte egennootto? Yihowa illete leellannokkiha ikkirono, Qullaawu Maxaafi iso duuchu garinni xawisanno. Yihowa, arrishshote, ‘wonqotenna ittanno giira’ gede assine xawinsoonni. (Far. 84:11; Ibi. 12:29) Hiziqeeli Yihowa heeꞌrannowi bulu dilqi gedeeha, giirate giddo noo camo gedeehanna xeenu gedensaanni fultanno magani-seemo gedeeha ikkinota xawisino. (Hiz. 1:26-28) Yihowa laꞌꞌa dandiineemmokki daafira isi baxannonketa ammana qarra ikkitankera dandiitanno. Mitu manni konni albaanni lowo qarri iillinonsa daafira Yihowa horo baxannonsakkihu gede asse hedanno. Yihowa macciishshamannonkerenna tini isiwa shiqa qarra ikkitannonke gede assitanno gara afino. Isi ninke kaaꞌlate baxissanno akattasi Qaalisi giddo borreessinanni gede assino. Yihowa daafira dancha gede xawise kulannohu mittu qaali baxilleho. (1 Yoh. 4:8) Yihowa baalankare assannohu baxillunniiti. Maganu baxilli taalle nookkiha ikkino daafira isi iso baxxannokkire nafa baxanno.—Mat. 5:44, 45. w24.01 26 guf. 1-3

Yihowa, Israeele Gibitsetenni fushshanno gede Muse doorino. Qoleno barra gomichu heelliicho hashsha qole giirate heelliicho horoonsiꞌrino; tini illete leeltanno tajeeti. (Ful. 13:21) Muse tenne heelliicho harunse Israeelete ledo Duumu Baariwa iillino. Israeelete manni albansaanni baaru noota badhensaanni kayinni Gibitsete olanto hordoffanni noonsata afiti lowo geeshsha masino. Kayinni isi disoꞌrino. Muse horoonsiꞌre mannasi hakkira massinohu Yihowaati. (Ful. 14:2) Hakkiinni Maganu insa lowo geeshsha maalale ikkanno garinni gatisinonsa. (Ful. 14:26-28) Hakkunni gedensaanni Muse 40 diro woꞌma halalla Maganu manna massagate gomichu heelliicho harunsino. (Ful. 33:7, 9, 10) Yihowa gomichu giddo heeꞌre Muse hasaawisinosi; Museno Yihowa biddishsha Israeelete kulanno. Israeelete mannira Yihowa insa massagate Muse horoonsiꞌranni noota leellishshannoti kaajja taje noonsa. w24.02 21 guf. 4-5